Wanfala Spesol Announcement
LONG end bilong annual meeting bilong Watch Tower Bible and Tract Society bilong Pennsylvania long October 7, 2000, chairman, John E. Barr bilong Governing Body hem talem wanfala spesol announcement. Disfala announcement hem storyim samting go moa from olketa tok wea Theodore Jaracz and Daniel Sydlik givim firstaem long datfala day.—Lukim page 12-16 and 28-31 bilong disfala magasin.
Taem hem talem wanfala important point, Brata Barr hem sei: “‘Datfala faithful and wise slave’ and Governing Body bilong hem lukaftarem olketa samting wea moa hae and wea affectim staka moa samting winim olketa samting wea olketa givim long olketa legal corporation for lukaftarem. Insaed purpose bilong olketa charter bilong olketa corporation hia, hem olketa samting wea garem spialaen. Bat masta bilong iumi, Jesus Christ, hem appointim faithful slave class ovarem ‘evri samting bilong hem’ wea minim olketa Kingdom interest hia long earth.”—Matthew 24:45-47.
Abaotem disfala Pennsylvania corporation, Brata Barr hem sei moa: “Start from taem wea hem kamap wanfala corporation long 1884, Watch Tower Bible and Tract Society bilong Pennsylvania hem duim wanfala important part long history bilong iumi distaem. Nomata olsem, hem wanfala legal society wea stap for ‘datfala faithful and wise slave’ iusim long taem wea fitim nomoa .”
Insaed tok bilong tufala, Brata Sydlik and Jaracz explainim hao wei wea “datfala faithful and wise slave” kasem responsibility for lukaftarem evri samting bilong Lord long earth, no stopem datfala slave class for letem olketa man wea fit midolwan long “nara sheep” for kea for samfala responsibility saed long administration. (John 10:16) And no eni reason stap from Scripture wea sei evriwan long olketa director bilong olketa legal corporation wea Olketa Jehovah Witness iusim mas olketa anointed Christian.
Brata Barr talem audience hao no longtaem go nomoa, samfala member bilong Governing Body bilong Olketa Jehovah’s Witness wea waka olsem olketa director and officer, disaed seleva for lusim waka bilong olketa for insaed long olketa board bilong director bilong olketa corporation long United States wea “datfala faithful and wise slave” iusim. Olketa electim samfala brata from nara sheep class wea olketa savve trustim for changem olketa.
Disfala disison hem barava help. Hem givim moa taem long olketa member bilong Governing Body for redyim spiritual kaikai and for kea for spiritual need bilong olketa brata evriwea long world.
Taem hem finisim tok, chairman sei long datfala hapi audience bilong hem: “Nomata olketa givim go olketa difren kaen legal waka and waka for organizem samting long olketa overseer wea garem experience, . . . evriwan long olketa serve anda long spiritual lead bilong Governing Body. . . . Iumi evriwan luk long Jehovah thru long prea for blessing bilong hem long hard waka bilong iumi for duim will bilong hem witim wan mind, for givim honor and glory long big nem bilong hem.”