Respect for Olketa wea Garem Paoa—Why Hem No Stap?
“Wei for againstim olketa wea garem paoa, long religion and waka, community and politik, evriwea long world maet wanday pipol ting long hem olsem bigfala samting wea happen insaed ten year wea go pas.”
PLANTI year go pas finis bihaen 1960, datfala ten year wea woman for raetem history and savveman Hannah Arendt hem tok abaotem antap. Distaem, wei for no respectim olketa wea garem paoa hem big winim enitaem bifor.
Olsem example, wanfala report insaed The Times bilong London hem sei: “Samfala dadi and mami les for acceptim paoa wea teacher garem ovarem pikinini bilong olketa and taem teacher trae for disciplinem pikinini, olketa komplen.” Planti taem, taem pikinini kasem discipline long skul, dadi and mami go long there, no for tok kros nomoa long teacher, bat for attakim olketa tu.
Wanfala man for toktok for National Association bilong olketa Head Teacher long Britain hem sei: “Pablik hem sei ‘Mi garem raet,’ winim wei for sei ‘Mi garem responsibility.’” Witim wei wea olketa fail for teachim pikinini for showim gudfala respect for olketa wea garem paoa, samfala dadi and mami no stretem pikinini—and les for nara man duim datwan. Pikinini wea iusim “olketa raet” bilong hem savve lukdaonem paoa bilong dadi and mami and teacher, and iumi savve wanem nao kamaot from diswan—“wanfala niu genereson wea no respectim olketa wea garem paoa and no savve wanem hem stret and rong,” Margarette Driscoll, woman for raetem niuspepa, hem talem.
Insaed article bilong hem “Genereson Wea Lus,” Time magasin talemaot hao planti young pipol long Russia lus hope, taem hem talem toktok bilong wanfala top music man wea sei: “Hao nao eniwan savve born kam long disfala world, wea no eni samting savve stap for longtaem and no eni samting followim justice, garem trust long community?” Savveman Mikhail Topalov saportim disfala tingting: “Olketa pikinini hia no krangge. Olketa lukim gavman laea long dadi and mami, lukim olketa lusim selen and waka bilong olketa. Waswe, iumi fit for expectim olketa for respectim olketa wea garem paoa?”
Bat, hem rong for tingse young genereson nomoa no trustim olketa wea garem paoa. Distaem, difren kaen pipol nao no trustim enikaen paoa, and lukdaonem tu. Waswe, diswan minim iumi no fit for trustim eniwan wea garem paoa? Sapos olketa iusim long stretfala wei, paoa, wea minim “paoa or raet for kontrolem, judgem, or tambuim samting wea samfala duim,” savve duim gudfala samting. Hem savve helpem man and community tu. Next article bae storyim hao nao olsem.