Waswe, Iu Savve Faendem Peace Long Mind?

Long 1854, Henry Thoreau, man for raetem buk long America hem raet: “Living bilong planti pipol no garem hope.”

Luk olsem, long taem bilong Thoreau planti pipol no garem peace long mind. Bat, datwan hem klosap 150 year bifor. Waswe, distaem hem difren? Or waswe, toktok bilong Thoreau fitim distaem tu? Waswe long iuseleva? Iu satisfae, garem peace? Or iu no feel sef, no sure abaotem future, “no garem hope,” olsem Thoreau hem talem?

SORRE tumas, planti samting long world hem aotem peace long mind bilong pipol. Letem iumi storyim tu-thri example nomoa. Long planti kantri, wei for no garem waka and wei for kasem smol pei hem mekem poor living kamap and hard taem saed long selen. Long samfala nara kantri staka iusim strong bilong olketa for aftarem riches and for ownim staka samting. Bat planti taem, from diswan needim kaen living wea man trae for winim narawan, hem lead go long wari, no peace. Sik, war, criminal fasin, wei wea no followim justice, and hard living hem aotem peace from pipol tu.

Olketa Lukaotem Peace Long Mind

Planti no willing for acceptim wei wea world hem go ahed distaem. Antônioa hem wanfala labor leader long wanfala big factory long São Paulo, Brazil. From hem hope for mekem living kamap moabeta, hem joinim olketa protest and demonstration, bat diswan nating givim hem peace long mind.

Samfala hope marit bae mekem laef bilong olketa garem peace, bat maet hem no olsem. Marcos hem wanfala bisnisman wea savve tumas. Hem joinim politik and kamap bigman long taon. Bat, famili laef bilong hem barava nogud. Taem olketa pikinini bilong hem lusim hom, hem and waef separate bikos tufala garem difren tingting wea tufala no savve stretem.

Gerson, wanfala pikinini wea no garem hom long Salvador, Brazil, hem laek traem niu samting. Hem kasem olketa difren taon taem hem go witim olketa man for draevem trak. No longtaem bihaen, hem tekem drug olowe, and hem steal from pipol for kasem selen for diswan. Planti taem police kotem hem. Bat, nomata hem wanfala barava raf man, Gerson barava laek for garem peace long mind. Waswe, bae hem savve faendem?

Taem Vania hem young yet, mami bilong hem dae, and Vania nao mas lukaftarem famili, witim sista bilong hem wea sik. Vania savve go long church bat hem tingse God lusim hem finis. Hem barava no garem peace long mind.

Narawan hem Marcelo. Only samting wea Marcelo wantem nao hem hapitaem. Hem laek for party witim olketa nara young wan—dance, drink, and tekem drug. Wantaem hem insaed long faet and mekem nara young wan garekil. Bihaen, hem sorre tumas long wanem hem duim and hem prea long God for help. Hem tu laek for garem peace long mind.

Olketa experience hia showimaot samfala samting wea savve spoelem peace long mind. Saed long datfala labor leader, bigman long politik, pikinini wea no garem hom, dota wea waka hard, and man for party, waswe, eni wei stap for olketa faendem peace long mind wea olketa lukaotem? Waswe, samting wea kasem olketa hem teachim iumi eniting? Ansa long tufala kwestin hia hem yes, olsem bae iumi lukim long next article.

[Footnote]

[Piksa long page 3]

Waswe, iu barava laek garem peace long mind?