Hapi for Weit Long Jehovah
WASWE, iu enitaem kaikaim frut wea hem no raep gud? For sure iu no hapi long teist bilong hem. Frut hem needim taem for kamap raep, bat taem iumi willing for weit iumi bae kasem gud samting. Long samfala nara wei tu iumi kasem gud samting taem iumi weit for samting. Bible hem sei olsem: “Hem gud tumas for man stap kwaet taem hem weit for salvation bilong Jehovah.” (Lamentations 3:26; Titus 2:13) Wanem nao hem minim for olketa Christian weit long Jehovah? Wanem gud samting nao iumi kasem taem iumi gohed for weit long hem?
Wanem Nao Hem Minim for Weit Long God?
From iumi olketa Christian, iumi “weitim and tingim evritaem day bilong Jehovah wea bae kam.” Iumi luk forward long datfala “taem wea olketa man wea no followim God bae finis.” (2 Peter 3:7, 12) Jehovah hem barava laekem tumas for finisim wicked fasin, bat hem patient for mekem olketa Christian kasem salvation long wei for givim glory long nem bilong hem. Bible hem sei olsem: “Nomata sapos God hem fit for showimaot kros bilong hem and mekem pipol savve long paoa bilong hem, hem showimaot long-safaring long olketa dish bilong kros wea fit for finis evribit, mekem hem savve showimaot richfala samting bilong glory bilong hem long olketa dish bilong mercy.” (Romans 9:22, 23) Olsem hem duim long taem bilong Noah, distaem tu Jehovah hem savve long barava taem for sevem pipol bilong hem. (1 Peter 3:20) So for iumi weit long God hem minim iumi need for weitim taem wea hem bae duim samting.
Taem iumi weitim day bilong Jehovah, maet samfala taem iumi feel nogud from standard bilong world and long fasin gogo daon. Long taem olsem, hem gud for tingim olketa raeting bilong profet bilong God, Micah, wea hem raet olsem: “Loyal wan hem finis from earth and no eni man hem raeteous. . . . Saed bilong mi, mi bae gohed for lukaotem Jehovah. Mi bae showimaot fasin for weit long God bilong salvation bilong mi.” (Micah 7:2, 7) Wanem nao disfala “fasin for weit” wea iumi shud garem? From plande taem man feel nogud taem hem mas weit, hao nao iumi savve kasem hapi taem iumi weit long God?
Hapi Taem Iumi Weit
Iumi savve kasem gudfala tingting from wei for lane from example bilong Jehovah. From taem bifor kam Jehovah hem “datfala hapi God.” (1 Timothy 1:11) Hem hapi taem hem weit bikos hem gohed for fulfillim nambawan plan bilong hem for mekem pipol wea lovem hem kamap perfect, wea followim plan bilong hem taem hem creatim Adam and Eve. (Romans 5:12; 6:23) Hem lukim gud samting wea kamaot from waka bilong hem, hem nao wei wea plande million pipol laek for kam insaed long tru worship. Jesus hem sei olsem: “Dadi bilong mi waka kam kasem distaem, and mi gohed for waka tu.” (John 5:17) For kasem hapi man mas duim samting for olketa narawan. (Acts 20:35) Long sem wei tu, olketa tru Christian no stap nating. Bat, olketa gohed for waka for helpem olketa narawan lane abaotem plan bilong God for olketa man.
From bifor kam olketa faithful pipol hapi for praisem God taem olketa weit for hem duim samting. Tingim David wea raetem olketa psalm olsem wanfala example long diswan. David hem kasem persecution from king bilong hem, and gud fren bilong hem witim son bilong hem againstim hem. Long olketa taem olsem, waswe, David savve gohed hapi taem hem weit long Jehovah for duim samting? Luk olsem David nao raetem Psalm 71 wea hem sei olsem: “For saed bilong mi, mi bae gohed for weit, and mi bae givim bigfala praise moa long iu. Mouth bilong miseleva bae story abaotem raeteous fasin bilong iu and salvation bilong iu for full day.” (Psalm 71:14, 15) Winim wei for feel nogud from hem mas weit, David hem showimaot hapi bikos hem busy for praisem Jehovah and strongim olketa narawan long tru worship.—Psalm 71:23.
