Why Nao Olketa No Garem Pikinini?

DELE and Fola,a wanfala hasband and waef, stap and waka long branch office bilong Watch Tower Society long Nigeria. No longtaem bihaen olketa start serve long there, mami bilong Fola hem kam for visit. Hem start kam farawe for story abaotem wanfala samting wea mekem hem wari tumas, wanfala samting wea mekem hem no sleep gud long naet.

“Iufala duim gudfala samting long mi,” hem sei long olketa. “Iufala sendem kam olketa present, and iufala visitim mi. Olketa samting hia wea showimaot love hem barava spesol long mi. Bat olketa mekem mi wari tu bikos evritaem mi ting hu nao bae duim olketa samting olsem for iufala taem iufala kasem age olsem mi? Iufala marit for tu year finis, bat iufala no garem pikinini yet. Waswe, iufala no ting hem taem nao for lusim Bethel and startim famili?”

Mami garem disfala tingting: Dele and Fola spendem inaf taem finis long Bethel. Hem taem nao for tufala ting abaotem future bilong tufala. Mi sure nara pipol savve tekova long waka bilong tufala. Dele and Fola no need for lusim full-taem ministry, bat tufala savve duim nara waka bilong service, wan wea bae letem tufala for garem pikinini and hapi olsem dadi and mami.

Wari Bilong Mami

Iumi minim wari bilong Mami. For want for garem pikinini hem feeling wea man born kam witim and evri kastom garem. Wei for garem pikinini mekem hope and hapi feeling kamap. Bible hem sei: “Frut bilong bele hem wanfala reward.” Tru nao, for garem pikinini hem wanfala spesol present from loving Creator bilong iumi.—Psalm 127:3.

Long planti kantri, olketa hasband and waef feisim bigfala hevi for garem pikinini. Olsem example, long Nigeria, wea klosap evri woman bornem sixfala pikinini, iu savve herem long evri wedding pipol wea talemaot hapi long man and woman wea just marit olketa sei olsem: “Naen month bihaen distaem, mifala hope for herem wanfala baby krae long haos bilong iutufala.” Tufala wea just marit maet kasem wanfala bed bilong baby olsem wedding present. Olketa mami-in-law bae lukluk long kalenda. Sapos datfala woman wea just marit no babule insaed samting olsem wan year, olketa bae lukluk gud long hem sapos eni problem stap wea olketa savve stretem.

For planti mami reason for man and woman marit hem for garem pikinini and joinim go famili laen. Mami bilong Fola sei olsem long hem: “Why nao iu marit sapos iu bae no garem pikinini? Samwan bornem iu; iu shud bornem olketa pikinini for iuseleva.”

Bat narafala samting for tingim hem stap. Long planti kantri long Africa, no inaf wei for kea for olketa olo wea gavman provaedem hem stap. Olketa pikinini nao bae lukaftarem olo dadi and mami bilong olketa, olsem dadi and mami lukaftarem olketa taem olketa smol yet. So mami bilong Fola hem ting hao sapos olketa pikinini bilong hem no garem pikinini bilong olketa seleva, long olketa year bihaen, olketa maet stap seleva, poor, and maet no garem eniwan for laekem or for berem olketa taem olketa dae.

Long planti ples bilong Africa, olketa tingim wei for no garem pikinini hem wanfala curse. Long samfala ples, olketa expectim evri woman for pruvim wei wea olketa fit for garem pikinini bifor olketa marit. Planti woman wea no savve garem pikinini barava trae hard for lukaotem olketa medicine and cure for stretem disfala problem.

Bikos long diskaen tingting, pipol ting long hasband and waef wea min for no garem pikinini olsem olketa stopem olketa seleva from gudfala samting. Planti taem pipol ting long olketa olsem difren, no tingting gud, and fit for sorre long olketa.

Hapi and Responsibility

Pipol bilong Jehovah luksavve hao nomata wei for garem pikinini hem hapi samting, diswan go witim responsibility. Bible hem sei long 1 Timothy 5:8: “Tru nao sapos eniwan no provaed for olketa wea bilong hem, and diswan hem moa tru for famili bilong hem, hem lusim disfala faith and hem moa worse winim man wea no garem faith.”

Dadi and mami mas provaed for famili bilong tufala long material and spiritual wei, and diswan needim taem and hard waka. Olketa no garem tingting for sei from God nao givim kam olketa pikinini, hem nao bae kea for olketa. Olketa luksavve hao for bringimap pikinini followim Bible principle hem wanfala full-taem responsibility wea God markem for olketa mami and dadi; hem no waka for givim long nara pipol.—Deuteronomy 6:6, 7.

