Iu Savve Hao for Weit?
WASWE, iu savve tingim haomas taem nao pipol iusim evri year for weit nomoa? Olketa weit long laen long stoa or long petrol station. Olketa weitim service long ples for kaikai. Olketa weit for lukim doctor or dentist. Olketa weit for olketa bas and train. Yes, barava bigfala part long laef bilong wanfala man hem iusim for weitim samting for happen. Long wanfala study, olketa long Germany seleva lusim 4.7 billion hour insaed wan year long wei for weit nomoa long laen trak long road! Samwan faendaot hao diswan hem semsem witim full laef bilong 7,000 pipol.
Wei for weit savve mekem man wiki. Long taem bilong iumi, hem olsem no inaf taem stap for duim evriting, and for tingim olketa nara samting wea iumi shud duim savve mekem wei for weit kamap barava test. Man for raet Alexander Rose wantaem sei: “Haf long pain bilong living hem wei for weit.”
Man bilong politik long America, Benjamin Franklin, luksavve hao wei for weit savve kostim big selen tu. Winim 250 year bifor, hem sei: “Taem hem selen.” Dastawe olketa bisnis lukaotem olketa wei for missim olketa delay wea no need for kamap long waka. For wakem moa samting insaed short taem savve minim moa profit. Olketa bisnis wea servem pablik stret trae for givim service wea fast—fast food, draev-thru banking, and olketa samting olsem—bikos olketa savve wanfala wei for mekem customer hapi hem for katem daon taem for weit.
Westem Laef
Man long America for raetem poem long mek-19 century, Ralph Waldo Emerson, hem wantaem komplen olsem: “Bigfala part long laef bilong man lus long wei for weit!” No longtaem go nomoa, man for raet, Lance Morrow, hem komplen abaotem feeling for boring and pain long body wea kam from wei for weit. Bat then hem tok abaotem “sorre bilong wei for weit wea no showaot.” Wanem nao diswan? “For savve hao olketa stealim wanfala barava important samting, taem, part bilong laef bilong man wea lus and hard for kasem bak.” Sorre samting, bat hem tru. Taem wea lus long wei for weit hem lus for olowe.
Hem tru, sapos laef hem no short tumas, pipol bae no wari tumas abaotem wei for weit. Bat laef hem short. Planti thousand year bifor, man wea raetem Psalm long Bible hem sei: “Long olketa seleva olketa day bilong olketa year bilong mifala hem seventi year; and sapos from spesol strong hem eiti year, bat olketa barava laekem trabol and olketa nogud samting; from hem mas finis kwiktaem, and mifala flae awe.” (Psalm 90:10) Nomata wea iumi stap and hu nao iumi, laef bilong iumi—olketa day, hour, minute wea stap front long iumi taem iumi born—garem spialaen. Nomata olsem, iumi kanduit missim samfala samting wea forcem iumi for westem samfala spesol taem hia for weitim samting or pipol.
Lane Hao for Weit
Staka long iumi gogo finis insaed wanfala trak wea draeva bilong hem trae for tekovarem trak front long hem. Planti taem, diswan no need nomoa—draeva no leit for kasem eni ples. Nomata olsem, hem barava les for followim gogo bilong nara draeva. Wei wea hem no patient showaot hem no lanem yet wei for weit. Lanem? Yes, for savve hao for weit hem wanfala leson wea man mas lanem. No eniwan hem born witim. Olketa baby wea hangre or feel nogud krae for kasem samting kwiktaem. Taem olketa growap kam nao olketa start for minim hao samfala taem olketa mas weit for samting olketa wantem. Tru tumas, from wei for weit hem part long laef wea man hard for missim, for savve hao for weit long patient wei taem man need for duim olsem hem mark bilong mature man.
Bat hem tru, samfala samting wea important tumas savve kamap wea fitim fasin for no patient. Wanfala young hasband wea kwiktaem tekem waef bilong hem long hospital bikos niu baby bilong tufala redy for born hem fit for no patient long olketa delay. Olketa angel wea encouragem Lot for lusim Sodom no weit taem Lot hem delay. Wei for distroe hem klosap, and laef bilong Lot and famili bilong hem stap long danger. (Genesis 19:15, 16) Bat staka taem, laef no stap long danger taem man need for weit. Long olketa taem hia, living bae moabeta sapos evriwan lane for patient—nomata sapos wei for weit hem kamap from wanfala no duim gud waka bilong hem or no kea. And tu, hem bae moa isi for patient sapos evriwan lane hao for iusim gud datfala taem for weit. Box long page 5 garem samfala idea long hao for winim wei for weit and tu hao for kasem gud samting from hem.
