Helpem Pipol for Wakabaot Fitim Jehovah

“Mifala . . . no stop for prea for iufala and ask mekem iufala savve . . . wakabaot fitim Jehovah witim goal for mekem hem hapi evribit taem iufala go ahed for garem frut long evri gudfala waka.”—COLOSSIANS 1:9, 10.

1, 2. Wanem nao savve barava givim hapi and wei for satisfae?

“MIFALA stap insaed caravan long wanfala farm. Wei for garem simpol living mekem mifala garem moa taem for kasem pipol witim gud nius. Mifala kasem bigfala blessing bilong privilege for helpem planti for dedicatem laef bilong olketa long Jehovah.”—Wanfala hasband and waef, wea full-taem minister long South Africa.

² Waswe, iu agree hao wei for helpem nara pipol hem givim hapi? Samfala trae evritaem for helpem olketa wea sik, garem need, or lonely—and satisfae from datwan. Olketa tru Christian sure best wei wea olketa savve helpem pipol hem for sharem savve abaotem Jehovah God and Jesus Christ witim olketa. Diswan nomoa savve leadim nara pipol for acceptim ransom bilong Jesus, mekem grow gudfala wei for fren witim God, and then olketa fit for kasem laef olowe.—Acts 3:19-21; 13:48.

3. Wanem kaen help nao iumi laek for lukluk long hem?

³ Bat, waswe long wei for helpem nara pipol wea servem God finis, wea go ahed for followim “Datfala Wei”? (Acts 19:9) Iu barava interest long olketa, bat maet iu no lukim hao iu savve duim moa samting or go ahed for helpem olketa. Or living bilong iu maet mekem hem hard for iu helpem olketa, so datwan katem daon wei for satisfae wea iu savve kasem. (Acts 20:35) Long saed bilong tufala samting hia iumi savve lanem samting from buk bilong Colossians.

4. (a) Wanem nao olketa samting wea go ahed taem Paul raet for olketa long Colossae? (b) Hao nao Epaphras join insaed diswan?

⁴ Taem aposol Paul raet for olketa Christian long Colossae, olketa arrestim and keepim hem long haos long Rome, bat pipol savve visitim hem. From hem fasin bilong hem, Paul mekius long lelebet freedom wea hem garem for preach abaotem Kingdom bilong God. (Acts 28:16-31) Olketa nara Christian savve visitim Paul, maet samfala stap prisoner witim hem tu samtaem. (Colossians 1:7, 8; 4:10) Wanfala nao Epaphras, man wea strong for talemaot gud nius, wea kam from taon bilong Colossae long Phrygia, flat ples wea hae ap long datfala kantri, wea east long Ephesus bilong Asia Minor (distaem hem Turkey). Epaphras duim bigfala waka for startim kongregeson long Colossae, and hem waka hard for olketa kongregeson long Laodicea and Hierapolis wea stap klosap. (Colossians 4:12, 13) Why nao Epaphras go for lukim Paul long Rome, and wanem nao iumi savve lanem from wanem Paul hem duim?

Gudfala Help for Olketa Long Colossae

5. Why nao Paul raetem samting wea hem raetem for olketa long Colossae?

⁵ For mekem hem savve storyim olketa samting wea happen insaed kongregeson long Colossae witim Paul, Epaphras startim hardfala gogo for Rome. Hem story abaotem faith, love, and waka for talemaot gud nius bilong olketa Christian hia. (Colossians 1:4-8) Bat tu, hem talemaot wari bilong hem long olketa nogud samting wea mekem danger kamap for spiritual saed bilong olketa long Colossae. From diswan Paul raetem go wanfala leta wea againstim samfala giaman idea wea gogo raon bilong olketa giaman teacher. Samting wea hem mekhae long hem nao main part wea Jesus Christ shud garem.a Waswe, hem help long wei for strongim olketa main Bible truth nomoa? Long wanem wei moa hem savve helpem olketa long Colossae, and wanem leson nao iumi savve lanem abaotem wei for helpem nara pipol?

