Kwestin From Reader
Hu nao “woman” wea Isaiah 60:1 storyim, and wat nao datfala toktok “getap” and ‘shaenim aot’ laet hem minim?
Isaiah 60:1 hem sei: “O woman, iu getap and shaen aot, from laet blo iu kam nao. Glory blo Jehovah hem shaen kam lo iu.” Context blo disfala verse showim hao datfala “woman” piksarem Zion, or Jerusalem, wea hem nao kapitol blo Judah lo datfala taem.a (Isa. 60:14; 62:1, 2) City blo Jerusalem representim datfala full nation. Bat toktok blo Isaiah mekem iumi garem tufala kwestin: First kwestin, wat taem and hao nao Jerusalem “getap” and shaenim aot spiritual laet? Second, hao, toktok blo Isaiah fulfill distaem tu?
Wat taem and hao nao Jerusalem “getap” and shaenim aot spiritual laet? Taem olketa Jew stap olsem prisoner lo Babylon for 70 years, Jerusalem and temple distroe finis. Bat afta olketa blo Media and Persia tekovarem Babylon, olketa Israelite wea stap lo evri ples wea Babylon bin rul ovarem, olketa free for go bak hom and mekem tru worship kamap moa. (Ezra 1:1-4) So start lo 537 B.C.E., wanfala grup blo olketa faithful Israelite from 12-fala tribe go bak lo Jerusalem. (Isa. 60:4) Olketa start for offerim olketa sakrifaes moa lo Jehovah, celebratem olketa festival, and buildim bak temple. (Ezra 3:1-4, 7-11; 6:16-22) Taem olsem, glory blo Jehovah start for shaen moa lo Jerusalem, or pipol blo hem wea kam bak. And from datwan, pipol blo hem start for shaenim aot truth lo olketa nation wea stap lo spiritual darkness.
Bat, profesi blo Isaiah abaotem hao tru worship bae kamap moa no fulfill lo Jerusalem bifor nomoa. Staka Israelite no gohed for obeyim God. (Neh. 13:27; Mal. 1:6-8; 2:13, 14; Matt. 15:7-9) Gogo, olketa rejectim tu datfala Messiah, Jesus Christ. (Matt. 27:1, 2) So lo 70 C.E., Jerusalem and temple hem distroe moa for second taem.
Jehovah talem finis hao datwan bae happen. (Dan. 9:24-27) Datwan showim Jehovah no min for olketa profesi abaotem tru worship wea stap lo Isaiah chapter 60, for fulfill evribit lo Jerusalem bifor.
Hao, toktok blo Isaiah fulfill distaem tu? Yes, bat hao hem fulfill hem join witim nara tokpiksa woman, datfala “Jerusalem antap.” Aposol Paul sei disfala woman, “Hem mami bilong iumi.” (Gal. 4:26) Jerusalem antap hem nao hevenly part lo organization blo God wea insaed datwan hem evri loyal angel blo God. Olketa “pikinini” blo datfala woman hem includim Jesus and 144,000 anointed Christian, olsem Paul wea garem hope for go lo heven. Olketa anointed Christian nao datfala “holy nation”—“Israel bilong God.”—1 Pet. 2:9; Gal. 6:16.
Hao nao Jerusalem antap hem “getap” and ‘shaenim aot laet’? Hem duim datwan thru lo olketa anointed pikinini blo hem lo earth. Distaem bae iumi comparem wat olketa duim witim wat Isaiah chapter 60 profesi abaotem.
Olketa anointed Christian mas “getap” bikos olketa bin stap insaed spiritually darkness bikos lo tokpiksa rabis grass, wea hem olketa apostate teaching wea kamap staka tumas lo mek-tu century C.E. (Matt. 13:37-43) Datwan mekem olketa for kamap prisoner blo Bigfala Babylon, wea hem nao evri false religion lo world. Olketa anointed Christian stap olsem prisoner go kasem “taem wea world hem gogo for finis,” wea datwan hem start lo year 1914. (Matt. 13:39, 40) No longtaem bihaen, lo 1919, olketa kamap free and kwiktaem start for shaenim aot spiritual laet thru lo wei for duim preaching waka.b Insaed olketa year wea go pas, pipol from evri nation kam lo datfala laet, includim olketa last wan blo Israel blo God, wea olketa nao olketa “king” wea Isaiah 60:3 storyim.—Rev. 5:9, 10.
Lo future, olketa anointed Christian bae shaenim aot laet blo Jehovah lo barava spesol wei. Hao nao olketa bae duim datwan? Taem olketa dae, olketa finisim waka blo olketa lo earth and kamap part lo “Niu Jerusalem,” or datfala bride blo Christ wea hem nao 144,000 king and priest.—Rev. 14:1; 21:1, 2, 24; 22:3-5.
Niu Jerusalem bae duim big waka for fulfillim Isaiah 60:1. (Comparem Isaiah 60:1, 3, 5, 11, 19, 20 witim Revelation 21:2, 9-11, 22-26.) Lo sem wei wea Jerusalem lo bifor hem ples wea gavman blo Israel hem stap, datfala Niu Jerusalem, and Christ, bae kamap gavman blo datfala niu system lo future. Hao nao Niu Jerusalem bae “kam daon from heven, from God”? Hem bae duim datwan taem hem focus for duim samting lo disfala earth. Pipol from evri nation and wea obeyim God “bae wakabaot long laet bilong datfala taon.” Olketa bae kamap free from sin and dae. (Rev. 21:3, 4, 24) Then lo datfala taem, bae profesi blo Isaiah and olketa nara profesi abaotem hao evri samting bae kamap gud moa, bae barava fulfill. (Acts 3:21) Datfala waka start taem Christ kamap King and bae hem finis lo end blo Wan Thousand Year Rul blo hem.
a Lo Isaiah 60:1, Niu World Transleison iusim word “woman” instead lo “Zion,” or “Jerusalem,” bikos Hebrew verb wea olketa iusim for “getap” and “shaen aot” hem lo feminine gender, and datfala word “iu” hem olsem tu. So lo languis blo iumi, olketa iusim datfala word “woman” for helpem iumi luksavve diswan hem story abaotem wanfala tokpiksa woman.
b Ezekiel 37:1-14 and Revelation 11:7-12 tu describem disfala spiritual restoration waka for mekem tru worship kamap moa wea start lo 1919. Ezekiel profesi abaotem hao evri anointed Christian bae startim bak tru worship bihaen olketa stap olsem prisoner for longfala taem. Profesi lo Revelation hem refer lo wei wea wanfala smol grup blo olketa anointed brata wea gohed for tekem lead bae start for waka moa bihaen wanfala short taem wea olketa mas stop for duim waka bikos olketa stap lo prison. Lo 1919, olketa kasem appointment for kamap datfala “faithful and wise slave.”—Matt. 24:45; lukim Pure Worship of Jehovah—Restored At Last!, page 118.