Word Bilong Jehovah Hem Laef
Olketa Main Point From Buk Bilong Jeremiah
OLKETA nogud samting wea Jeremiah talemaot hem masbi mekem pipol bilong hem barava seke fogud! Datfala nambawan temple wea olketa iusim winim thri handred year finis olsem main ples for worship bae olketa bonem long fire. Datfala taon long Jerusalem and land long Judah bae distroe and bae emti bikos pipol wea stap long there bae kamap prisoner. Olketa message hia and olketa nara judgment message hem stap insaed buk bilong Jeremiah. Long evri buk insaed long full Bible, only buk bilong Psalms nomoa hem big winim buk bilong Jeremiah. Disfala buk hem storyim tu olketa samting wea happen long Jeremiah insaed 67 year wea hem wanfala faithful profet. Jeremiah raetem evri samting wea stap insaed disfala buk, no followim taem wea olketa samting happen, bat followim olketa subject.
Why nao iumi shud interest long Bible buk bilong Jeremiah? Olketa profesi wea fulfill finis insaed disfala buk strongim faith bilong iumi hao Jehovah evritaem fulfillim olketa promis bilong hem. (Isaiah 55:10, 11) Waka wea Jeremiah duim olsem wanfala profet and tingting bilong pipol abaotem datfala message wea hem talemaot, hem semsem witim samting wea happen long taem bilong iumi. (1 Corinthians 10:11) And tu, wei wea Jehovah deal witim pipol bilong hem showimaot olketa fasin bilong hem and datwan shud barava muvim iumi.—Hebrews 4:12.
“PIPOL BILONG MI DUIM TUFALA NOGUD SAMTING”
Long 40 year bifor Jerusalem hem distroe long 607 B.C.E, long mek-13 year long rul bilong Josiah, wea hem king long Judah, Jeremiah hem kamap wanfala profet. (Jeremiah 1:1, 2) Olketa message wea hem talemaot insaed long lastfala 18 year long rul bilong Josiah hem showimaot klia nogud fasin bilong pipol long Judah and Jeremiah talemaot judgment bilong Jehovah againstim datfala nation. Jehovah hem talemaot olsem: “Mi bae mekem Jerusalem olsem big hip bilong olketa ston, and olketa taon long Judah mi bae mekem hem kamap hip rabis, and no eniwan bae stap long there.” (Jeremiah 9:11) Why nao olsem? Hem sei: “From pipol bilong mi duim tufala nogud samting.”—Jeremiah 2:13.
Datfala message hem storyim tu hao wanfala smol sekson wea repent olketa bae kamap gud moa. (Jeremiah 3:14-18; 12:14, 15; 16:14-21) Bat, pipol no hapi long Jeremiah, bikos hem man for talemaot datfala message. “Chief wea lead long haos bilong Jehovah” hitim Jeremiah and putim hem insaed olketa stock for full naet.—Jeremiah 20:1-3.
Ansa for Olketa Bible Kwestin:
1:11, 12—Why nao Jehovah hem gohed for wekap saed long toktok bilong hem abaotem “wanfala branch bilong almond tree”? Almond tree hem “wanfala long olketa firstfala tree wea savve garem flaoa long taem bilong spring season.” (Verse 11, footnote) Long tokpiksa wei hem olsem Jehovah hem gohed for “wekap early and sendem [olketa profet bilong hem]” for warnim pipol bilong hem abaotem judgment bilong hem and hem “gohed for wekap” go kasem taem evri samting hia hem fulfill.—Jeremiah 7:25.
2:10, 11—Wanem nao mekem samting wea olketa Israelite wea no faithful duim hem barava difren tumas? Olketa heathen nation wea stap long west and east olsem Kittim and Kedar maet tekem kam olketa nara god from olketa difren kantri for worshipim witim olketa god bilong olketa, bat no eni raeting stap wea showimaot olketa barava lusim olketa god bilong olketa. Bat for olketa Israelite olketa lusim Jehovah, and winim wei for givim glory long God wea laef, olketa givim glory long olketa god wea no laef.
