Only Wei for Aotem Evribit Heit

“No eni heit stap sapos fraet no stap firstaem. . . . Iumi heitim samting wea iumi fraetem dastawe ples wea heit hem stap, fraet hem stap haed.”​—CYRIL CONNOLLY, Man For Raet.

PLANTI man wea studyim living ting heit hem samting wea stap deep insaed tingting bilong man bat hem no savve. Wanfala scientist bilong politik sei olsem: “Maet big part bilong heit hem samting wea stap insaed body,” wea man born kam witim.

Iumi no sapraes taem pipol wea studyim fasin bilong man garem tingting olsem. Olketa man and woman wea pipol hia studyim olketa born “witim sin,” and “long sin,” olsem Bible hem talem. (Psalm 51:5) Creator seleva tu, taem hem lukluk long olketa man wea no perfect insaed planti thousand year go finis, “lukim hao nogud fasin bilong man hem big tumas long earth and evri wei bilong tingting long heart bilong hem nogud evritaem.”—Genesis 6:5.

Wei for ting daonem, favorim, and heit wea kamaot from olketa fasin hia hem bikos man no perfect taem hem born and selfish fasin tu. (Deuteronomy 32:5) Sorre tumas, no eni gavman bilong man, nomata wanem plan nao hem garem, savve mekem eni law wea changem heart bilong olketa man long diswan. Nius woman Johanna McGeary hem sei olsem: “Sapos wanfala police force stap raonem world, nomata hao strong, hem no savve aotem fasin for heit wea mekem Bosnia, Somalia, Liberia, Kashmir, the Caucasus fulap witim wei for killim dae planti pipol.”

Bat, bifor iumi lukaotem olketa ansa, iumi mas minim wanem nao bihaenem olketa fasin for heit hia.

Fraet Mekem Heit Kamap

Heit hem showaot long planti difren wei. Man for raet Andrew Sullivan tok stret olsem: “Wankaen heit hem wei for fraet, and heit wea lukdaonem; wankaen heit hem showimaot paoa, and heit wea kamaot from man no garem paoa; wankaen hem for pei bak, and heit wea kam from wei for jealous. . . . Wankaen heit hem bilong man wea againstim, and heit bilong man wea safa. Wankaen heit hem bone isisi, and heit wea isisi finis. And wankaen heit hem savve bosta, and heit wea no savve laet.”

Tru nao, samfala main reason wea mekem raoa bilong heit kamap long taem bilong iumi hem saed bilong living and selen. Strong wei for ting daonem nara man and heit wea kwiktaem kamap stap planti taem long olketa area wea sekson bilong pipol wea garem rich living hem smol nomoa. And tu, heit stap long ples wea living bilong wanfala sekson hem stap long danger from staka stranger kakam long there.

Samfala maet ting pipol hia wea just kam bae mekem moa hard for olketa kasem waka for selen, from olketa bae waka for smol pei, or bae mekem price bilong land and haos for go daon. Sapos kaen wei for fraet olsem hem gudfala reason or nomoa hem nara story. Fraet for lusim selen and fraet hao living bilong community bae kamap nogud hem strongfala reason wea startim wei for ting daonem narawan and heit.

Wanem nao shud firstfala step for finisim heit? Wei for changem tingting.

Changem Tingting

McGeary lukim hao: “Trufala change savve kamap only sapos pipol wea insaed diswan disaed for duim.” And hao nao samting wea pipol disaed for duim savve change? Samting wea happen showaot hao nambawan samting wea barava strong, wea muvim man, and mekem man go ahed for againstim heit for grow, hem kam from Word bilong God, Bible. Diswan hem bikos “word bilong God hem laef and garem paoa and hem sharp winim tu-saed sword and hem savve kat go for divaedem soul and spirit, and olketa join and bon, and hem luksavve long tingting and samting wea heart want for duim.”—Hebrews 4:12.

Tru, wei for aotem fasin for ting daonem narawan and heit hem no happen seleva or insaed wan day. Bat hem savve happen. Jesus Christ, man wea savve barava muvim heart and mekem conscience garem feeling, hem savve muvim pipol for change. Planti million pipol win for followim disfala wise kaonsel bilong Jesus Christ: “Go ahed for lovem olketa enemy bilong iufala and for prea for olketa wea persecutim iufala.”—Matthew 5:44.

