Wea Nao Iu Savve Faendem Peace Long Mind?
Planti samting long distaem hem difren from taem bilong Thoreau, wea iumi storyim long first article. Wanfala big samting wea difren nao hem wei wea distaem planti advaes stap long hao for kasem peace long mind. Olketa doctor wea studyim mind and pipol for raetem buk for helpem man—olketa man for raetem niuspepa tu—givim idea bilong olketa. Maet advaes bilong olketa hem for helpem man for lelebet taem; bat for givim ansa wea really stretem problem, man needim samting wea moa deep. Hem nao wanem olketa pipol wea iumi storyim long first article olketa faendem.
ANTÔNIO, Marcos, Gerson, Vania, and Marcelo kam from olketa difren living and garem olketa difren problem. Bat olketa semsem long thrifala samting. First wan, olketa kasem taem wea olketa ‘no garem eni hope and olketa no tingim God insaed long world.’ (Ephesians 2:12) Mek-tu, olketa barava laek garem peace long mind. And mek-thri, olketa evriwan faendem peace long mind wea olketa lukaotem bihaen olketa studyim Bible witim Olketa Jehovah’s Witness. Taem olketa go ahed, olketa start for luksavve God hem interest long olketa. Tru tumas, olsem Paul talem pipol long Athens long taem bilong hem, God “hem no farawe from iumi.” (Acts 17:27) Wei for barava bilivim diswan hem bigfala part long wei for helpem iu kasem peace long mind.
Why Nao Peace Hem No Big Tumas?
Bible talem tufala main reason why peace hem no big tumas long world—nomata peace long mind or peace midolwan long pipol. Jeremiah 10:23 hem explainim first reason: “Wei bilong man hem no bilong hem. Hem no bilong man wea wakabaot for disaedem gogo bilong hem.” Man no garem wisdom or savve for rulim hemseleva long wei wea hem no needim eni help, and only help wea savve barava helpem man hem kam from God. Olketa man wea no depend long God for gaedem olketa bae nating kasem peace for olowe. Mek-tu reason why peace hem no big tumas hem showaot long toktok bilong aposol John: “Full world hem stap long paoa bilong wicked wan.” (1 John 5:19) Sapos God no gaedem man, samting wea man duim for kasem peace bae kamap iusles evritaem bikos long waka bilong datwan wea man no savve lukim bat wea really stap—and wea barava strong—datfala “wicked wan,” Satan.
From tufala reason hia—wei wea planti pipol no depend long God for gaedem olketa and wei wea Satan hem busy tumas long world—olketa man no stap gud. Aposol Paul barava talem stret: “Evri creation go ahed for krae tugeta and feel pain tugeta kam kasem distaem.” (Romans 8:22) Hu nao no agree witim datfala toktok? Long olketa rich and poor kantri, olketa famili problem, criminal fasin, wei wea no followim justice, wei wea pipol no feel hapi bikos long fasin bilong narawan, hard taem long selen, heit midolwan long olketa tribe, wei wea man iusim paoa bilong hem for spoelem narawan, sik, and planti samting moa, hem aotem peace from mind bilong pipol.
Wea for Faendem Peace Long Mind
Taem Antônio, Marcos, Gerson, Vania, and Marcelo studyim Word bilong God, Bible, olketa lanem samting wea changem laef bilong olketa. Olketa lanem hao wanday living long world bae difren. Diswan hem no hope nating wea sei evri samting bae kamap gud long end. Diswan hem trufala hope wea garem strong faondeson hao God garem purpose for olketa man and nomata distaem, iumi savve kasem gud samting from datfala purpose sapos iumi duim will bilong hem. Olketa live followim samting wea olketa lanem from Bible, and laef bilong olketa kamap moabeta. Olketa kasem moa hapi and peace winim wanem olketa tingim.
Distaem Antônio hem no joinim moa olketa protest and raoa. Hem savve hao eni change wea kamap from datwan hem no barava help and hem for lelebet taem nomoa. Disfala man wea hem labor leader bifor hem lane abaotem Kingdom bilong God. Hem nao Kingdom wea planti million pipol prea for hem taem olketa talem Lord’s Prea (or, Our Father) and sei long God: “Kingdom bilong iu kam.” (Matthew 6:10a, New International Version) Antônio lanem hao Kingdom bilong God hem wanfala really gavman long heven wea bae givim tru peace long olketa man.
