Waka Hard for Mekem Spiritual Paradaes Luk Naes
“Mi bae mekem ples wea mi putim leg bilong mi for barava luk naes.”—ISA. 60:13.
1, 2. Long olketa Hebrew Scripture, datfala toktok “ples for mi putim leg bilong mi” hem minim wanem?
JEHOVAH GOD sei: “Heven nao throne bilong mi, and earth hem ples for mi putim leg bilong mi.” (Isa. 66:1) God story tu abaotem datfala ples for putim leg bilong hem, wea hem nao earth, taem hem sei: “Mi bae mekem ples wea mi putim leg bilong mi for barava luk naes.” (Isa. 60:13) Long wanem wei nao God duim datwan? And wanem nao iumi wea stap long earth mas duim?
2 Long olketa Hebrew Scripture, datfala toktok “ples for mi putim leg bilong mi” hem minim tu datfala temple long Israel bifor. (1 Chron. 28:2; Ps. 132:7) Datfala temple hem barava luk naes long Jehovah bikos hem nao main ples for tru worship, and hem mekem Jehovah kasem praise long earth.
3. Wanem nao main ples for tru worship distaem, and wanem taem nao hem start?
3 Long distaem, main ples for tru worship hem no wanfala really temple long earth bat hem wanfala spiritual temple. Temple hia mekem Jehovah kasem praise winim eni building. Wanem nao datfala spiritual temple? Hem arrangement wea God mekem for olketa man fren witim hem and worshipim hem. Ransom sakrifaes bilong Jesus nao mekem disfala arrangement kamap. Disfala arrangement hem start long 29 C.E. taem Jesus baptaes and Jehovah anointim hem for kamap hae priest long datfala spiritual temple.—Heb. 9:11, 12.
4, 5. (a) Wanem nao Psalm 99 hem talem wea olketa tru Christian barava laek for duim? (b) Wanem kwestin nao iumi wanwan shud ting raonem?
4 Iumi tinghae long disfala arrangement wea God mekem for iumi savve worshipim hem. Iumi showimaot diswan taem iumi preach long pipol abaotem Jehovah and olketa nambawan samting wea iumi kasem from datfala ransom. Iumi hapi tumas bikos distaem winim eit million tru Christian nao praisem Jehovah evriday! Staka pipol garem rong tingting and tingse bihaen olketa dae and go long heven nao bae olketa praisem God. Bat pipol bilong Jehovah savve hem important for praisem Jehovah long earth distaem.
5 Taem iumi praisem Jehovah, iumi duim sem samting wea olketa faithful wakaman bilong God olketa duim wea Bible storyim long Psalm 99:1-3, 5. (Readim.) Olketa faithful man olsem Moses, Aaron, and Samuel barava sapotim tru worship long bifor. (Ps. 99:6, 7) Distaem tu, olketa anointed Christian faithful for worshipim Jehovah long spiritual temple long earth bifor olketa go long heven for waka olsem priest witim Jesus. Staka million “nara sheepsheep” faithful for sapotim olketa. (John 10:16) Olketa anointed Christian and olketa nara sheepsheep wan mind for worshipim Jehovah. Bat iumi wanwan shud ting raonem disfala kwestin: ‘Waswe, mi barava sapotim arrangement bilong Jehovah for tru worship?’
OLKETA WEA WORSHIP INSAED SPIRITUAL TEMPLE
6, 7. Wanem nao happen bihaen Christian kongregeson hem start, and kasem 1919, wanem nao happen?
6 Samting olsem 100 year bihaen Christian kongregeson hem start, wei for apostate hem kamap wea Bible sei bae hem happen. (Acts 20:28-30; 2 Thess. 2:3, 4) Bihaen datwan, hem no isi for savve hu nao olketa wea worshipim God long stretfala wei, go kasem taem wea Jehovah iusim Jesus for showimaot hu nao olketa wea worshipim God long spiritual temple bilong Hem.
