Perfect Laef—No Wanfala Dream Nomoa!
Wanfala perfect world—wanem nao datwan minim long iu? Tingim wanfala living wea no garem eni criminal fasin, wei for iusim nogud drug, bigfala hangre, poor living, or wei wea no followim justice. Evriwan enjoyim nambawan health long feeling and body. No eni sorre or wei for no hapi bikos dae hem finis nao. Waswe, fitim man for barava wantem kaen world olsem?
NOMATA olketa luksavve long samting wea science and technology duim, planti pipol no barava bilivim hao savve bilong man or olketa study wea hem duim bae mekem perfect world kamap wea evriwan bae stap long peace and hapi. Long narasaed, iumi no savve denyim hao fasin bilong man hem for laek mekem samting kamap moabeta and stretem wei for no perfect. Tru, wei for dream nomoa bae no helpem pipol wea no garem haos and poor, or mekem satisfae olketa wea cripple and sik wea barava wantem wei wea olketa safa for finis. World wea perfect no savve kamap from samting wea man duim. Bat, nomata bigfala wei for safa and hard living stap distaem, olketa strongfala reason stap for biliv hao wanfala perfect world hem barava klosap.
Taem iu ting abaotem perfect laef, laef bilong Jesus Christ maet kam long mind bilong iu. Jesus hem no only perfect man wea stap long earth. Adam and Eve, wea God wakem long image bilong hem, enjoyim perfect laef insaed wanfala paradaes. Bat, tufala lusim datfala gudfala living bikos tufala bighed for againstim Dadi bilong tufala long heven. (Genesis 3:1-6) Nomata olsem, Creator putim feeling for laek laef olowe insaed long olketa man. Ecclesiastes 3:11 talemaot datwan: “Evri samting [God] mekem luk naes long taem bilong hem. Hem putim taem olowe insaed long heart bilong olketa, mekem olketa man bae nating faendemaot waka wea trufala God hem duim from start go kasem finis.”
Nomata wei for no perfect and sin leadim olketa man for garem living wea “iusles” and “slave bilong wei for rotten,” lukim disfala toktok bilong aposol Paul wea givim comfort: “Creation barava luk forward and weitim taem wea olketa son bilong God bae showaot. From creation kamap iusles nao, no from hemseleva wantem bat thru long dat wan wea mekem kamap olsem, long faondeson bilong hope mekem creation seleva tu bae kamap free from slave bilong wei for rotten and kasem nambawan freedom olsem olketa pikinini bilong God.” (Romans 8:19-21) Bible talemaot klia hao olketa samting wea God provaedem for mekem olketa man kamap perfect moa hem kam thru long Jesus Christ.—John 3:16; 17:3.
For join witim disfala nambawan hope for future, iumi evriwan fit for muv ahed long spiritual wei, for mekem datwan showaot klia distaem.
Trae for Balance
Jesus Christ ting long wei for perfect olsem hem important tumas dastawe hem talem wanfala bigfala sekson: “Iufala mas perfect, olsem Dadi bilong iufala long heven hem perfect.” (Matthew 5:48) Waswe, Jesus expectim iumi for no duim sin long disfala wicked system? Nomoa. Iumi shud trae for mekem grow olketa fasin olsem willing for give, kaenfala fasin, and love long olketa nara man, bat planti taem iumi fail for duim stret samting. Wanfala aposol bilong Jesus tu raet olsem: “Sapos iumi talemaot olketa sin bilong iumi, hem nao faithful and raeteous for forgivim olketa sin bilong iumi and klinim iumi from evri samting wea no raeteous. Sapos iumi sei: ‘Iumi nating duim sin,’ iumi sei hem laea nao, and word bilong hem no stap insaed long iumi.”—1 John 1:9, 10.
Nomata olsem, iumi savve kamap moabeta long wei wea iumi ting long iumiseleva and deal witim nara pipol, and no ova tumas. Hu nao fit for faendem nara story wea moabeta abaotem gudfala fasin wea balance olsem datwan insaed Word bilong God, Bible? Wei for mekem grow olketa fasin olsem hapi and wei for balance bae helpem iumi for stap gud witim pipol long waka ples, witim marit partner bilong iumi, and witim dadi and mami or olketa pikinini bilong iumi. Aposol Paul encouragem olketa Christian olsem: “Hapi evritaem long Lord. Wanfala taem moa mi bae sei, Hapi! Letem evri man lukim balance fasin bilong iufala.”—Philippians 4:4, 5.
Gud Samting Bilong Balance Fasin
Taem iu balance long samting wea iu hope for and stap klia long wei for spoelem iuseleva long wei for laek perfect, iu and nara pipol tu kasem gud samting. For barava savve long samting iu fit for duim hem minim iu mas garem tingting wea followim really samting and balance long wanem iu laek for duim. Remember, God wakem iumi for stap long earth and satisfae long gudfala waka wea givim gud samting for iumiseleva and nara pipol.—Genesis 2:7-9.
