Waswe, Iu Live Followim Dedication Bilong Iu?

“Nomata wanem iufala duim, duim witim full-soul for Jehovah, and no for man.”—COLOSSIANS 3:23.

1. Long mining bilong world, wanem nao datfala word “dedication” hem minim?

HAO nao olketa sportsman duim barava best bilong olketa? Long soccer, basketball, baseball, ranran, golf, or eni nara sport, olketa best wan kasem barava top only thru long wei for dedicate evribit. Olketa mas barava fit saed long body and mind. Diswan fitim wanfala mining bilong datfala word “dedicate,” wea hem “givim best evribit long wanfala tingting or akson.”

2. Wanem nao “dedication” hem minim insaed long Bible? Givim example.

² Bat, wanem nao “dedication” hem minim long Bible? “Dedicate” hem kam from wanfala Hebrew word wea garem mining for “stap separate; kamap separate; muv awe.”a Long Israel bifor, Hae Priest Aaron werem long turban datfala “holy saen bilong dedication,” wea hem wanfala pis gold wea olketa katem raeting long hem wea sei “Holy fasin hem bilong Jehovah.” Datwan hem olsem wanfala reminder long hae priest for no duim eni samting wea spoelem temple “bikos saen bilong dedication, anointing oil bilong God bilong hem, hem stap antap long hem.”—Exodus 29:6; 39:30; Leviticus 21:12.

3. Hao nao dedication shud affectim fasin bilong iumi?

³ From diswan iumi savve lukim hao dedication hem minim serious samting. Hem minim man seleva willing for talemaot hem wanfala servant bilong God, and man mas garem klin fasin. So, iumi minim why nao aposol Peter talem moa disfala toktok bilong Jehovah: “Iufala mas holy, from mi nao holy.” (1 Peter 1:15, 16) Olsem olketa Christian wea dedicate, iumi garem bigfala responsibility for live followim dedication bilong iumi, stap faithful go kasem end. Bat wanem nao insaed long Christian dedication?—Leviticus 19:2; Matthew 24:13.

4. Hao nao iumi kasem step bilong dedication, and hem olsem wanem?

⁴ Bihaen iumi kasem stretfala savve long Jehovah God and olketa purpose bilong hem and Jesus Christ and part wea hem garem insaed olketa purpose hia, iumiseleva disaed for servem God witim full heart, mind, soul, and strong. (Mark 8:34; 12:30; John 17:3) Datwan hem olsem promis bilong man seleva, hem dedicate evribit long God. Dedication bilong iumi hem no samting wea seknomoa feeling muvim iumi for duim. Iumi ting raonem gud and prea abaotem, iusim paoa bilong gudfala tingting. So, hem no wanfala disison for lelebet taem nomoa. Iumi kanduit for olsem samwan wea start for houm garden and then givap taem hem duim haf nomoa bikos hem hard waka tumas or bikos luk olsem harvest taem hem farawe tumas. Tingim olketa example bilong samfala wea ‘holem go hou’ bilong theocratic responsibility nomata wanem.—Luke 9:62; Romans 12:1, 2.

Olketa No Rejectim Dedication Bilong Olketa

5. Hao nao Jeremiah hem wanfala nambawan example bilong wanfala servant bilong God wea dedicate?

⁵ Profesi ministry bilong Jeremiah hem go ahed winim 40 year (647-607 B.C.E.), and hem no wanfala isi assignment. Hem barava luksavve long samting wea hem hard for duim. (Jeremiah 1:2-6) Hem need for garem and go ahed strong for feisim olketa stonhed pipol bilong Judah evriday. (Jeremiah 18:18; 38:4-6) Bat, Jeremiah trustim Jehovah God, wea strongim hem mekem hem kamap wanfala servant bilong God wea barava dedicate.—Jeremiah 1:18, 19.

6. Wanem example nao aposol John showimaot for iumi?

⁶ Waswe long faithful aposol John, wea stap prisoner long hard ples long island bilong Patmos taem hem olo, from hem “tok abaotem God and givim witness long Jesus”? (Revelation 1:9) Hem go ahed strong and live followim dedication bilong hem olsem wanfala Christian for samting olsem 60 year. Hem stap bihaen taem Jerusalem finis evribit long hand bilong army bilong Rome. Hem garem privilege for raetem wanfala Gospel, thrifala leta, and buk bilong Revelation, wea hem luk ahed long war bilong Armageddon. Waswe, hem givap nao bihaen hem lanem hao Armageddon bae no kam taem hem laef yet? Waswe, hem wikdaon long wei for no interest? Nomoa, John stap faithful go kasem dae bilong hem, hem savve hao nomata “taem wea set finis hem klosap,” wei wea olketa vision bilong hem bae fulfill bae kamap bihaen.—Revelation 1:3; Daniel 12:4.