6. Paul hem strongim wanem samting long leta bilong hem for olketa long Colossae?

⁶ Long start bilong leta bilong hem, Paul helpem iumi for minim wankaen help wea iumi maet no tingim. Hem gudfala wei for help taem man stap farawe, bikos Paul and Epaphras stap farawe from Colossae. Paul hem sei: “Mifala evritaem thankiu long God, Father bilong Lord Jesus Christ bilong iumi taem mifala prea [footnote, “prea evritaem”] for iufala.” Yes, olketa prea hia hem barava for olketa Christian long Colossae. Paul sei moa: “Dastawe mifala tu, start long taem wea mifala herem diswan, mifala no stop for prea for iufala and ask mekem iufala savve kamap full witim stretfala savve long will bilong hem witim evri wisdom and spiritual savve.”—Colossians 1:3, 9.

7, 8. Planti taem olketa prea bilong iumiseleva and bilong kongregeson story abaotem wanem?

⁷ Iumi savve Jehovah nao hem “Man wea herem prea,” so iumi savve trustim wei wea hem stanbae for herem olketa prea wea iumi talem wea fitim will bilong hem. (Psalm 65:2; 86:6; Proverbs 15:8, 29; 1 John 5:14) Bat, taem iumi prea for nara pipol, hao nao olketa prea bilong iumi?

⁸ Iumi maet planti taem tingim and prea abaotem ‘full sekson bilong olketa brata bilong iumi long world.’ (1 Peter 5:9) Or iumi maet story long Jehovah abaotem olketa Christian and nara pipol long wanfala ples wea kasem disaster or barava nogud samting. Taem olketa disaepol long first-century long nara ples herem nius abaotem bigfala hangre long Judea, iumi sure olketa offerim planti prea for olketa brata bilong olketa bifor olketa sendem go help. (Acts 11:27-30) Long taem bilong iumi, iumi savve planti taem herem olketa prea for full famili bilong olketa brata or abaotem wanfala big sekson bilong olketa brata long olketa Christian meeting, wea planti need for minim and fit for sei “Amen” long hem.—1 Corinthians 14:16.

Talem Prea wea Targetim Need

9, 10. (a) Olketa wanem example nao showaot wei for prea for man wanwan hem fitim? (b) Hao nao Paul kamap man wea pipol prea for hem?

⁹ Nomata olsem, Bible givim iumi olketa example bilong olketa prea for nara pipol wea targetim need, wea talemaot nem bilong man. Tingim toktok bilong Jesus long Luke 22:31, 32. Olketa 11-fala faithful aposol bilong hem stap raonem hem. Evriwan long olketa bae needim saport bilong God long olketa hard taem wea stap long front, and Jesus prea for olketa. (John 17:9-14) Nomata olsem, Jesus chusim Peter, hem barava story abaotem datfala disaepol insaed long prea. Olketa nara example: Elisha prea for God helpem wanfala man, servant bilong hem. (2 Kings 6:15-17) Aposol John prea for Gaius go ahed gud long physical and spiritual wei. (3 John 1, 2) And olketa nara prea targetim samfala difren sekson.—Job 42:7, 8; Luke 6:28; Acts 7:60; 1 Timothy 2:1, 2.

¹⁰ Olketa leta bilong Paul barava mekhae long olketa prea wea targetim need. Hem askem olketa for prea for hem or for hem and olketa wea stap witim hem. Colossians 4:2, 3 read olsem: “Go ahed strong long prea, go ahed for wekap long hem witim wei for talem thankiu, and long semtaem prea for mifala tu, mekem God savve openem door for toktok for mifala, for talemaot holy secret abaotem Christ, from dastawe nao mi stap long prison.” Tingim tu olketa nara example hia: Romans 15:30; 1 Thessalonians 5:25; 2 Thessalonians 3:1; Hebrews 13:18.