For weit long Jehovah hem no olsem taem man hem feel nogud from hem mas weitim wanfala ship wea hem delay for kam. Bat hem olsem hapi wea parents garem taem olketa weitim pikinini bilong olketa for kamap big mekem olketa savve feel praod. Olketa year olsem fulap witim training, instruction, and discipline—wea goal bilong hem, hem for kasem gud samting. Long sem wei tu, iumi savve kasem hapi from iumi helpem olketa narawan for fren gud witim God, taem iumi gohed for weit long Jehovah. Iumi laekem God for appruvim iumi, and gogo sevem iumi tu.
No Lus Hope
For weit long Jehovah hem minim for gohed and garem love and for servem hem and no lusim datfala hope. Samfala taem diswan hem no isi. Plande long olketa servant bilong God distaem stap insaed long olketa community wea pipol tok spoelem eniwan wea laef bilong olketa showaot olketa garem faith long olketa promis bilong God. Tingim example bilong olketa faithful Israelite wea gohed for garem hope taem olketa stap olsem prisoner for 70 year long Babylon. Wanem nao helpem olketa for gohed and garem hope? Masbi olketa readim olketa psalm and datwan hem strongim olketa. Wanfala long olketa psalm wea maet olketa raetem long datfala taem hem sei olsem: “Mi weit for toktok bilong hem. Soul bilong mi weit long Jehovah, winim wei wea man for lukaot hem weit for morning, wea lukluk for morning hem kam. Israel mas gohed for weit long Jehovah.”—Psalm 130:5-7.
Olketa Jew wea gohed for strongim hope bilong olketa taem olketa readim and story abaotem datfala hope kasem reward taem olketa enemy tekovarem Babylon. Plande thousand long olketa faithful Jew kwiktaem travel go bak long Jerusalem. Bible hem sei olsem abaotem datfala taem: “Taem Jehovah tekem bak olketa prisoner bilong Zion, . . . mouth bilong iumi fulap witim laflaf.” (Psalm 126:1, 2) Olketa Jew no givap, bat olketa gohed for strongim faith bilong olketa. And olketa nating givap for singim praise long Jehovah.
Long sem wei, olketa tru Christian wea weit long God long taem wea “olketa samting wea happen long world distaem bae finis,” gohed for waka hard for strongim faith bilong olketa. Olketa studyim Word bilong God, encouragem each other, and gohed for praisem Jehovah long wei for preach abaotem gud nius bilong Kingdom.—Matthew 24:3, 14.
Weit for Kasem Gud Samting From Discipline
Profet bilong God Jeremiah hem raet olsem: “Hem gud tumas for man stap kwaet taem hem weit for salvation bilong Jehovah.” (Lamentations 3:26) Jeremiah hem tingim hao hem bae gud samting sapos pipol bilong Jehovah no komplen abaotem wei wea hem disciplinem olketa taem hem letem enemy for distroem Jerusalem. Bat olketa shud kasem gud samting from datfala experience long wei for ting raonem wei wea olketa no obey and hao olketa need for changem tingting bilong olketa.—Lamentations 3:40, 42.
Long sem wei wea frut hem kamap raep, iumi kasem gud samting from discipline wea kam from Jehovah. Bible hem storyim datfala discipline bilong God olsem: “Olketa wea kasem training from diswan bae garem frut bilong peace, wea hem nao raeteous fasin.” (Hebrews 12:11) Olsem wei wea frut needim taem for kamap raep, iumi needim taem for changem tingting bilong iumi followim datfala training wea iumi kasem from God. Olsem example, sapos iumi duim rong samting wea bae mekem iumi lusim samfala privilege insaed long kongregeson, wei wea iumi willing for weit long God bae helpem iumi for stap klia long wei for feel wikdaon and givap. Long taem olsem, iumi kasem encouragement from toktok bilong David: “Kros bilong [God], hem for lelebet taem nomoa, bat gudfala fasin bilong hem, hem for olowe. Nomata sapos hem krae long evening, long morning hem singaot witim hapi.” (Psalm 30:5) Sapos iumi garem fasin for weit and followim kaonsel wea iumi kasem from Word bilong God and organization bilong hem, taem bilong iumi for “singaot witim hapi” bae kam.
