Resurrection Bilong Jesus Barava Important Long Iumi

1, 2. (a) Wanem nao samfala bigman bilong Jew religion askem long Peter, and wanem nao Peter talem long olketa? (Lukim piksa long start bilong study.) (b) Wanem nao mekem Peter no fraet long datfala taem?

TU-THRI week bihaen Jesus laef bak, Peter standap front long samfala bigman bilong Jew religion wea barava kros long hem. Olketa hia nao planim dae bilong Jesus. Olketa kros long Peter bikos hem healim wanfala man wea kripol start kam long taem wea hem born. Olketa sei long Peter: “Hu nao givim paoa long [iu] for duim diswan?” Peter no fraet and sei: “Disfala man wea standap front long iufala evriwan hem gud bak bikos long nem bilong Jesus Christ bilong Nazareth. Jesus nao iufala nilam hem long post bat God mekem hem for laef bak.”—Acts 4:5-10.

² Bifor Jesus dae, thrifala taem nao Peter sei hem no savve long Jesus bikos hem fraet. (Mark 14:66-72) Bat taem hem standap front long olketa bigman hia hem no fraet. Hao nao olsem? Holy spirit nao helpem hem for no fraet. And nara samting tu, Peter hem barava sure Jesus hem laef bak finis. Wanem nao mekem aposol Peter barava sure Jesus hem laef bak? And wanem nao mekem iumi tu barava sure long datwan?

3, 4. (a) Storyim samfala resurrection wea happen bifor olketa aposol born. (b) Hu nao olketa wea Jesus resurrectim?

³ Olketa aposol bilong Jesus savve man wea dae savve laef bak. Staka year bifor olketa born, God givim paoa long profet Elijah and Elisha for resurrectim samfala. (1 Ki. 17:17-24; 2 Ki. 4:32-37) And tu, taem samfala man torowem dead body bilong wanfala man insaed hol wea olketa bon bilong Elisha stap and body hia tasim olketa bon bilong Elisha, datfala man hem laef bak. (2 Ki. 13:20, 21) Olketa Christian long first century bilivim wanem olketa Holy Raeting talem, olsem iumi tu bilivim wanem Bible talem.

⁴ Taem iumi readim olketa story long Bible abaotem olketa resurrection wea Jesus duim datwan mekem iumi barava hapi. Olsem example, taem Jesus resurrectim son bilong wanfala widow woman, masbi datfala woman sapraes fogud. (Luke 7:11-15) Long narataem, Jesus resurrectim wanfala young gele. Masbi dadi and mami bilong hem barava hapi taem dota bilong tufala hem laef bak! (Luke 8:49-56) And masbi olketa wea lukim Lazarus kamaot from cave taem Jesus resurrectim hem olketa barava hapi tu!—John 11:38-44.

RESURRECTION BILONG JESUS HEM BARAVA SPESOL

5. Long wanem wei nao resurrection bilong Jesus hem difren from olketa nara resurrection?

⁵ Olketa aposol savve resurrection bilong Jesus hem difren from olketa nara resurrection. Olketa wea resurrect bifor Jesus, olketa garem physical body taem olketa laef bak, and gogo olketa dae moa. Taem Jesus laef bak hem garem spirit body wea no savve dae and rotten. (Readim Acts 13:34.) Peter sei: “[Jesus] hem man taem olketa killim hem dae, bat hem wanfala spirit taem God mekem hem laef bak.” And Peter sei tu: “Christ hem go long heven and distaem hem long raet saed bilong God. Olketa angel and olketa wea garem paoa stap anda long hem.” (1 Pet. 3:18-22) Olketa resurrection wea happen bifor hem olketa nambawan mirakol, bat resurrection bilong Jesus nao hem barava spesol winim olketa hia.

6. Hao nao resurrection bilong Jesus strongim olketa disaepol bilong hem?

⁶ Resurrection bilong Jesus hem barava strongim olketa disaepol bilong hem. Olketa enemy bilong Jesus tingse hem dae finis, bat hem laef bak nao. Hem wanfala strongfala spirit wea no eni man savve spoelem hem. Taem Jesus laef bak, datwan pruvim hem Son bilong God. From olketa disaepol savve Jesus hem laef bak, olketa no sorre or fraet moa, bat datwan mekem olketa feel strong and hapi fogud. Resurrection bilong Jesus hem barava important for mekem plan bilong Jehovah kamap tru. And hem barava important part tu bilong gud nius wea olketa disaepol talemaot long evri ples.