Marcos lane for followim wisefala kaonsel bilong Bible abaotem marit. From diswan, man hia wea bigman long politik bifor, hem go bak and stap hapi distaem witim waef bilong hem. Hem luk forward tu long taem wea, klosap nao, Kingdom bilong God bae aotem disfala greedy, selfish world and changem witim wanfala wea moabeta. Hem barava minim moa disfala sentence long Lord’s Prea wea sei: “Will bilong iu bae kamap long earth olsem long heven.” (Matthew 6:10b, NIV) Taem will bilong God kamap long earth, olketa man bae kasem living wea olketa nating experiencem bifor.
Waswe long Gerson? Distaem hem no gogo olabaot and hem no steal. Laef bilong disfala man, wea bifor hem pikinini wea no garem hom, hem garem mining distaem bikos hem iusim strong bilong hem for helpem nara pipol kasem peace long mind. Olsem olketa experience hia showim, wei for studyim Bible and followim wanem hem talem savve barava changem laef bilong man for kamap moabeta.
Peace Long Mind Insaed World wea Fulap Witim Trabol
Main wan wea insaed long wei for fulfillim will bilong God long taem bifor hem Jesus Christ, and taem pipol studyim Bible witim Olketa Jehovah’s Witness, olketa lanem planti samting abaotem hem. Long naet wea Jesus hem born, olketa angel singim praise long God: “Givim glory long God wea stap antap, and long earth peace stap midolwan long olketa man bilong gudwill.” (Luke 2:14) Taem Jesus growap, hem laek for helpem living bilong pipol kamap moabeta. Hem minim feeling bilong olketa and showim spesol kea long olketa wea safa and sik. And, olsem olketa angel hia talem, hem givim peace long mind long hambol pipol. Long end bilong ministry bilong hem, hem talem olketa disaepol bilong hem: “Mi leavim iufala long peace, mi givim iufala peace bilong mi. Mi no givim long iufala long wei wea world hem givim. No letem heart bilong iufala wari or letem olketa wikdaon from wei for fraet.”—John 14:27.
Jesus hem no just man wea trae for helpem laef bilong pipol. Hem sei hem olsem wanfala shepherd, and hem sei olketa hambol follower bilong hem olsem sheep taem hem sei: “Mi kam mekem olketa savve kasem laef and kasem for longfala taem. Mi disfala gudfala shepherd; disfala gudfala shepherd hem givim laef bilong hem for olketa sheep.” (John 10:10, 11) Tru nao, no olsem planti leader distaem wea tingim olketa seleva firstaem, Jesus givim laef bilong hem for olketa sheep bilong hem.
Hao nao iumi savve kasem gud samting from wanem Jesus hem duim? Planti savve gud long disfala toktok: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) First samting, for showimaot faith long Jesus hem needim savve abaotem hem and Dadi bilong hem, Jehovah. Savve abaotem God and Jesus Christ savve lead go long wei for fren klos witim Jehovah God wea bae helpem iumi for kasem peace long mind.
Jesus hem sei: “Olketa sheep bilong mi lisin long voice bilong mi, and mi savve long olketa, and olketa followim mi. And mi givim olketa laef olowe, and no eni samting bae finisim olketa, and no eniwan bae tekaotem olketa from hand bilong mi.” (John 10:27, 28) Datfala toktok barava givim comfort! Hem tru, Jesus talem datwan klosap tu thousand year bifor, bat toktok hia garem sem paoa yet olsem long datfala taem. Nating forgetim hao Jesus Christ hem laef yet and hem duim waka, hem rul distaem olsem King long Kingdom bilong God long heven. Olsem taem hem wakabaot long earth planti year bifor, hem tingim yet olketa hambol pipol wea barava laek kasem peace long mind. And tu, hem Shepherd bilong sheep bilong hem yet. Sapos iumi followim hem, hem bae helpem iumi for kasem peace long mind, insaed diswan hem for garem tru hope for lukim peace long future—wea diswan bae minim nomoa raf fasin, war, and criminal fasin.
