Waswe, Iu Remember?
Waswe, iu hapi for readim olketa issue bilong Wastaoa wea kamap no longtaem go nomoa? Trae lukim sapos iu savve ansarem olketa kwestin hia:
• Wanem nao mekem isi for olketa long Korea for acceptim Christmas?
Wanfala biliv from bifor stap long Korea and samfala nara kantri abaotem wanfala god bilong kitchen wea olketa sei hem kam thru long chimney and tekem kam samfala present long December. And tu, bihaen long World War II, olketa U.S. soldia givimaot olketa present and help long church.—12/15, page 4, 5.
• For fulfillim Isaiah 21:8, hu nao God iusim olsem “man for lukaot” long taem bilong iumi?
Olketa Christian wea spirit anointim, wea waka olsem sekson for lukaot, talem pipol abaotem mining bilong olketa samting wea happen long world wea fulfillim Bible profesi. Olketa helpem planti wea studyim Bible for luksavve and stap klia long olketa wei and teaching wea againstim Bible.—1/1, page 8, 9.
• Hu nao olketa “Polish Breathren”?
Olketa nao smol religion long mek-16 and mek-17 century long Poland wea olketa encouragem wei for followim Bible and rejectim olketa teaching bilong church, olsem Trinity, wei for baptaes taem man smol, and hellfire. Wantaem olketa barava persecutim olketa and forcem olketa for go long olketa difren kantri. —1/1, page 21-3.
• Why nao man mas trustim olketa Bible profesi winim toktok bilong olketa scientist wea studyim future or pipol wea studyim star?
Pipol wea sei olketa nao profet nating showimaot man fit for trustim olketa bikos olketa nating tingim Jehovah and Bible. Olketa Bible profesi nomoa savve helpem iu for savve hao nao olketa samting wea happen distaem fitim purpose bilong God, and givim gud samting long iuseleva and famili bilong iu for olowe.—1/15, page 3.
• Wanem nao samfala pruv wea showimaot iumi stap insaed olketa last day?
Iumi savve lukim wanem hem happen bihaen olketa aotem Satan from heven. (Rev. 12:9) Iumi stap insaed taem bilong lastfala “king” wea Revelation 17:9-11 storyim. Namba bilong olketa trufala anointed Christian hem katdaon, bat hem luk olsem samfala bae stap yet long earth taem great tribulation hem start.—1/15, page 12, 13.
• Wanem taem nao olketa raetem buk bilong Habakkuk, and why nao iumi shud interest long hem?
Olketa raetem disfala Bible buk long samting olsem 628 B.C.E. Hem garem olketa judgment bilong Jehovah againstim Judah bifor and againstim Babylon. Hem tok tu abaotem judgment bilong God wea bae klosap for kasem wicked system bilong distaem.—2/1, page 8.
• Long wanem ples long Bible nao iumi savve faendem wise kaonsel bilong wanfala mami for olketa gudfala waef?
Last chapter long buk bilong Proverbs, chapter 31, hem nambawan ples for kasem kaonsel olsem.—2/1, page 30, 31.
• Why nao iumi savve thankiu tumas from Jehovah showimaot “mind bilong Christ” long iumi? (1 Cor. 2:16)
Thru long record bilong Gospel, Jehovah helpem iumi for lanem olketa tingting, feeling, waka, and samting wea moa important long man. Diswan savve helpem iumi for kamap olsem Jesus, especially long hao nao iumi tinghae long preaching waka for sevem laef.—2/15, page 25.
• Waswe, God savve ansarem prea distaem?
Yes. Nomata Bible showimaot God no ansarem evri prea, samfala samting wea happen distaem pruvim hem planti taem ansarem prea bilong pipol wea askem comfort and help long samting olsem hao for stretem problem insaed marit.—3/1, page 3-7.
• Wanem nao iumi savve duim for kasem strong from God?
Iumi savve askem diswan long prea, lukaotem spiritual strong from Bible, and kasem strong from wei for kaban witim olketa Christian brata.—3/1, page 15, 16.
• Hao nao dadi and mami savve helpem pikinini for kasem gud samting from olketa Christian meeting?
Olketa savve helpem pikinini for stap wekap, maet mekem olketa sleep bifor olketa meeting. Olketa savve encouragem pikinini for raetem “note,” olsem for putim wanfala mark long pepa evritaem wea olketa herem word or nem wea olketa heresavve long hem.—3/15, page 17, 18.
• Wanem nao samfala samting wea iumi savve lanem from example bilong Job?
Job putim wei wea hem fren witim God olsem first samting, deal long stret wei witim olketa nara man, trae hard for loyal long marit partner bilong hem, tingim spiritual living bilong famili bilong hem, and faithful for stand strong long test.—3/15, page 25-7.
• Waswe, Bible garem haed toktok wea explainim samfala secret message?
Nomoa. Olketa idea abaotem haed toktok hem fitim tu samfala buk bilong world. Haed toktok wea samfala tingse hem stap insaed long Bible bae no garem eni mining from olketa garem difren spelling long olketa Hebrew raeting.—4/1, page 30, 31.