“Tru Nao, Lord Hem Laef Bak Moa!”

Tingim hao olketa disaepol bilong Jesus barava wari taem pipol killim dae Lord bilong olketa. Luk olsem hope bilong olketa dae tu olsem datfala body wea Joseph bilong Arimathea putim long grev. Hope hao Jesus bae mekem olketa Jew kamap free from hard rul bilong Rome hem dae tu.

SAPOS datwan nao hem end bilong disfala samting, olketa disaepol bilong Jesus maet finis olsem olketa follower bilong pipol wea mekem olketa seleva olsem Messiah. Bat Jesus hem laef! Olsem Scripture talem, samfala taem hem showim hemseleva long olketa follower bilong hem no longtaem bihaen dae bilong hem. So, diswan muvim samfala long olketa for sei: “Tru nao, Lord hem laef bak moa!”—Luke 24:34.

Olketa disaepol mas defendim faith bilong olketa long Jesus olsem datfala Messiah. Main wei wea olketa duim diswan hem for point go long wei wea hem laef bak from dae bilong hem wea olsem strongfala pruv hao hem nao Messiah. Tru nao, “witim bigfala paoa olketa aposol go ahed for givim witness abaotem resurrection bilong Lord Jesus.”—Acts 4:33.

Sapos eniwan fit for pruvim hao disfala resurrection hem giaman samting—maet long wei for switim wanfala disaepol for talemaot hao diswan hem giaman samting or for showimaot hao body bilong Jesus still stap insaed grev—Christian Wei maet foldaon finis long firstaem. Bat hem nating foldaon. From olketa savve hao Christ hem laef bak, olketa follower bilong Jesus go evriwea and talemaot resurrection bilong hem, and staka pipol biliv long Christ wea laef bak moa.

Why nao iu tu savve biliv long resurrection bilong Jesus? Wanem pruv nao stap wea showimaot diswan really happen?

Why Iumi Mas Tingim Pruv?

Evriwan long fofala Gospel story abaotem resurrection bilong Jesus. (Matthew 28:1-10; Mark 16:1-8; Luke 24:1-12; John 20:1-29)a Olketa nara part bilong Christian Greek Scripture story abaotem wei wea Christ hem laef bak from dae olsem tru samting.

Dastawe olketa follower bilong Jesus talemaot resurrection bilong hem! Sapos God nao mekem hem laef bak, datwan hem nius wea fit for mekem man sapraes wea world nating herem bifor. Hem minim God hem stap. And tu, hem minim Jesus hem stap laef distaem.

Hao nao datwan hem affectim iumi? Jesus hem prea olsem: “Diswan nao minim laef olowe, for olketa kasem savve long iu, only trufala God, and abaotem datwan wea iu sendem kam, Jesus Christ.” (John 17:3) Tru nao, iumi fit for kasem savve abaotem Jesus and Dadi bilong hem wea savve givim laef. Taem iumi followim diskaen savve, nomata iumi dae, iumi savve kasem resurrection, from Jesus tu hem olsem. (John 5:28, 29) Iumi savve garem hope bilong laef olowe long wanfala paradaes earth anda long Kingdom bilong God long heven wea stap long hand bilong Son bilong hem wea kasem glory, Jesus Christ, datfala King bilong olketa king.—Isaiah 9:6, 7; Luke 23:43; Revelation 17:14.

Dastawe, datfala kwestin sapos Jesus hem really laef bak from dae hem barava important. Hem affectim laef bilong iumi distaem and hope bilong iumi for future. Dastawe, mifala invaetem iu for lukluk gud long fofala samting wea pruvim hao Jesus hem dae and kasem resurrection.

Jesus Hem Really Dae Long Post

Samfala man for daot sei nomata olketa nilam Jesus, hem no really dae long datfala post. Olketa sei hem just klosap for dae so hem kamap strong moa taem hem insaed grev. Nomata olsem, evri raeting wea stap pruvim body bilong Jesus wea dae finis nao olketa putim insaed long grev.