Disfala waka for bringimap pikinini hem barava hard samting insaed “olketa last day” bilong “nogud taem wea hard for deal witim.” (2 Timothy 3:1-5) Witim olketa problem saed long selen wea kamap moa worse, nogud fasin wea kamap big long evri ples addim moa hevi long wei for bringimap olketa pikinini distaem. Nomata olsem, evriwea long world, planti Christian hasband and waef feisim disfala challenge and olketa win for bringimap pikinini wea fraet long God “long discipline and wei for stretem tingting wea kam from Jehovah.” (Ephesians 6:4) Jehovah lovem and blessim olketa mami and dadi hia from hard waka bilong olketa.

Why Samfala No Garem Pikinini

Long narasaed, planti Christian hasband and waef no garem pikinini. Samfala no savve garem pikinini bat nomata olsem olketa no adoptim pikinini. Olketa nara hasband and waef wea savve bornem pikinini disaed for no duim olsem. Olketa hasband and waef olsem chus for no garem pikinini no bikos olketa want for stap klia from responsibility or olketa fraet for feisim olketa challenge bilong wei for garem pikinini. Bat, olketa disaed strong for givim full strong bilong olketa for difren kaen waka insaed full-taem ministry wea wei for garem pikinini bae no letem olketa for duim diswan. Samfala serve olsem missionary. Olketa narawan servem Jehovah long traveling waka or long Bethel.

Olsem evri Christian, olketa luksavve hao wanfala waka stap wea olketa mas hariap for duim. Jesus hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” Distaem olketa go ahed for duim disfala waka. Hem wanfala important waka, bikos “end” bae minim wei for finisim evribit pipol wea no obeyim disfala gud nius.—Matthew 24:14; 2 Thessalonians 1:7, 8.

Taem bilong iumi hem semsem witim taem wea Noah and famili bilong hem buildim bigfala ark wea sevem olketa from bigfala Flood. (Genesis 6:13-16; Matthew 24:37) Nomata thrifala son bilong Noah marit evriwan, no eniwan long olketa garem pikinini go kasem bihaen long datfala Flood. Maet wanfala reason hem bikos olketa want for givim full strong bilong olketa for datfala waka wea olketa mas duim long datfala taem. Narafala reason maet hem wei wea olketa hol bak for garem pikinini insaed wanfala nogud and raf world wea “nogud fasin bilong man hem big tumas long earth and evri wei bilong tingting long heart bilong hem nogud evritaem.”—Genesis 6:5.

Nomata diswan no minim hem rong for garem pikinini distaem, planti Christian hasband and waef no garem pikinini mekem olketa savve share evribit insaed disfala important waka wea Jehovah givim long pipol bilong hem for duim. Samfala hasband and waef weit lelebet bifor olketa garem pikinini; olketa narawan disaed finis for no garem pikinini and tingim wei for garem pikinini insaed raeteous niu world bilong Jehovah. Waswe, diswan hem wei for no tingting gud? Waswe, olketa missim hapi laef? Waswe, hem sorre samting?

Sef and Hapi Laef

Dele and Fola, wea iumi story abaotem firstaem, marit for ten year finis, and tufala disaed strong for no garem pikinini. “Olketa relative bilong mifala still forcem mitufala for garem pikinini,” Dele hem sei. “Main wari bilong olketa hem future bilong mitufala. Mitufala talemaot long olketa evritaem hao mitufala tinghae long wei wea olketa tingim mitufala, bat mifala explainim gud hao mitufala hapi long wanem mitufala duim. Saed long sef living, mifala talem olketa hao trust bilong mifala hem long Jehovah, wea kea long olketa wea stap faithful and loyal long hem. Mitufala explainim tu hao wei for garem pikinini no evritaem minim pikinini bae kea for dadi and mami taem olketa olo. Samfala pikinini nating kea gud long dadi and mami bilong olketa, samfala moa no savve help, and samfala moa dae bifor mami and dadi bilong olketa dae. Long narasaed, mifala sure long future bilong mifala witim Jehovah.”

Dele and olketa narawan olsem hem barava trustim promis bilong Jehovah for olketa servant bilong hem: “Mi bae nating lusim iu and bae nating forgetim iu.” (Hebrews 13:5) Olketa bilivim tu hao “hand bilong Jehovah no kamap short tumas mekem hem kanduit for sevem man, or ear bilong hem kamap hevi tumas mekem hem kanduit for herem samting.”—Isaiah 59:1.

