Wat Nao Iumi Savve Duim for God Hapi lo Worship blo Iumi?

Olsem leson 13 storyim, God no hapi lo evri religion. Bat iumi savve worshipim God followim wanfala wei wea hem hapi lo hem. Wat nao datfala “wei for worship,” or religion wea God hapi lo hem? (James 1:27) Bae iumi storyim wanem Bible talem.

1. Worship blo iumi shud followim wanem?

Worship blo iumi shud followim wanem Bible talem. Jesus sei lo God: “Toktok blo iu [hem] tru.” (John 17:17) Samfala religion no laek followim truth insaed Bible, wea hem toktok blo God. Olketa followim nomoa olketa teaching and kastom blo man. Bat Jehovah no hapi lo pipol wea “go raonem law” blo hem. (Readim Mark 7:9.) Iumi mekem God hapi taem worship blo iumi followim wanem Bible talem and iumi followim advaes insaed Bible.

2. Worshipim blo iumi for Jehovah shud hao?

Iumi shud worshipim Jehovah nomoa bikos hem nao Creator. (Revelation 4:11) Diswan minim iumi mas lovem and worshipim hem nomoa, and no iusim idol or image lo worship blo iumi.​—Readim Aesaea 42:8.

Worship blo iumi mas “holy” and wea Jehovah “hapi long hem.” (Rome 12:1) Diswan minim iumi mas obeyim law blo hem. Example nao, olketa wea lovem Jehovah tinghae lo law blo hem abaotem marit and followim. And olketa no duim samting wea savve spoelem man olsem for smokem tobacco, or tekem drug or alcohol lo rong wei.a

3. Why nao iumi shud meet tugeta witim olketa narawan wea worshipim Jehovah?

Lo olketa meeting wea kamap evri week, iumi garem chance for “preisim [Jehovah] . . . long ae blong olketa pipol hu i hipap fo wosipim hem.” (Sams 111:1, 2) Iumi savve duim diswan taem iumi singsing for praisem God. (Readim Sams 104:33.) Jehovah laekem iumi for go lo olketa meeting bikos hem lovem iumi and hem savve meeting bae helpem iumi for enjoyim laef for olowe. Lo olketa meeting hia, iumi savve encouragem narawan and kasem encouragement tu.

DIG GO MOA

4. Iumi shud no iusim idol lo worship blo iumi

VIDEO: Waswe, God Acceptim Wei for Iusim Image Io Worship? (3:26)

• Wat nao happen taem samfala pipol blo God lo bifor iusim idol lo worship blo olketa?

Samfala pipol iusim idol taem olketa worshipim God bikos datwan mekem olketa feel klos lo God. Iu tingse taem olketa duim olsem, bae God klos lo olketa? Readim Eksodas 20:4-6 and Sams 106:35, 36, then discussim tugeta olketa kwestin hia:

• Wat nao samfala idol or image wea iu lukim pipol iusim lo worship blo olketa?

• Hao nao tingting blo Jehovah taem pipol iusim image lo worship blo olketa?

• Iu tingse God hapi taem iumi iusim image lo worship blo iumi? Why nao olsem?

5. If iumi worshipim Jehovah nomoa iumi bae free from olketa biliv wea no stret

VIDEO: Truth Mekem Mi Free (5:16)

Readim Sams 91:14, then discussim tugeta disfala kwestin:

• Wat nao Jehovah promis for duim for iumi if iumi worshipim hem nomoa bikos iumi lovem hem?

6. Iumi worshipim God lo olketa meeting lo kongregeson

Iumi praisem Jehovah and encouragem each other taem iumi singsing and givim koment lo meeting. Readim Psalm 22:22 (NW), then discussim tugeta olketa kwestin hia:

• Hao, olketa koment wea iu herem lo meeting hem encouragem iu?

• Hao iu laek redyim wanfala koment for givim?

7. Jehovah hapi taem iumi storyim samting iumi lanem

Staka chance stap for iumi storyim truth lo Bible lo narawan. Readim Sams 9:1 and 34:1, then discussim tugeta kwestin hia:

• Wat nao wanfala samting wea iu lanem from Bible wea iu laek storyim lo eniwan?

MAIN POINT

Iumi mekem God hapi if iumi worshipim hem nomoa, praisem hem lo olketa meeting, and storyim samting iumi lanem.

Review

• Worship blo iumi shud followim wanem? Why nao olsem?

• Why nao iumi shud worshipim Jehovah nomoa?

• Why nao iumi shud meet tugeta for worshipim God witim olketa wea laek for mekem hem hapi?

FAENDAOT MOA

Lo datfala story “Mi No Slave Nao for Olketa Idol” read abaotem wanfala woman hem stop nao for worshipim idol.

“Bible Changem Laef Bilong Pipol” (The Watchtower, July 1, 2011)

Read abaotem samting wea savve helpem iu for givim koment lo meeting.

“Praisem Jehovah Insaed Kongregeson” (Wastaoa, January 2019)

Lukim hao wanfala young man kasem gud samting from olketa meeting nomata hem no isi for hem.

Jehovah Lukaftarem Mi (3:07)

Staka pipol sei cross hem symbol blo olketa Christian. Hao, iumi shud iusim lo worship blo iumi?

“Why Nao Olketa Jehovah’s Witness No Iusim Cross Long Worship Bilong Olketa?” (Article lo jw.org)