Wanem Nao Datfala Spiritual Paradaes?

GUSTAVO hem growap long wanfala taon long Brazil.a From taem hem smol olketa teachim hem hao gud pipol go long heven taem olketa dae. Hem no savve eniting abaotem purpose bilong God hao wanday faithful pipol bae enjoyim perfect laef insaed paradaes earth. (Revelation 21:3, 4) And nara samting tu hem no savve. Hem no savve hao, nomata distaem, hem savve stap insaed wanfala spiritual paradaes.

Waswe, enitaem iu herem eniting abaotem disfala spiritual paradaes? Iu savve hem wanem samting and wanem iu need for duim for insaed long hem? Eniwan wea laek for barava hapi need for savve abaotem disfala paradaes.

Faendem Datfala Spiritual Paradaes

For sei man savve stap insaed wanfala paradaes nomata long distaem maet no here stret. Disfala world barava nating paradaes. Tumas pipol kasem samting wea wanfala Hebrew king bifor hem talem: “Lukim! wata long eye bilong olketa wea kasem hevi, bat olketa no garem man for givim comfort; and long pipol wea putim hevi long olketa, paoa stap, mekem olketa no garem man for givim comfort.” (Ecclesiastes 4:1) Staka handred million pipol safa anda long nogud organization bilong politik, religion, and selen, and olketa no kasem eni help, no eni “man for givim comfort.” Staka moa stragol for peim kaon, bringimap pikinini, and duim staka nara samting for stap laef. Olketa hia tu bae barava laekem man for givim comfort, samwan for mekem hevi bilong olketa isi lelebet. For olketa evriwan, laef hem nating paradaes.

So wea nao datfala spiritual paradaes? Olketa Greek, Persian, and Hebrew word for “paradaes” givim idea bilong wanfala garden wea luk naes, wanfala peaceful ples wea man barava rest long hem. Bible hem promis hao wanday earth bae kamap really paradaes, wanfala naesfala garden for olketa man wea no garem sin. (Psalm 37:10, 11) So wanfala spiritual paradaes hem kaen ples wea luk naes and wea man hem rest, wea letem man enjoyim peace witim nara pipol and witim God. Distaem, olsem Gustavo faendaot bihaen, kaen paradaes olsem hem stap, and hem kasem moa and moa pipol.

Taem hem 12 year, Gustavo disaed hem laek for kamap Roman Catholic priest. Mami and dadi bilong hem hapi taem hem go skulim. Hem skulim tu music, acting, and politik, wea church saportim for kasem interest bilong young pipol. Hem savve hao wanfala priest hem for helpem pipol and no savve marit. Bat, samfala priest and student wea Gustavo savve long olketa duim dirty fasin. Midolwan living olsem, Gustavo start for ova tumas long alcohol. Hem klia, hem no faendem yet wanfala spiritual paradaes.

Wanday, Gustavo readim wanfala Bible tract wea story abaotem wanfala paradaes earth. Diswan mekem hem tingim purpose bilong laef. Hem sei: “Mi start for readim Bible evritaem, bat mi no minim. Mi no luksavve tu hao God garem nem.” Hem lusim datfala lotu skul and faendem Olketa Jehovah’s Witness for helpem hem minim Bible. Hem kwiktaem muv ahed and no longtaem bihaen dedicatem laef bilong hem long God. Gustavo lane abaotem datfala spiritual paradaes.

Wanfala Pipol for Nem Bilong God

Gustavo lanem hao nem bilong God, Jehovah, hem no samting nating nomoa for wanfala Bible student. (Exodus 6:3) Hem important part bilong tru worship. Jesus teachim olketa disaepol bilong hem for prea: “Dadi bilong mifala wea stap long heven, letem nem bilong iu kamap holy.” (Matthew 6:9) Abaotem olketa Gentile wea kamap Christian, disaepol James hem sei: “God . . . lukluk kam long olketa nation for chusim wanfala pipol for nem bilong hem.” (Acts 15:14) Long first century, datfala “pipol for nem bilong hem” nao Christian kongregeson. Waswe, wanfala pipol for nem bilong God stap distaem? Yes, and gogo Gustavo luksavve hao pipol hia hem Olketa Jehovah’s Witness.

Olketa Jehovah’s Witness preach long 235 kantri and territory. Olketa winim six million minister, and narafala eit million wea interest attendim finis meeting bilong olketa. Pipol savve long olketa thru long pablik ministry bilong olketa, wea fulfillim toktok bilong Jesus: “Olketa bae talemaot disfala gud nius bilong kingdom evriwea long earth for givim witness long evri nation.” (Matthew 24:14) Bat, why nao Gustavo sei hem faendem spiritual paradaes taem hem kaban witim Olketa Jehovah’s Witness? Hem sei: “Mi markem samting mi lukim long world and especially insaed datfala lotu skul witim samting mi lukim midolwan Olketa Jehovah’s Witness. Samting wea barava difren hem bigfala love midolwan olketa Witness.”