Narafala reason for trust kam from wei for lukim hao Jehovah hem keepim olketa faithful servant bilong hem. King David hem raet olsem: “Long bifor, mi wanfala young man, and distaem mi kamap olo nao, bat mi nating lukim eniwan wea raeteous hem no garem eni samting.” Tingim datwan. Waswe, iu savve long eni faithful servant bilong Jehovah wea hem “no garem eni samting”?—Psalm 37:25.

Winim wei for luk bak and sorre, olketa wea iusim laef bilong olketa for servem Jehovah and olketa nara Christian savve ting bak witim feeling for satisfae. Brata Iro Umah hem insaed full-taem service for 45 year and distaem hem serve olsem wanfala traveling overseer long Nigeria. Hem sei: “Nomata mi and waef bilong mi no garem pikinini, mitufala no savve forgetim hao Jehovah hem kea long mitufala evritaem long spiritual and material wei. Mitufala nating short long eni samting. Hem bae no lusim mitufala taem mifala kamap olo. Olketa year insaed full-taem service nao hem barava hapi wan long laef bilong mitufala. Mitufala hapi from mifala fit for servem olketa brata bilong mifala, and olketa brata tinghae tumas long waka wea mifala duim, and olketa helpem mitufala.”

Nomata planti hasband and waef no garem really pikinini, olketa garem difren kaen pikinini: Olketa Christian disaepol wea worshipim Jehovah. Aposol John hem samting olsem 100 year taem hem raet olsem: “No eni samting hem mekem mi moa hapi winim diswan, wei wea mi herem hao olketa pikinini bilong mi go ahed for wakabaot long truth.” (3 John 4) Faithful fasin bilong olketa “pikinini” bilong John—olketa wea hem teachim “truth” long olketa—mekem hem hapi tumas.

Semkaen hapi hem stap distaem. Bernice, wanfala woman from Nigeria, hem marit for 19 year finis and hem chus for no garem pikinini. Insaed 14 year wea go pas, hem serve olsem wanfala pioneer. Taem hem klosap long taem bilong laef wea hem no savve garem pikinini nao, hem nating feel sorre for iusim laef bilong hem for mek disaepol. Hem sei: “Mi feel hapi for lukim olketa spiritual pikinini bilong mi growap. Nomata sapos mi garem olketa pikinini bilong miseleva, mi daot sapos olketa bae moa klos long mi winim olketa wea mi helpem for lanem truth. Olketa treatim mi olsem mi really mami bilong olketa, olketa storyim hapi and problem bilong olketa and ask for advaes bilong mi. Olketa raetem kam leta, and mifala visitim narawan.

“Samfala ting long wei for no garem pikinini olsem wanfala curse. Olketa sei iu bae safa taem iu olo. Bat mi no ting hem olsem. Mi savve hao taem mi go ahed for servem Jehovah witim full soul, hem givim mi reward and lukaftarem mi. Hem bae no torowem mi aotsaed taem mi olo.”

God Lovem and Tinghae Long Olketa

Olketa wea bornem and bringimap olketa pikinini wea “go ahed for wakabaot long truth” garem staka samting for thankiu long hem. Dastawe Bible hem sei: “Dadi bilong raeteous wan bae hapi; dadi bilong wisefala man bae hapi long hem tu. Dadi and mami bilong iu bae singaot witim hapi, and woman wea bornem iu bae hapi”!—Proverbs 23:24, 25.

Olketa Christian hia wea no kasem hapi long wei for garem pikinini long disfala world kasem blessing long narafala wei. Planti hasband and waef olsem duim bigfala part for mekem samting bilong Kingdom kamap big. For planti year, olketa kasem experience, wisdom, and savve wea mekem olketa fit for givim nambawan help long Kingdom waka. Planti nao lead long disfala waka.

Nomata olketa no garem pikinini for saed bilong Kingdom, Jehovah blessim olketa witim wanfala loving spiritual famili wea barava tinghae long olketa sakrifaes wea olketa mekem. Hem olsem Jesus talem finis: “No eniwan wea lusim [“let go,” long really wei] haos or brata or sista or mami or dadi or pikinini or garden for saed bilong mi and for saed bilong gud nius wea bae no garem wan handred taem moa long disfala taem, olketa haos and brata and sista and mami and pikinini and garden . . . and long system wea bae kam laef olowe.”—Mark 10:29, 30.

Evriwan wea faithful hem barava spesol samting long Jehovah! Evri loyal wan olsem, olketa wea garem pikinini and tu olketa wea no garem pikinini, garem trust long disfala promis bilong aposol Paul: “God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and go ahed for serve.”—Hebrews 6:10.

[Footnote]

[Piksa long page 23]

Hasband and waef wea no garem pikinini kasem blessing bilong wanfala loving spiritual famili