Kwestin From Reader
Long Romans 12:19, waswe, aposol Paul minim olketa Christian mas no kros taem hem sei: “Iufala no trae for pei bak, iufala wea mi lovem, bat letem nomoa ples for kros”?
For tok stret, nomoa. Long hia aposol Paul hem minim kros bilong God. Bat, diswan no minim hem gud nomoa for olketa Christian kros. Bible kaonselem iumi for no kamap kros. Tingim olketa kaonsel hia wea kam from God.
“Let go long kros and lusim bigfala kros; no kamap hot tumas seknomoa iu duim nogud samting.” (Psalm 37:8) “Evriwan wea go ahed for kros long brata bilong hem mas givim ansa long kot bilong justice.” (Matthew 5:22) “Olketa waka bilong body showaot klia, and olketa nao fornication, fasin wea no klin, olabaot fasin, worshipim idol, spiritism, fasin for heit, faet, jealous fasin, fasin for kros.” (Galatians 5:19, 20) “Aotem evri nogud fasin for againstim man and kros and fasin for singaot and tokspoelem narawan from iufala witim evri wicked fasin.” (Ephesians 4:31) “Evri man mas kwiktaem for lisin, slow for toktok, slow for kros.” (James 1:19) And tu, buk bilong Proverbs evritaem kaonselem iumi for no garem fasin for kros long olketa smol samting and mistek bilong olketa man.—Proverbs 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Olketa verse wea stap raonem Romans 12:19 hem fitim kaonsel olsem. Paul talem for love bilong iumi mas no garem hypocrite fasin, for blessim olketa wea persecutim iumi, for tingim gud samting abaotem nara pipol, for no changem nogud samting witim nogud samting, and for mas trae hard for stap long peace witim evriwan. Then hem givim disfala encouragement: “Iufala no trae for pei bak, iufala wea mi lovem, bat letem nomoa ples for kros; from olketa raetem finis: ‘Fasin for pei bak hem bilong mi; mi nao bae pei bak, Jehovah hem sei.’”—Romans 12:9, 14, 16-19.
Tru nao, iumi mas no letem kros muvim iumi for pei bak. Savve bilong iumi abaotem olketa samting wea happen and justice tingting bilong iumi hem no perfect. Sapos iumi letem kros muvim iumi for pei bak, planti taem bae iumi duim rong samting. Datwan bae samting wea Enemy bilong God, Devil, nomoa hem wantem. Paul raet olsem tu: “Iufala savve kros, bat no sin; no letem sun go daon taem iufala kros yet, and no givim eni chance long Devil.”—Ephesians 4:26, 27.
Beta samting for duim, wise samting for duim, hem for letem God disaedem wanem taem and hu nao hem bae pei bak long hem. Hem fit for duim datwan bikos hem savve long evri samting, and eni panis wea hem givim bae followim perfect justice bilong hem. Iumi lukim hao diswan nao point bilong Paul long Romans 12:19 taem hem talem toktok wea kam from Deuteronomy 32:35, 41, wea sei tu: “Fasin for pei bak hem bilong mi, and panis.” (Markem Hebrews 10:30.) So, nomata disfala toktok “bilong God” hem no stap insaed Greek text, samfala man for transleit distaem putim insaed long Romans 12:19. Diswan mekem olketa transleitim olsem “letem God givim panis” (The Contemporary English Version); “givim ples for kros bilong God” (American Standard Version); “letem God panisim sapos hem laek” (The New Testament in Modern English); “leavim ples for panis bilong God.”—The New English Bible.
Nomata taem olketa enemy bilong truth tokspoelem or persecutim iumi, iumi savve showimaot trust long toktok bilong Moses abaotem Jehovah God: “Jehovah, Jehovah, God wea garem mercy and kaenfala fasin, slow for kros and garem bigfala loving-kaeness and truth, keepim loving-kaeness for olketa thousand, forgivim mistek and rong and sin, bat hem bae no letem man wea duim rong for missim panis.”—Exodus 34:6, 7.