Lukaotem Jehovah Witim Wanfala Heart wea Redy
PRIEST bilong olketa long Israel, Ezra, hem man wea savve tumas for duim research, hem savveman, man for copyim, and hem teachim Law. For olketa Christian distaem hem wanfala gudfala example bilong wei for serve witim full soul. Hao nao olsem? Long wei wea hem keepim fasin for lovem God nomata taem hem stap long Babylon, wanfala taon wea fulap witim olketa giaman god and wei for worshipim demon.
Bat fasin for lovem God wea Ezra garem no kamap seleva. Hem waka hard for kasem. Tru tumas, hem talem iumi hao hem “redyim heart bilong hem for lukluk long law bilong Jehovah and for duim datwan.”—Ezra 7:10.
Olsem Ezra, pipol bilong Jehovah distaem want for duim evri samting wea Jehovah askem olketa for duim taem olketa stap insaed world wea againstim tru worship. So letem iumi lukluk gud long olketa wei wea iumi tu savve redyim heart bilong iumi, samting wea stap insaed long man—insaed diswan hem olketa tingting bilong iumi, olketa wei, olketa feeling, and olketa reason wea muvim iumi—for “lukluk long law bilong Jehovah and for duim datwan.”
Redyim Heart Bilong Iumi
“For redy” hem minim “for mek-redy firstaem for wanfala goal: for redy for iusim samting long wankaen wei, or wankaen fasin.” Bat, sapos iu kasem stretfala savve abaotem Word bilong God and dedicatem laef bilong iu long Jehovah, diswan pruvim heart bilong iu hem redy and iumi savve markem witim “gudfala graon” wea Jesus storyim insaed tokpiksa bilong hem abaotem man for plantim seed.—Matthew 13:18-23.
Nomata olsem, iumi need for lukluk gud long heart bilong iumi and klinim evritaem. Why nao olsem? From tufala reason. First wan, bikos olketa feeling wea savve spoelem man, olsem olketa rabis grass long garden savve kwiktaem garem rut, and hem barava tru long “olketa last day” distaem taem “air” bilong system bilong Satan hem fulap witim olketa nogud seed bilong tingting bilong body. (2 Timothy 3:1-5; Ephesians 2:2) Mek-tu reason hem abaotem datfala graon seleva. Graon savve kwiktaem drae, kamap hard, and kamap iusles taem man no lukaftarem. Or maet planti pipol tumas wakabaot antap long garden hia and purubutim graon gogo hem kamap hard. Hem semsem witim tokpiksa graon bilong heart bilong iumi. Hem savve kamap iusles sapos iumi no lukaftarem or sapos pipol wea no interest long spiritual saed bilong iumi purubut long hem.
So, hem barava important for iumi evriwan followim disfala kaonsel bilong Bible: “Winim eni samting wea iu mas gardim, gardim gud heart bilong iu, from olketa samting bilong laef kamaot from hem.”—Proverbs 4:23.
Olketa Wei for Mekem “Graon” Bilong Heart Bilong Iumi Kamap Moabeta
Letem iumi ting raonem samfala wei, or samfala fasin, wea bae helpem “graon” bilong heart bilong iumi kamap moabeta for samting grow long hem. Staka samting stap for mekem heart bilong iumi kamap moabeta, bat iumi bae ting raonem sixfala: wei for luksavve long spiritual need bilong iumi, hambol fasin, honest fasin, fasin for fraet long God, faith, and love.
Jesus sei: “Hapi nao olketa wea luksavve long spiritual need bilong olketa.” (Matthew 5:3) Olsem wei for hangre long physical wei hem talem iumi need for kaikai, wei for luksavve long spiritual need bilong iumi mekem iumi hangre for spiritual kaikai. Hem fasin bilong man for laekem tumas kaikai bikos hem mekem laef garem mining and purpose. Olketa hevi wea kam from system bilong Satan or fasin for les for study savve mekem mind slow for luksavve long disfala need. Nomata olsem, Jesus hem sei: “Man mas laef, no long bred nomoa, bat long evri toktok wea kamaot from mouth bilong Jehovah.”—Matthew 4:4.