7 Kasem 1919, Jehovah showimaot klia hu nao olketa wea hem hapi long olketa and wea worshipim hem long spiritual temple bilong hem. Olketa hia changem samfala samting long laef bilong olketa mekem olketa savve worshipim God long wei wea hem laekem. (Isa. 4:2, 3; Mal. 3:1-4) Long datfala taem, samting wea aposol Paul lukim insaed wanfala vision staka handred year bifor, hem start for kamap tru.
8, 9. Wanem nao datfala “paradaes” wea Paul lukim long vision?
8 Paul storyim datfala vision wea hem lukim long 2 Corinth 12:1-4. (Readim.) Long datfala vision, Jehovah mekem Paul for lukim samting wea bae happen long future. Wanem nao datfala “paradaes” wea Paul lukim? Hem savve minim datfala physical Paradaes long earth wea bae kamap long future. (Luke 23:43) Hem savve minim tu datfala spiritual paradaes wea bae stap evriwea long earth long niu world, wea hem samting wea pipol bilong God distaem start for enjoyim finis. And tu, hem savve minim olketa gud samting long heven long “datfala paradaes bilong God.”—Rev. 2:7.
9 Bat why nao Paul sei hem “herem olketa toktok wea hem tambu for man talem”? Bikos long datfala taem, hem no stretfala taem for Paul explainim evri nambawan samting wea hem lukim long datfala vision. Bat distaem nao Jehovah letem iumi for talemaot long nara pipol olketa gud samting wea pipol bilong hem kasem distaem!
10. Long wanem wei nao spiritual paradaes hem difren from spiritual temple?
10 Iumi savve story abaotem “spiritual paradaes” staka taem, bat wanem nao datwan hem minim? Hem minim wei wea pipol bilong Jehovah enjoyim staka spiritual samting distaem, wea mekem olketa garem peace witim God and olketa nara brata and sista. Spiritual paradaes hem difren from spiritual temple. Datfala spiritual temple hem minim arrangement wea God mekem for olketa man fren witim hem and worshipim hem. Datfala spiritual paradaes hem mekem iumi luksavve long olketa wea God hem hapi long olketa, and wea worshipim hem long datfala spiritual temple.—Mal. 3:18.
11. Wanem nambawan privilege nao iumi garem distaem?
11 Iumi hapi tumas bikos start long 1919, Jehovah letem olketa man wea no perfect for waka tugeta witim hem for strongim and mekem grow disfala spiritual paradaes! Waswe, iu tu sapotim disfala nambawan waka? Waswe, iu tinghae long disfala privilege for waka tugeta witim Jehovah for mekem hem kasem praise long earth?
JEHOVAH MEKEM ORGANIZATION BILONG HEM LUK NAES
12. Hao nao iumi savve samting wea Isaiah 60:17 talem hem kamap tru? (Lukim piksa long start bilong study.)
12 Profet Isaiah talem wanfala profesi wea showimaot staka nambawan change bae kamap long organization bilong God long earth. (Readim Isaiah 60:17.) Olketa young wan and olketa wea niu long truth read abaotem or herem story nomoa abaotem olketa change hia. Bat staka brata and sista experiencem olketa change hia! Olketa faithful brata and sista hia barava sure God hem iusim King bilong iumi, Jesus, for leadim organization bilong hem! Taem iumi herem olketa brata and sista hia story abaotem olketa samting hia, datwan savve helpem iumi trustim Jehovah and strongim faith bilong iumi.
13. Wanem nao Psalm 48:12-14 sei iumi mas duim?
13 Evri tru Christian mas talem olketa narawan abaotem organization bilong Jehovah. Nomata iumi stap long world bilong Satan, iumi garem wan mind and stap gud witim olketa brata and sista bilong iumi evriwea long world! Datwan hem olsem wanfala mirakol. Iumi mas talem olketa narawan abaotem organization bilong Jehovah and abaotem spiritual paradaes!—Readim Psalm 48:12-14.
14, 15. Wanem nao samfala change wea kamap bihaen long 1970, and hao nao olketa change hia helpem organization?
