Olketa wea Faet Againstim God Bae No Win!

“Olketa bae faet againstim iu, bat olketa bae no winim iu.”—JEREMIAH 1:19.

1. Wanem waka nao Jeremiah kasem, and hao long nao hem duim waka bilong hem?

JEHOVAH appointim young Jeremiah for kamap wanfala profet long olketa nation. (Jeremiah 1:5) Diswan hem long taem wea gudfala King Josiah rulim Judah. Jeremiah duim ministry bilong hem olsem profet insaed olketa nogud year bifor Babylon tekovarem Jerusalem and tekem pipol bilong God olsem prisoner.—Jeremiah 1:1-3.

2. Hao nao Jehovah strongim Jeremiah, and wei for faet againstim datfala profet hem minim wanem?

² Olketa message bilong judgment wea Jeremiah mas talemaot bae mekem pipol againstim hem. Dastawe, God strongim hem for samting wea stap front long hem. (Jeremiah 1:8-10) Olsem example, spirit bilong profet hia kasem strong from disfala toktok: “Olketa bae faet againstim iu, bat olketa bae no winim iu, from ‘mi stap witim iu,’ Jehovah hem sei, ‘for sevem iu.’” (Jeremiah 1:19) For faet againstim Jeremiah hem minim for faet againstim God. Distaem, Jehovah garem wanfala sekson bilong olketa servant wea olsem profet, wea waka bilong olketa klosap olsem wanem Jeremiah duim. Olsem hem, olketa no fraet for talemaot profesi toktok bilong God. And disfala message affectim evri man and nation for gud samting or nogud samting, wea depend long hao hem herem and followim message hia. Olsem long taem bilong Jeremiah, samfala distaem faet againstim God long wei for againstim olketa servant bilong hem and waka wea Hem givim long olketa.

Olketa Servant Bilong Jehovah Kasem Attak

3. Why nao olketa servant bilong Jehovah kasem attak?

³ Pipol bilong Jehovah kasem attak from start bilong mek-20 century kam kasem distaem. Long planti kantri, olketa man wea garem wicked plan lukaotem wei for spoelem—tru nao, for stopem—waka for talemaot gud nius abaotem Kingdom bilong God. Dat wan wea bihaenem olketa nao hem main Enemy bilong iumi, datfala Devil, wea “wakabaot olsem wanfala lion wea singaot strong, and lukaotem samwan for kaikaim.” (1 Peter 5:8) Bihaen “taem bilong olketa nation wea set finis” hem end long 1914, God putim Son bilong hem olsem niu King bilong earth, and givim hem disfala komand: “Go ahed for rul midolwan long olketa enemy bilong iu.” (Luke 21:24; Psalm 110:2) Christ go ahed for iusim paoa bilong hem and aotem Satan from heven and forcem hem for stap klosap long earth. From Devil savve taem bilong hem short, hem sutim kros bilong hem long olketa anointed Christian and olketa wea fren witim olketa. (Revelation 12:9, 17) Wanem nao kamaot from planti attak bilong olketa hia wea faet againstim God?

4. Wanem kaen test nao pipol bilong Jehovah feisim long taem bilong World War I, bat wanem nao happen long 1919 and 1922?

⁴ Olketa anointed servant bilong Jehovah feisim planti test long faith bilong olketa long World War I. Pipol mekfani and tokspoelem olketa, ronem olketa, and whipim olketa. Olsem Jesus talem finis, ‘evri nation heitim’ olketa. (Matthew 24:9) Taem strongfala feeling abaotem war go ahed, olketa enemy bilong Kingdom bilong God iusim wanfala plan wea pipol iusim finis againstim Jesus Christ. Olketa laea for sei pipol bilong Jehovah againstim gavman, and olketa attakim barava main part bilong organization bilong God long earth. Long May 1918, olketa arrestim president bilong Watch Tower Society, J. F. Rutherford, and sevenfala wea waka klos witim hem. Eitfala man hia kasem bigfala prison sentence and mas go long gavman prison long Atlanta, Georgia, U.S.A. Naen month bihaen olketa kamap free. Long May 1919 circuit kot bilong appeal givim disison hao olketa man hia no kasem stretfala trial, and olketa aotem datfala judgment. Disfala case redy for go long kot moa, bat bihaen, gavman stopem kot case, and Brata Rutherford and olketa fren bilong hem kamap free evribit from eni blame. Olketa go ahed witim waka bilong olketa, and samfala convention wea kamap long Cedar Point, Ohio, long 1919 and long 1922 mekem Kingdom-preaching waka muv ahed moa.

