Go Ahed for Servem Jehovah Witim Heart wea Stand Strong
“Heart bilong mi hem stand strong, O God, heart bilong mi hem stand strong.”—PSALM 57:7.
1. Why nao iumi savve biliv strong olsem David?
JEHOVAH savve mekem iumi stand strong long Christian faith, mekem iumi savve hol strong long trufala Christian Wei olsem olketa servant wea dedicate long hem. (Romans 14:4) So, iumi savve biliv strong olsem David wea raetem psalm and mas singaot: “Heart bilong mi hem stand strong, O God.” (Psalm 108:1) Sapos heart bilong iumi hem stand strong, diswan bae muvim iumi for fulfillim dedication bilong iumi long God. And taem iumi lukluk long hem for leadim and strongim iumi, iumi savve kamap olketa wea disaed strong and biliv olsem pipol wea garem faithful fasin, “evritaem garem planti samting for duim insaed waka bilong Lord.”—1 Corinthians 15:58.
2, 3. Wanem nao kaonsel bilong Paul long 1 Corinthians 16:13 talem iumi for duim?
2 Taem hem givim encouragement for olketa follower bilong Jesus long Corinth bifor, bat wea mas fitim olketa Christian distaem tu, aposol Paul sei: “Go ahed for wekap, stand strong long faith, go ahed olsem olketa man, grow maeti.” (1 Corinthians 16:13) Long Greek languis each komand hia minim man mas go ahed for duim. Wanem nao disfala kaonsel barava talem long iumi?
3 Iumi savve “go ahed for wekap” long spiritual wei taem iumi againstim Devil and stap klosap long God. (James 4:7, 8) Wei for depend long Jehovah mekem iumi fit for keepim wan mind and for ‘stand strong long Christian faith.’ Iumi—and planti woman midolwan iumi tu—“go ahed olsem olketa man” taem iumi servem God olsem pipol wea strong for talemaot Kingdom. (Psalm 68:11) Iumi “grow maeti” taem iumi go ahed for lukluk long Father bilong iumi long heven for givim iumi strong for duim will bilong hem.—Philippians 4:13.
4. Wanem nao lead go for iumi baptaes olsem Christian?
4 Iumi showaot iumi acceptim truth taem iumi dedicate evribit long Jehovah and showimaot datwan long wei for baptaes anda long wata. Bat wanem nao lead go for iumi baptaes? Firstaem iumi kasem stretfala savve from Word bilong God. (John 17:3) Diswan buildimap faith and muvim iumi for repent, wea showim iumi barava feel sorre for olketa rong samting iumi duim bifor. (Acts 3:19; Hebrews 11:6) Next samting iumi tan raon, taem iumi tan raon from olketa rong fasin and go aftarem laef wea fitim will bilong God. (Romans 12:2; Ephesians 4:23, 24) Then iumi dedicate witim full heart long Jehovah thru long prea. (Matthew 16:24; 1 Peter 2:21) Iumi askem God for givim iumi gudfala conscience and then iumi baptaes for showimaot dedication long hem. (1 Peter 3:21) Wei for ting bak long olketa step hia bae helpem iumi for tingting strong long need for go ahed for live followim dedication bilong iumi and servem Jehovah witim heart wea stand strong.
Go Ahed for Lukaotem Stretfala Savve
5. Why nao iumi shud go ahed for kasem savve long Bible?
5 For live followim dedication bilong iumi long God, iumi mas go ahed for kasem savve long Bible wea savve buildimap faith. Iumi hapi tumas for kasem spiritual kaikai taem iumi firstaem savve long truth bilong God! (Matthew 24:45-47) Olketa “kaikai” hia teist naes tumas—and olketa strongim iumi long spiritual wei. Distaem hem important tumas for go ahed kasem gudfala spiritual kaikai mekem iumi keepim heart wea stand strong olsem olketa servant wea dedicate long Jehovah.
6. Hao nao iu kasem help for mekem grow wei for tinghae long truth bilong Bible from heart?
6 Iumi need for waka hard for kasem moa savve long Bible. Hem olsem for lukaotem richfala samting wea haed—samting wea man mas waka hard for hem. Bat hem gud tumas taem man faendem “barava savve bilong God”! (Proverbs 2:1-6) Taem wanfala Kingdom pablisa firstaem studyim Bible witim iu, hem maet iusim datfala buk Savvy Wea Lead Go Long Laef Olawe. For studyim each chapter, man need for iusim staka taem. Iu kasem gud samting taem iufala readim and storyim olketa scripture. Sapos iu no minim wanfala point, hem explainim long iu. Datwan wea conductim Bible study bilong iu redy gud, prea for spirit bilong God, and helpem iu for mekem grow wei for tinghae long truth from heart.