Olketa Example Bilong Dedication Distaem

7. Hao nao wanfala brata hem showimaot gudfala example bilong Christian dedication?

⁷ Long distaem, planti thousand faithful Christian bin strong for live followim dedication bilong olketa nomata olketa no stap laef for lukim Armageddon. Wanfala olsem nao hem Ernest E. Beavor long England. Hem kamap wanfala Witness long 1939 long start bilong World War II, hem sellim wanfala bisnis for tek-foto for nius mekem hem duim full-taem ministry. Bikos hem keepim Christian wei for no teksaed, hem go long prison for tufala year. Famili bilong hem saportim hem, and long 1950 thrifala pikinini bilong hem attendim Watchtower Bible Skul Bilong Gilead for kasem training olsem missionary, long New York. Brata Beavor hem barava strong for preach dastawe olketa fren bilong hem kolem hem Armageddon Ernie. Hem loyal for live followim dedication bilong hem, and go kasem dae bilong hem long 1986, hem talemaot wei wea war bilong God, Armageddon, hem klosap tumas. Hem no ting long dedication bilong hem olsem wanfala kontrak witim God for lelebet taem nomoa!b—1 Corinthians 15:58.

8, 9. (a) Wanem example nao planti young man long Spain showimaot long taem bilong rul bilong Franco? (b) Wanem nao olketa kwestin wea fitim?

⁸ Narafala example bilong strong wea nating katdaon hem kam from Spain. Long rul bilong Franco (1939-75), planti handred young Witness wea dedicate olketa stand strong olsem Christian wea no teksaed. Planti long olketa stap tenfala year or moa insaed olketa army prison. Wanfala Witness, Jesús Martín, kasem judgment for stap 22 year insaed prison. Olketa whipim hem nogud taem hem stap long army prison long North Africa. No eni samting hia hem isi, bat hem nating lusim faith.

⁹ Planti taem, olketa young man hia no savve wanem taem, or sapos, olketa bae kamap free, bikos olketa garem judgment for stap staka year long prison. Nomata olsem, olketa go ahed faithful and keepim strong for ministry taem olketa insaed prison. Taem evri samting start for kamap moabeta long 1973, planti long olketa Witness hia, wea kasem winim 30 year finis, olketa kamap free from prison and stretawe go insaed long full-taem ministry, samfala kamap spesol pioneer and traveling overseer. Olketa live followim dedication bilong olketa long prison, and go ahed for duim olsem taem olketa kamap free.c Waswe long iumi distaem? Waswe, iumi faithful long dedication bilong iumi olsem olketa loyal wan hia?—Hebrews 10:32-34; 13:3.

Stretfala Tingting Long Dedication Bilong Iumi

10. (a) Hao nao iumi mas ting long dedication bilong iumi? (b) Hao nao Jehovah ting long service bilong iumi for hem?

¹⁰ Hao nao iumi ting long dedication bilong iumi long God for duim will bilong hem? Waswe, hem nao first samting long laef bilong iumi? Nomata wanem kaen living iumi garem, nomata young or olo, marit or singol, healthy or sik, iumi shud traem best for live followim dedication bilong iumi, for fitim living bilong iumi. Living bilong wanfala maet mekem hem fit for serve insaed full-taem ministry olsem wanfala pioneer, olsem volunteer long wanfala branch office bilong Watch Tower Society, olsem wanfala missionary, or insaed long traveling ministry. Long narasaed, samfala dadi and mami maet busy for lukaftarem olketa physical and spiritual need bilong famili. Waswe, samfala hour wea olketa iusim insaed long ministry evri month hem samting wea Jehovah no tinghae long hem olsem planti hour wea wanfala full-taem servant hem iusim? Nomoa nao. God nating expectim from iumi samting wea iumi no garem. Aposol Paul talem disfala principle: “Sapos willing fasin hem stap firstaem, hem barava fitim wanem man hem garem, and no wanem hem no garem.”—2 Corinthians 8:12.