5. Wanem nao kasem Olketa Jehovah’s Witness long Nazi Germany?

⁵ Samfala gavman wea rul long raf wei kamap long olketa year bilong 1930, and Germany, Italy, and Japan kaban tugeta. Long olketa firstfala year, nogud persecution kamap againstim pipol bilong God, main wan nao long Nazi Germany. Gavman putim olketa tambu. Olketa lukluk insaed long olketa haos, and arrestim pipol wea stap insaed. Olketa putim planti thousand long concentration camp bikos olketa nating willing for lusim faith bilong olketa. Goal bilong disfala faet againstim God and pipol bilong hem, hem for distroem Olketa Jehovah’s Witness long area wea datfala raf gavman rulim.a Taem olketa Witness go long kot long Germany for trae kasem freedom bilong olketa, Ministry Bilong Justice long Germany preparem wanfala longfala report for mek sure olketa bae no win. Hem sei: “Olketa kot mas no fail just bikos hem luk olsem hem hard for iusim law; bat olketa mas trae hard and lukaotem wei nomata hem no isi, for fulfillim haefala waka bilong olketa.” Diswan minim justice bae no savve kamap. Olketa Nazi tingse waka bilong Olketa Jehovah’s Witness hem bae spoelem and againstim olketa, and ‘spoelem faondeson bilong nation.’

6. Wanem nao olketa duim for trae stopem waka bilong iumi long World War II and bihaen datwan?

⁶ Long World War II, gavman putim olketa law and tambu long pipol bilong God long Australia, Canada, and narafala kantri wea saed witim Commonwealth Bilong Britain—long Africa, Asia, and olketa island bilong Caribbean and Pacific. Long United States, olketa strongfala enemy and pipol wea herem rongfala information “iusim law for mek trabol.” (Psalm 94:20) Bat olketa go long kot for faet againstim wei for salutim flag and for stopem haos-tu-haos preaching, and planti gudfala disison long kot long United States help for saportim freedom bilong worship. From help bilong Jehovah, waka bilong enemy nating win. Taem war hem finis long Europe, gavman aotem olketa tambu. Planti thousand Witness wea stap long olketa concentration camp kamap free, bat faet hem no finis yet. Kwiktaem bihaen World War II, datfala Cold War hem start. Olketa kantri long Eastern Europe putim moa hevi long pipol bilong Jehovah. Olketa iusim law for spoelem and stopem witnessing waka bilong iumi, stopem olketa Bible literature, stopem olketa pablik assembly. Planti go long prison or long olketa labor camp.

Go Ahed Long Preaching Waka!

7. Wanem nao kasem Olketa Jehovah’s Witness long Poland, Russia, and samfala nara kantri long olketa year wea just go pas?

⁷ Taem olketa year go pas, Kingdom-preaching waka hem start for muv ahed moa. Poland, nomata hem stap anda long Communist rul, letem olketa Witness for garem samfala wan-day convention long 1982. Olketa international convention kamap long there long 1985. Olketa bigfala international convention kamap long 1989, wea planti thousand wea hipap kam from Russia and Ukraine. Long datfala year Hungary and Poland registerim Olketa Jehovah’s Witness. Long end bilong 1989, Berlin Wall hem kam daon. Tu-thri month bihaen, East Germany registerim iumi, and no longtaem bihaen, wanfala international convention kamap long Berlin. Start long 1990, olketa trae hard for visitim olketa brata long Russia. Olketa go lukim samfala bigman long Moscow, and long 1991, gavman registerim Olketa Jehovah’s Witness. Start long datfala taem, waka hem grow big tumas long Russia and long olketa province wea part bilong Soviet Union bifor.