7. Wanem nao mekem man fit for teachim truth bilong God long nara pipol?
7 Disfala wei for waka hard hem fitim bikos Paul hem raet: “Letem eniwan wea olketa teachim word long hem share long evri gudfala samting witim datwan wea teachim hem olsem.” (Galatians 6:6) Greek toktok long hia hem minim olketa mas mekem olketa teaching long Word bilong God go daon insaed long mind and heart bilong datwan “wea olketa teachim word long hem.” Wei for teachim iu long datfala wei mekem iu go ahed for fit olsem man for teachim nara pipol. (Acts 18:25) For faithful long dedication bilong iu, iu mas keepim wei for stap healthy long spiritual wei and fasin for stand strong for go ahed for studyim Word bilong God.—1 Timothy 4:13; Titus 1:13; 2:2.
Rememberim Wei wea Iu Repent and Tan Raon
8. Hao nao man savve keepim fasin wea God appruvim?
8 Waswe, iu rememberim hapi wea iu kasem taem iu lanem truth, repent, and then feelim wei wea God forgivim iu long faondeson bilong faith wea iu garem long ransom sakrifaes bilong Jesus? (Psalm 32:1-5; Romans 5:8; 1 Peter 3:18) Iu barava no laek for go bak long living wea followim sin. (2 Peter 2:20-22) Witim olketa nara samting, wei for prea evritaem long Jehovah bae helpem iu for keepim fasin wea God appruvim, live followim dedication bilong iu, and go ahed faithful for servem Jehovah.—2 Peter 3:11, 12.
9. From iumi tan raon finis from olketa samting bilong sin, wanem gogo nao iumi shud followim?
9 From iu tan raon finis from olketa samting bilong sin, go ahed for lukaotem help bilong God for keepim heart bilong iu strong. Datwan hem olsem iu gogo followim rong road bat iu luk insaed wanfala gudfala map and then start for followim stretfala road. No go difren. Go ahed for depend long instruction wea kam from God, and disaed strong for stap long road wea lead go long laef.—Isaiah 30:20, 21; Matthew 7:13, 14.
Nating Forgetim Dedication and Baptism Bilong Iu
10. Wanem nao olketa point wea iumi shud tingim saed long dedication bilong iumi long God?
10 Mas remember hao iu dedicate long Jehovah thru long prea, witim tingting for servem hem long faithful wei for olowe. (Jude 20, 21) Dedication hem minim for go difren, or stap separate for wanfala holy purpose. (Leviticus 15:31; 22:2) Dedication bilong iu hem no agreement for lelebet taem or promis wea iu talem for man. Hem dedication for olowe go long Sovereign bilong Universe, and for live followim iumi mas loyal long God for olowe. Tru nao, nomata iumi ‘laef or dae, iumi bilong Jehovah.’ (Romans 14:7, 8) Hapi bilong iumi hem depend long wei wea iumi willing for stap anda long will bilong hem and go ahed for servem hem witim heart wea stand strong.
11. Why nao iu shud rememberim baptism bilong iu and mining bilong hem?
11 Evritaem remember hao baptism bilong iumi hem saen bilong wei for dedicate witim full heart long God. No eniwan forcem iu for baptaes, iuseleva nao disaed. Waswe, iu disaed strong distaem for mekem will bilong iu followim will bilong God for full laef bilong iu? Iu askem God for givim iu gudfala conscience and iu baptaes olsem saen for showimaot dedication bilong iu long hem. Keepim datfala gudfala conscience taem iu fulfillim dedication bilong iu, and iu bae kasem rich blessing bilong Jehovah.—Proverbs 10:22.
Will Bilong Iu Join Insaed Diswan
12, 13. Hao nao will bilong iumiseleva hem join witim dedication and baptism?
12 Tru nao, dedication and baptism hem helpem planti million pipol long full earth. Taem iumi showimaot dedication bilong iumi long God long wei for go anda long wata for baptaes, iumi dae saed long living bilong iumi bifor bat iumi no dae saed long will bilong iumiseleva. Olsem olketa wea biliv wea kasem stretfala savve, from iumi followim will bilong iumi nao iumi dedicate long God thru long prea and baptaes. For dedicate and baptaes minim iumi luksavve wanem nao will bilong God and then chus for duim datwan. (Ephesians 5:17) So iumi followim Jesus, wea followim will bilong hem taem hem lusim waka bilong hem olsem carpenter, hem baptaes, and givim hemseleva evribit for duim will bilong Dadi bilong hem long heven.—Psalm 40:7, 8; John 6:38-40.
