Smol Body, Big Heart
HEM bae olsem wanem for tok long olketa stranger abaotem Kingdom bilong God sapos iu 76 centimeter tol nomoa? Laura savve talem iu. Taem hem 33 year, tol bilong hem kasem 76 centimeter. Hem and sista bilong hem, María, wea hem 24 year and 86 centimeter tol, stap long Quito, Ecuador. Letem tufala minim olketa problem wea tufala feisim long Christian ministry bilong tufala.
“For go long territory bilong mifala for preach and for go long olketa Christian meeting, mifala wakabaot for samting olsem haf kilometer for kasem bas. Start from ples wea hem dropim mifala, mifala wakabaot for narafala haf kilometer for kasem mek-tu bas. Faevfala raf dog stap long disfala road. Mitufala fraet tumas long olketa dog bikos olketa luk olsem bigfala horse. Sapos hem fitim mitufala holem stik for raosem olketa, wea mitufala haedem long saed road bifor mifala kasem bas mekem mitufala savve iusim moa taem mifala wakabaot go hom.
“For go insaed bas hem no isi samting. Mitufala mas stand antap long wanfala hip graon for mekem hem moa isi for go insaed bas. Samfala draeva stop klosap long hip hia, bat olketa narawan nomoa. Long taem olsem, wan wea lelebet tol helpem narawan wea moa short for go insaed. For kasem mek-tu bas mifala need for akrosim wanfala busy road—wanfala barava hard samting for duim witim short leg bilong mitufala. Bikos mitufala smol long body, wanfala hevi basket for karem buk hem wanfala challenge tu. For mekem basket no hevi tumas, mitufala iusim poket-size Bible and no karem staka buk tumas.
“From taem wea mitufala pikinini, mifala savve shame tumas. Olketa neiba bilong mifala savve hao mitufala fraet tumas for tok long olketa stranger. So olketa sapraes tumas for lukim mitufala noknok long door bilong olketa, and olketa savve lisin long mifala. Bat long ples wea pipol no savve long mitufala, planti taem olketa lukluk nomoa long hao mitufala smol tumas; so olketa nating ting strong long message bilong mitufala. Nomata olsem, wei for feelim love bilong Jehovah hem givim mitufala strong for go ahed long preaching. Wei for ting raonem Proverbs 3:5, 6 tu strongim mitufala.”
Olsem Laura and María showimaot, wei for no givap nomata iumi garem olketa physical problem, savve givim glory long God. Aposol Paul hem prea for God aotem from hem “nila long body” bilong hem, maet hem wei for safa tumas. Bat God talem hem: “Kaeness bilong mi wea man no fitim hem inaf for iu; bikos paoa bilong mi kamap perfect long man wea wik.” Tru nao, hem no need for olketa problem long body for finis bifor iumi savve servem God. Wei for depend evribit long God savve helpem iumi for duim best bilong iumi long eni living. From Paul ting long “nila long body” bilong hem long disfala wei, hem savve sei olsem: “Taem mi wik, hem nao taem wea mi garem paoa.” (2 Corinthians 12:7, 9, 10) Samfala year bihaen Paul raet olsem: “Long evri samting mi kasem strong from dat wan wea givim paoa long mi.”—Philippians 4:13.
Long taem bilong iumi, God duim wanfala maeti waka thru long olketa man, woman, and olketa pikinini wea loyal evribit long hem. Planti long olketa garem problem long body long samfala wei. Nomata evriwan hope for God healim olketa anda long Kingdom bilong hem, olketa no weit for kamap free from problem bilong olketa bifor olketa trae for duim samting long service bilong hem.
Waswe, iu safa from samfala problem long body? Stand strong! Thru long faith iu savve kamap olsem Paul, Laura, and María. Abaotem olketa hia, wea olsem olketa faithful man and woman bilong faith bifor, iumi savve sei: “Nomata olketa wiki olketa kasem moa paoa.”—Hebrews 11:34.
[Piksa long page 8]
María
Laura
[Piksa long page 9]
María helpem Laura for go insaed bas
[Piksa long page 9]
“Mitufala fraet tumas long olketa dog bikos olketa luk olsem bigfala horse”
Long daon: Laura and María and olketa wea studyim Bible witim tufala