Wei wea Governing Body Hem Difren From Wanfala Legal Corporation
START kam long January 1885 olketa holem olketa annual meeting bilong Watch Tower Bible and Tract Society of Pennsylvania. Long taem olketa go ahed for hipimap olketa anointed Christian long end bilong mek 19 century, olketa director and officer bilong disfala corporation garem hope for go long heven. Tru nao, klosap evritaem hem olsem.
Wanfala taem nomoa hem no olsem. Long 1940, Hayden C. Covington—wea long datfala taem hem lawyer bilong Society and wanfala bilong olketa “nara sheep,” wea hope for stap long earth—olketa chusim hem olsem wanfala director bilong Society. (John 10:16) Hem serve olsem vice president bilong Society from 1942 go kasem 1945. Long datfala taem, Brata Covington hem finis olsem wanfala director for fitim wanem olketa tingse hem will bilong Jehovah long datfala taem—for evri director and officer bilong Pennsylvania corporation mas olketa anointed Christian. Lyman A. Swingle changem Hayden C. Covington long board of directors, and olketa electim Frederick W. Franz olsem vice president.
Why nao olketa servant bilong Jehovah biliv evri director and officer bilong Watch Tower Bible and Tract Society of Pennsylvania shud olketa anointed Christian? Bikos long datfala taem, pipol tingim datfala board bilong olketa director and officer bilong Pennsylvania corporation olsem sekson bilong Governing Body bilong Olketa Jehovah’s Witness, wea evri member bilong hem olowe bin olketa wea spirit anointim.
Wanfala Spesol Annual Meeting
Long annual meeting long October 2, 1944, long Pittsburgh, olketa member bilong Pennsylvania corporation acceptim sixfala resolution wea changem charter bilong hem. Datfala charter hem provaedem olketa voting share long olketa wea mekem contribution bilong selen for waka bilong Society, bat mek-thri change hem finisim datwan. Wanfala report for datfala annual meeting hem sei: “Namba bilong olketa wea savve member bilong Society bae no winim 500 . . . Each wan wea olketa chusim mas wanfala full-taem servant bilong Society or wanfala part-taem servant bilong wanfala company [kongregeson] bilong Olketa Jehovah’s Witness and mas showimaot spirit bilong Lord.”
Bihaen datwan, olketa wea kamap director mas kasem datwan from vote bilong olketa wea barava dedicate long Jehovah, nomata haomas selen olketa givim for helpem Kingdom waka go ahed. Diswan kamap samting wea agree witim olketa change for mekem samting moabeta wea isisi kamap, wea Isaiah 60:17 talemaot bae happen, wea hem sei: “Winim copper mi bae tekem kam gold, and winim iron mi bae tekem kam silver, and for changem olketa ston, iron; and mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” Taem hem storyim “olketa overseer” and “olketa man for givim waka for iufala,” disfala profesi hem point go long olketa samting wea kamap moabeta saed long wei wea pipol bilong Jehovah duim olketa samting insaed long organization bilong hem.
Disfala important step for mekem organization followim theocratic wei hem kam long end bilong datfala “tu thousand thri handred evening and morning,” wea Daniel 8:14 story abaotem. Long datfala taem “datfala holy ples” hem “barava kamap stret moa.”
Bat bihaen long datfala spesol annual meeting long 1944, wanfala important kwestin hem still stap. From pipol tingim datfala sevenfala member bilong board bilong olketa director bilong Pennsylvania corporation olsem Governing Body long datfala taem, waswe, diswan minim hao Governing Body no enitaem savve garem winim sevenfala anointed Christian insaed long hem? And tu, from olketa member bilong datfala corporation chusim olketa director, waswe, olketa member bilong corporation nao chusim olketa member bilong Governing Body long datfala annual meeting each year? Waswe, olketa director and officer bilong Watch Tower Bible and Tract Society of Pennsylvania and olketa member bilong Governing Body semsem or difren?
Narafala Annual Meeting wea Spesol
Olketa kwestin hia kasem ansa long annual meeting long October 1, 1971. Long datfala taem, wanfala long olketa speaker hem storyim hao Governing Body bilong “faithful and wise slave” hem start planti handred year bifor long Watch Tower Bible and Tract Society of Pennsylvania.” (Matthew 24:45-47) Wanfala governing body hem kamap long Pentecost bilong 33 C.E., winim 1,800 year bifor datfala Pennsylvania corporation hem start. Long firstaem, governing body hem garem no 7-fala man, bat 12-fala aposol. Luk olsem, namba bilong olketa kamap moa big bihaen, bikos “olketa aposol and older man long Jerusalem” go ahed for lead.—Acts 15:2.
