“Stap Gud Witim Evri Man”
“Traem best bilong iufala for stap gud witim evri man.”—ROM. 12:18.
1, 2. (a) Wanem nao Jesus sei bae kasem olketa wea followim hem? (b) Wanem buk long Bible and chapter nao storyim wanem iumi shud duim taem pipol againstim iumi?
JESUS talem olketa wea followim hem hao pipol long world bae duim olketa nogud samting long olketa. Long naet bifor hem dae hem storyim why nao pipol bae duim olsem. Hem talem olketa aposol: “Sapos iufala olsem pipol long world, olketa bae laekem iufala. Bat mi chusim iufala and iufala no olsem pipol long world. Dastawe pipol long world heitim iufala.”—John 15:19.
2 Samting wea Jesus storyim hem kasem aposol Paul. Paul sei olsem long mek-tu leta wea hem raetem long Timothy: “Iu luksavve finis long wanem mi teachim, laef bilong mi, samting wea mi laek duim, faith wea mi garem, wei wea mi no givap kwiktaem, showimaot love, gohed strong, pipol spoelem mi, and mi safa.” Then Paul sei moa: “Tru tumas, pipol bae spoelem evriwan wea gohed for lovem God and wea followim Christ Jesus.” (2 Tim. 3:10-12) Long Romans chapter 12, Paul storyim wanem olketa Christian long Rome mas duim taem pipol againstim olketa. Toktok wea hem talem savve helpem iumi tu distaem.
“Duim Olketa Gudfala Samting”
3, 4. Long wanem wei nao iumi savve followim kaonsel long Romans 12:17 (a) sapos no evriwan long famili worshipim Jehovah? (b) taem nogud samting kasem pipol?
3 Readim Romans 12:17. Paul talem sapos man duim nogud samting long iumi, iumi mas no duim nogud samting go bak long hem. Hem important tumas for iumi followim kaonsel wea Paul talem sapos no evriwan long famili bilong iumi worshipim Jehovah. Hasband or waef wea insaed long truth bae no talem nogud toktok or duim nogud samting go bak long hasband or waef bilong hem. Man bae no kasem eni gud samting sapos hem ‘changem bak nogud samting long narawan.’ Sapos hem changem bak nogud samting, hem savve mekem problem worse go moa.
4 Bat Paul talem gudfala samting for iumi duim. Hem sei: “Evri man shud lukim [iumi] duim olketa gudfala samting.” Sapos hasband tok nogud long waef abaotem biliv bilong hem, bat waef hem kaen long hasband, datwan savve stopem raoa. (Prov. 31:12) Carlos, wea waka long wanfala Bethel, storyim wanem nao mami bilong hem duim taem dadi barava againstim mami. Hem kaen long dadi and keepim gud haos bilong olketa. Carlos hem sei: “Mami talem mifala pikinini for respectim dadi. Hem talem mi for mas pleim wanfala game witim dadi wea dadi laekem tumas nomata mi no savve laek pleim tumas. Dadi savve hapi taem mifala plei.” Gogo hem studyim Bible and hem baptaes. Long sem wei tu, taem Olketa Jehovah’s Witness “duim gudfala samting” for helpem pipol taem disaster kasem olketa, plande taem datwan mekem pipol wea no laekem iumi for changem tingting bilong olketa.
Putim “Olketa Sakol wea Hot Tumas” Long Hed
5, 6. (a) Wanem nao hem minim for putim “olketa sakol wea hot tumas” long hed bilong enemy? (b) Storyim eni experience wea showimaot gud samting savve happen taem man followim Romans 12:20.
5 Readim Romans 12:20. Taem Paul talem diswan, luk olsem hem tingim Proverbs 25:21, 22 wea sei: “Sapos man wea heitim iu hem hangre, givim kaikai long hem. Sapos hem dae for drink, givim wata long hem. Sapos iu duim olsem, iu putim olketa sakol wea hot tumas long hed bilong hem and Jehovah bae givim olketa gudfala samting long iu.” Taem iumi tingim wanem Paul talem long Romans chapter 12, tokpiksa sakol no minim for panisim man wea againstim iumi or for mekem hem shame. Bat luk olsem datfala proverb witim wanem Paul talem hem story abaotem wanem pipol long bifor duim for meltim gravol mekem iron kamaot. Charles Bridges, wanfala savveman long mek-19 century wea kam from England, hem sei: “No putim fire andanit nomoa long iron wea no savve bend bat putim olketa hot sakol antap long iron hia tu. Staka pipol wea againstim or heitim narawan savve changem tingting bilong olketa taem narawan showimaot love long olketa, isisi witim olketa, and no tingim olketa seleva.”
