“Taem for Mekem Evri Samting Kamap Gud Moa” Hem Klosap!
No longtaem bifor Jesus hem go ap long heven, samfala long olketa faithful disaepol bilong hem askem hem: “Lord, bae iu startim moa kingdom bilong Israel long distaem?” Ansa bilong Jesus showimaot hao samfala taem bae go pas bifor Kingdom savve kam. Insaed long taem hia, olketa follower bilong hem bae garem bigfala waka for duim. Olketa bae kamap witness bilong Jesus “long Jerusalem and long Judea and Samaria and go kasem evri farawe ples long earth.”—Acts 1:6-8.
OLKETA no savve finisim datfala assignment insaed tu-thri day, samfala week, or samfala month nomoa. Olketa disaepol no hol bak bat start for preach. Bat olketa no lusim interest long disfala subject bilong wei for evri samting kamap gud moa. Aposol Peter story abaotem diswan long wanfala bigfala crowd wea hipap long Jerusalem, taem hem sei: “Repent, and tan raon mekem hem aotem sin bilong iufala, mekem olketa taem bilong blessing bae kam from Jehovah seleva and mekem hem savve sendem Christ wea hem appointim for iufala, Jesus, wea heven, tru nao, mas holem go kasem taem for mekem evri samting kamap gud moa wea God talem thru long mouth bilong olketa holy profet bilong hem from taem bifor.”—Acts 3:19-21.
Disfala “taem for mekem evri samting kamap gud moa” bae bringim kam “taem bilong blessing” from Jehovah. Profesi hia for evri samting kamap gud moa bae happen long tufala wei. Firstaem, evri samting bae kamap gud moa long spiritual wei, blessing wea hem go ahed distaem. Mek-tu samting, physical paradaes bae kamap long earth bihaen datwan.
Taem for Evri Samting Kamap Gud Moa Hem Start
Olsem aposol Peter hem talem long datfala crowd long Jerusalem, heven hem ‘holem Jesus.’ Diswan go ahed kasem 1914 nomoa, taem Jesus kasem paoa bilong hem and start for rul olsem King wea God appointim. Long datfala taem, olsem Peter talemaot, Jehovah bae “sendem” Son bilong hem long wei wea Hem bae letem Jesus for duim waka bilong hem olsem main wan long purpose bilong God. Bible hem storyim datfala samting wea happen long tokpiksa wei: “And [organization bilong God long heven] bornem wanfala son, wanfala boy, [Kingdom bilong God long hand bilong Jesus Christ] wea bae lukaftarem olketa nation witim iron stik.”—Revelation 12:5.
Bat olketa nation nating want for stap anda long rul bilong Christ. Tru nao, olketa tok strong againstim olketa loyal wan bilong hem long earth wea stap anda long hem, wea iumi savve long olketa distaem olsem Olketa Jehovah’s Witness. Olsem olketa aposol bifor, olketa Witness no hol bak for duim “waka for witness abaotem Jesus.” (Revelation 12:17) Wei for againstim waka wea olketa faithful Christian hia duim kamap long planti kantri. Long 1918, olketa tekem long kot olketa important member bilong sekson long headquarters bilong Watch Tower Society long Brooklyn, New York, from olketa accusim olketa witim giaman samting and judgem olketa long rong wei for stap longtaem insaed prison. For lelebet taem luk olsem datfala witness waka for “go kasem evri farawe ples long earth” hem bae fail.—Revelation 11:7-10.
Bat, long 1919, olketa member bilong headquarters wea stap long prison kamap free and bihaen olketa aotem evribit giaman toktok wea accusim olketa. Olketa kwiktaem go ahed moa for mekem evri samting kamap gud moa long spiritual wei. Start long dat taem, pipol bilong Jehovah enjoyim gudfala spiritual living winim enitaem bifor.
Olketa startim wanfala bigfala waka for teachim pipol bilong evri nation for followim olketa samting wea Christ komandim olketa follower bilong hem for duim. (Matthew 28:20) Hem barava strongim man for lukim samfala wea bifor olketa showimaot olketa fasin olsem animal bat olketa changem wei bilong olketa! Olketa aotem oldfala fasin, wea mekem kamap olketa fasin olsem “kros,” “nogud toktok,” and “dirty toktok,” and werem niufala fasin, “wea thru long stretfala savve hem go ahed for kamap niu fitim image bilong [God] wea creatim.” Long spiritual wei, olketa toktok bilong profet Isaiah go ahed for fulfill distaem: “Wolf [man wea showimaot olketa fasin olsem wolf bifor] bae stap witim pikinini sheep [man wea showimaot hambol fasin], and leopard seleva bae leidaon witim pikinini goat, and pikinini buluka and young lion and olketa animal wea kaikai gud bae stap tugeta.”—Colossians 3:8-10; Isaiah 11:6, 9.
Nara Wei for Evri Samting Kamap Gud Moa Hem Klosap!
For join witim spiritual paradaes wea iumi garem distaem wea kamaot from wei wea evri samting kamap gud moa, taem hem kam klosap tumas for earth bilong iumi kamap paradaes long physical wei. Wanfala smol part long earth hem paradaes taem Jehovah putim tufala grani bilong iumi, Adam and Eve, long garden bilong Eden. (Genesis 1:29-31) Dastawe iumi fit for sei Paradaes bae kamap gud moa. Bat, bifor datwan savve happen, earth mas free from giaman religion wea no honorim God. Olketa bilong politik bilong disfala world nao bae duim diswan. (Revelation 17:15-18) Then, olketa bilong politik and bisnis, witim pipol wea saportim olketa, bae finis evribit. Last samting, olketa lastfala enemy bilong God—Satan datfala Devil and olketa demon bilong hem—bae stap long prison for wan thousand year—long bilong disfala project for evri samting kamap gud moa. Long datfala taem, “drae area and ples wea no garem wata bae singaot from olketa hapi, and olketa drae open ples bae hapi and open olsem saffron.” (Isaiah 35:1) Full earth bae kamap free from trabol. (Isaiah 14:7) Nomata planti million wea dae finis bae laef bak moa long earth. Evriwan bae kasem gud samting bilong ransom sakrifaes wea hem nao mekem evri samting kamap gud moa. (Revelation 20:12-15; 22:1, 2) Bae no eni blind, earpas, or cripple pipol long disfala earth. “No eniwan bae sei: ‘Mi sik.’” (Isaiah 33:24) No longtaem bihaen long end bilong Thousand Year Rul bilong Christ, Devil and olketa demon bilong hem bae kamap free for shortfala taem and bae lukim hao purpose bilong God for earth hem fulfill kasem datfala taem. Gogo, olketa bae finis evribit.—Revelation 20:1-3.
Taem earth kasem end bilong datfala thousand year wea evri samting kamap gud moa, “evri samting wea laef” bae praisem Jehovah, and olketa bae duim olsem for olowe. (Psalm 150:6) Waswe, iu bae stap midolwan long olketa? Iu savve olsem.