Long 1971 datfala sem speaker minim hao olketa member bilong Watch Tower Society no savve vote for hu nao bae olketa member bilong Governing Body wea anointed. Why nao olsem? “Bikos” hem sei “no eni man appointim governing body bilong datfala ‘slave’ class. Jesus Christ, Hed bilong trufala Christian kongregeson and Lord and Masta bilong ‘faithful and wise slave’ class . . . appointim olketa. So hem klia hao, no eni member bilong eni legal corporation savve vote for hu nao olketa member bilong Governing Body.
Taem hem go ahed datfala speaker talem disfala barava important toktok: “Governing body hem no garem olketa officer olsem Board of Directors bilong Society hem garem, olsem, president, vice president, secretary-treasurer and assistant secretary-treasurer. Hem garem chairman nomoa.” For planti year, president bilong Pennsylvania corporation hem main wan long olketa member bilong Governing Body tu. Diswan bae finis nao. Nomata olketa no semsem saed long savve and experience bilong olketa, olketa member bilong Governing Body bae semsem saed long responsibility bilong olketa. Speaker hem go ahed for sei: “Eni member bilong governing body savve chairman and no need for president bilong . . . Society . . . long semtaem. Evri samting hem depend long wei wea olketa long governing body iusim for each wan share for serve olsem chairman.”
Long datfala spesol annual meeting long 1971, olketa storyim hao olketa member bilong Governing Body wea spirit anointim olketa, difren from olketa director bilong datfala Pennsylvania corporation. Nomata olsem, olketa member bilong Governing Body go ahed for serve olsem olketa director and officer bilong Society. Bat, distaem, disfala kwestin kamap: Waswe, eni reason from Bible stap for sei olketa director bilong Watch Tower Bible and Tract Society of Pennsylvania mas olketa member bilong Governing Body?
Ansa hem nomoa. Datfala Pennsylvania corporation hem no only legal corporation wea Olketa Jehovah’s Witness iusim. Samfala narawan stap. Wanfala hem Watchtower Bible and Tract Society of New York, Incorporated. Hem helpem waka bilong iumi long United States. Hem klia hao blessing bilong Jehovah hem stap long datfala corporation, nomata klosap evriwan long olketa director and officer olketa bilong “nara sheep.” Long Britain, olketa iusim International Bible Students Association. Long olketa nara kantri, olketa iusim olketa nara legal corporation for helpem Kingdom waka. Evriwan long olketa waka tugeta for help and duim part bilong hem for mekem waka for preach abaotem gud nius hem go ahed evriwea long earth. Nomata wea nao olketa stap or hu nao serve olsem olketa director or officer, Governing Body nao iusim olketa and gaedem olketa corporation hia long theocratic wei. So, olketa corporation olsem garem waka for duim for helpem Kingdom waka.
Hem helpem iumi for garem olketa legal corporation. Long disfala wei iumi obeyim olketa law bilong kantri, olsem Word bilong God askem iumi for duim. (Jeremiah 32:11; Romans 13:1) Olketa legal corporation helpem waka bilong iumi for spreadim Kingdom message long wei for printim olketa Bible, buk, magasin, brochure, and nara information. And tu, olketa legal corporation olsem help for deal witim olketa samting saed long hu nao ownim land, relief waka, olketa kontrak for iusim olketa ples for convention, and olketa samting olsem. Iumi thankiu long olketa corporation olsem for waka wea olketa duim.
Olketa Mekhae Long Nem Bilong Jehovah
Long 1944, olketa changem Article 11 bilong Watch Tower Bible and Tract Society charter, for strongim wanem nao olketa goal bilong disfala corporation. Olsem charter hem talem, insaed long olketa purpose bilong Society hem nao disfala main purpose: “For preachim gospel bilong kingdom bilong God anda long Christ Jesus long evri nation olsem wanfala witness long nem, word and wei wea Olmaeti God JEHOVAH hem barava hae winim eniwan.”
Start kam long 1926 ‘faithful slave’ hem mekhae long nem bilong Jehovah. Barava important year hem 1931, taem Olketa Bible Student acceptim datfala nem Olketa Jehovah’s Witness. (Isaiah 43:10-12) Samfala long olketa pablikeson wea mekhae long nem bilong God hem Jehovah (1934), “Let Your Name Be Sanctified” (1961), and “The Nations Shall Know That I Am Jehovah”—How? (1971).