Iumi kasem barava gud samting taem iumi savve and bilivim hao Jehovah, thru long Jesus, bae helpem iumi. Waswe, iu rememberim Vania, wea taem hem young girl hem garem bigfala responsibility and tingse God forgetim hem? Distaem Vania savve hao God nating lusim hem. Hem sei: “Mi lanem hao God hem barava stap and hem garem olketa barava naesfala fasin. Love bilong hem muvim hem for sendem Son bilong hem long earth for givim laef long iumi. Hem barava important for savve long diswan.”
Marcelo hem sei wei wea hem fren witim God hem tru samting. Disfala young man for party bifor hem sei: “Planti taem young pipol no savve wanem for duim, and gogo spoelem olketa seleva nomoa. Samfala tekem drug, olsem mi. Mi hope planti moa bae kasem blessing, olsem mi tu, taem olketa lanem truth abaotem God and Son bilong hem.”
Taem olketa study gud long Bible, Vania and Marcelo mekem grow strongfala faith long God and wei for trustim hao hem willing for helpem olketa deal witim problem bilong olketa. Sapos iumi duim sem samting olsem olketa—studyim Bible and followim wanem hem talem—bae iumi kasem bigfala peace long mind, olsem olketa. Then encouragement bilong aposol Paul bae barava fitim iumi: “No wari long eni samting, bat long evri samting thru long prea and wei for barava askem witim wei for sei thankiu, talem evri samting long God; and peace bilong God wea winim evri tingting bilong man bae gardim heart and tingting bilong iufala thru long Christ Jesus.”—Philippians 4:6, 7.
Faendem Trufala Peace Distaem
Jesus Christ hem leadim pipol wea barava lukaotem truth long road wea lead go long laef olowe long paradaes earth. Taem hem leadim olketa go long klin worship bilong God, olketa kasem peace wea olsem datwan wea Bible storyim: “Pipol bilong mi mas stap long ples wea garem peace and long ples wea olketa savve trustim evribit and long ples for rest wea no eniwan savve spoelem.” (Isaiah 32:18) And datwan hem smolfala example nomoa bilong peace wea olketa bae kasem long future. Iumi readim: “Olketa wea garem kwaet fasin bae kasem earth, and olketa bae hapi tumas long bigfala peace. Olketa raeteous wan seleva bae kasem earth, and olketa bae stap olowe long hem.”—Psalm 37:11, 29.
So waswe, iumi savve garem peace long mind distaem? Yes. And tu, iumi savve sure hao klosap nao, God bae givim long olketa man wea obey, peace wea winim enitaem bifor. So, prea long hem and askem hem for givim iu peace. Sapos iu garem eni problem wea aotem peace bilong iu, prea olsem hao King David hem prea: “Olketa wari long heart bilong mi kamap staka; from olketa hevi wea stap antap long mi, plis aotem mi. Lukim problem bilong mi and trabol bilong mi, and forgivim evri sin bilong mi.” (Psalm 25:17, 18) Feel sure God herem olketa prea olsem. Hem openem hand bilong hem and givim peace long evriwan wea lukaotem datwan witim honest heart. Iumi garem disfala loving promis: “Jehovah hem stap klosap long olketa wea kolem hem, long evriwan wea kolem hem witim trufala fasin. Samting wea olketa wea fraet long hem wantem, bae hem duim, and singaot bilong olketa for help, bae hem herem, and bae hem sevem olketa.”—Psalm 145:18, 19.
[Blurb long page 5]
Man no garem wisdom or savve for rulim hemseleva long wei wea hem no needim eni help and only help wea savve barava helpem man hem kam from God
[Blurb long page 6]
Savve abaotem God and Jesus Christ savve lead go long wei for fren klos witim Jehovah God wea bae helpem iumi for kasem peace long mind
[Piksa long page 7]
Wei for followim Bible kaonsel savve helpem famili laef for garem peace