Why Winim Tingting for Evriting Mas Perfect?
Waswe, iu evritaem trae hard for duim barava best bilong iu? Tru nao, for duim olsem savve helpem iu and pipol raonem iu long planti wei. Long narasaed, samfala ova tumas and kamap man for laekem evriting mas perfect. Wanem nao datwan minim?
WANFALA mining bilong disfala toktok “tingting for evriting mas perfect” hem “for garem feeling for rejectim eniting wea no perfect.” Maet iu meetim pipol wea garem kaen fasin olsem. Iu savve lukim hao samting olketa askem from pipol wea ova tumas savve kosim planti problem, wea mekem wei for no satisfae and feel wikdaon hem kamap. Planti pipol wea garem balance fasin luksavve hao tingting for evriting mas perfect long wei for ova tumas for askem samting long evri part long living hem no mas gud. Hem samting wea man mas winim. Bat, wanfala problem nao, taem man luk long tingting or fasin bilong hemseleva, maet hem hard for luksavve long tingting for evriting mas perfect, so hem wanfala challenge for winim datwan.
Nelson garem barava bigfala responsibility and planti problem for stretem. Hem evritaem lukluk long statistics, and production hem barava important. Planti ting man needim tingting for evriting mas perfect mekem hem savve win for keepim wanfala waka wea olketa narawan wantem. Nomata samfala maet tinghae long wei wea Nelson gud tumas long waka bilong hem, tingting for evriting mas perfect mekem hem kasem problem long saed long body, olsem hed soa and wari. Waswe iu tu kasem samting wea kasem Nelson?
Tingting for evriting mas perfect affectim young pipol tu. Taem hem pikinini, Rita from Rio de Janeiro, laekem tumas for go long skul. Hem trae for no luk olsem hem laek win evritaem, bat hem savve barava feel nogud sapos hem no kasem gud mark. Rita sei: “From taem mi pikinini, mi savve markem miseleva witim narawan wea garem planti taem, bat mi evritaem wari and hariap for duim samting. Mi nating feel olsem mi garem taem for rest bikos mi garem staka samting for duim.”
Taem hem smol girl, Maria savve krae from hem kros taem hem no savve draw gud olsem olketa narawan. And tu, taem hem trae for barava pleim music long perfect wei, planti taem hem wari tumas winim wei for enjoyim wei for pleim music or singsing. Narafala girl long Brazil, Tânia, wea trae for haedem wei wea hem laek win tumas, hem sei hem putim olketa hae mark for hemseleva wea hem no fit for kasem, long skul and haos. Hem tingse sapos waka bilong hem no perfect, pipol bae no laekem hem tumas. And tu, samfala taem Tânia expectim tumas samting from nara pipol, wea mekem hem feel sorre.
Nomata wei for garem savve, waka hard, and feeling for satisfae hem important, olketa nogud feeling, olsem fraet for fail, maet kamaot from man markem olketa goal wea hard tumas for kasem. Dadi or mami or olketa narawan maet putim hae mark for perfect long skul waka or sports wea hard for olketa young wan kasem. Example, mami bilong Ricardo garem hae hope for hem, laekem hem for kamap wanfala doctor, pleim piano, and savve long tu-thri languis. Waswe, iu luksavve hao wei for ova tumas long tingting olsem savve mekem problem or sorre kamap?
Why Stap Klia Long Tingting for Evriting Mas Perfect?
Pipol evriwea laekem man for duim waka wea barava gud, wea kasem hae standard. So pipol mas resis for kasem olketa waka long company. Narafala samting wea mekem planti for trae moa hard hem bikos olketa fraet for lusim waka. Samfala wakman kamap olsem sportsman wea duim bigfala sakrifaes for kasem niu record. Then, taem samting wea moa hard kamap, maet hem feel olsem hem mas train for kamap moabeta, maet hem iusim medicine for datwan and—hem hope—for win. Sapos pipol no aftarem samting long balance wei, bat laekem evriting mas perfect, diswan savve kosim “wei for fraet for fail for muvim olketa” or “trae hard for kamap nambawan.”—The Feeling Good Handbook.
Tru, samfala ting olketa savve evritaem kamap moabeta long samting wea olketa duim long arts or sports. Nomata olsem, olsem Dr. Robert S. Eliot talem, “tingting for evriting mas perfect hem wei for expectim samting wea man kanduit kasem.” Hem sei moa: “Diswan hem from man feel guilty, laek defendim seleva, and fraet nogud pipol tokspoelem hem.” Dastawe, disfala toktok bilong wise King Solomon hem barava tru: “Miseleva lukim finis evri hard waka and evri bigfala savve long waka, wea mekem wanfala hem trae for winim narawan; diswan tu hem iusles nomoa and hard waka for aftarem wind.”—Ecclesiastes 4:4.
Wanem nao iu savve duim sapos iu kaen man wea laekem evriting mas perfect? Waswe, hem tru hao taem iu trae moa hard, iu kamap moa sorre? Waswe, iu laek for kamap man wea no laekem samting wea ova tumas and kamap moa relax? Wanem nao hem minim for perfect? Waswe, iu no barava laek for duim best bilong iu bat long semtaem no garem tingting for evriting mas perfect? Sapos olketa man wea no perfect savve iusim savve wea God givim for faendemaot samting wea savve helpem nara pipol, tingim wanem nao olketa man savve duim taem olketa garem perfect living and God gaedem olketa!
[Piksa long page 4]
Dadi, mami or olketa narawan maet laekem evriting mas perfect, wea olketa young wan no savve kasem