3:11-22; 11:10-12, 17—Why nao Jeremiah talemaot toktok againstim ten-tribe kingdom bilong north tu nomata Samaria distroe finis long 740 B.C.E.? Diswan hem bikos wei wea Jehovah distroem Jerusalem long 607 B.C.E. datwan hem judgment bilong hem for full nation bilong Israel, no for Judah nomoa. (Ezekiel 9:9, 10) And tu, nomata bihaen datfala ten-tribe kingdom hem distroe finis pipol still tingim hao Jerusalem hem stand for datfala ten-tribe kingdom tu, from message wea olketa profet bilong God talemaot hem for olketa Israelite.
4:3, 4—Wanem nao disfala komand hem minim? Olketa Jew wea no faithful need for kamap hambol, and redyim and klinim heart bilong olketa. Olketa need for “circumcisem” heart bilong olketa, wea minim olketa mas aotem olketa nogud tingting, feeling, and samting wea muvim man for duim samting wea no stret. (Jeremiah 9:25, 26; Acts 7:51) Diswan minim man mas changem wei bilong hemseleva, long wei for finis for duim samting wea nogud and for duim samting wea God hem hapi long hem.
4:10; 15:18—Long wanem wei nao Jehovah trikim pipol bilong hem? Long taem bilong Jeremiah olketa nara profet stap wea ‘talem olketa profesi wea no tru.’ (Jeremiah 5:31; 20:6; 23:16, 17, 25-28, 32) Jehovah no stopem olketa for talemaot message bilong olketa wea no tru.
16:16—Luk olsem taem Jehovah “askem plande man for fishing” and “plande man for hunt” for kam, wanem nao datwan minim? Datwan maet minim wei wea Jehovah letem army bilong olketa enemy for lukaotem olketa Jew wea no faithful, and hem iusim olketa for fulfillim judgment bilong hem. Nomata olsem, for fitim samting wea Jeremiah 16:15 talem, maet diswan savve minim tu wei for lukaotem olketa Israelite wea repent.
20:7—Long wanem wei nao Jehovah trikim and “iusim strong” bilong hem againstim Jeremiah? From pipol no interest, and olketa rejectim and persecutim Jeremiah taem hem talemaot judgment bilong Jehovah, maet hem ting hem no garem strong nao for gohed. Nomata olsem, Jehovah iusim strong bilong hem againstim olketa samting olsem, and hem strongim Jeremiah for gohed. So hem olsem Jehovah hem trikim Jeremiah taem Hem iusim hem for duim olketa samting wea hemseleva tingse hem bae no fit for duim.
Olketa Leson for Iumi:
1:8. Jehovah savve sevem pipol bilong hem from persecution, maet long wei wea hem iusim olketa judge wea no favorim samwan, changem olketa raf man long gavman witim samfala wea garem gudfala tingting, or hem strongim olketa servant bilong hem for gohed and no givap.—1 Corinthians 10:13.
2:13, 18. Olketa Israelite wea no faithful duim tufala nogud samting. Olketa lusim Jehovah, man wea blessim, leadim, and protectim olketa. And olketa mekem olketa tokpiksa tank for olketa seleva long wei for mekem olketa agreement witim army bilong Egypt and Assyria. Long distaem, wei for lusim trufala God and followim olketa idea and tingting bilong olketa man and politik, hem olsem man hem changem “man wea givim living wata” witim “olketa tank wea brek.”
6:16. Jehovah encouragem pipol bilong hem wea bighed for stop and tingting gud firstaem, lukluk gud long olketa seleva, and for go bak long “olketa road” bilong olketa faithful laen dadi bilong olketa. Iumi shud evritaem lukluk long iumiseleva for savve sapos iumi really wakabaot followim wei wea Jehovah laekem iumi for followim!
7:1-15. Wei wea olketa Jew putim trust long datfala temple, and luk long hem olsem wanfala samting wea bae protectim olketa, hem nating sevem olketa. Iumi shud wakabaot followim faith, no samting wea iumi lukim.—2 Corinthians 5:7.