7. Wanem nao Jesus duim distaem, and wanem nao olketa kwestin wea kamap?

⁷ Iumi savve Jesus no just wanfala nambawan man wea laef bifor, bat hem laef distaem and leadim preaching waka wea gohed evriwea long world. Jesus Christ hem rul distaem insaed Kingdom bilong God long heven, and klosap nao bae hem finisim pipol wea no obeyim God, and mekem earth kamap paradaes wea pipol bae laef olowe long hem. (Luke 23:43) Olketa gud samting hia bae no happen sapos Jehovah no resurrectim Jesus. So wanem nao samfala reason wea mekem iumi barava sure Jesus hem laef bak? And why nao resurrection bilong Jesus hem barava important long iumi?

JEHOVAH GAREM PAOA FOR FINISIM DAE

8, 9. (a) Why nao olketa bigman bilong Jew religion sei olketa security mas gaedem datfala cave? (b) Storyim olketa samting wea happen taem tufala woman kam long cave wea olketa berem Jesus.

⁸ Long day bihaen olketa killim Jesus dae, olketa hed priest and olketa Pharisee kam long Pilate, and sei: “Mifala tingim samting wea datfala man for laea hem talem taem hem laef yet. Hem sei, ‘Mi bae laef bak bihaen thrifala day.’ So talem olketa man bilong iu for gaedem datfala cave go kasem mek-thri day nogud olketa disaepol bilong hem kam and stealim body bilong hem and sei long pipol, ‘Hem laef bak nao!’ Kaen laea toktok olsem bae hem barava nogud winim datfala samting wea Jesus talem firstaem.” So Pilate sei long olketa: “Iufala garem man for security. Talem hem for go gaedem gud ples ia.” So hem nao wanem olketa duim.—Matt. 27:62-66.

⁹ Olketa wea berem Jesus putim body bilong hem insaed wanfala cave and satem witim wanfala big ston. Olketa bigman bilong Jew religion laekem dead body bilong Jesus for stap olowe insaed datfala cave. Bat datwan hem no plan bilong Jehovah. Thrifala day bihaen Jesus dae, Mary Magdalene and nara Mary kam long datfala cave. Tufala lukim ston wea olketa iusim for satem cave hia hem aot finis, and wanfala angel nao sidaon antap long hem. Angel talem tufala woman hia for luk insaed long datfala cave. Hem sei: “Hem no stap long hia nao. . . . Hem laef bak finis.” (Matt. 28:1-6) Jesus hem laef bak nao!

10. Wanem nao Paul talem long olketa long Corinth wea pruvim Jesus hem laef bak?

¹⁰ Olketa samting wea happen insaed 40 day bihaen datwan barava pruvim Jesus hem laef bak. Paul storyim olketa samting hia long olketa long Corinth. Hem sei: “Barava important samting wea mi lanem, hem nao mi teachim long iufala, and datwan hem olsem: Olketa Holy Raeting sei Christ hem dae for olketa sin bilong iumi. Olketa berem hem, and olketa Holy Raeting sei hem laef bak long mek-thri day. Cephas lukim hem, then twelvfala aposol lukim hem tu. Wanfala taem bihaen datwan, winim 500 brata nao lukim hem. Staka long olketa stap yet witim iumi distaem, bat samfala dae finis. Bihaen datwan, James lukim hem, then evri aposol lukim hem tu. Bat mi, wea olsem pikinini wea born early, mi nao last man wea lukim hem.”—1 Cor. 15:3-8.