Samfala narawan talem semkaen toktok abaotem Olketa Jehovah’s Witness. Miriam, wanfala young woman from Brazil, hem sei: “Bifor, mi no savve hao for hapi, nomata insaed famili bilong mi. Firstaem mi lukim love wea waka hem midolwan Olketa Jehovah’s Witness.” Wanfala man wea nem bilong hem Christian hem sei: “Samfala taem mi duim spiritism, bat religion hem no important long mi. Mi ting moa hae long position bilong mi and waka bilong mi olsem engineer. Nomata olsem, taem waef bilong mi start studyim Bible witim Olketa Jehovah’s Witness, mi lukim hem change. Mi tinghae tu long hapi and strong bilong olketa Christian woman wea visitim hem.” Why nao pipol tok olsem abaotem Olketa Jehovah’s Witness?

Wanem Nao Spiritual Paradaes?

Wan samting wea mekem Olketa Jehovah’s Witness difren hem wei wea olketa tinghae long savve from Bible. Olketa biliv Bible hem tru and hao hem Word bilong God. Dastawe, olketa no satisfae witim main savve abaotem religion bilong olketa nomoa. Olketa garem program for duim study seleva and Bible reading wea go ahed evritaem. Taem man kaban for longtaem witim Olketa Jehovah’s Witness, hem bae lanem moa samting abaotem God and will bilong Hem wea showaot insaed Bible.

Kaen savve olsem mekem Olketa Jehovah’s Witness free from olketa samting wea stealim hapi bilong pipol, olsem olketa kastom biliv and olketa nogud idea. Jesus hem sei: “Truth bae mekem iufala free,” and Olketa Jehovah’s Witness faendem diswan hem tru. (John 8:32) Fernando, wea duim spiritism bifor, hem sei: “For lane abaotem laef olowe hem bigfala comfort. Mi fraet nogud dadi and mami or mi bae dae.” Truth mekem Fernando free from wei for fraetem spirit world and laef bihaen man dae.

Insaed Bible, savve abaotem God hem barava join witim paradaes. Profet Isaiah hem sei: “Olketa bae no spoelem eniwan or spoelem eni samting long holy maunten bilong mi; from earth bae fulap witim savve bilong Jehovah olsem wata hem kavarem sea.”—Isaiah 11:9.

Bat hem tru, savve seleva hem no inaf for givim peace wea Isaiah talem profesi abaotem. Man mas followim samting hem lanem. Fernando sei olsem: “Taem man mekem grow olketa frut bilong spirit, hem mekem big datfala spiritual paradaes.” Long hia Fernando hem point go long toktok bilong aposol Paul, wea kolem olketa gud fasin wea wanfala Christian shud mekem grow, “olketa frut bilong spirit.” Hem listim olketa olsem “love, hapi, peace, patient for safa, kaenfala fasin, gudfala fasin, faith, kwaet fasin, fasin for kontrolem seleva.”—Galatians 5:22, 23.

Waswe, iu savve lukim hao for kaban witim wanfala community wea trae hard for mekem grow olketa gud fasin olsem bae barava olsem iu stap long paradaes? Spiritual paradaes wea profet Zephaniah talem profesi abaotem hem stap midolwan kaen pipol olsem. Hem sei: “Olketa bae no followim wei wea no raeteous, or talem laea samting, and mouth bilong olketa bae no garem giaman toktok; from olketa bae kaikai and sleep gud, and no eniwan bae mekem olketa fraet.”—Zephaniah 3:13.

Important Waka Bilong Love

Maet iu lukim hao firstfala frut bilong spirit wea Paul talem hem love. Diswan hem fasin wea Bible story staka abaotem. Jesus hem sei: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35) Hem tru, Olketa Jehovah’s Witness no perfect. Samfala taem olketa garem problem midolwan olketa seleva olsem olketa aposol bilong Jesus. Bat olketa barava lovem each other, and olketa prea for saport bilong holy spirit taem olketa mekem grow disfala fasin.

From diswan, wei wea olketa fren tugeta hem spesol. Wei for faet midolwan difren tribe or difren kantri no stap midolwan olketa. Tru nao, long olketa last year bilong mek-20 century, taem pipol raonem olketa killim dae man bilong difren tribe and kantri, olketa Witness protectim each other nomata laef bilong olketa seleva long danger. Nomata olketa “kamaot from evri nation and tribe and pipol and languis,” olketa enjoyim wan mind wea hard for man minim go kasem taem hemseleva insaed.—Revelation 7:9.

Paradaes Midolwan Olketa wea Duim Will Bilong God

No eni ples stap insaed spiritual paradaes for greedy fasin, dirty fasin, and selfish fasin. Olketa Christian mas: “Finis for followim disfala system, bat kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.” (Romans 12:2) Taem iumi garem living wea klin and duim will bilong God long olketa nara wei, iumi help for buildimap disfala spiritual paradaes and iumi kamap moa hapi. Carla kasem diswan. Hem sei: “Dadi bilong mi teachim mi for waka hard for saportim miseleva saed long selen. Bat nomata university skul bilong mi mekem mi feel sef, mi missim wan mind insaed famili and sef feeling wea savve from Word bilong God nomoa savve givim.”