8. Wanem nao happen long pipol bilong Jehovah long 45 year bihaen World War II hem finis?

⁸ Persecution hem katdaon long samfala ples, bat long narafala ples hem kamap moa big. Long 45 year bihaen mek-tu world war hem finis, planti kantri nating willing for registerim Olketa Jehovah’s Witness. And tu, olketa tambuim iumi or waka bilong iumi long 23 kantri long Africa, 9-fala long Asia, 8-fala long Europe, 3-fala long Latin America, and 4-fala long samfala island nation.

9. Wanem nao kasem olketa servant bilong Jehovah long Malawi?

⁹ Olketa Jehovah’s Witness long Malawi kasem raf persecution start long 1967. From olketa no teksaed olsem trufala Christian, olketa brata bilong iumi long there nating willing for baem card wea saportim politik. (John 17:16) Bihaen long wanfala meeting bilong Malawi Congress Party long 1972, raf fasin kamap moa. Pipol ronem olketa brata from haos bilong olketa and no letem olketa for waka. Planti thousand lusim kantri mekem olketa no dae. Bat waswe, olketa wea faet againstim God and pipol bilong hem olketa win? Barava nomoa nao! Bihaen planti samting hem change, Malawi reportim peak bilong 43,767 Kingdom pablisa long 1999, and winim 120,000 attendim olketa distrik convention long there. Distaem olketa wakem finis wanfala niu branch office long kapitol taon.

Olketa Lukaotem Excuse

10. Olsem hem happen long Daniel, wanem nao olketa wea againstim pipol bilong God long distaem duim?

¹⁰ Olketa apostate, bigman long religion, and samfala moa no laek for herem message bilong iumi from Word bilong God. From samfala religion bilong Christendom forcem olketa, olketa wea againstim iumi trae for faendem wanfala wei, wea olketa sei hem fitim law, for mekem wei for faet againstim iumi luk olsem hem stret. Wanem kaen plan nao olketa iusim samfala taem? Tingim, wanem nao olketa nogud man duim for attakim profet Daniel? Long Daniel 6:4, 5, iumi read: “Olketa bigman long gavman and olketa satrap trae hard for faendem rong againstim Daniel long saed bilong kingdom; bat olketa no faendem eni rong or nogud samting, bikos hem man wea pipol trustim and no eniwan faendem hem olsem man wea slak or duim nogud samting. So olketa strongfala man hia sei olsem: ‘Iumi bae no faendem eni rong againstim Daniel, bat iumi mas faendem samting againstim hem insaed long law bilong God bilong hem.’” Long sem wei distaem, olketa wea againstim iumi trae for faendem wanfala excuse. Olketa komplen tumas abaotem “olketa danger cult” and trae for iusim disfala nem long Olketa Jehovah’s Witness. Thru long kleva and giaman toktok, and wei for laea, olketa attakim worship bilong iumi and wei wea iumi followim olketa principle bilong God.