15:16, 17. Olsem Jeremiah, iumi tu savve faet againstim wei for feel wikdaon. Iumi savve duim olsem long wei for enjoyim Bible study seleva, for praisem nem bilong Jehovah long ministry, and for stap klia long wei for kaban witim nogud pipol.
17:1, 2. Olketa sin wea pipol long Judah duim hem mekem Jehovah no hapi long sakrifaes bilong olketa. Fasin wea no klin savve mekem Jehovah no acceptim olketa sakrifaes bilong praise bilong iumi.
17:5-8. Iumi fit for trustim olketa man and olketa organization only sapos olketa duim samting wea followim will bilong God and olketa principle long Bible. Iumi wise taem iumi trust long Jehovah nomoa for kasem salvation, trufala peace and sef living.—Psalm 146:3.
20:8-11. Iumi shud no letem wei wea pipol no interest and againstim iumi, or persecution, for mekem iumi lusim strong wea iumi garem for preach abaotem Kingdom.—James 5:10, 11.
“MEKEM NEK BILONG IUFALA FOR STAP ANDA LONG YOKE BILONG KING BILONG BABYLON”
Jeremiah hem talemaot judgment againstim fofala last king bilong Judah and olketa false profet, olketa nogud shepherd, and olketa nogud priest. Jehovah storyim olketa faithful remnant olsem olketa gudfala fig taem hem sei: “Bae mi lukaftarem olketa long gudfala wei.” (Jeremiah 24:5, 6) Chapter 25 story lelebet abaotem thrifala profesi bilong olketa judgment wea olketa nara chapter bihaen nao bae storyim moa samting abaotem olketa.
Olketa priest and olketa profet mekem plan for killim dae Jeremiah. Message wea hem talemaot hem for olketa mas servem king bilong Babylon. Jeremiah hem sei olsem long King Zedekiah: “Mekem nek bilong iufala for stap anda long yoke bilong king bilong Babylon.” (Jeremiah 27:12) Nomata olsem, ‘Datwan wea mekem pipol bilong Israel for stap long difren ples bae mekem Israel for stap tugeta moa.’ (Jeremiah 31:10) From olketa Rechabite garem fasin for obey, God promis for blessim olketa. King Zedekiah givim komand for olketa putim Jeremiah “long prison insaed long Courtyard bilong Gard.” (Jeremiah 37:21) Jerusalem hem distroe, and plande long olketa pipol wea stap long there olketa kamap prisoner. Jeremiah and secretary bilong hem, Baruch, tufala midolwan long smol grup long pipol wea stap bihaen. Nomata Jeremiah warnim olketa for no duim olsem, olketa fraet and olketa go long Egypt. Chapter 46 go kasem 51 hem talem toktok bilong Jeremiah for olketa nation.
Ansa for Olketa Bible Kwestin:
22:30—Waswe, disfala order hem aotem right bilong Jesus Christ for rul long throne bilong David? (Matthew 1:1, 11) Nomoa. Datfala order hem stopem eni pikinini wea kam from laen bilong Jehoiachin for “sidaon long throne bilong David . . . long Judah.” Jesus bae rul long heven, no long wanfala throne long Judah.
23:33—Wanem nao “datfala hevi bilong Jehovah”? Long taem bilong Jeremiah, important toktok wea hem talemaot abaotem wei wea Jerusalem bae distroe hem wanfala hevi for olketa wantok bilong hem long Israel. And tu, from pipol no willing for change hem olsem wanfala hevi long Jehovah from hem mas rejectim olketa. Long sem wei tu, message from Bible againstim olketa false Christian religion hem wanfala hevi for olketa, and olketa pipol wea no willing for obeyim datfala message olketa olsem wanfala hevi long God.
31:33—Long wanem wei nao law bilong God stap insaed heart bilong olketa? Taem wanfala man hem lovem law bilong God wea datwan mekem hem barava strong for duim will bilong Jehovah, hem olsem law bilong God hem stap insaed heart bilong hem.