Hem tru, wei for enjoyim spiritual paradaes hem no minim wei for free from olketa physical problem bilong laef. Olketa Christian kasem sik yet. Kantri olketa stap insaed maet insaed olketa big trabol. Staka olketa poor. Nomata olsem, for garem klos wei for fren witim Jehovah God—wea hem important part bilong datfala spiritual paradaes—minim iumi savve luk long hem for saport. Tru nao, Jehovah invaetem iumi for ‘torowem hevi bilong iumi long hem,’ and staka savve givim witness long olketa nambawan wei wea hem saportim olketa insaed olketa barava hard taem. (Psalm 55:22; 86:16, 17) God promis for stap witim olketa wea worshipim hem nomata long “deepfala valley.” (Psalm 23:4) Wei for trust hao God hem redy for saportim iumi hem helpem iumi for keepim “peace bilong God wea winim evri tingting,” wea hem nao wanfala key for datfala spiritual paradaes.—Philippians 4:7.

Mekem Big Datfala Spiritual Paradaes

Staka pipol savve hapi for visitim naesfala garden. Olketa laek for wakabaot insaed or maet sidaon and enjoyim naesfala lukluk bilong hem. Long sem wei, staka hapi for kaban witim Olketa Jehovah’s Witness. Olketa kasem gud feeling, peace, and moa strong from wei for fren tugeta witim olketa. Nomata olsem, for garden luk naes olsem evritaem man need for lukaftarem. Long sem wei, datfala spiritual paradaes stap insaed barava nogud world only bikos Olketa Jehovah’s Witness waka hard long hem, and God blessim waka bilong olketa. So hao nao man savve garem gudfala share for mekem big paradaes hia?

Firstaem, iu need for kaban witim wanfala kongregeson bilong Olketa Jehovah’s Witness, studyim Bible witim olketa, and kasem savve from Bible wea hem faondeson bilong disfala spiritual paradaes. Carla hem sei: “No eni spiritual paradaes stap taem no eni spiritual kaikai.” Insaed diswan hem wei for readim Word bilong God evritaem and ting raonem wanem iu readim. Savve wea iu kasem bae mekem iu fren moa klos long Jehovah God, and iu bae start for lovem hem. Bae iu lane tu for story long hem long prea and askem hem for gaedens and spirit bilong hem for saportim iu for duim will bilong hem. Jesus talem iumi for no givap for prea. (Luke 11:9-13) Aposol Paul sei: “Prea evritaem.” (1 Thessalonians 5:17) Datfala privilege for story witim God long prea, witim full trust hao hem bae herem iu, hem important part bilong spiritual paradaes.

Gogo laef bilong iu bae kamap moabeta thru long wanem iu lanem, and iu bae want for talem pipol abaotem. Then iu bae fit for obeyim komand bilong Jesus: “Letem laet bilong iufala shaen front long olketa man, mekem olketa savve lukim olketa gudfala waka bilong iufala and givim glory long Dadi bilong iufala wea stap long heven.” (Matthew 5:16) For story long pipol abaotem Jehovah God and Jesus Christ and praisem bigfala love wea tufala showim long olketa man hem givim bigfala hapi.

Klosap nao bae earth kamap wanfala really paradaes—naesfala garden hom wea klin and fitim faithful pipol. Wei wea disfala spiritual paradaes stap insaed “nogud taem wea hard for deal witim” hem pruv bilong paoa bilong God and showimaot wanem hem savve and bae duim long future.—2 Timothy 3:1.

Nomata distaem, olketa wea enjoyim spiritual paradaes kasem spiritual wei wea Isaiah 49:10 hem fulfill: “Olketa bae no hangre, and bae olketa no thirsty, bae bigfala hot or sun no hotem olketa. From Wan wea sorre long olketa bae leadim olketa, and bae hem tekem olketa go long spring bilong wata.” José hem lukim hao diswan barava tru. Hem hope for kamap wanfala man wea garem bignem for pleim music, bat hem faendem wei for satisfae taem hem servem God witim Christian kongregeson. Hem sei: “Distaem mi garem mining long laef. Mi feel sef midolwan olketa Christian brata, and mi savve long Jehovah olsem loving Dadi wea iumi savve trustim.” Hapi bilong José—and staka million narawan olsem hem—hem barava olsem wanem Psalm 64:10 hem talem: “Raeteous wan bae hapi long Jehovah and bae barava haed long hem.” Diswan barava fitim wanfala spiritual paradaes!

[Footnote]

[Piksa long page 10]

Taem iumi enjoyim spiritual paradaes, iumi shud help for mekem big!