11. Wanem laea toktok nao samfala wea againstim Olketa Jehovah’s Witness talem?

¹¹ Long samfala kantri, olketa sekson bilong religion and politik no willing for luksavve iumi followim “worship wea klin and no dirty front long God.” (James 1:27) Nomata Christian waka bilong iumi go ahed long 234 kantri distaem, olketa wea againstim iumi sei iumi no wanfala “religion wea pipol savve long hem.” No longtaem bifor wanfala international convention kamap long 1998, wanfala niuspepa long Athens talem hao olketa bigman bilong Greek Orthodox church sei “[Olketa Jehovah’s Witness] no wanfala ‘religion wea pipol savve long hem,’” nomata European Court of Human Rights givim difren judgment. Tu-thri day bihaen, narafala niuspepa long sem taon talem toktok bilong wanfala man long church, wea sei: “[Olketa Jehovah’s Witness] no fit for olsem ‘wanfala Christian kongregeson,’ bikos olketa nating semsem witim Christian faith wea showaot long Jesus Christ.” Diswan barava mekem iumi sapraes, from no eni nara grup bilong religion mekhae long wei for followim Jesus olsem Olketa Jehovah’s Witness!

12. Long disfala spiritual faet bilong iumi, wanem nao iumi mas duim?

¹² Iumi lukaotem wei for defendim and pruvim gud nius thru long law. (Philippians 1:7) Bat, iumi bae no lusim or daonem wei wea iumi strong for followim olketa mark bilong God saed long raeteous fasin. (Titus 2:10, 12) Olsem Jeremiah, iumi ‘taetem kaleko and talem evriting wea Jehovah komandim iumi,’ no letem olketa wea faet againstim God for mekem iumi fraet tumas. (Jeremiah 1:17, 18) Holy Word bilong Jehovah markem klia stretfala road for iumi followim. No enitaem iumi want for depend long wik “arm bilong man” or lukaotem “ples for haed long shadow bilong Egypt,” hem nao, disfala world. (2 Chronicles 32:8; Isaiah 30:3; 31:1-3) Long disfala spiritual faet, iumi mas go ahed for trust long Jehovah witim full heart, letem hem leadim gogo bilong iumi, and no depend long savve bilong iumiseleva. (Proverbs 3:5-7) Sapos Jehovah no saportim iumi and hemseleva no gardim iumi, evri waka bilong iumi bae “iusles nomoa.”—Psalm 127:1.

Kasem Persecution bat No Brekem Faith

13. Why nao iumi savve sei datfala attak from Satan againstim Jesus hem fail?

¹³ Main example bilong wei for no brekem faith long Jehovah hem Jesus, wea pipol laea and accusim wei for againstim and spoelem gavman long hem. Bihaen Pilate lukluk gud long case bilong Jesus, hem willing for letem Jesus go free. Bat pipol wea olketa bigman bilong religion bihaenem olketa singaot for killim dae Jesus, nomata hem no guilty. For changem Jesus, olketa laekem Barabbas for kamap free—wanfala man wea stap long prison from hem againstim gavman and killim man dae! Pilate traem moa for changem tingting bilong olketa wea againstim Jesus, bat gogo hem givap and lisin long singaot and tingting bilong olketa. (Luke 23:2, 5, 14, 18-25) Nomata Jesus dae long wanfala post, datfala barava nogud attak from Satan againstim Son bilong God wea no guilty hem fail evribit, bikos Jehovah resurrectim Jesus and givim hem glory long raet saed bilong Hemseleva. And long day bilong Pentecost 33 C.E., thru long Jesus wea kasem glory, olketa disaepol kasem holy spirit, wea startim Christian kongregeson—“wanfala niufala creation.”—2 Corinthians 5:17; Acts 2:1-4.

14. Wanem nao happen taem olketa bilong Jew religion duim samting againstim olketa follower bilong Jesus?

¹⁴ No longtaem bihaen, sekson bilong religion trae for mekem olketa aposol fraet bat olketa follower bilong Christ hia go ahed nomoa for talemaot olketa samting wea olketa lukim and herem. Olketa disaepol bilong Jesus prea olsem: “Jehovah, herem strongfala toktok bilong olketa, and letem olketa slave bilong iu go ahed for talem word bilong iu and no fraet.” (Acts 4:29) Jehovah ansarem prea bilong olketa taem hem givim holy spirit long olketa and strongim olketa for go ahed for talemaot and no fraet. No longtaem bihaen, olketa aposol kasem order for no preach moa, bat Peter and olketa nara aposol ansa olsem: “Mifala mas obeyim God olsem ruler and no olketa man.” (Acts 5:29) Nomata pipol warnim, arrestim, and whipim olketa, diswan nating stopem olketa for mekem Kingdom waka kamap moa big.