32:10-15—Why nao olketa keepim tufala copy long datfala kontrak? Wanfala copy wea open hem for olketa iusim and for story raonem. Datfala nara copy wea olketa rolim and sealim hem stap for pruvim datfala copy wea open sapos need kamap. Jeremiah showimaot gudfala example for iumi long wei for duim olketa samting saed long law nomata witim wanfala relative or nara brata and sista.
33:23, 24—Hu nao “tufala famili” wea disfala scripture storyim? Wanfala hem famili bilong olketa king wea King David hem kam from, and narawan hem famili laen bilong Aaron wea olketa priest kam from. From Jerusalem and temple bilong Jehovah hem distroe, hem luk olsem Jehovah rejectim tufala famili hia and bae hem no garem wanfala kingdom wea rul ovarem earth and worship bilong hem bae no kamap moa.
46:22—Why nao voice bilong Egypt hem olsem voice bilong wanfala snek? Diswan maet piksarem saond wea wanfala snek mekem taem hem fraet and ranawe or wei wea Egypt hem tok smol taem hem shame from bigfala trabol kasem hem. Disfala tokpiksa hem showimaot hao nomata olketa Pharaoh bilong Egypt tingse wei for werem saen bilong wanfala holy snek long hed bilong olketa, wea hem nao datfala woman snek god, Uatchit, bae protectim olketa, bat really datwan hem wanfala barava iusles samting.
Olketa Leson for Iumi:
21:8, 9; 38:19. Nomata Jerusalem hem barava klosap distroe, and olketa pipol wea no repent fit for dae, Jehovah givim nara chance moa long pipol long Jerusalem. Tru nao, “hem showimaot bigfala mercy.”—2 Samuel 24:14; Psalm 119:156.
31:34. Hem barava comfortim iumi for savve hao Jehovah no tingim moa olketa sin bilong olketa wea hem forgivim finis and for duim samting againstim olketa long future!
38:7-13; 39:15-18. Jehovah no forgetim wei wea iumi faithful long service bilong iumi for hem, wea insaed diswan hem wei wea iumi “servem olketa holy wan.”—Hebrews 6:10.
45:4, 5. Olsem hem happen long olketa last day bilong Judah, long “olketa last day” bilong disfala world hem no taem for lukaotem “olketa bigfala samting,” olsem riches, bignem, or material samting.—2 Timothy 3:1; 1 John 2:17.
FIRE HEM BONEM JERUSALEM
Hem year 607 B.C.E. and hem mek-11 year long rul bilong Zedekiah. Army bilong King Nebuchadnezzar bilong Babylon stap raonem Jerusalem for 18 month finis. Long mek-seven day long mek-faev month long mek-19 year long rul bilong Nebuchadnezzar, Nebuzaradan, wea hem chief bilong bodygard, hem ‘kam kasem,’ or arrive long Jerusalem. (2 Kings 25:8) Maet taem hem stap long camp bilong hem aotsaed long olketa wall bilong datfala taon, Nebuzaradan lukluk long olketa samting wea gohed and hem mekem wanfala plan for duim samting. Thrifala day bihaen, long mek-ten day bilong datfala month, hem ‘kam insaed,’ wea minim hem go insaed Jerusalem. And hem bonem datfala taon.—Jeremiah 52:12, 13.
Jeremiah hem storyim plande samting abaotem wei wea Jerusalem hem distroe. Olketa raeting bilong Jeremiah sapotim olketa sorre toktok wea stap long Bible buk bilong Lamentations.
[Piksa long page 8]
Insaed olketa toktok wea Jeremiah talemaot hem judgment bilong Jehovah againstim Jerusalem
[Piksa long page 9]
Hao nao Jehovah “iusim strong” bilong hem againstim Jeremiah?
[Piksa long page 10]
“Olsem olketa gudfala fig, mi bae tingim olketa pipol bilong Judah wea stap olsem prisoner.”—Jeremiah 24:5.