From olketa killim dae Jesus long pablik, staka pipol barava lukim hao hem really dae long datfala post. Datfala bigman bilong army long Rome wea kasem order for arrangem dae bilong hem nao talemaot hao hem dae. Datfala officer hem wanfala bigman wea waka bilong hem nao hem for mek sure Jesus hem dae. Nara samting tu, datfala Governor bilong Rome Pontius Pilate hem letem Joseph bilong Arimathea for berem body bilong Jesus bihaen hem mek sure hao hem dae finis.—Mark 15:39-46.

Olketa Faendem Grev Hem Emti

Datfala emti grev givim firstfala pruv long olketa disaepol abaotem resurrection bilong Jesus, and no eniwan argue againstim disfala pruv kasem distaem. Olketa berem Jesus insaed wanfala niu grev, wan wea olketa no iusim bifor. Hem stap klosap long ples wea olketa killim hem dae and long dat taem hem isi nomoa for faendem. (John 19:41, 42) Evri story bilong Gospel agree hao taem olketa fren bilong Jesus kasem grev hia long mek-tu morning bihaen dae bilong hem, body bilong hem no stap nao.—Matthew 28:1-7; Mark 16:1-7; Luke 24:1-3; John 20:1-10.

Disfala emti grev hem mekem olketa enemy bilong Jesus barava sapraes, olsem olketa fren bilong Jesus tu sapraes. For longtaem nao olketa enemy bilong hem barava trae hard for lukim hem dae and berem. Taem olketa kasem finis goal bilong olketa, olketa barava careful for putim wanfala security gard and satem strong disfala grev. Nomata olsem, long morning bilong firstfala day bilong datfala week, hem emti.

Waswe, olketa fren bilong Jesus tekem body bilong hem from datfala grev? Nomoa, from olketa Gospel showimaot hao olketa sorre tumas bihaen olketa killim Jesus dae. Nara samting tu, olketa disaepol bilong hem bae nating willing for kasem persecution and dae long samting wea olketa savve hem giaman nomoa.

Hu nao mekem grev hia emti? Olketa enemy bilong Jesus no garem eni reason for tekem disfala body. Nomata sapos olketa tekem, iumi sure olketa bae iusim bihaen for pruvim hao samting wea olketa disaepol talem hao Jesus hem resurrect finis and hem stap laef hem rong. Bat datwan nating happen, bikos God nao duim disfala samting.

Samfala week bihaen, olketa enemy bilong Jesus no talem eni samting taem Peter witness olsem: “Olketa man bilong Israel, herem olketa toktok hia: Jesus bilong Nazareth, wanfala man wea God showimaot long pablik long iufala thru long olketa strongfala waka and profesi and saen wea God duim thru long hem midolwan long iufala, olsem iufala seleva savve, disfala [man], wea God givim go from purpose and savve bilong hem abaotem future, iufala givim long olketa man wea brekem law for nilam hem long post and killim dae. Bat God resurrectim hem thru long wei wea hem aotem paoa bilong dae, bikos dae kanduit holem hem for olowe. From David sei olsem abaotem hem, ‘Mi garem Jehovah front long mi evritaem . . . And tu, body bilong mi tu bae stap witim hope; from iu bae no lusim soul bilong mi long Hades, and iu bae no letem loyal wan bilong iu for rotten.’”—Acts 2:22-27.

Planti Lukim Jesus wea Resurrect

Insaed buk bilong Acts, man wea raetem Gospel Luke hem sei: “Long [olketa aposol] tu thru long planti strongfala pruv [Jesus] showimaot hem laef bihaen hem safa, olketa lukim hem planti taem insaed long foti day and hem talem olketa samting abaotem kingdom bilong God.” (Acts 1:2, 3) Planti disaepol lukim Jesus wea resurrect long olketa difren taem—long wanfala garden, long road, long wanfala kaikai, long saed Sea bilong Tiberias.—Matthew 28:8-10; Luke 24:13-43; John 21:1-23.

Pipol wea againstim diswan kwestinim wei wea hem showim hemseleva. Olketa sei hao olketa man wea raet mekem ap story nomoa, or olketa showim samfala example wea luk olsem olketa Gospel no agree witim each other. For tok stret, wei wea olketa story bilong Gospel hem lelebet difren from narawan pruvim hao olketa no story haed tugeta for mek sure olketa Gospel bae agree. Savve bilong iumi abaotem Jesus kamap moa big taem wanfala man wea raet givim moa information abaotem samting wea happen long laef bilong Christ long earth, winim wanem olketa narawan raetem abaotem datwan.