15. Hu nao Gamaliel, and wanem advaes nao hem givim long olketa bilong religion wea againstim olketa follower bilong Jesus?

¹⁵ Wanem nao olketa bigman bilong religion duim? “Olketa barava feel nogud and laek killim [olketa aposol] dae.” Bat, wanfala teacher bilong Law wea nem bilong hem Gamaliel, wanfala Pharisee, hem stap, and evri pipol barava tinghae long hem. Taem hem putim olketa aposol aotsaed long Sanhedrin hall for lelebet taem, hem talem olketa hia bilong religion wea againstim olketa: “Olketa man bilong Israel, lukluk gud long iufala seleva long wanem iufala laek duim long olketa man hia. . . . Mi sei long iufala, No duim eni samting long olketa man hia, bat leavim olketa; (bikos, sapos disfala plan or waka hem from olketa man, bae hem finis; bat sapos hem from God, iufala bae no fit for finisim olketa;) nogud maet iufala kamap pipol wea faet againstim God.”—Acts 5:33-39.

Eni Samting for Faet Againstim Iumi Bae No Win

16. Long toktok bilong iuseleva, hao nao bae iu storyim promis wea Jehovah givim long pipol bilong hem?

¹⁶ Advaes bilong Gamaliel hem gud, and iumi tinghae long pipol wea toktok gud for saed bilong iumi. Iumi luksavve tu hao freedom bilong worship hem kamap from olketa disison long kot from olketa judge wea no teksaed. Nomata olsem, wei wea iumi followim Word bilong God hem mekem olketa bigman long Christendom and olketa nara bigman bilong Bigfala Babylon, world rul bilong giaman religion, no hapi. (Revelation 18:1-3) Nomata olketa and pipol wea lisin long olketa faet againstim iumi, iumi garem disfala promis: “‘Eni samting for faet againstim iu bae no win, and eni toktok wea bae kam againstim iu long datfala judgment bae iu daonem. Diswan hem samting wea olketa servant bilong Jehovah bae garem, and raeteous fasin bilong olketa hem kam from mi,’ hem nao toktok bilong Jehovah.”—Isaiah 54:17.

17. Nomata pipol faet againstim iumi, why nao iumi no fraet?

¹⁷ Olketa enemy bilong iumi faet againstim iumi nomata no eni reason stap, bat iumi no wikdaon. (Psalm 109:1-3) Bae iumi nating letem olketa wea heitim Bible message bilong iumi for mekem iumi fraet and brekem faith. Nomata iumi expectim spiritual faet bilong iumi bae kamap moa big, iumi savve finis wanem bae happen. Olsem Jeremiah, iumi bae lukim disfala profesi toktok fulfill: “Olketa bae faet againstim iu, bat olketa bae no winim iu, from ‘mi stap witim iu,’ Jehovah hem sei, ‘for sevem iu.’” (Jeremiah 1:19) Yes, iumi savve olketa wea faet againstim God bae no win!

[Footnote]

Hao Nao Bae Iu Ansa?

• Why nao olketa servant bilong Jehovah kasem attak?

• Long olketa wanem wei nao pipol faet againstim pipol bilong Jehovah?

• Why nao iumi savve sure olketa wea faet againstim God bae no win?

[Piksa long page 17]

Jeremiah hem sure Jehovah bae stap witim hem

[Piksa long page 18]

Olketa wea laef taem concentration camp finis

[Piksa long page 18]

Raf sekson againstim Olketa Jehovah’s Witness

[Piksa long page 18]

J. F. Rutherford and olketa wea waka witim hem

[Piksa long page 21]

Long taem bilong Jesus, olketa wea faet againstim God nating win