FOFALA REASON WHY IUMI SAVVE JESUS HEM LAEF BAK

11. Wanem nao “olketa Holy Raeting” talem wea showimaot Jesus bae laef bak?

¹¹ Firstfala reason, “olketa Holy Raeting sei” Jesus bae laef bak. Samfala profesi long Bible sei Jesus bae laef bak. Olsem example, David sei Jehovah bae no leavim long grev “datfala man wea faithful.” (Readim Psalm 16:10.) Long Pentecost 33 C.E., aposol Peter sei datfala profesi wea David talem hem abaotem Jesus. Hem sei: “David hem savve finis Christ bae hem laef bak. Hem storyim datwan and hem sei God no leavim Christ long grev and body bilong hem no rotten.”—Acts 2:23-27, 31.

12. Hu nao lukim Jesus bihaen hem laef bak?

¹² Mek-tu reason, staka pipol nao lukim Jesus bihaen hem laef bak. Insaed 40 day bihaen hem laef bak, olketa disaepol lukim Jesus long ples wea grev bilong hem stap, and tu long road wea go for Emmaus and long olketa nara ples. (Luke 24:13-15) Long olketa taem hia, hem story long samfala man wanwan, wea wanfala nao hem Peter, and samfala taem hem story tu long olketa grup wea hipap. Wantaem, hem story long wanfala grup wea winim 500 pipol nao hipap! From staka pipol nao lukim Jesus bihaen hem laef bak, datwan pruvim diswan hem really happen.

13. Wanem nao olketa disaepol duim wea showimaot olketa barava sure Jesus hem laef bak?

¹³ Mek-thri reason, olketa disaepol bilong Jesus strong for preach abaotem resurrection bilong Jesus. Bikos long preaching waka wea olketa duim, pipol persecutim olketa, spoelem olketa, and laek killim olketa dae tu. Tingim diswan: Sapos Jesus hem no laef bak, waswe, bae Peter putim laef bilong hem long danger for preach abaotem resurrection bilong Jesus long olketa bigman bilong Jew religion wea heitim Jesus and planim dae bilong hem? Nomoa. Peter and olketa nara disaepol barava sure Jesus laef bak and hem leadim datfala preaching waka. Nara samting tu, from Jesus hem laef bak, datwan mekem olketa disaepol bilong hem sure bae olketa tu laef bak. Olsem example, taem Stephen dae, hem barava sure olketa wea dae bae laef bak.—Acts 7:55-60.

14. Wanem nao mekem iu barava sure Jesus hem laef distaem?

¹⁴ Mek-foa reason, wanfala samting wea happen distaem hem pruvim Jesus rul and hem Hed long Christian kongregeson. Datfala samting nao hem wei wea staka pipol kam insaed organization bilong Jehovah. Hard for datwan hem happen sapos Jesus no laef bak. And tu, sapos Jesus no laef bak maet iumi distaem no savve long eni samting abaotem hem. Bat staka samting pruvim Jesus hem laef distaem and hem leadim preaching waka wea gohed evriwea long world.

RESURRECTION BILONG JESUS HEM BARAVA IMPORTANT LONG IUMI

15. Why nao resurrection bilong Christ hem mekem iumi no fraet for preach?

¹⁵ Resurrection bilong Christ hem mekem iumi no fraet for preach. For 2,000 year finis, olketa enemy bilong God traem staka difren kaen samting for stopem pipol bilong hem for no preachim gud nius, olsem wei for apostate, tok spoelem pipol bilong God, attakim olketa, tambuim preaching waka, killim olketa nogud, and killim olketa dae tu. Nomata olsem, Bible sei: “Eni weapon wea pipol wakem for againstim iufala bae no spoelem iufala.” (Isa. 54:17) Iumi no fraetem olketa wakaman bilong Satan. Jesus gohed for helpem iumi, olsem hem promis for duim. (Matt. 28:20) So iumi shud gohed strong for preach bikos hard for olketa enemy bilong iumi stopem iumi for talemaot gud nius!

16, 17. (a) Hao nao resurrection bilong Jesus pruvim evri samting wea hem teachim hem tru? (b) Olsem John 11:25 storyim, God givim paoa long Jesus for duim wanem?