Waswe, wei wea Jesus showim hemseleva bihaen resurrection hem wanfala dream nomoa? For sei olsem hem hard for bilivim, bikos planti pipol nao lukim hem. Midolwan olketa hia hem olketa fisherman, olketa woman, wanfala wakman bilong gavman, and nomata datfala aposol wea daot Thomas, wea hem biliv nomoa bihaen hem lukim pruv hao Jesus hem laef bak from dae. (John 20:24-29) Long samfala taem, olketa disaepol bilong Jesus nating luksavve firstaem long Lord bilong olketa wea resurrect. Wantaem, winim 500 pipol lukim hem, planti long olketa still stap laef taem aposol Paul iusim datfala samting wea happen olsem pruv bilong hem for defendim resurrection.—1 Corinthians 15:6.

Jesus wea Stap Laef Affectim Pipol

Resurrection bilong Jesus hem no wanfala interesting samting for argue abaotem nomoa. Wei wea hem really stap affectim planti pipol evriwea long gudfala wei. Start kam from first century, staka pipol wanwan change from wei for no interest or for barava againstim Christian Wei and kamap barava sure hao hem nao tru religion. Wanem nao changem olketa? Wei for studyim Scripture pruvim long olketa hao God resurrectim Jesus for laef olsem wanfala spirit wea kasem glory long heven. (Philippians 2:8-11) Olketa showimaot faith long Jesus and long salvation wea Jehovah God hem provaedem thru long ransom sakrifaes bilong Christ. (Romans 5:8) Olketa man olsem faendem trufala hapi taem olketa duim will bilong God and garem living wea followim olketa teaching bilong Jesus.

Tingim wanem nao hem minim for olsem wanfala Christian long first century. Olketa no aftarem hae position, paoa, or riches. Bat long wei wea difren, planti Christian ‘hapi taem pipol stealim evri samting wea olketa ownim’ for saed bilong faith bilong olketa. (Hebrews 10:34) Christian Wei needim laef wea man mas sakrifaesim samting and kasem persecution wea long planti taem man savve dae for faith bilong hem.

Bifor olketa kamap follower bilong Christ, samfala garem olketa gudfala chance for kasem hae position and riches. Saul bilong Tarsus hem study anda long datfala teacher bilong Law wea garem bignem Gamaliel and hem start for mekem hemseleva wanfala important man long eye bilong olketa Jew. (Acts 9:1, 2; 22:3; Galatians 1:14) Nomata olsem, Saul kamap aposol Paul. Hem and planti narawan rejectim hae position and paoa wea disfala world offerim. Why? Mekem olketa spreadim message bilong trufala hope wea garem faondeson long olketa promis bilong God and long wei wea Jesus Christ hem resurrect finis from dae. (Colossians 1:28) Olketa willing for safa for samting wea olketa savve hem garem faondeson long truth.

Sem samting go ahed for happen long planti million pipol distaem. Iu savve faendem olketa insaed olketa kongregeson bilong Olketa Jehovah’s Witness raonem world. Olketa Witness hapi for invaetem iu long celebration bilong dae bilong Christ bihaen sun go daon long Sunday, April 8, 2001. Olketa bae hapi for lukim iu kam long datfala taem and long evri meeting bilong olketa for studyim Bible long Kingdom Hall bilong olketa.

Waswe, iu laek lanem moa samting, no abaotem datfala dae and resurrection bilong Jesus nomoa, bat abaotem laef and olketa teaching bilong hem tu? Hem invaetem iumi for kam long hem. (Matthew 11:28-30) Duim samting distaem for kasem stretfala savve abaotem Jehovah God and Jesus Christ. For duim olsem savve minim laef olowe anda long Kingdom bilong God long hand bilong Son bilong hem wea hem lovem tumas.

[Footnote]

[Olketa Piksa long page 6]

From the Self-Pronouncing Edition of the Holy Bible, containing the King James and the Revised versions

[Piksa Credit Line long page 7]

Planti million pipol faendem trufala hapi olsem olketa follower bilong Jesus Christ