11. Taem hem long Rome, Epaphras prea for hu nao?

¹¹ Diswan happen tu long fren bilong Paul long Rome. “Epaphras, wea hem bilong iufala, . . . sendem hello bilong hem long iufala, hem trae hard evritaem for prea for iufala.” (Colossians 4:12) Datfala word “trae hard” savve minim “stragol,” olsem wanfala sports man long olketa game bifor. Waswe, Epaphras prea strong nomoa for evri brata long earth or for olketa tru worshiper long full Asia Minor? Paul showimaot hao Epaphras hem prea for olketa long Colossae. Epaphras savve long samting wea kasem olketa. Iumi no savve long nem bilong evriwan long olketa, and iumi no savve tu long wanem problem nao kasem olketa, bat tingim samfala samting wea maet happen. Maet young Linus hem faet againstim olketa idea bilong pipol long datfala taem, and Rufus maet needim strong for no go bak long olketa kastom bilong Jew religion wea hem followim bifor. From Persis garem hasband wea no biliv, hem needim fasin for stand strong and wisdom for teachim olketa pikinini bilong hem insaed long Lord, and waswe, Asyncritus, wea garem bigfala sik, hem needim extra comfort? Yes, Epaphras savve long olketa insaed hom kongregeson bilong hem, and hem prea strong abaotem olketa bikos hem and Paul laekem olketa loyal wan olsem for wakabaot fitim Jehovah.

12. Hao nao iumi savve targetim need long prea bilong iumiseleva?

¹² Waswe, iu lukim example for iumi—wanfala wei for iumi helpem nara pipol? Olsem iumi savve, planti taem olketa pablik prea long olketa Christian meeting no barava targetim wanfala point for fitim planti difren pipol wea stap long audience. Bat iumi savve targetim need taem iumiseleva prea and famili prea. Taem iumi askem God for gaedem and blessim evri traveling overseer or spiritual shepherd, waswe, fit for iumi samtaem targetim samting? Olsem example, waswe sapos iu talem nem bilong circuit overseer wea visitim kongregeson bilong iu or conductor bilong Kongregeson Buk Study bilong iu? Long Philippians 2:25-28 and 1 Timothy 5:23, Paul talemaot wari bilong hem abaotem health bilong Timothy and Epaphroditus. Waswe, iumi tu savve showimaot semkaen wei for interest long olketa wea sik wea iumi savve long nem bilong olketa?

13. Wanem kaen samting nao fitim for iumi storyim insaed olketa prea bilong iumiseleva?

¹³ Tru, iumi mas stap klia long wei for poke-nose insaed bisnis bilong nara pipol, bat hem stret for olketa prea bilong iumi showimaot trufala interest for olketa wea iumi savve and lovem. (1 Timothy 5:13; 1 Peter 4:15) Maet wanfala brata lusim waka bilong hem, and iumi no savve givim hem narafala waka. Nomata olsem, iumi savve talemaot nem bilong hem and storyim hard taem wea hem kasem insaed prea bilong iumiseleva. (Psalm 37:25; Proverbs 10:3) Waswe, iumi savve long wanfala singol sista wea kamap olo wea no garem hasband and pikinini bikos hem disaed strong for marit “only insaed long Lord”? (1 Corinthians 7:39) Long prea bilong iuseleva, waswe sapos iu askem Jehovah for blessim hem and helpem hem go ahed loyal insaed service bilong hem? Olsem nara example, tufala elder maet givim kaonsel long wanfala brata wea mekem mistek. Waswe sapos tufala hia talem nem and storyim hem insaed private prea bilong tufala samfala taem?

14. Hao nao olketa prea wea targetim need join witim wei for helpem nara pipol?

¹⁴ Planti chance stap for iu storyim tu insaed prea bilong iuseleva olketa wea needim saport, comfort, wisdom, and holy spirit, or eni long olketa frut wea kamaot from holy spirit. From olketa stap farawe or from nara samting, maet iu faendem hem hard for givim help stret or long material saed long olketa. Bat no forget for prea for olketa brata and sista bilong iu. Iu savve olketa want for wakabaot fitim Jehovah, bat olketa maet barava needim help for duim datwan evritaem. Wanfala key for help nao olketa prea bilong iu.—Psalm 18:2; 20:1, 2; 34:15; 46:1; 121:1-3.