13 Jehovah God wantem Son bilong hem for kamap “perfect thru long olketa wei for safa.” So, Jesus mas followim will bilong hem mekem hem stand strong long faithful wei long olketa hard samting. For kasem datwan, hem “begim and askem samting . . . singaot and krae, and God lisin long hem from hem fraet long God.” (Hebrews 2:10, 18; 5:7, 8) Sapos iumi showimaot semkaen wei for fraet long God, iumi sure “God lisin” long iumi, and iumi sure Jehovah bae mekem iumi strong olsem olketa Witness bilong hem wea dedicate.—Isaiah 43:10.
Iu Savve Keepim Heart wea Stand Strong
14. Why nao iumi shud readim Bible evriday?
14 Wanem nao bae helpem iu for keepim heart wea stand strong and live followim dedication bilong iu long God? Readim Bible evriday witim goal for kasem moa savve. Diswan hem samting wea “faithful and wise slave” encouragem iumi evritaem for duim. Iumi kasem kaonsel olsem bikos for live followim dedication bilong iumi hem minim for go ahed for wakabaot insaed truth bilong God. Sapos organization bilong Jehovah hem min for saportim olketa giaman teaching, bae hem nating talem Olketa Jehovah’s Witness and pipol wea herem preaching for readim Bible.
15. (a) Wanem nao iumi shud tingim taem iumi disaedem samting? (b) Why nao iumi savve sei waka for selen hem no main waka long wanfala Christian?
15 Taem iu disaedem eni samting, evritaem tingim hao nao diswan maet affectim dedication bilong iu long Jehovah. Diswan maet join witim waka bilong iu for selen. Waswe, iu trae for mekem diswan helpem iu long tru worship? Nomata planti boss faendem hao olketa Christian wea dedicate olketa honest and waka gud, olketa luksavve tu hao olketa Witness bilong Jehovah no garem feeling for winim narawan for kasem hae position. Diswan hem from goal bilong olketa Witness hem no for kasem riches, bignem, position, or paoa. For olketa wea live followim dedication bilong olketa long God, barava important samting for duim hem will bilong God. Waka for selen wea mekem olketa fit for kasem need long living hem no main waka. Olsem aposol Paul, main waka bilong olketa hem Christian ministry. (Acts 18:3, 4; 2 Thessalonians 3:7, 8; 1 Timothy 5:8) Waswe, iu keepim olketa samting bilong Kingdom olsem first samting long living bilong iu?—Matthew 6:25-33.
16. Wanem nao iumi savve duim sapos wari wea ova tumas mekem iumi hard for live followim dedication bilong iumi long God?
16 Samfala maet feel nogud tumas long olketa difren wari bilong olketa bifor olketa lanem truth. Bat heart bilong olketa fulap witim hapi, thankiu, and love for God taem olketa acceptim Kingdom hope! For tingim olketa blessing wea olketa enjoyim start kam from datfala taem maet helpem olketa for live followim dedication bilong olketa long Jehovah. Long narasaed, waswe sapos wari wea ova tumas long olketa problem bilong living hem start for isisi blokem “word bilong God,” long sem wei wea olketa nila grass savve stopem seed for grow and kamap mature? (Luke 8:7, 11, 14; Matthew 13:22; Mark 4:18, 19) Sapos iu feel olsem diswan hem start for happen long iu or famili bilong iu, torowem wari bilong iu long Jehovah and prea for hem bae helpem iu mekem grow love and wei for tinghae. Sapos iu torowem hevi bilong iu long hem, bae hem givim iu strong and strongim iu for go ahed servem hem long hapi wei witim heart wea stand strong.—Psalm 55:22; Philippians 4:6, 7; Revelation 2:4.
17. Hao nao iumi fit for deal witim olketa hardfala test?
17 Go ahed for prea long Jehovah God evritaem, long sem wei wea iu prea taem iu dedicate long hem. (Psalm 65:2) Taem iu kasem temptation for duim rong samting or taem iu feisim wanfala hardfala test, lukaotem wei wea God leadim iu and help from hem for followim datwan. Rememberim need for garem faith, from disaepol James hem raet olsem: “Sapos eniwan long iufala hem no garem wisdom [for deal witim wanfala test], letem hem go ahed for askem God, from hem givim planti long evriwan long wei wea no mekem man feel shame; and God bae givim long hem. Bat letem hem go ahed for ask witim faith, no daotem eni samting, from man wea daot hem olsem wave bilong sea wea wind blowim olabaot. Tru nao, no letem datfala man tingse hem bae kasem eni samting from Jehovah; hem man wea no sure, no stedy long evri wei bilong hem.” (James 1:5-8) Sapos luk olsem wanfala test hem hard tumas, iumi savve sure long diswan: “No eni difren temptation savve kasem iufala, only temptation wea kasem evri man nomoa. Bat God hem faithful, and hem bae no letem eni temptation kasem iufala wea iufala no fit for winim, bat witim datfala temptation hem bae openem wei for iufala savve stand strong.”—1 Corinthians 10:13.
