Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • w01 3/15 pp. 20-24
  • Maet Diswan Nao Best Laef Waka for Iu?

Disfala sekson no garem eni video.

Sorre, disfala video no savve plei distaem.

  • Maet Diswan Nao Best Laef Waka for Iu?
  • Wastaoa wea Talemaot Kingdom Bilong Jehovah—2001
  • Subheding
  • Olketa Nara Article
  • Waswe, God Showim Wei?
  • Wanfala Nambawan Laef
  • Living Long Bethel
  • Wanem Nao Iu Savve Duim for Kamap Fit?
  • Iumi Evriwan Garem Share
  • Invitation for Evriwan!
    Wastaoa wea Talemaot Kingdom Bilong Jehovah—2010
  • Gudfala Waka wea God No Forgetim
    Christian Laef and Ministry Bilong Iumi—Meeting Buk—2019
  • Wanem Nao Bethel?
    Hu Nao Duim Wanem Jehovah Laekem Distaem?
  • Branch Letter
    Kingdom Ministry Bilong Iumi—2006
Wastaoa wea Talemaot Kingdom Bilong Jehovah—2001
w01 3/15 pp. 20-24

Maet Diswan Nao Best Laef Waka for Iu?

SAPOS iu wanfala baptaes Christian, hem tru hao love for God nao muvim iu for duim will bilong hem. And tu, ministry hem samting wea iu barava interest for duim. Tingim hao Jesus Christ givim spesol komand for evri follower bilong hem mek disaepol. (Matthew 28:19, 20) Hem tru, maet iu waka for selen distaem for saportim iuseleva. Bat olsem wanfala follower bilong Jesus and wanfala Jehovah’s Witness, first and important samting hem wei wea iu wanfala Christian minister—wan wea putim waka for preachim Kingdom olsem first samting long laef.—Matthew 24:14.

Maet iu midolwan 19 and 25 year and tingting raonem wanem laef waka nao bae iu duim. Taem iu ting raonem wanem for chusim, wei for satisfae maet wanfala important goal bilong iu.

So tingim wanem Jørgen long Denmark talem abaotem wanem hem chusim. Jørgen hem sei hem “wanfala nambawan wei bilong living wea iu savve keepim mind long waka wea important winim eni nara waka.” Eva, wanfala woman long Greece wea 31 year, hem sei: “Taem mi markem laef bilong mi witim olketa fren bilong mi, mi evritaem tingse laef bilong mi hem garem moa mining, busy witim planti samting, and moa interesting.” Wanem kaen laef waka nao provaedem wei for satisfae olsem? Hao nao iu savve kasem kaen laef olsem?

Waswe, God Showim Wei?

For chusim laef waka maet hard tumas. Tru nao, samfala maet laekem God for talem stret wanem nao hem laekem olketa for duim.

Taem Moses stap long Midian, Jehovah directim hem for go bak long Egypt and leadim olketa Israelite aot from wei for slave. (Exodus 3:1-10) Angel bilong God go long Gideon, wea God appointim hem for sevem Israel from hardfala living. (Judges 6:11-14) David lukaftarem olketa sheep taem God talem Samuel for anointim hem olsem next king bilong Israel. (1 Samuel 16:1-13) Distaem iumi no kasem kaen instruction olsem. Bat, iumi mas lukluk gud long olketa samting and disaed hao for iusim olketa savve bilong iumi wea kam from God.

Jehovah openem “wanfala bigfala door wea lead go for waka” for olketa young Christian distaem. (1 Corinthians 16:9) Long wanem wei? Insaed last tenfala year, winim 2,125,000 moa pipol join for talemaot Kingdom mekem distaem namba bilong olketa hem winim 6,000,000 evriwea long earth. Hu nao help for provaedem planti million Bible, buk, brochure, magasin, and tract wea fulfillim spiritual need and for waka for preachim gud nius evriwea long world? Olketa member bilong Bethel famili evriwea long world nao enjoyim disfala nambawan privilege.

Wanfala Nambawan Laef

Bethel hem minim “Haos bilong God,” and olketa Bethel hom nao ples wea olketa Christian volunteer wea serve long olketa headquarter and branch office bilong Watch Tower Society stap insaed. (Genesis 28:19, footnote) Maet iumi tingim olketa Bethel famili wea organize gud olsem ‘olketa famili wea kamap strong thru long wisdom’ and wea faondeson nao love for Jehovah.—Proverbs 24:3.