6 Long sem wei wea “olketa sakol wea hot tumas” savve meltim gravol mekem iron kamaot, man wea kaen long pipol wea againstim hem savve mekem olketa changem tingting bilong olketa and for no againstim pipol bilong God. Kaenfala wei bilong iumi savve mekem pipol garem gudfala tingting abaotem iumi and message from Bible wea iumi preachim long olketa. Aposol Peter sei: “Pipol long world tok spoelem iufala and olketa sei iufala nogud. So iufala mas gohed for showim gudfala wei mekem olketa savve lukim gud samting wea iufala duim. Diswan bae mekem olketa praisem God taem hem kam for judgem pipol.”—1 Pet. 2:12.
“Stap Gud Witim Evri Man”
7. Wanem nao mekem olketa disaepol stap gud, and datwan shud mekem iumi duim wanem?
7 Readim Romans 12:18. Long lastfala naet wea Jesus stap witim olketa aposol bilong hem, hem sei long olketa: “Iufala bae stap gud bihaen mi go. Samting mi talem long iufala nao mekem iufala for olsem.” (John 14:27) From olketa disaepol savve Jehovah God and Son bilong hem lovem olketa and hapi long olketa, datwan nao mekem olketa for stap gud and no wari. From iumi savve Jehovah and Jesus lovem iumi, datwan shud mekem iumi tu stap gud witim narawan. Olketa tru Christian no raoa bat stap gud witim narawan.—Matt. 5:9.
8. Wanem nao iumi savve duim mekem famili bilong iumi and kongregeson stap gud?
8 Wanfala samting wea iumi mas duim for mekem famili stap gud hem for kwiktaem stretem problem and no leavim datwan gogo problem hem big nao. (Prov. 15:18; Eph. 4:26) Iumi mas duim sem samting long kongregeson tu. Aposol Peter storyim hao man wea laek stap gud witim narawan mas no talem nogud samting. (1 Pet. 3:10, 11) Bihaen James storyim man mas tingting gud bifor hem talem samting, no jealous, and no raoa, hem sei: “Man wea garem wisdom wea kam from God savve garem olketa gudfala wei. Nambawan wei nao, hem mekem man no duim eni rabis samting. Nara samting tu, hem mekem man stap gud witim olketa narawan, no ova tumas, hapi for obey, sorre long pipol and duim olketa gudfala samting. Hem no favorim samfala pipol nomoa and no trae for laea long wei bilong hem. Pipol wea trae hard for stap gud witim narawan bae kasem gud samting from olketa gudfala wei bilong olketa.”—Jas. 3:17, 18.
9. Wanem nao iumi mas tingim taem iumi trae hard for “stap gud witim evri man”?
9 Wanem Paul talem long Romans 12:18 hem no for iumi stap gud nomoa witim olketa long famili and long kongregeson. Bat hem talem for iumi “stap gud witim evri man,” wea hem nao olketa neiba, pipol wea iumi waka witim, skul witim, and pipol wea iumi story witim long preaching waka. Bat aposol Paul talem nara samting tu. Hem sei: “Traem best bilong iufala.” Datwan minim iumi trae hard for “stap gud witim evri man,” bat hem no minim iumi bae duim samting wea God no laekem.
Jehovah Nao Bae Changem Bak
10, 11. Wanem nao hem minim for ‘weitim God nao for kros long pipol,’ and why nao datwan hem stret samting for iumi duim?