Long really wei, for kaikai evritaem, long balance wei, and olketa gudfala kaikai bae helpem body for stap healthy, and mekem body getius for wantem moa kaikai. Hem semsem long spiritual wei. Iu bae no tingim iuseleva olsem man wea willing for study hard, bat sapos iu mekem kamap fasin bilong iu for readim Word bilong God evriday and iu studyim olketa Bible buk evritaem, iu bae wantem tumas olketa samting hia. Tru nao, iu bae luk forward long taem for studyim Bible. So no kwiktaem givap; waka hard for mekem grow wei for wantem spiritual samting.
Hambol Fasin Mekem Heart Soft
Hambol fasin hem wanfala important samting for garem mekem heart redy bikos hem mekem iumi willing for lane and helpem iumi for willing for acceptim loving kaonsel and wei for stretem iumi. Tingim example bilong King Josiah. Long taem wea hem rul olketa faendem wanfala raeting wea garem Law bilong God wea hem givim thru long Moses. Taem Josiah herem olketa toktok bilong Law and luksavve hao olketa laen dadi bilong hem go difren from klinfala worship, hem brekem kaleko bilong hem and krae front long Jehovah. Why nao Word bilong God barava tasim heart bilong disfala king? Disfala story sei heart bilong hem “soft,” so hem kamap hambol taem hem herem olketa toktok bilong Jehovah. Jehovah lukim hambol and willing heart bilong Josiah and blessim hem from datwan.—2 Kings 22:11, 18-20.
Hambol fasin helpem olketa disaepol bilong Jesus wea “no skul gud and man nating,” for minim and followim olketa spiritual truth wea olketa wea “wise and kleva” bat “long saed bilong body” nomoa fail for luksavve. (Acts 4:13; Luke 10:21; 1 Corinthians 1:26) Olketa hia no redy for acceptim toktok bilong Jehovah bikos heart bilong olketa kamap hard from praod fasin. Waswe, iumi sapraes hao Jehovah heitim praod fasin?—Proverbs 8:13; Daniel 5:20.
Honest Fasin and Fasin for Fraet Long God
Profet Jeremiah raetem hao “heart hem savve giamanim man winim eni nara samting and hem nating hol bak. Hu nao fit for savve long hem?” (Jeremiah 17:9) Disfala giaman wei savve showaot long planti difren wei, olsem taem iumi mekem olketa excuse for iumiseleva taem iumi rong. Hem showaot klia tu taem iumi ting smol long olketa bigfala wik point bilong iumi. Bat, honest fasin bae helpem iumi for winim wanfala heart wea giaman from hem helpem iumi for feisim tru samting abaotem iumiseleva mekem iumi kamap moabeta. Man wea raetem psalm showimaot diskaen honest fasin taem hem prea olsem: “Lukluk gud long mi, O Jehovah, and testim mi; klinim kidney bilong mi and heart bilong mi.” Hem klia, man wea raetem psalm hem redyim heart bilong hem for letem Jehovah klinim and testim hem, nomata diswan minim for talemaot olketa fasin wea no klin mekem hem winim olketa samting hia.—Psalm 17:3; 26:2.
Fasin for fraet long God, wea insaed diswan hem wei for “heitim nogud fasin,” hem barava strongfala help long wei for kamap klin. (Proverbs 8:13) Nomata hem tinghae long loving-kaeness and gudfala fasin bilong Jehovah, man wea really lovem Jehovah bae luksavve hao Jehovah hem garem paoa for givim panis, or for killim dae tu olketa wea no obeyim hem. Jehovah showimaot hao olketa wea fraet long hem savve obeyim hem tu taem hem sei olsem abaotem Israel: “Sapos olketa mekem grow nomoa insaed long heart bilong olketa wei for fraet long mi and for obeyim olketa komandment bilong mi evritaem, mekem olketa and olketa son bilong olketa savve kasem gudfala samting for olowe!”—Deuteronomy 5:29.
Hem tru, goal bilong fasin for lovem God hem, no for mekem iumi fraet for stap anda, bat for muvim iumi for obeyim loving Father bilong iumi, wea iumi savve hem barava interest long iumi. Tru nao, diskaen fasin for fraet long God hem barava nambawan and savve bringim hapi, wea Jesus Christ seleva showimaot.—Isaiah 11:3; Luke 12:5.