Duim Samting for Strongim Nara Pipol

15. Why nao iumi shud interest long lastfala part bilong Colossians?

¹⁵ Tru, strongfala prea wea targetim samting hem no only wei for helpem nara pipol, especially olketa wea iu lovem. Buk bilong Colossians showimaot datwan klia. Planti savveman sei bihaen Paul raet abaotem olketa teaching and gudfala kaonsel, hem addim olketa toktok bilong hello nomoa for difren pipol. (Colossians 4:7-18) Nomata olsem, iumi lukim finis hao disfala last part bilong buk garem gudfala kaonsel, and iumi savve lanem moa samting from disfala sekson.

16, 17. Wanem nao iumi savve talem abaotem olketa brata wea nem bilong olketa stap long Colossians 4:10, 11?

¹⁶ Paul hem raet olsem: “Aristarchus man wea mi tufala stap long prison sendem kam hello bilong hem long iufala, and tu Mark kasin bilong Barnabas, (diswan wea iufala kasem komand for welkamim sapos hem kasem iufala,) and Jesus wea olketa kolem Justus, hem nao bilong olketa wea circumcise. Olketa nomoa waka witim mi for kingdom bilong God, and olketa nao help for strongim mi.”—Colossians 4:10, 11.

¹⁷ Long there Paul hem talemaot nem bilong samfala brata wea olketa barava fit for hem talem samting abaotem olketa. Hem sei olketa bilong sekson wea circumcise, olketa Jew. Planti Jew wea circumcise stap long Rome, and samfala kamap Christian. Nomata olsem, olketa wea Paul story abaot, olketa nao wan wea kam for helpem hem. Luk olsem olketa no hol bak for kaban witim olketa Gentile Christian, and olketa hapi for share witim Paul for preach long olketa Gentile.—Romans 11:13; Galatians 1:16; 2:11-14.

18. Hao nao Paul praisem samfala wea stap witim hem?

¹⁸ Lukim toktok bilong Paul: “Olketa nao help for strongim mi.” Hem iusim wanfala Greek word wea kamap wanfala taem nomoa insaed long Bible. Planti man transleitim olsem “comfort.” Bat, narafala Greek word (pa·ra·ka·le’o) nao olketa savve evritaem transleitim “comfort.” Paul iusim datfala word long disfala leta bat no long Colossians 4:11.—Matthew 5:4; Acts 4:36; 9:31; 2 Corinthians 1:4; Colossians 2:2; 4:8.

19, 20. (a) Wanem nao mining bilong toktok wea Paul talem abaotem olketa brata wea helpem hem long Rome? (b) Wanem nao olketa wei wea maet olketa brata helpem Paul?

¹⁹ Luk olsem olketa wea Paul talem nem bilong olketa duim moa samting winim wei for givim comfort long saed bilong toktok nomoa. Samfala taem olketa iusim Greek word wea olketa transleitim “help for strongim” long Colossians 4:11 long olketa buk bilong world, for minim wanfala medicine for daonem pain. New Life Version Bible read olsem: “Olketa barava helpem mi!” Today’s English Version sei: “Olketa helpem mi long bigfala wei.” Wanem nao maet olketa Christian brata wea stap klosap long Paul duim for helpem hem?

²⁰ Paul savve garem olketa visitor, bat planti samting nao hem no savve duim, olsem for baem olketa main samting wea hem needim—kaikai and kaleko for cold season. Hao nao hem bae baem olketa scroll for study or baem samting for raetraet long hem? (2 Timothy 4:13) Waswe, iu no ting olketa brata hia helpem Paul witim olketa need bilong hem, olsem go baem samting long stoa or for duim samting for hem? Maet hem laek for chekim and buildimap wanfala kongregeson. From hem stap long prison, hem no savve duim olsem, so olketa brata hia maet go visit for Paul, tekem olketa message, and tekem kam bak olketa report. Datwan barava strongim hem!