10 Readim Romans 12:19. Nomata sapos pipol “no laekem” preaching waka bilong iumi and message wea iumi talemaot and samfala pipol againstim iumi, iumi mas no “kros” long olketa and “raf” long olketa. (2 Tim. 2:23-25) Paul talem olketa Christian for no changem bak nogud samting long pipol, bat “weitim God nao for kros long olketa.” Iumi olketa Christian savve hem no stret for iumi changem bak nogud samting long pipol. Man wea raetem psalm hem sei: “Iu no barava kros fogud, nogud gogo iu laek duim nogud samting tu.” (Ps. 37:8) Solomon hem sei tu: “No tok olsem: ‘Mi bae changem bak rabis samting!’ Trustim Jehovah nomoa, and hem nao bae sevem iu.”—Prov. 20:22.
11 Sapos pipol spoelem iumi, best samting for iumi duim hem for weitim Jehovah nao for panisim olketa sapos hem tingse hem fitim for duim olsem. Paul tingim diswan taem hem sei: “Jehovah talem finis long Olketa Holy Raeting: ‘Mi nao bae changem bak nogud samting. Mi nao bae pei bak.’” (Markem witim Deuteronomy 32:35.) Sapos iumi trae for changem bak nogud samting, datwan showimaot iumi bighed and laek duim samting wea Jehovah nomoa fit for duim. Hem bae showimaot tu iumi no trustim Jehovah wea promis olsem: “Mi nao bae pei bak.”
12. Wanem taem nao bae Jehovah showimaot kros bilong hem, and long wanem wei nao bae hem duim datwan?
12 Long Romans chapter 1, Paul hem sei: “God hem showimaot kros bilong hem from heven long pipol wea no obeyim hem and wea no raeteous. Olketa duim olketa nogud samting for stopem pipol for no savve long samting wea tru.” (Rom. 1:18) Jehovah bae iusim Son bilong hem for showimaot kros bilong hem from heven long taem bilong “big trabol.” (Rev. 7:14) Datwan bae “barava showimaot wei bilong God for judgem pipol hem stret,” olsem Paul talem long nara leta bilong hem. Hem sei: “Diswan showimaot hem stret for God changem bak nogud samting long olketa wea mekem iufala safa. Bae hem finisim nogud samting wea kasem iufala and wea kasem mifala tu. Diswan bae happen taem Lord Jesus hem showaot from heven witim olketa strongfala angel bilong hem insaed wanfala big fire. Hem bae changem bak nogud samting long olketa wea no savve long God and olketa wea no obeyim gud nius abaotem Lord bilong iumi Jesus.”—2 Thess. 1:5-8.
Garem Gudfala Wei Mekem Iu Winim Nogud Wei
13, 14. (a) Why nao iumi no sapraes taem pipol againstim iumi? (b) Wanem nao iumi mas duim taem pipol spoelem iumi?
13 Readim Romans 12:14, 21. From iumi savve Jehovah bae mekem evri plan bilong hem kamap tru, iumi savve gohed strong for preachim “gud nius abaotem kingdom long evri ples long world.” (Matt. 24:14) Iumi savve olketa enemy bilong iumi bae kros tumas long iumi taem iumi disfala waka bikos Jesus hem sei: “Long evri kantri bae [pipol] heitim iufala bikos iufala olketa disaepol bilong mi.” (Matt. 24:9) Dastawe taem pipol againstim iumi, iumi no sapraes or wikdaon. Aposol Peter hem sei: “Olketa fren, long distaem iufala safa long olketa samting wea hem testim iufala. Nogud iufala sapraes tumas long diswan and iufala tingim diswan hem mas no kasem iufala olsem. Nomoa. Bat hem gud for iufala mas hapi nomoa, from iufala safa long wei wea Christ tu hem safa long hem.”—1 Pet. 4:12, 13.
14 Iumi no heitim pipol wea spoelem iumi, bat iumi trae for teachim olketa bikos iumi luksavve samfala no minim samting wea olketa duim. (2 Cor. 4:4) Iumi trae hard for followim wanem Paul talem. Hem sei: “Askem God for duim gud samting long pipol wea spoelem iufala. Iufala mas prea for olketa and no tok spoelem olketa.” (Rom. 12:14) Taem Jesus givim Sermon Long Maunten, hem sei: “Gohed lovem olketa enemy bilong iufala, and for duim gud samting long olketa wea heitim iufala. Askem God for duim olketa gud samting long olketa wea laekem iufala for kasem nogud samting, and prea for olketa wea tok spoelem iufala.” (Luke 6:27, 28) Aposol Paul savve finis man wea duim nogud samting savve changem wei bilong hem and kamap faithful disaepol bilong Christ wea strong for worshipim Jehovah. (Gal. 1:13-16, 23) Long nara leta, Paul hem sei: “Taem pipol tok nogud long mifala, mifala askem God for duim gud samting long olketa. Taem olketa spoelem mifala, mifala gohed strong nomoa. Taem olketa tok spoelem mifala, mifala talem nomoa olketa gudfala samting long olketa.”—1 Cor. 4:12, 13.