Hao nao Bethel hem olsem wanfala famili? Wanfala member bilong Bethel famili long Estonia wea 25 year sei: “Mi enjoyim feeling for evritaem stap midolwan olketa fren bilong Jehovah. Kasem distaem, diswan hem olsem barava nambawan samting for mi long Bethel service.”—Psalm 15:1, 2.

Distaem raonem world, samting olsem 19,500 enjoyim privilege bilong Bethel service. (Psalm 110:3) Long United States, 46 percent bilong olketa wea stap long Bethel, olketa midolwan 19 and 29 year. Olsem Isaiah, olketa sei: “Mi long hia! Sendem mi.” (Isaiah 6:8) Isaiah—wea dedicate finis long Jehovah—hem volunteer for wanfala privilege moa long service. Luk olsem diswan minim hem mas sakrifaesim samfala gud samting bilong hemseleva. Olketa wea serve long Bethel lusim hom and ples bilong olketa, and tu olketa mami, dadi, brata, sista, and olketa fren. Olketa willing for mekem olketa sakrifaes hia “for saed bilong gud nius.”—Mark 10:29, 30.

Bat, planti spiritual blessing stap long Bethel! Wanfala young member long Bethel famili long Russia hem sei: “Taem iumi garem fasin for sakrifaesim seleva, iumi savve lanem planti samting wea bae helpem iumi for stap long niu world. For saed bilong mi olketa blessing bilong Jehovah hem barava big winim olketa sakrifaes bilong mi.”—Malachi 3:10.

Living Long Bethel

Hao nao living long Bethel? Olketa member bilong Bethel agree hao hem gudfala, mekem man satisfae and, hem spesol. Jens wea 43 year, hem enjoyim Bethel service. Why nao olsem? Hem sei: “From mi feelim hao mifala waka hard olsem part long wanfala big sekson for duim wanfala important assignment. Mi savve garem feeling long hao big and important nao waka bilong Jehovah.”

From Monday go kasem Saturday, day long Bethel hem start witim morning worship. Diswan hem wanfala story tugeta abaotem Bible, wea wanfala elder wea garem savve nao leadim. Long Monday naet for wanfala hour olketa garem famili study long Bible witim help bilong Wastaoa, and samfala taem bihaen diswan olketa garem wanfala tok followim Bible theme wea barava fitim Bethel famili.

Wanem nao happen taem man hem niu long Bethel? For helpem olketa niu member for savve long laef long Bethel, olketa mature brata givim samfala tok wea deal witim olketa difren part long Bethel service. For samfala week long datfala first year, evri niu member bilong Bethel famili attendim wanfala nambawan skul evri week for mekem grow savve bilong olketa long Bible. Olketa niu wan hia enjoyim tu wanfala spesol schedule for readim Bible. Insaed long first year bilong Bethel service, olketa niu member bilong famili readim full Bible.

Wanem nao kamaot from evri training hia? Joshua, wanfala member bilong Bethel famili long Hong Kong wea 33 year hem ansa olsem: “Bethel hem barava strongim wei wea mi tinghae long Jehovah. Mi savve kaban witim planti brata wea garem savve and wea iusim klosap full laef bilong olketa for servem Jehovah. Main samting wea mi enjoyim tumas hem olketa spiritual schedule, olsem morning worship and famili study long Wastaoa. And tu, mi laekem disfala living wea followim order and simpol wei. Diswan mekem mi free from wari nating. Mi lane tu for deal witim olketa samting followim Christian fasin, and diswan evritaem givim gudfala samting.”

Olketa member bilong Bethel famili iusim klosap full taem and strong bilong olketa for duim waka wea olketa volunteer for hem. Hem minim, main wei for iusim strong long body and savve bilong olketa hem for duim assignment wea olketa kasem long Bethel. Staka difren kaen assignment stap. Samfala waka long olketa printing press, or mekem olketa buk for sendem go long planti kongregeson. Samfala narawan waka long kitchen, rum for kaikai, or long ples for wasim kaleko. Samfala moa assignment hem for klin, waka long farm, construction waka, and samfala moa. Samfala garem responsibility for lukaftarem olketa machine and tul long olketa department hia. Samfala narawan waka saed long health or duim office waka. Evri assignment long Bethel garem olketa challenge for enjoyim and mekem iu feel barava gud. Waka wea olketa duim long Bethel mekem man satisfae long spesol wei bikos hem saportim olketa samting saed long Kingdom, and olketa duim bikos olketa lovem God.