11. Salvation bilong iumi hem depend long wanem?

¹¹ Nomata wanem, salvation bilong iumi hem depend, no long eni samting wea iumi maet duim, bat long kaeness bilong Jehovah wea iumi no fit for kasem thru long Christ Jesus, Lord bilong iumi. Paul explainim klia tumas: “Evriwan sin and no kasem glory bilong God, and olsem free present nao hem kolem olketa raeteous thru long kaeness bilong hem wea iumi no fit for kasem wea mekem olketa kamap free thru long ransom wea Christ Jesus peim.” Bat, olketa waka bilong iumi pruvim strongfala faith bilong iumi long olketa promis bilong God.—Romans 3:23, 24; James 2:17, 18, 24.

12. Why nao iumi shud no markem iumi witim narawan?

¹² No eni need stap for iumi markem witim narawan taem wea iumi iusim long service bilong God, haomas Bible literature iumi givimaot, or namba bilong olketa Bible study wea iumi conductim. (Galatians 6:3, 4) Nomata wanem iumi duim insaed long Christian ministry, iumi evriwan mas rememberim hambol toktok bilong Jesus: “So iufala tu, taem iufala duim evri samting wea iufala mas duim, iufala sei, ‘Mifala nao olketa iusles slave nomoa. Samting wea mifala duim hem samting wea mifala shud duim.’” (Luke 17:10) Waswe, iumi fit for really sei planti taem iumi duim “evri samting” wea iumi “mas duim”? So kwestin hem, Hao gud nao shud service bilong iumi long God?—2 Corinthians 10:17, 18.

Mekem Each Day Important

13. Wanem wei for tingting nao iumi needim taem iumi duim samting followim dedication bilong iumi?

¹³ Bihaen hem givim kaonsel long olketa waef, hasband, pikinini, dadi and mami, and olketa slave, Paul raet olsem: “Nomata wanem iufala duim, duim witim full-soul for Jehovah, and no for man, from iufala savve hao thru long Jehovah nao iufala bae kasem reward bilong promis. Slave for Masta, Christ.” (Colossians 3:23, 24) Iumi no serve for show-off long olketa man long samting wea iumi duim insaed service bilong Jehovah. Iumi trae for servem God long wei for followim example bilong Jesus Christ. Hem duim short ministry bilong hem witim feeling for hariap.—1 Peter 2:21.

14. Wanem warning nao Peter givim abaotem olketa last day?

¹⁴ Aposol Peter tu showimaot feeling for hariap. Long mek-tu leta bilong hem, hem givim warning hao long olketa last day, pipol for mekfani bae stap—olketa apostate and pipol wea daot—wea, from samting olketa seleva laekem, bae olketa askem kwestin abaotem taem wea Christ bae stap moa. Bat, Peter hem sei: “Jehovah hem no slow long saed bilong promis bilong hem, olsem samfala pipol tingim wei for slow, bat hem patient witim iufala from hem no laekem eniwan for dae bat hem laekem evriwan for repent. Nomata olsem, day bilong Jehovah bae kam olsem man for steal.” Tru nao, day bilong Jehovah bae kam. So, iumi shud mekem datwan kamap samting iumi tingim evriday long hao sure and strong nao faith bilong iumi long olketa promis bilong God.—2 Peter 3:3, 4, 9, 10.

15. Hao nao iumi shud ting abaotem each day long laef bilong iumi?

¹⁵ For live followim dedication bilong iumi evribit, iumi shud iusim each day for praisem Jehovah. Long end bilong each day, waswe, iumi savve luk bak and lukim hao long lelebet wei iumi share for mek holy long nem bilong God and talemaot gud nius bilong Kingdom? Maet hem from klin fasin bilong iumi, gudfala story bilong iumi, or loving kea for famili and olketa fren. Waswe, iumi iusim olketa chance wea kamap for sharem Christian hope bilong iumi witim nara pipol? Waswe, iumi helpem samwan for ting strong abaotem olketa promis bilong God? Letem iumi hipimap gudfala spiritual samting evriday, long tokpiksa wei, go ahed for buildimap wanfala spiritual bank account.—Matthew 6:20; 1 Peter 2:12; 3:15; James 3:13.