¹⁶ Resurrection bilong Jesus pruvim evri samting wea hem teachim hem tru. Wanfala savveman sei sapos Christ hem no laef bak, datwan minim olketa Christian krangge tumas bikos evri samting wea olketa bilivim hem laea nomoa. Aposol Paul sei sapos Christ hem no laef bak, waka bilong iumi for preach hem iusles, and faith bilong iumi hem iusles tu. Sapos Jesus no laef bak, olketa samting wea olketa Gospel talem hem story nating nomoa abaotem wanfala gud man wea wise and wea olketa enemy bilong hem killim hem dae. Bat iumi savve Jesus hem laef bak, and datwan pruvim evri samting wea hem teachim hem tru.—Readim 1 Corinth 15:14, 15, 20.

¹⁷ Jesus sei: “Mi nao givim laef long pipol and mekem olketa for laef bak moa. Nomata sapos man wea biliv long mi hem dae, bae hem laef bak moa.” (John 11:25) Disfala promis bilong Jesus bae hem kamap tru. Jehovah givim paoa long Jesus for resurrectim olketa wea bae rul long heven and staka billion pipol wea bae stap long earth. Sakrifaes and resurrection bilong Jesus mekem iumi barava sure God bae finisim dae. Bikos long diswan iumi savve stand strong long eni test and hem helpem iumi tu for no fraet for dae!

18. Resurrection bilong Jesus mekem iumi sure long wanem samting?

¹⁸ Resurrection bilong Jesus mekem iumi sure Jehovah bae judgem olketa man long stretfala wei. Paul sei olsem long samfala man and woman long Athens: “[God bae] judgem olketa man evriwea long world. Hem bae judgem olketa long stretfala wei and hem bae iusim wanfala man wea hem markem for duim diswan. Evri man savve trustim diswan from hem mekem disfala man for laef bak moa.” (Acts 17:31) God markem Jesus for judgem olketa man long earth, and iumi sure hem bae showimaot love taem hem duim datwan.—Readim Isaiah 11:2-4.

19. From iumi barava sure Jesus hem laef bak, hao nao datwan affectim iumi?

¹⁹ From iumi barava sure Jesus hem laef bak, datwan mekem iumi laek for obeyim God. Sapos Jesus no dae and no laef bak, hard for iumi kamap free from sin and dae. (Rome 5:12; 6:23) Iumi bae no garem eni hope, and maet iumi garem sem tingting olsem pipol wea Paul story abaotem wea sei: “Iumi kaikai and drink nomoa bikos tumoro iumi dae.” (1 Cor. 15:32) Bat iumi no ting long olketa samting wea man savve enjoyim long laef olsem main samting long laef bilong iumi. Iumi tinghae long resurrection hope, and iumi laek for obeyim Jehovah long evri samting.

20. Hao nao resurrection bilong Jesus pruvim Jehovah garem bigfala paoa and wisdom?

²⁰ Resurrection bilong Jesus pruvim Jehovah garem bigfala paoa and wisdom, and hem “givim gud samting long olketa wea barava lukaotem hem.” (Heb. 11:6) Jehovah showimaot hem garem bigfala paoa and wisdom taem hem resurrectim Jesus for laef moa long heven olsem wanfala spirit wea no savve dae. And tu, God showimaot hem fit for mekem olketa promis bilong hem kamap tru. Jehovah talem profesi abaotem wanfala “pikinini” wea bae duim samting for showimaot Jehovah nomoa fit for rul. For mekem disfala promis kamap tru, datfala “pikinini,” wea hem nao Jesus, mas dae and laef bak.—Gen. 3:15.

21. Wanem nao feeling bilong iu abaotem resurrection hope?

²¹ Iumi thankiu long Jehovah from hem givim iumi datfala resurrection hope. Bible talem disfala promis: “Tent bilong God hem stap witim olketa man. Hem bae stap witim olketa and olketa bae kamap pipol bilong hem, and God nao bae stap witim olketa. Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.” Aposol John nao raetem datfala promis, and hem kasem disfala instruction: “Raetem diswan, bikos man savve trustim olketa toktok hia and hem barava tru.” Hu nao showim long John evri samting wea hem raetem long buk Revelation? Jesus Christ nao showim evri samting hia long John bihaen Jesus resurrect!—Rev. 1:1; 21:3-5.