15. Wanem nao nambawan samting wea iumi savve duim for winim nogud samting?
15 Olketa tru Christian followim tu wanem last verse long Romans chapter 12 talem. Hem sei: “No letem olketa nogud wei for winim iufala, bat garem gudfala wei mekem iufala winim evri nogud wei.” Satan nao startim evri rabis wei. (John 8:44; 1 John 5:19) Long vision wea Jesus showim long aposol John, John lukim olketa anointed brata bilong Jesus “winim [Satan] finis bikos long paoa bilong blood bilong Pikinini Sheepsheep and long paoa bilong message wea olketa talemaot.” (Rev. 12:11) So nambawan samting wea iumi savve duim for winim Satan and olketa nogud wei bilong hem, hem for duim gudfala samting. Hem nao for preachim gud nius abaotem Kingdom.
Iumi Hapi Long Hope wea Iumi Garem
16, 17. Wanem nao iumi lanem long Romans chapter 12 abaotem (a) wanem iumi shud duim long laef bilong iumi? (b) wanem iumi shud duim long kongregeson? (c) wanem iumi shud duim long pipol wea againstim iumi?
16 Iumi lanem staka samting from Romans chapter 12. Iumi wea dedicate finis long Jehovah mas willing for sakrifaesim samfala samting. Holy spirit bilong God mekem iumi hapi for givim olketa sakrifaes bikos iumi luksavve hem nao wanem God laekem iumi for duim. Laef bilong iumi showimaot holy spirit hem strongim iumi and iumi iusim savve wea iumi garem long gudfala wei. Iumi hambol and waka hard mekem evriwan long kongregeson garem wan mind. Iumi welkamim pipol and duim samting wea showimaot iumi luksavve long feeling bilong narawan.
17 Romans chapter 12 storyim staka samting tu wea iumi mas duim taem pipol againstim iumi. Iumi mas no duim nogud samting go bak long pipol, bat trae hard for kaen long olketa. Iumi bae trae hard for stap gud witim evri man, bat hem no minim iumi bae duim samting wea God no laekem. Iumi bae waka hard for stap gud witim olketa long famili, long kongregeson, olketa neiba, pipol wea iumi waka witim, skul witim, and olketa wea iumi story witim long preaching waka. Nomata sapos man duim nogud samting long iumi, iumi trae hard for duim gudfala samting long olketa and tingim evritaem Jehovah nao bae changem bak nogud samting long pipol wea spoelem iumi.
18. Wanem nao thrifala samting wea Paul talem long Romans 12:12 wea hem gud for iumi duim?
18 Readim Romans 12:12. Iumi storyim staka samting finis, bat Paul talem nara thrifala samting wea iumi mas duim. Sapos Jehovah no helpem iumi, iumi bae no fit for duim evri samting hia, dastawe aposol Paul sei iumi mas “gohed for prea.” Sapos olsem, iumi bae fit for duim nara samting wea hem talem, hem nao for “gohed strong taem [iumi] kasem trabol.” Lastfala samting, iumi mas tingim evritaem wanem Jehovah promisim long iumi and “hapi long hope wea [iumi] garem” for laef olowe long heven or long earth.
Review
• Wanem nao iumi shud duim taem pipol againstim iumi?
• Iumi mas waka hard for stap gud witim hu, and long wanem wei nao iumi savve duim datwan?
• Why nao iumi mas no duim nogud samting go bak long narawan?
[Piksa long page 8]
Taem iumi helpem olketa neiba, diswan savve mekem olketa changem tingting bilong olketa abaotem iumi
[Piksa long page 9]
Waswe, iu waka hard for stap gud witim evriwan long kongregeson?