Olketa member bilong Bethel famili kasem assignment for joinim wanfala kongregeson, wea olketa barava iusim olketa gud samting from waka bilong olketa. Olketa enjoyim wei for attendim olketa meeting bilong kongregeson and share long preaching waka. From diswan, olketa member bilong Bethel famili feel klos long olketa brata and sista long olketa lokol kongregeson.—Mark 10:29, 30.

Rita, wanfala member bilong Bethel famili long Britain, hem sei: “Mi barava thankiu for kongregeson! Taem mi long olketa meeting and long ministry, hem barava strongim faith bilong mi for lukim olketa brata, sista, pikinini, and olketa olo long there! Nomata wanem happen, olketa stap. Diswan helpem mi for moa strong long Bethel service bilong mi.”

Living long Bethel hem no waka, olketa meeting, field service, and study nomoa. Datfala famili enjoyim olketa taem for rest tu. Long samfala taem, olketa enjoyim olketa “Famili Naet” program, wea givim chance for enjoyim and kasem gud samting long spiritual wei from difren savve wea narawan garem, and for lanem moa samting abaotem laef bilong nara pipol wea serve long Bethel wea savve encouragem evriwan. Nara samting tu, hem for enjoyim gudfala wei for visitim narawan wea savve buildimap man. Samfala rum witim samting for hapitaem maet stap, and tu olketa library for man duim reading and research. And nara gudfala samting hem naesfala story raonem olketa tebol long taem for kaikai.

Tom, wanfala member bilong Bethel famili long Estonia, hem sei: “Sea hem klosap nomoa long Bethel, and klosap long there hem wanfala sekson long bush wea luk naes tumas wea mi and waef enjoyim olketa short wakabaot. Samfala taem tu mi pleim golf, hockey, and tennis witim olketa fren long kongregeson and long Bethel. And taem weather hem fitim, mifala raedem bicycle bilong mifala.”

Wanem Nao Iu Savve Duim for Kamap Fit?

Hem tru, main purpose bilong Bethel hem olsem wanfala ples wea olketa mature Christian savve duim holy service long Jehovah and waka for olketa brata raonem full world. Olketa wea kamap member bilong Bethel famili mas kasem samfala mark. Wanem nao iu savve duim for kasem olketa mark for serve long Bethel?

Olsem Timothy, wea serve witim aposol Paul, olketa wea kam for serve long Bethel mas garem gud nem long kongregeson. (1 Timothy 1:1) “Olketa brata long Lystra and Iconium givim gudfala report abaotem” Timothy. (Acts 16:2) Nomata hem young, Timothy savve gud long Bible and hem garem gudfala faondeson long truth. (2 Timothy 3:14, 15) Long sem wei tu, olketa wea serve long Bethel mas garem savve long Bible.

Olketa member bilong Bethel famili need for garem spirit for sakrifaesim seleva. From hem showaot klia tumas hao Timothy garem spirit for sakrifaesim seleva and hem willing for putim Kingdom firstaem long interest bilong hemseleva, Paul savve sei abaotem hem: “Mi no garem eni narawan wea garem fasin olsem hem, wea bae barava lukaftarem olketa samting bilong iufala. From evri narawan lukaotem samting bilong olketa seleva nomoa, no samting bilong Christ Jesus. Bat iufala lukim hao hem pruvim hemseleva, olsem wanfala pikinini witim dadi hem waka hard witim mi for mekem gud nius go ahed.”—Philippians 2:20-22.

Bethel service needim olketa spiritual man and woman. Olketa arrangement wea stap for olketa member bilong Bethel famili mekem olketa fit for grow long spiritual wei thru long Bible study, wei for evritaem go long olketa Christian meeting and long field ministry, and for kaban witim olketa mature Christian. So, olketa long Bethel kasem help for followim kaonsel bilong Paul: “Go ahed for wakabaot long wan mind witim [Christ Jesus], garem rut and go ahed for grow long hem and kamap strong long faith, olsem iufala lanem, kamap full tumas witim faith long wei for talem thankiu.”—Colossians 2:6, 7.

