WASWE, IU TINGIM YET?

Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:

Waswe, Bible letem wei for bonem body bilong man wea dae finis?

Wei for bonem body bilong man wea dae finis or for berem hem, hem samting wea man seleva or famili savve disaedem. No eni scripture sei hem rong for bonem body bilong man wea dae finis. Bible showimaot taem King Saul and son bilong hem Jonathan dae, olketa bonem tufala and then berem tufala. (1 Sam. 31:2, 8-13)—6/15, page 7.

Why nao iumi sure God no kosim olketa nogud samting wea happen?

God hem raeteous. Evri samting wea hem duim hem stret, and hem keepim olketa promis bilong hem. And tu, Jehovah hem lovem man and showimaot mercy long hem. (Deut. 32:4; Ps. 145:17; Jas. 5:11)—9/1, page 4.

Wanem nao samfala hard samting wea olketa wea muv go long nara kantri for preach olketa feisim?

Thrifala hard samting nao: (1) Laef hem difren. (2) Olketa misstim hom and famili. (3) Hem tek taem for garem olketa fren. Staka brata and sista wea willing for muv go long nara kantri for preach olketa kasem staka blessing.—7/15, page 4-5.

Why nao hem isi for iusim olketa niu tract?

Wei wea olketa raetem evri tract hem semsem. Evri tract hem garem wanfala kwestin for askem long haosholder and scripture wea iumi savve readim long hem. Nomata wanem ansa nao hem talem, tane go long page 2, and showim hem wanem Bible talem. And tu, evri tract garem kwestin wea iumi savve iusim for duim return visit.—8/15, page 13-14.

Wanem nao dadi and mami savve duim for lukaftarem gud olketa pikinini bilong tufala?

Hem barava important for lisin gud long olketa pikinini bilong iu mekem iu savve long tingting bilong olketa. Waka hard for feedim olketa long spiritual wei. And leadim pikinini bilong iu for worshipim Jehovah. Olsem example, traem best for helpem pikinini sapos hem garem samfala daot abaotem truth.—9/15, page 18-21.

Wanem nao Bible promisim bae happen taem Kingdom bilong God hem rulim earth?

Olketa problem saed long health bae finis, no eniwan bae dae, evriwan bae garem waka, bae no eni war, no eniwan bae hangre, and no eniwan bae poor.—11/1, page 6-7.

Wanem agreement nao Bible storyim wea mekem olketa narawan garem raet for rul witim Christ?

Bihaen Jesus kaikaim Pasova witim olketa aposol, hem mekem wanfala agreement witim olketa faithful disaepol bilong hem. Hem nao datfala agreement for wanfala Kingdom. (Luke 22:28-30) Datfala agreement showimaot olketa garem raet for rul witim Jesus long heven.—10/15, page 16-17.

Hu nao pipol wea James storyim long Acts 15:14 wea God chusim for “garem nem bilong hem”?

Pipol hia nao olketa Christian wea Jew and no Jew wea God chusim olketa for “talemaot long evri ples olketa nambawan wei” bilong hem. (1 Pet. 2:9, 10)—11/15, page 24-25.