Needim Taem for Kamap Mature
Sapos iu young or no longtaem nomoa iu baptaes, maet iu kwiktaem laek for kasem samfala responsibility insaed long Christian kongregeson. Bat man needim samfala taem for kamap mature long spiritual wei wea mekem hem fit for lukaftarem olketa responsibility olsem. So mekius long olketa year hia for kamap mature long spiritual wei. Olsem example, taem man hem young hem gudfala taem for readim full Bible, for mekem grow olketa Christian fasin, and for kasem savve for mekem pipol kamap disaepol. (Ecclesiastes 12:1) Taem iu hambol for showimaot fasin for weit, long taem wea Jehovah hem markem bae iu kasem samfala moa responsibility.
Iumi need for showimaot patient fasin tu taem iumi tekpart long waka for mekem pipol kamap disaepol. Olsem wei wea wanfala farmer mas gohed for watarem seed go kasem taem wea God mekem hem grow, waka for mekem pipol kamap disaepol hem olsem tu. (1 Corinthians 3:7; James 5:7) For helpem olketa narawan garem faith and tinghae long Jehovah long heart bilong olketa, iumi mas patient for studyim Bible witim olketa for samfala month or maet samfala year. For weit long Jehovah iumi needim patient fasin, nomata sapos long start, olketa student no muv ahed. Bat sapos olketa showimaot lelebet wei for tinghae, maet datwan showimaot hao spirit bilong Jehovah muvim olketa. Taem iu showimaot patient fasin, maet iu savve kasem hapi long wei for lukim hao Jehovah muvim datfala student for kamap wanfala disaepol bilong Christ.—Matthew 28:20.
Showimaot Love Long Wei for Weit
Olsem wanfala example for showimaot hao fasin for weit hem pruv bilong love and trust, tingim samting wea happen long wanfala olo granmami wea stap long wanfala desert long Andes long South America. Hem witim narafala Witness sista nomoa Olketa Jehovah’s Witness wea stap insaed long datfala vilij. Masbi tufala barava luk forward long visit bilong olketa nara Christian brata and sista. Long wanfala taem, tufala weitim traveling overseer for visitim olketa. Hem firstaem for datfala traveling overseer for kasem olketa, bat taem hem go for visitim olketa hem lus and hem no savve faendem vilij bilong tufala. So hem mas go bak and trae moa for kasem tufala wea datwan hem mekem hem delay for tu-thri hour. Taem hem lukim datfala vilij bilong tufala hem midolnaet. From no eni electric kasem datfala vilij, hem sapraes for lukim wanfala laet hem shaen. Hem barava hapi taem hem kasem datfala vilij, from hem lukim hao datfala laet hem shaen from lamp wea datfala olo granmami hem holem! Datfala granmami hem no garem eni daot hao datfala brata bae kam so hem patient for weit.
Witim semkaen wei for showimaot patient fasin iumi hapi for weit long Jehovah. Iumi savve feel sure hem bae keepim olketa promis bilong hem. And olsem datfala traveling overseer, iumi tinghae long olketa wea showimaot love long wei for weit long iumi. Iumi shud no sapraes for savve hao God hem tinghae long olketa wea showimaot fasin for weit long hem. Bible hem sei olsem: “Jehovah hem hapi . . . long olketa wea weit for loving-kaeness bilong hem.”—Psalm 147:11.
[Piksa long page 19]
Olketa wea busy for praisem God hapi taem olketa weit long Jehovah