14 Staka olo brata and sista long kongregeson experiencem samfala change wea kamap wea mekem organization bilong Jehovah long earth luk naes. Olketa rememberim taem wea wanfala kongregeson servant nomoa lukaftarem kongregeson, and no wanfala body of elders nao duim datwan. Olketa tingim tu taem wea each kantri garem wanfala branch servant, and no wanfala Branch Komiti. And olketa tingim yet taem wea president bilong Watch Tower Society nao leadim organization, and no Governing Body bilong Olketa Jehovah’s Witness. Nomata kongregeson servant, branch servant, and president garem narawan for helpem olketa, long datfala taem wanfala man nomoa mekem disison insaed kongregeson, long branch office, and long world hedquarter. Bat bihaen 1970, samfala change kamap mekem wanfala grup bilong olketa elder nao garem responsibility for mekem olketa disison, and no wanfala elder nomoa.
15 Why nao olketa change hia hem helpem organization? Bikos olketa change wea kamap hem followim wei wea iumi minim gud moa wanem Bible talem. Winim wei wea wanfala elder nomoa mekem evri disison, organization kasem gud samting from olketa gudfala wei bilong evri elder, wea olketa nao “olketa man olsem present” wea Jehovah givim.—Eph. 4:8; Prov. 24:6.
Jehovah givim pipol long evri ples long world help wea olketa needim (Paragraf 16, 17 storyim diswan)
16, 17. Wanem nao samfala change wea kamap wea iu tinghae long hem, and why nao olsem?
16 Tingim olketa change wea kamap no longtaem go nomoa saed long olketa pablikeson bilong iumi. Iumi hapi for offerim olketa pablikeson wea luk naes and wea helpem pipol long ministry. Tingim tu wei wea iumi iusim niu technology for preachim gud nius. Olsem example, staka pipol savve lukluk long jw.org website bilong iumi, and kasem help wea olketa needim. Olketa change hia showimaot Jehovah barava tingim pipol and lovem olketa.
17 Iumi tinghae tu long olketa change wea kamap saed long olketa meeting, wea mekem iumi garem taem for duim Famili Worship or for study seleva. And iumi tinghae tu long olketa change wea kamap saed long olketa assembly and olketa convention bilong iumi. Evri year iumi savve sei olketa convention and assembly kamap gud winim bifor! Iumi hapi tu long olketa training wea iumi kasem from staka Bible skul wea gohed distaem. Olketa change hia showimaot Jehovah hem leadim organization bilong hem, and hem gohed for mekem disfala spiritual paradaes for barava luk naes!
WANEM IUMI SAVVE DUIM FOR MEKEM SPIRITUAL PARADAES LUK NAES
18, 19. Wanem nao iumi savve duim for mekem spiritual paradaes luk naes?
18 Jehovah givim iumi privilege for duim samting for mekem spiritual paradaes luk naes. Bat wanem nao iumi savve duim? Iumi savve strong for preach abaotem Kingdom and teachim pipol for kamap disaepol. Taem iumi helpem samwan for worshipim God, iumi help for mekem grow datfala spiritual paradaes.—Isa. 26:15; 54:2.
19 And tu, taem iumi waka hard for garem olketa gudfala wei wea God hapi long hem, iumi help for mekem spiritual paradaes luk naes. Taem iumi duim olsem, datwan savve mekem olketa narawan laek for kam insaed disfala spiritual paradaes. Staka taem first samting wea mekem pipol interest for kam long organization and for savve long Jehovah and Jesus, hem no savve wea iumi garem long Bible nomoa, bat hem wei wea iumi klin and stap gud witim olketa narawan.
Iu savve help for mekem grow disfala spiritual paradaes (Paragraf 18, 19 storyim diswan)
20. Wanem nao Proverbs 14:35 talem wea iumi laek for duim?
20 Masbi Jehovah and Jesus barava hapi taem tufala lukim spiritual paradaes wea iumi insaed distaem. Iumi hapi distaem for duim samting for mekem disfala spiritual paradaes luk naes. And bae iumi barava hapi long niu world taem iumi bae waka hard for mekem disfala full earth kamap wanfala paradaes. Iumi shud evritaem tingim Proverbs 14:35, wea sei: “King hem hapi long wakaman wea showimaot hem wise long olketa samting wea hem duim.” Iumi laek for showimaot iumi wise taem iumi waka hard for mekem disfala spiritual paradaes luk naes!