21, 22. (a) Why nao toktok long Colossians 4:11 shud mekem iumi interest? (b) Wanem nao samfala wei wea iumi savve followim example bilong olketa wea stap witim Paul?

²¹ Samting wea Paul raetem abaotem “help for strongim” hem helpem iumi for savve hao iumi savve helpem nara pipol. Maet olketa wakabaot fitim Jehovah long olketa mark bilong hem saed long fasin, attendim olketa Christian meeting, and share insaed waka for preach. From datwan olketa fit for kasem toktok wea showaot iumi tinghae long olketa. Bat waswe, iumi savve duim moa samting for olsem ‘help wea strongim’ olsem olketa wea helpem Paul?

²² Sapos iu savve long wanfala sista wea wise for followim 1 Corinthians 7:37 bat distaem hem no garem famili wea klos long hem, waswe, iu savve invaetem hem long samfala samting wea famili duim, maet for kaikai witim famili or attendim smol party witim olketa fren or relative? Waswe sapos iu invaetem hem for gogo witim famili bilong iu long wanfala convention or holiday? Or askem hem for kam witim iu sapos fitim taem iu go for baem kaikai. Iu savve duim olketa sem samting hia for olketa widow woman or widow man, or maet olketa wea no savve draev. Iu savve kasem reward for herem experience bilong olketa or kasem advaes from savve bilong olketa for smol samting olsem for chusim kaikai or baem kaleko for olketa pikinini. (Leviticus 19:32; Proverbs 16:31) Samting wea kamaot from diswan nao wei for feel klos wea moa big. Then bae olketa feel moa free for askem help bilong iu sapos olketa needim medicine long hospital, or samting olsem. Luk olsem olketa brata wea stap witim Paul long Rome givim gudfala help wea fitim and strongim hem, olsem help bilong iu savve duim. Long datfala taem and distaem tu wanfala extra blessing hem for mekem moa strong datfala love, and iumi disaed strong for servem Jehovah tugeta long loyal wei.

23. Hem gud sapos iumi wanwan iusim taem for duim wanem?

²³ Evriwan long iumi savve ting raonem olketa samting wea disfala article storyim. Olketa hia example nomoa, bat olketa savve mekem iumi tingim olketa really samting, wea iumi savve kamap wanfala “help for strongim” olketa brata and sista bilong iumi long wei wea moa big. Diswan no minim iumi followim tingting bilong olketa humanitarian (pipol wea helpem narawan for garem gudfala living). Datwan hem no goal bilong olketa brata wea Colossians 4:10, 11 storyim. Olketa hia ‘olketa wakman witim iumi for kingdom bilong God.’ Wei wea wanfala man kasem strong hem join evribit witim datwan. Letem datwan olsem tu for iumi.

24. Wanem nao main reason for iumi prea for and trae hard for strongim nara pipol?

²⁴ Iumi talem nem bilong olketa narawan insaed prea bilong iumiseleva and trae hard for strongim olketa bikos long diswan: Iumi biliv hao olketa brata and sista bilong iumi laek for “wakabaot fitim Jehovah witim goal for mekem hem hapi evribit.” (Colossians 1:10) Datwan hem join witim nara samting wea Paul storyim taem hem raet abaotem olketa prea bilong Epaphras for saed bilong olketa Colossian, for olketa savve “standap evribit witim biliv wea strong long full will bilong God.” (Colossians 4:12) Hao nao iumiseleva savve duim datwan? Bae iumi lukim.

[Footnote]

Waswe, Iu Lukim?

• Hao nao iumi savve help long wei wea moa big long olketa prea bilong iumiseleva?

• Long wanem wei nao samfala Christian olsem “help for strongim” Paul?

• Long wanem kaen taem nao iumi savve kamap “help for strongim” narawan?

• Wanem nao goal for prea for and lukaotem wei for strongim olketa brata and sista bilong iumi?

[Piksa long page 18]

Waswe, iu savve invaetem nara Christian for go aot witim famili bilong iu?

[Credit Line]

Courtesy of Green Chimney’s Farm