Invitation for Evriwan!
WANFALA invitation hem stap for evriwan. Invitation for wanem? For visitim wanfala branch office bilong Olketa Jehovah’s Witness wea olketa kolem, Bethel. Raonem world 118 Bethel nao stap. Staka wea visit long Bethel barava tinghae long waka wea gohed long there.
Wanfala young wan wea studyim Bible lukim staka brata and sista hapi for waka for Jehovah long Bethel long Mexico. Hem barava tinghae long wanem hem lukim. Hem sei: “Wanem nao mi mas duim for waka long hia?” Olketa talem: “First samting, iu mas baptaes. Then hem gud for iu pioneer.” Datfala young wan duim wanem olketa talem and tufala year bihaen, hem kasem invitation for waka long Bethel long Mexico. And hem waka for 20 year finis.
Wanem Nao Bethel?
Long Hebrew languis, “Bethel” hem minim “Haos bilong God.” (Gen. 28:19) Olketa branch office savve printim and givimaot olketa Bible and Bible literature. And tu, olketa helpem and sapotim winim 100,000 kongregeson bilong Olketa Jehovah Witness evriwea long world. Klosap 20,000 man and woman nao waka long Bethel. Olketa kam from difren ples and garem difren kastom bat olketa barava hapi for waka for Jehovah and olketa spiritual brata and sista bilong olketa. Staka wea duim disfala Christian waka for longtaem finis hapi for waka witim olketa wea young and strong. Long olketa evening and weekend, olketa long Bethel hapi for hipap witim olketa brata and sista long olketa kongregeson meeting, or for duim Christian ministry. Olketa iusim tu free taem wea olketa garem for studyim Bible, hapitaem, and for duim olketa nara samting.
Olketa long Bethel kasem smol reimbursement evri month for helpem olketa. Olketa hapi tu for kaikaim healthy kaikai and for stap long naes rum wea klin. Olketa no mekem Bethel for olsem olketa expensive hotel bat hem ples wea fitim for duim waka. Olketa wea visit long Bethel tinghae long hao olketa keepim gud olketa building, garden, and evriting organize gud. Olketa tinghae tu long kaenfala wei wea evriwan showimaot and waka gud tugeta witim wan mind. Evriwan waka hard and nomata olketa busy tumas olketa kaen long pipol. Long Bethel, no eniwan hem gud winim narawan nomata olketa kam from difren ples or garem difren assignment. Evri assignment hem important nomata hem waka for klining, waka long garden, kuki, printim olketa buk or waka long office. Olketa wea waka long Bethel sapotim preaching waka wea Olketa Jehovah’s Witness duim.—Col. 3:23.
Olketa wea Waka Long Bethel
Iumi laek for savve long samfala wea waka long Bethel famili raonem world. Wanem nao mekem olketa for laek waka long Bethel? Tingim Mario. Taem Mario kamap Jehovah’s Witness, hem garem gud waka long wanfala big company long Germany wea sellim olketa trak. And hem garem chance for kasem big position long waka. No longtaem bihaen Mario baptaes, hem volunteer for waka long Bethel for wan week. Mario kasem assignment for help long department for printim olketa buk. Mario lukim hao olketa wea waka long Bethel barava difren from olketa wea hem waka witim long company. So hem raetem application for waka full taem long Bethel. Mario hapi for waka long Bethel long Germany nomata olketa relative and olketa wea hem waka witim bifor no minim why nao hem disaedem datwan.
Staka wea no skul gud tu waka long Bethel. Abel hem wanfala olsem, and hem waka long Bethel long Mexico for 15 year finis. Hem sei: “Mi lanem staka samting long Bethel. Mi lane for waka long olketa printing machine. Mi savve sapos mi duim disfala waka for eni company, bae mi garem staka selen bat bae mi nating hapi. Wei for waka long Bethel mekem mi garem peace, satisfae, and no wari abaotem wei for laek winim narawan. Mi feel olsem mi kasem nambawan education wea helpem mi long spiritual wei and helpem mi for savve long staka samting. Hard tumas for mi kasem gud samting olsem nomata sapos mi go long university.”