For fitim kaen waka wea stap long Bethel, olketa wea kasem disfala privilege for serve mas strong long body and garem gudfala health. Sapos iu kasem olketa mark wea mifala storyim finis, iu 19 year or winim, and iu baptaes finis for wan year, mifala encouragem iu for ting raonem Bethel service.

Iumi Evriwan Garem Share

Olsem olketa Christian, hem tru hao iumi evriwan barava want for putim Kingdom waka olsem first samting long laef and for iusim full soul bilong iumi for service long Jehovah. (Matthew 6:33; Colossians 3:23) Tu, iumi savve encouragem olketa wea serve long Bethel for go ahed for givim holy service long there. And iumi shud especially encouragem olketa young brata wea kasem olketa mark for Bethel service, for trae hard for kasem disfala nambawan privilege.

Bethel service hem wanfala living wea mekem man satisfae long spiritual wei—wan wea maet best laef waka for iu. Hem olsem for Nick, wea start for serve long Bethel taem hem 20 year. Bihaen tenfala year long Bethel service, hem sei: “Mi planti taem prea long Jehovah for thankiu long hem for kaeness bilong hem wea man no fit for kasem. Wanem samting moa mi savve askem? Long hia, olketa faithful Christian stap raonem mifala wea duim best bilong olketa for servem Jehovah.”

[Box/Olketa Piksa long page 22]

WANEM NAO OLKETA ELDER AND PARENTS SAVVE DUIM?

Main wan wea olketa elder and traveling overseer shud encouragem for putim application for Bethel hem olketa young man. Wanfala survey showimaot hao 34 percent long olketa young wan long Bethel famili sei main wan for encouragem olketa for putim goal for serve long Bethel hem nao olketa Christian overseer. Hem tru, maet lokol kongregeson bilong olketa missim olketa. Bat hem gud for remember hao nomata iumi sure Timothy barava affectim narafala young pipol long gudfala wei long Lystra and Iconium, olketa elder long there no hol bak for letem hem serve witim Paul. Olketa no tingse for letem Timothy go witim Paul bae minim kongregeson bilong olketa seleva bae safa long bigfala wei.—1 Timothy 4:14.

Christian parents mas barava trae hard for affectim pikinini long gudfala wei saed long diswan. Long datfala sem survey, 40 percent wea tekpart talem hao parents nao main wan for encouragem olketa for duim Bethel service. Wanfala sista wea serve long Bethel for tu-thri year finis sei: “Laef bilong mami and dadi long service bilong Jehovah hem samting wea strong for muvim mi for acceptim Bethel service. Taem mi lukim example bilong tufala long full-taem ministry, mi sure diswan bae best living wea mi savve chusim and bae barava mekem mi satisfae.”

[Box long page 24]

OLKETA TINGHAE LONG BETHEL SERVICE

“Mi barava lovem service bilong mi long Bethel. Hem mekem mi satisfae for tingim hao mi servem Jehovah for full day finis and bae mi duim sem samting tumoro, next tumoro, and go moa. Diswan givim mi gudfala conscience and fulimap mind bilong mi witim olketa gudfala tingting.”

“Bethel hem wanfala ples wea iu savve iusim full taem and strong bilong iu for service bilong Jehovah and no eniting for pullim iu go difren. Diswan givim really hapi. Bat iu savve lukim tu organization bilong Jehovah long difren wei. Iu feel klosap long midol bilong datfala organization, and diswan hem barava spesol.”

“For serve long Bethel, hem best samting wea happen long laef bilong mi. Long hia education nating savve finis. And long hia education hem no for apim miseleva long samting, bat hem for Jehovah. Long hia waka bilong mi bae nating kamap iusles.”

“For iusim savve bilong mi long Bethel mekem mi satisfae and garem peace bikos mi iusim for Jehovah and for olketa brata.”

“Mi no savve faendem really wei for satisfae and hapi long waka wea mi garem bifor. For planti year mi laekem tumas idea for waka witim and for helpem olketa brata and sista bilong mi. Dastawe mi kam long Bethel. Mi barava satisfae for savve hao wei wea mi waka hard bae helpem narafala pipol long spiritual wei and bae givim praise long Jehovah.”

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem