Why Nao Iumi Mas Balance Long Samting Iumi Expectim?
TAEM iumi kasem wanem iumi hope for hem and goal bilong iumi, diswan savve mekem iumi feel satisfae. Bat, planti samting wea iumi dream abaotem and expectim no happen olsem wanem iumi laekem. Olketa samting wea fail long living savve mekem iumi feel kros witim iumiseleva and witim nara pipol tu. Wanfala wise man barava talem disfala tru samting: “Taem samting wea man expectim hem delay hem mekem heart sik.”—Proverbs 13:12.
Wanem nao samfala samting wea savve lead go for mekem iumi feel nogud? Hao nao iumi savve duim samting for balance long wanem iumi expectim? And tu, why nao wei for duim olsem savve helpem iumi?
Samting Iumi Expectim and Wei for Feel Nogud
From living distaem hem kwiktaem tumas, taem iumi trae moa hard for duim samting, hem olsem iumi fail long bigfala wei moa. From iumi mas olowe iusim staka taem and strong bilong iumi, taem iumi fail long samting iumi markem for duim, iumi savve feel nogud long iumiseleva. Iumi savve start for feel olsem iumi failim nara pipol tu. Cynthia, wanfala waef and mami wea savve long hevi bilong wei for garem pikinini, hem sei olsem: “Wei for no semsem evritaem long training wea mi givim long olketa pikinini bilong mi and feeling for sei mi no trainim olketa long stret wei hem savve mekem mi feel kros.” Stephanie, wanfala teenager, hem sei olsem abaotem education bilong hem: “Mi no garem inaf taem for duim evri samting wea mi laek for duim, and datwan mekem mi no patient.”
Ova tumas long wei for expectim samting savve tan go for wei for laek perfect, and diswan savve mekem man barava feel wiki. Ben, wanfala young marit man, sei: “Taem mi lukluk gud long olketa akson, tingting, or feeling wea mi garem, mi evritaem lukim hao mi shud duim samting long wei wea moabeta. Mi evritaem laek perfect, and diswan mekem mi no patient, wiki, and feel nogud.” Gail, wanfala Christian waef, hem sei olsem: “Tingting for laek perfect hem no give chance for man fail. Mifala man olsem laek for best mami and best waef. Mifala mas duim samting and kasem result bifor mifala hapi, so for weist taem hem mekem mifala kros.”
Narafala samting wea lead go for man feel nogud hem health wea no mas gud and olo. Wei for no savve muv raon gud and no strong hem mekem man feelim moa wei wea hem no savve duim staka samting and diswan mekem big disfala feeling for wiki. Elizabeth sei: “Mi no patient witim miseleva bikos mi no savve duim olketa samting wea mi isi for duim bifor mi sik.”
Olketa example hia showimaot samting wea savve mekem man start for feel nogud. Sapos iumi no kontrolem, olketa feeling olsem savve mekem iumi bilivim hao nara pipol tu no tinghae long iumi. So, wanem gud samting nao iumi savve duim for deal witim olketa wei for feel nogud and mekem grow balance wei for expectim samting?
Olketa Wei for Mekem Grow Balance Wei for Expectim Samting
First samting, remember hao Jehovah hem balance and minim samting. Psalm 103:14 hem sei: “Hem savve gud hao hem wakem iumi, hem tingim hao iumi dust.” From hem savve wanem iumi fit for duim and no savve duim, Jehovah expectim nomoa wanem iumi fit for givim. And wanfala samting wea hem askem from iumi hem for “hambol taem [iumi] wakabaot witim God bilong [iumi].”—Micah 6:8.
Jehovah encouragem iumi for tan long hem tu insaed long prea. (Romans 12:12; 1 Thessalonians 5:17) Bat, hao nao datwan helpem iumi? Prea strongim and balancem tingting bilong iumi. Barava strongfala prea hem showimaot iumi needim help—hem mark bilong hambol fasin. Jehovah hem willing for ansarem prea bilong iumi taem hem givim iumi holy spirit bilong hem, wea frut bilong hem nao love, kaenfala fasin, gudfala fasin, and fasin for kontrolem seleva. (Luke 11:13; Galatians 5:22, 23) Prea hem daonem tu wari and wei for feel wiki. Elizabeth sei thru long prea “iu savve kasem comfort wea iu no savve kasem from eniwea moa.” Kevin agree and sei: “Mi prea for garem kwaet heart and klia tingting mekem mi savve deal witim wanfala problem. No enitaem Jehovah forgetim mi.” Aposol Paul savve long spesol gudfala samting bilong prea. Dastawe hem talem: “Talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:6, 7) Tru nao, wei for story witim Jehovah savve barava helpem iumi for mekem grow balance tingting long wanem iumi expectim from iumiseleva and nara pipol.
Bat, samfala taem, iumi needim man for semtaem encouragem iumi. Toktok wea man talem long barava taem hem gud tumas. Wei for story secret witim wanfala mature fren wea iumi trustim savve helpem iumi for garem difren tingting long samting wea mekem iumi feel nogud or wari. (Proverbs 15:23; 17:17; 27:9) Young pipol wea stragol witim wei for feel wiki savve faendem hao sapos olketa askem advaes bilong dadi and mami, diswan savve helpem olketa for kasem balance. Kandi talemaot disfala toktok witim wei for tinghae: “Loving instruction from dadi and mami bilong mi mekem mi kamap moa balance and moa isi for pipol kaban witim mi.” Tru nao, kaonsel long Proverbs 1:8, 9 hem barava fitim: “Lisin, son bilong mi, long discipline bilong dadi bilong iu, and no lusim law bilong mami bilong iu. From olketa nao samting wea luk naes tumas long hed bilong iu and naesfala nekles long nek bilong iu.”
Samting wea kamaot from tingting for laek perfect showaot klia long disfala toktok: “For expectim living for fitim tingting bilong iumiseleva hem invaetem wei for feel wiki.” For stap klia long diswan, man need for changem tingting bilong hem. Hambol fasin—wei for luksavve long samting iumi no savve duim—bae mekem grow insaed long iumi wei for balance and expectim samting wea fitim. Romans 12:3 warnim iumi long stretfala wei for “no tinghae tumas long [iumiseleva] winim wanem hem fitim.” And tu, Philippians 2:3 encouragem iumi for garem hambol tingting and tingim nara pipol olsem hae winim iumi.
Elizabeth, wea iumi storyim finis, hem no patient witim hemseleva from sik bilong hem. Hem needim taem for garem tingting bilong Jehovah long samting and for kasem comfort for savve God no forgetim service bilong iumi. Colin hem no savve muvim body bilong hem bikos long wanfala sik wea hem garem. Long firstaem hem garem feeling for sei ministry bilong hem iusles sapos hem markem witim samting wea hem duim taem hem no sik yet. Taem hem ting raonem olketa scripture olsem 2 Corinthians 8:12, hem aotem olketa feeling hia. Datfala verse sei: “Sapos willing fasin hem stap firstaem, hem barava fitim wanem man hem garem, and no wanem hem no garem.” Colin sei: “Nomata mi give lelebet nomoa, mi savve give yet, and datwan hem samting wea Jehovah acceptim.” Long Hebrews 6:10, iumi kasem disfala reminder: “God hem no wicked mekem hem forgetim waka bilong iufala and love wea iufala showimaot for nem bilong hem.”
So, hao nao iumi savve disaedem sapos samting wea iumi expectim hem balance? Askem iuseleva, ‘Waswe, olketa samting wea mi expectim hem fitim olketa samting wea God expectim?’ Galatians 6:4 hem sei: “Letem evri man pruvim waka bilong hemseleva, and then hem bae garem reason for hapi long samting wea hemseleva duim, and no long wei for markem hemseleva witim narafala man.” Remember, Jesus hem sei: “Yoke bilong mi hem kaenfala and lod bilong mi hem no hevi.” Tru nao, olsem olketa Christian, iumi garem wanfala yoke for karem, bat hem “kaenfala” and hem “no hevi,” and Jesus promisim hao sapos iumi lane for karem long stretfala wei, diswan bae strongim iumi.—Matthew 11:28-30.
Balance Wei for Expectim Samting Hem Givim Reward
Man savve kasem reward stretawe and for olowe taem hem lisin and followim kaonsel long Word bilong God and mekem grow balance wei for expectim samting. Wanfala reward nao hem wei wea diswan affectim body bilong iumi long gudfala wei. Jennifer, wea kasem gudfala samting from olketa reminder bilong Jehovah sei olsem: “Mi garem moa strong and feeling for laef.” Dastawe nao Proverbs 4:21, 22 encouragem iumi for lisin long toktok bilong Jehovah witim eye and heart bilong iumi, “bikos olketa hia laef for pipol wea faendem olketa and health for full body bilong olketa.”
Narafala reward hem gudfala feeling long mind and feeling. Theresa hem sei: “Taem mi mekem heart and mind bilong mi for lisin long Word bilong God, mi faendem mi moa hapi.” Hem tru, bae olketa samting long living still mekem iumi feel nogud. Bat, iumi bae fit for feisim olketa long wei wea moa isi. James 4:8 hem sei olsem: “Kam klosap long God, and hem bae kam klosap long iufala.” Jehovah promis tu for strongim iumi for feisim olketa challenge bilong laef and for blessim iumi witim peace.—Psalm 29:11.
Wei for balance for expectim samting hem mekem iumi fit for stap stedy long spiritual wei. Diswan tu hem wanfala blessing. Iumi savve lukluk klia long olketa moa important samting long living. (Philippians 1:10) Olketa goal bilong iumi balance and fit for iumi kasem, wea givim iumi moa hapi and wei for satisfae. Iumi bae moa willing for givim iumiseleva long Jehovah, from iumi savve hem bae duim samting long best wei. Peter hem sei: “Dastawe, kamap hambol anda long maeti hand bilong God, mekem hem liftimap iufala long taem wea fit.” (1 Peter 5:6) Waswe, eni reward hem winim reward for Jehovah honorim iumi?
[Piksa long page 31]
For mekem grow balance wei for expectim samting savve helpem iumi deal witim wei for feel wiki and feel nogud