Barava spesol wan long olketa nao hem New World Translation of the Holy Scriptures, wea olketa pablisim evri part bilong hem long English long 1960. Hem garem nem bilong Jehovah long evri ples wea Tetragrammaton hem stap long olketa Hebrew Scripture. Disfala transleison garem tu nem bilong God long 237 ples insaed long Olketa Christian Greek Scripture, wea olketa putim bihaen olketa careful for mek sure wea nao hem shud go. Iumi thankiu hao, long olketa difren wei, Jehovah hem letem datfala “slave” and Governing Body bilong hem for iusim olketa samting wea olketa garem for pablisim olketa buk and olketa legal corporation for talemaot nem bilong hem long full earth!
Mekhae Long Wei for Givimaot Word Bilong God
Pipol bilong Jehovah evritaem givim witness abaotem nem bilong hem and saportim Word bilong hem long wei for pablisim and givimaot planti million Bible pablikeson and Bible tu. Long first part bilong mek-19 century, Watch Tower Society kamap wan wea ownim copyright bilong The Emphatic Diaglott, Greek-English interlinear edition bilong olketa Christian Greek Scripture bilong Benjamin Wilson. Society pablisim wanfala edition bilong King James Version bilong Olketa Bible Student wea garem wanfala 500-page appendix. Long 1942 hem pablisim King James Version witim olketa reference. Then long 1944 Society start for printim American Standard Version bilong 1901, wea iusim nem bilong God. Nem bilong Jehovah stap tu insaed The Bible in Living English, wea Steven T. Byington nao wakem, wea Society pablisim long 1972.
Olketa legal corporation wea Olketa Jehovah’s Witness iusim hem help for printim and givimaot evri Bible transleison hia. Bat samting wea barava showaot, hem barava klos wei wea Watch Tower Society and datfala grup bilong olketa anointed Witness bilong Jehovah wea insaed long New World Bible Translation Committee barava waka tugeta long klos wei. Iumi hapi hao kam kasem distaem olketa printim winim 106,400,000 copy bilong disfala transleison nomata full wan or samfala part bilong hem long 38 languis. Tru nao, Watch Tower Bible and Tract Society of Pennsylvania hem wanfala Bible society!
Christ hem appointim ‘faithful slave’ for ‘keepim evri samting bilong masta bilong hem.’ Insaed long diswan hem olketa building and samting long hedquarter long New York State, U.S.A., and 110 branch wea stap raonem world. Olketa member bilong slave class savve hao Jesus bae askem olketa for givim ansa for hao nao olketa bin iusim samting wea hem givim for olketa. (Matthew 25:14-30) Bat, diswan no stopem ‘slave’ for letem olketa overseer wea kasem mark midolwan long olketa “nara sheep” for kea for olketa responsibility saed long law and administration. Tru nao, diswan letem olketa member bilong Governing Body for spendem moa taem “for prea and for ministry bilong word.”—Acts 6:4.
Sapos olketa samting wea happen long world no stopem, Governing Body, wea hem stand for “datfala faithful and wise slave,” bae mekius long olketa legal corporation. Olketa barava help, bat waka savve go ahed nomata olketa no stap. Sapos gavman tambuim wanfala legal corporation, preaching waka bae still go ahed. Nomata distaem, long olketa land wea gavman tambuim waka bilong iumi and no eni legal corporation stap, olketa go ahed for talemaot Kingdom message, mekem olketa disaepol, and evri samting go ahed for grow. Diswan hem happen bikos Olketa Jehovah’s Witness plantim and watarem, and ‘God nao mekem hem grow.’—1 Corinthians 3:6, 7.
Taem iumi luk go long future, iumi sure hao Jehovah bae kea for olketa spiritual and material need bilong pipol bilong hem. Hem and Son bilong hem, Jesus Christ, bae go ahed for provaedem gaedens and saport wea iumi needim for finisim datfala Kingdom-preaching waka. Tru tumas, eni samting wea iumi duim olsem olketa servant bilong God iumi duim ‘no witim army, or paoa, bat witim spirit bilong Jehovah.’ (Zechariah 4:6) Dastawe iumi prea for help bilong Jehovah, from iumi savve hao witim strong wea hem givim, iumi bae fit for finisim datfala waka wea hem givim iumi for duim insaed long disfala taem bilong end!