Keepim Klia Wei Bilong Iu for Lukluk

16. Wanem nao olketa wei wea Satan trae for mekem dedication bilong iumi long God for wikdaon?

¹⁶ Iumi stap long olketa taem wea hem kamap moa hard for olketa Christian. Satan and olketa sekson bilong hem trae for mekem samting wea gud and samting wea nogud, samting wea klin and no klin, stret and rong fasin, for no luk difren tumas. (Romans 1:24-28; 16:17-19) Hem mekem isi tumas for heart and mind bilong iumi kamap dirty thru long TV and computer. Spiritual eye bilong iumi no lukluk klia, or no lukim stret, so iumi fail for luksavve long olketa kleva trik bilong hem. Wei wea iumi disaed strong for live followim dedication bilong iumi kamap wik and iumi no holem datfala “hou” long strong wei sapos iumi lusim olketa spiritual mark.—Luke 9:62; Philippians 4:8.

17. Hao nao kaonsel bilong Paul savve helpem iumi for keepim wei for fren witim God?

¹⁷ So toktok bilong Paul for kongregeson long Thessalonica hem barava fitim: “Diswan nao will bilong God, for iufala kamap holy, iufala mas stap klia from fornication; for evriwan long iufala mas savve hao for keepim body bilong hem holy and garem honor, no long wei for kavetem sex olsem olketa nation duim wea no savve long God.” (1 Thessalonians 4:3-5) Dirty fasin hem leadim samfala for disfellowship from Christian kongregeson—olketa wea no lukaftarem dedication bilong olketa long God. Olketa letem wei wea olketa fren witim God for kamap wik, mekem hem no important part long laef bilong olketa. Bat, Paul hem sei: “God kolem iumi, no witim wei for letem eni dirty samting, bat for followim fasin wea holy. So, man wea rejectim diswan, hem no rejectim man, bat God, wea hem nao putim holy spirit bilong hem long iufala.”—1 Thessalonians 4:7, 8.

Wanem Nao Iu Disaed Strong for Duim?

18. Wanem nao iumi shud disaed strong for duim?

¹⁸ Sapos iumi luksavve long wei wea dedication bilong iumi long Jehovah God hem barava serious samting, wanem nao iumi shud disaed strong for duim? Iumi shud disaed strong for keepim gudfala conscience saed long fasin and ministry bilong iumi. Peter givim disfala encouragement: “Keepim gudfala conscience, mekem samting wea olketa tok againstim long iufala kamap samting wea olketa shame long hem wea tokspoelem gudfala fasin bilong iufala long saed bilong Christ.” (1 Peter 3:16) Maet iumi mas safa and feisim nogud samting bikos long Christian fasin bilong iumi, bat Christ tu kasem datwan bikos long faith and loyal fasin bilong hem long God. “Dastawe,” Peter hem sei, “from Christ hem safa long body, iufala tu protectim iuseleva witim sem wei for tingting; bikos man wea hem safa long body hem no duim olketa sin.”—1 Peter 4:1.

19. Wanem nao iumi laekem nara pipol for talem abaotem iumi?

¹⁹ Tru tumas, wei wea iumi disaed strong for live followim dedication bilong iumi bae protectim iumi from enikaen samting long world bilong Satan wea sik saed long spiritual wei, fasin, and body. Bat winim datwan, iumi bae sure hao God appruvim iumi, wea hem moabeta winim eni samting wea Satan and sekson bilong hem savve givim. So, no letem eniwan savve sei iumi lusim love wea iumi garem taem iumi firstaem kasem truth. Bat, letem pipol storyim iumi olsem olketa long first-century kongregeson long Thyatira: “Mi savve long waka bilong iu, and love and faith and ministry and fasin for stand strong bilong iu, and mi savve distaem iu duim moa waka winim taem bifor.” (Revelation 2:4, 18, 19) Tru nao, no letem iumi hafhaf long dedication bilong iumi, bat letem iumi “shaen witim spirit,” strong go kasem end—and datfala end hem klosap tumas.—Romans 12:11; Revelation 3:15, 16.

[Olketa Footnote]

Waswe, Iu Remember?

• Wanem nao insaed long dedication?

• Wanem example bilong olketa servant bilong God wea dedicate bifor and distaem nao iumi fit for followim?

• Hao nao iumi shud tingim service bilong iumi long God?

• Wanem nao iumi mas disaed strong for duim saed long dedication bilong iumi long God?

[Piksa long page 15]

Jeremiah stap faithful nomata pipol deal witim hem long barava nogud wei

[Piksa long page 16]

Ernest Beavor showimaot strongfala Christian example for olketa pikinini bilong hem

[Piksa long page 17]

Planti handred young Witness wea stap insaed olketa prison long Spain keepim faithful fasin bilong olketa

[Olketa Piksa long page 18]

Letem iumi hipimap gudfala spiritual samting each day