Iumi mas luksavve hao wei for no patient maet showimaot praod wei for tingting, feeling for sei iumi important tumas for weit. For eniwan witim kaen tingting olsem, hem fit for ting raonem disfala toktok long Bible: “Man wea patient hem moabeta winim man wea praod long fasin.” (Ecclesiastes 7:8) Bighed fasin, or praod fasin, hem nogud fasin wea serious, and wise toktok from Bible hem sei: “Jehovah barava heitim evriwan wea garem praodfala heart.” (Proverbs 16:5) Dastawe, for lanem patient fasin—for lane hao for weit—hem maet needim iumi for luk gud long iumiseleva and wei wea iumi fren witim pipol raonem iumi.
Patient Fasin Bae Kasem Reward
Planti taem hem moa isi for iumi weit sapos iumi sure weit bilong iumi bae no lus nating and samting iumi weitim bae kam. Long diswan, hem gud for tingim wei wea olketa faithful worshiper bilong God weitim olketa nambawan promis bilong hem insaed Bible for fulfill. Olsem example, insaed wanfala psalm wea kam from God, hem sei: “Olketa raeteous wan seleva bae kasem earth, and olketa bae stap olowe long hem.” Aposol John talem moa disfala promis taem hem sei: “Man wea duim will bilong God bae stap olowe.” (Psalm 37:29; 1 John 2:17) Hem klia tumas, sapos iumi savve laef olowe, wei for weit no wanfala big problem tumas. Bat iumi no laef olowe distaem. Waswe, hem stret for tok abaotem laef olowe or nomoa?
Bifor iu ansa, tingim wei wea God wakem first dadi and mami bilong iumi witim hope for laef olowe. From tufala sin nomoa dastawe tufala lusim datfala hope for tufala seleva and olketa pikinini bilong tufala—wea iumi insaed diswan. Nomata olsem, stretawe bihaen tufala sin, God talemaot purpose bilong hem for tanem bak samting wea kamaot from wei wea tufala no obey. Hem promis hao wanfala “seed” bae kam, wea gogo diswan hem Jesus Christ.—Genesis 3:15; Romans 5:18.
Sapos iumi wanwan bae kasem gud samting from wei wea olketa promis bilong hem fulfill, hem samting for iumi disaedem. For kasem diswan bae needim patient fasin. For helpem iumi lanem diskaen wei for patient, Bible encouragem iumi for ting raonem example bilong wanfala farmer. Hem plantim seed bilong hem and no garem eni wei moa bat for weit long patient wei—duim wanem hem fit for duim for protectim garden bilong hem—go kasem taem bilong harvest. Then patient fasin bilong hem kasem reward, and hem lukim olketa frut bilong hard waka bilong hem. (James 5:7) Aposol Paul talem nara example bilong patient fasin. Hem remindim iumi abaotem olketa faithful man and woman bilong taem bifor. Olketa luk go long taem wea olketa purpose bilong God bae fulfill, bat olketa mas weitim taem wea set finis bilong God. Paul encouragem iumi for followim olketa hia, “wea thru long faith and patient fasin kasem olketa promis.”—Hebrews 6:11, 12.
Yes, wei for weit hem part long laef wea man hard for missim. Bat hem no need for kamap samting wea evritaem mekem man wiki. For olketa wea weitim olketa promis bilong God for fulfill, hem savve givim hapi. Olketa savve iusim taem wea olketa weit for mekem grow klos wei for fren witim God and for duim olketa waka wea showimaot faith bilong olketa. And thru long prea, study, and wei for ting raonem samting, olketa savve mekem grow strongfala faith hao evriting wea God hem promisim bae happen long taem wea hem markem.
[Box/Piksa long page 5]
KATEM DAON WEI FOR WIKI FOR WEIT!
Plan firstaem! Sapos iu savve iu bae weit, redy for read, raet, knit, crochet, or duim samfala nara samting.
Iusim taem hia for ting raonem samting, samting wea kamap moa hard long world distaem wea muv fast tumas.
Keepim samfala buk klosap long telephone for iu iusim sapos iu weitim samwan for kam long phone; insaed faev or ten minute, iu savve readim tu-thri page.
Taem iu weit insaed wanfala grup, iusim chance, sapos fitim, for story long olketa and sharem samfala idea wea bae encouragem olketa.
Keepim wanfala notebuk or buk for read insaed trak bilong iu for taem wea iu mas weit wea iu no tingim.
Satem eye bilong iu, relax, or prea.
FOR WIN FOR WEIT HEM DEPEND LONG FASIN AND WEI FOR PLAN FIRSTAEM.