From hem followim wanem hem teachim, wanfala wea barava klos fren bilong Jesus hem Matthew, man wea bifor hem kolektem tax, wea olketa Jew pipol heitim. (Matthew 9:9; 11:19) And tu, Jesus startim wanfala wei bilong klin worship wea gogo planti thousand Gentile wea pipol aotem and heitim bifor join insaed. (Galatians 3:28) Pipol from evriwea long world long datfala taem kamap olketa follower bilong Jesus Christ. (Acts 10:34, 35) Pipol savve long sekson hia from barava bigfala love wea olketa garem. (John 13:35) Taem olketa man wea fulap witim heit sutim dae Stephen, disaepol bilong Jesus witim ston, lastfala toktok bilong hem olsem: “Jehovah, no putim disfala sin againstim olketa.” Stephen laekem best samting for olketa wea heitim hem.—Acts 6:8-14; 7:54-60.

Olketa tru Christian distaem acceptim long sem wei tu kaonsel bilong Jesus for duim gud samting, no long olketa Christian brata bilong olketa nomoa, bat tu long pipol wea heitim olketa. (Galatians 6:10) Olketa waka hard for finisim nogud heit from laef bilong olketa. From olketa luksavve long olketa strongfala paoa wea savve startim heit insaed long olketa, olketa duim samting for changem heit witim love. Tru nao, olsem wanfala wise man bifor hem talem, “fasin for heit nao samting wea mekem raoa kamap, bat love hem kavarem evri rong.”—Proverbs 10:12.

Aposol John hem sei: “Eniwan wea heitim brata bilong hem, hem man for killim dae samwan, and iufala savve hao man for killim dae samwan no garem laef olowe.” (1 John 3:15) Olketa Jehovah’s Witness bilivim datwan. From diswan, distaem olketa join tugeta—from evrikaen living saed long tribe, kastom, religion, and politik—for kamap wanfala community wea wan mind and no garem heit, wanfala sekson bilong olketa trufala brata evriwea long world.—Lukim olketa box.

Heit Bae Finis Evribit!

‘Bat,’ maet iu sei, ‘datwan maet gud tumas for olketa wea insaed. Bat, diswan no finisim evribit fasin for heit from earth bilong iumi.’ Hem tru, nomata iu no garem heit insaed long heart bilong iu, iu savve safa from heit bilong narawan. So iumi mas luk long God for trufala ansa bilong disfala problem evriwea long earth.

Purpose bilong God hem for evri part bilong heit for finis from earth. Diswan bae happen anda long rul bilong gavman long heven wea Jesus lanem iumi for prea for hem: “Dadi bilong mifala wea stap long heven, letem nem bilong iu kamap holy. Letem kingdom bilong iu kam. Letem will bilong iu kamap long earth, olsem long heven.”—Matthew 6:9, 10.

Taem datfala prea hem kasem ansa evribit, olketa samting wea mekem grow fasin for heit bae nomoa. Olketa samting wea mekius long heit bae finis evribit. Giaman story, wei for no savve, and wei for ting daonem narawan bae change for kamap savve, truth, and raeteous fasin. Then, long datfala taem, God ‘bae aotem finis evri wata from eye, dae bae nomoa, and sorre and krae and pain bae nomoa tu.’—Revelation 21:1-4.

Herem nius wea moabeta! Pruv wea hard for denyim showaot iumi stap insaed “olketa last day.” So, iumi savve sure hao klosap nao iumi bae lukim heit hem finis from disfala earth. (2 Timothy 3:1-5; Matthew 24:3-14) Long promis niu world bilong God, trufala spirit bilong wei for olsem famili bae stap bikos olketa man bae kasem bak finis wei for perfect.—Luke 23:43; 2 Peter 3:13.

Bat iu no need for weit go kasem datfala taem for enjoyim trufala wei for olsem famili. Tru nao, olsem olketa story insaed showimaot, Christian love hem stap finis insaed planti million heart wea sapos nomoa fit for fulap witim heit. Olketa invaetem iu tu for kamap part bilong datfala bigfala loving famili!

[Piksa long page 7]

Anda long Kingdom bilong God evri part bilong heit bae aot from disfala earth