Visit Long Bethel Savve Encouragem Iumi
Wei for visitim Bethel savve helpem man for fren gud witim God. Hem nao wanem kasem Omar long Mexico. Mami bilong Omar teachim Bible long hem. Bat taem Omar 17 year, hem stop for attendim olketa Christian meeting and no preach. Wei bilong hem start for nogud and hem aftarem olketa material samting. Bihaen, company wea Omar waka for hem sendem hem witim olketa nara wakaman for go long Bethel long Mexico for showim olketa hao for iusim samfala machine. Omar sei: “Bihaen datwan, mifala tour long Bethel. From olketa kaen tumas long mi and from samting wea mi lukim hem mekem mi for ting raonem laef bilong mi, and wei wea mi lusim Jehovah. Kwiktaem nomoa mi start for attendim olketa meeting moa and studyim Bible. Bihaen sixfala month wea mi visitim Bethel, mi baptaes. Mi thankiu long Jehovah from datfala visit long Bethel encouragem mi.”
Long Japan, Masahiko hem big kam insaed Witness famili. Nomata olsem, hem tingse wei for gohed olsem Christian hem strict tumas. Hem busy tumas long olketa samting long skul and hem stop for attendim meeting and no duim preaching waka. Masahiko ting go bak and sei: “Wanfala day famili bilong mi and samfala brata and sista disaed for tour long Bethel. Famili bilong mi barava laekem mi tu for go. Taem mi tour long Bethel, datwan barava encouragem mi. Taem mi gogo witim olketa brata and sista hia, mi hapi fogud winim eni narataem wea mi stap witim olketa fren bilong mi wea no Witness. Mi laek followim Christian wei and mi disaed for study.” Distaem Masahiko duim full-taem service long kongregeson bilong hem.
Wanfala Witness from France muv go for waka long Moscow. From hem no attendim olketa meeting hem wikdaon long spiritual wei. Hem duim olketa samting wea rong and gogo hem maritim man wea no Witness. Then wanfala sista from kongregeson long France visitim hem and tufala go long Saint Petersburg, long Russia, and visit long Bethel long there. Hem sei: “Taem mitufala kasem Bethel, olketa barava welkamim mitufala and datwan mekem mi feel gud tumas. Evriwan long there waka gud tugeta. Mi feelim spirit bilong Jehovah. Mi luksavve nao hem rong for mi lusim organization bilong Jehovah, bat why nao mi duim datwan? Bihaen datfala visit long Bethel, mi prea long Jehovah for helpem mi and mi start for teachim Bible long tufala gele bilong mi.” Datfala sista wea wik long spiritual wei kasem strong from datfala visit long Bethel and olketa long kongregeson helpem hem tu. Bihaen datwan hem gohed gud long spiritual wei.
Waswe, visit long Bethel savve strongim tu olketa wea no savve long Olketa Jehovah’s Witness? Alberto long Brazil wea barava join insaed politik visitim Bethel long 1988. From Bethel hem klin tumas, organize gud, and olketa free for lukim evri waka wea gohed long there, hem barava tinghae long datwan. No longtaem bifor Alberto tour long Bethel, hem visitim brata-in-law bilong hem wea waka long ples wea olketa trainim olketa priest. Alberto luksavve tufala ples hia barava difren. Hem sei: “Ples wea olketa trainim olketa priest, olketa duim evri samting haed.” No longtaem bihaen hem visitim Bethel, hem start for studyim Bible, hem lusim politik, and distaem hem wanfala elder long kongregeson.
Kam Visitim Bethel!
Staka barava traem best for visitim branch office long kantri bilong olketa. Long Brazil, Paulo and Eugenia mas gogo long bas for 3,000 kilometer for tufala day mekem tufala kasem Bethel long there. So tufala keepim selen for fofala year mekem tufala fit for duim datwan. Tufala sei: “Mifala hapi tumas from mifala duim datwan. Distaem mifala minim gud hao organization bilong Jehovah hem waka. Taem mifala storyim waka long Bethel long olketa Bible study, samfala ask olsem, ‘Waswe, iu go long there finis?’ Distaem mifala savve sei, ia.”
Waswe, iu stap klosap long wanfala branch office or Bethel hom? Mifala laekem iu for kam visitim mifala. Iu barava welkam and hem bae strongim iu for gohed worshipim Jehovah.
[Piksa long page 18]
Mario
[Piksa long page 18]
Abel
[Piksa long page 18]
Germany
[Piksa long page 18]
Japan
[Piksa long page 18]
Brazil