Sapos kam kasem distaem iu evritaem wantem tumas samting from iuseleva, waswe iu no prea long Jehovah? For God appruvim iu hem samting wea bae barava strongim iu. Jehovah savve long fasin bilong iumi and wei wea iumi no perfect, so hem balance and isi for mekem hem hapi. Man wea raetem psalm promisim iumi olsem: “Olsem dadi hem showim mercy long olketa son bilong hem, Jehovah hem showim mercy long olketa wea fraet long hem. From hem savve gud hao hem wakem iumi, hem tingim hao iumi dust.” (Psalm 103:13, 14) Iumi thankiu tumas from God deal witim olketa man long wei wea showimaot mercy olsem! Nomata hem savve long olketa samting wea iumi no fit for duim, iumi savve kamap spesol long eye bilong hem olsem pikinini wea hem lovem.
Winim wei for aftarem wei for laek perfect, hem moa wise for mekem grow spiritual wei for luksavve and tingting wea balance! And tu, iumi sure no eniwan savve stopem wei wea Jehovah fulfillim purpose bilong hem for mekem olketa man kamap perfect anda long Kingdom bilong God. Bat, wanem nao wei for man kamap perfect hem minim?
Perfect Laef Moabeta Winim Tingting for Evriting Mas Perfect
Perfect laef no minim man garem wei for laek perfect. Olketa wea garem privilege for stap anda long Kingdom bilong God bae no pipol wea expectim tumas samting, and tingse olketa seleva nao raeteous. Wanfala mark for winim datfala big trabol hem wei for barava tinghae long ransom sakrifaes, wea datfala big crowd wea aposol John storyim olketa showimaot: “Mifala sev thru long God bilong mifala, wea sidaon long throne, and thru long Lamb.” (Revelation 7:9, 10, 14) Evriwan wea laef thru long datfala big trabol wea klosap kam bae thankiu tumas from Christ willing for dae for olketa and evriwan wea showimaot faith long hem. Loving sakrifaes bilong hem nao faondeson for stretem evribit olketa wik point bilong olketa and wei for no perfect.—John 3:16; Romans 8:21, 22.
Perfect laef bae waswe? Winim wei for trae winim narawan and selfish, love and kaenfala fasin midolwan olketa man bae mekem living hem gud tumas, wea aotem wari and wei for ting daonem seleva. Nomata olsem, perfect laef bae no boring. Word bilong God hem no provaedem evri information abaotem Paradaes bat hem storyim kaen living wea iumi bae garem: “Olketa bae buildim haos and stap insaed; and olketa bae plantim plantation and kaikaim frut bilong hem. Olketa bae no buildim and narafala man nao stap insaed; olketa bae no plantim and narawan nao kaikaim. From olketa day bilong pipol bilong mi bae olsem olketa day bilong wanfala tree; and waka wea olketa seleva duim pipol wea mi chusim bae iusim evribit. Olketa bae no hard waka nating, or bornem pikinini for mek trabol.”—Isaiah 65:21-23.
Winim wei for tingim wanem kaen hapitaem, stoa, technology, or transport nao Kingdom bae provaedem, tingim iuseleva olsem iu enjoyim wei wea disfala toktok hem fulfill: “‘Wolf and pikinini sheep nao bae kaikai tugeta, and lion bae kaikaim grass olsem buluka; and for snek, kaikai bilong hem bae dust. Olketa bae no duim eni nogud samting or spoelem eni samting long full maunten bilong mi wea holy,’ Jehovah hem talem.” (Isaiah 65:25) Perfect laef bae difren evribit from wanem iumi lukim distaem! Sapos iu wanfala wea kamap fit for laef long datfala taem, iu bae garem reason for trustim hao loving Dadi bilong iu long heven bae interest long iu and famili bilong iu. “Kasem nambawan hapi long Jehovah, and hem bae givim samting wea heart bilong iu wantem.”—Psalm 37:4.
Perfect laef hem no wanfala dream nomoa. Loving purpose bilong Jehovah abaotem olketa man bae fulfill evribit. Iu and famili bilong iu savve stap midolwan long olketa wea bae kasem perfect laef and stap olowe insaed niu world bilong God. Bible hem talem disfala profesi: “Olketa raeteous wan seleva bae kasem earth, and olketa bae stap olowe long hem.”—Psalm 37:29.
[Piksa long page 6]
Iumi savve kamap moabeta long wei wea iumi ting long iumiseleva and nara pipol, sapos iumi stap klia long wei for laek perfect and ova tumas
[Piksa long page 7]
Waswe, hem gud for tingim iuseleva olsem iu enjoyim peace and raeteous living insaed long Paradaes?