18. Wanem nao iumi savve duim sapos bigfala sin wea iumi haedem mekem iumi wikdaon for live followim dedication bilong iumi long Jehovah?
18 Waswe sapos wanfala bigfala sin wea iu haedem hem spoelem conscience bilong iu and mekem iu wikdaon for live followim dedication bilong iu long God? Sapos iu repent, iu savve kasem comfort hao Jehovah ‘bae no lukdaonem heart wea brek and pisis.’ (Psalm 51:17) Lukaotem help bilong olketa loving Christian elder, from iu savve olketa—olsem Jehovah—bae no ting smol long wei wea iu laek for kasem bak moa wei for fren gud witim Father bilong iu long heven. (Psalm 103:10-14; James 5:13-15) Then, from iu kasem bak spiritual strong and heart wea stand strong, iu bae fit for mekem gogo bilong iu stret and fit for live followim dedication bilong iu long God.—Hebrews 12:12, 13.
Go Ahed for Servem Jehovah Witim Heart wea Stand Strong
19, 20. Why nao hem important tumas for iumi go ahed for live followim dedication bilong iumi?
19 Long olketa hard taem distaem, iumi mas waka hard for live followim dedication bilong iumi and go ahed for servem God witim heart wea stand strong. Jesus hem sei: “Man wea go ahed strong kasem end hem nao datwan wea bae sev.” (Matthew 24:13) From iumi stap long “olketa last day,” end savve kam long enitaem. (2 Timothy 3:1) And tu, no eniwan long iumi savve sure sapos iumi bae laef tumoro. (James 4:13, 14) So hem important tumas for iumi go ahed for live followim dedication bilong iumi distaem!
20 Aposol Peter hem strongim diswan long mek-tu leta bilong hem. Hem showim hao olsem pipol wea no followim God olketa dae long Flood, tokpiksa earth, or wicked pipol tu bae distroe long “day bilong Jehovah.” Dastawe, Peter strong for sei: “Iufala mas kamap wanem kaen man long holy fasin and waka wea showimaot fasin for lovem God”! Hem encouragem olketa tu: “Olketa wea mi lovem, from iufala garem disfala savve firstaem, lukaot nogud rong bilong pipol [olketa giaman teacher and man wea no followim God] pullim iufala go and iufala lusim wei wea iufala go ahed strong.” (2 Peter 3:5-17) Hem sorre samting sapos wanfala wea baptaes hem go difren and kasem end long laef bilong hem olsem man wea fail for keepim heart wea stand strong!
21, 22. Hao nao toktok bilong Psalm 57:7 hem tru for David and olketa tru Christian?
21 Wei wea iu disaed strong for live followim dedication bilong iu savve kamap moa strong sapos iu evritaem tingim hapi day wea iu baptaes and lukaotem help bilong God mekem toktok and fasin bilong iu mekem heart bilong hem hapi. (Proverbs 27:11) For pipol bilong hem, Jehovah nating savve fail, and iumi shud faithful long hem. (Psalm 94:14) Hem showim feeling for sorre and mercy taem hem spoelem plan bilong olketa enemy bilong David and sevem hem. David thankiu tumas long diswan taem hem talemaot barava strongfala love wea hem garem for Man wea Sevem Hem. Witim deep feeling, hem sing olsem: “Heart bilong mi hem stand strong, O God, heart bilong mi hem stand strong. Mi bae singsing and mekem music.”—Psalm 57:7.
22 Olsem David, olketa tru Christian no go difren from wei wea olketa lovem God. Witim heart wea stand strong, olketa talemaot wei wea Jehovah sevem and keepim olketa, and olketa hapi for singim praise long hem. Sapos heart bilong iu stand strong, iu bae depend long God, and witim help bilong hem iu bae fit for fulfillim dedication bilong iu. Tru nao, iu savve kamap olsem “raeteous wan” wea man for raetem psalm hem sei: “Nomata nogud nius hem bae no fraetem tu. Heart bilong hem stand strong, hem depend long Jehovah.” (Psalm 112:6, 7) Witim faith long God and wei for depend long hem evribit, iu savve live followim dedication bilong iu and go ahed for servem Jehovah witim heart wea stand strong.
Waswe, Iu Remember?
• Why nao iumi shud go ahed for kasem stretfala savve long Bible?
• Why nao iumi shud tingim wei wea iumi repent and tan raon?
• Hao nao iumi kasem gud samting taem iumi rememberim dedication and baptism bilong iumi?
• Wanem nao bae helpem iumi for go ahed for servem Jehovah witim heart wea stand strong?
[Olketa Piksa long page 18]
Waswe, iu keepim spiritual health bilong iu long wei for readim Word bilong God evriday?
[Piksa long page 18]
For mekem Christian ministry main waka bilong iumi hem helpem iumi for go ahed servem Jehovah witim heart wea stand strong