Wanfala Heart wea Redy Hem Rich Long Faith
Wanfala heart wea strong long faith luksavve hao nomata eni samting Jehovah askem or talem thru long Word bilong hem, hem stret evritaem and hem for helpem iumi. (Isaiah 48:17, 18) Man wea garem heart olsem bae satisfae taem hem followim encouragement long Proverbs 3:5, 6, wea sei olsem: “Trust long Jehovah witim full heart bilong iu and no depend long savve bilong iuseleva. Long evri wei bilong iu, lisin long hem, and hem bae stretem gogo bilong iu.” Bat, wanfala heart wea short long faith bae no willing for trust long Jehovah, hem barava tru sapos wei for mekem sakrifaes hem insaed diswan, olsem wei for garem simpol living mekem man fit for duim olketa samting bilong Kingdom. (Matthew 6:33) Dastawe, Jehovah ting long wanfala heart wea no garem faith olsem “wicked.”—Hebrews 3:12.
Iumi savve showimaot faith bilong iumi long Jehovah long planti wei, insaed diswan hem olketa samting bilong iumiseleva wea iumi duim long haos. Olsem example, tingim disfala principle long Galatians 6:7: “No giamanim iufala seleva: Iufala no savve trikim God. Eni samting man hem plantim, datwan nao bae hem harvestim tu.” Faith bilong iumi long disfala principle bae showaot long samting olsem olketa movie wea iumi lukim, olketa buk iumi readim, haomas taem iumi iusim for studyim Bible, and long olketa prea bilong iumi. Tru nao, strongfala faith wea muvim iumi for plant “saed long spirit” hem wanfala key for garem heart wea redy for acceptim Word bilong Jehovah and obeyim.—Galatians 6:8.
Love—Barava Nambawan Fasin
Winim evri nara fasin, love barava mekem graon bilong heart bilong iumi willing for obeyim Word bilong Jehovah. Dastawe, taem hem markem witim faith and hope, aposol Paul sei love nao “winim evriwan.” (1 Corinthians 13:13) Wanfala heart wea fulap witim love for God hem kasem barava wei for satisfae and hapi from wei for obeyim hem; hem nating lusim olketa mark bilong God. Aposol John hem sei: “Diswan nao mining bilong love bilong God, for iumi obeyim evri komandment bilong hem; and olketa komandment bilong hem no hevi.” (1 John 5:3) Followim semkaen tingting, Jesus sei: “Sapos eniwan lovem mi, hem bae obeyim toktok bilong mi, and Father bilong mi bae lovem hem.” (John 14:23) Lukim hao disfala love hem barava strong. Tru nao, Jehovah lovem tumas olketa wea love pullim olketa long hem.
Jehovah savve hao iumi no perfect and sin againstim hem planti taem. Nomata olsem, hem no keepim hemseleva farawe from iumi. Samting wea Jehovah luk for hem long olketa servant bilong hem nao hem “full heart,” wan wea muvim iumi for servem hem long willing wei witim “soul wea hapi.” (1 Chronicles 28:9) Bat Jehovah savve hao hem needim taem and hard waka for iumi mekem grow olketa gudfala fasin insaed heart bilong iumi for mekem iumi garem olketa frut bilong spirit. (Galatians 5:22, 23) Dastawe, hem patient witim iumi, “from hem savve gud hao hem wakem iumi, hem tingim hao iumi dust.” (Psalm 103:14) Jesus showimaot semkaen tingting, hem nating tok againstim olketa disaepol bilong hem from olketa mistek bilong olketa bat long patient wei hem helpem and encouragem olketa. Waswe, love, mercy, and patient fasin bilong Jehovah and Jesus no muvim iu for lovem tufala long bigfala wei?—Luke 7:47; 2 Peter 3:9.
Sapos samfala taem iu faendem hard for aotem olketa fasin olsem rabis grass wea grow deep insaed long iu or for pisisim olketa fasin wea olsem strongfala clay, no givap or wikdaon. Bat, go ahed for kamap moabeta taem iu “go ahed for prea,” witim wei for barava askem Jehovah for spirit bilong hem. (Romans 12:12) Witim willing help bilong hem, iu, olsem Ezra, bae win for redyim heart bilong iu evribit “for lukluk long law bilong Jehovah and for duim datwan.”
[Piksa long page 31]
Ezra keepim fasin for lovem God nomata hem stap long Babylon
[Piksa Credit Line long page 29]
Garo Nalbandian