Hao Wei for Widow Affectim Tufala Woman
SANDRA hem wanfala widow wea stap long Australia. Taem hasband bilong hem dae samfala year bifor, Sandra seke fogud. “For savve hao mi lusim partner and best fren bilong mi hem barava tumas long mi. Mi kanduit rememberim hao mi kasem bak haos from hospital or wanem mi duim long datfala day. Insaed olketa week bihaen, fraet bilong mi gogo kamap pain long body wea kamap evritaem.”
Sandra garem wanfala fren wea moa olo, Elaine, wea hem bin widow for samting olsem sixfala year. Elaine lukaftarem hasband bilong hem, David, for sixfala month bifor hem dae from cancer. From sorre bilong hem big tumas, no longtaem bihaen hasband bilong hem dae, hem blind for lelebet taem. Tufala year bihaen, hem haf-dead long pablik ples. Doctor bilong hem no faendem eni saen bilong sik long body. Bat, hem faendaot Elaine nating aotem sorre bilong hem, so hem advaesem Elaine for go long haos and trae hard for krae. “Hem tek taem for mi deal witim sorre bilong mi,” Elaine hem sei, and hem sei tu hao taem hem feel lonely, “mi savve go insaed bedroom and haedem hed bilong mi insaed olketa kaleko bilong David.”
Yes, dae bilong marit partner savve startim staka difren kaen feeling, bikos wei for widow hem no just for no garem hasband. Olsem example, for lelebet taem Sandra feel olsem hem no savve moa hu nao hemseleva. Olsem staka nara widow wea just lusim hasband, hem feel olsem hem no savve protectim hemseleva, no sef. Sandra ting bak: “From mi getius long wei wea hasband bilong mi disaedem samting, seknomoa mi mas disaedem olketa samting hia seleva. Mi no sleep gud. Mi taed and wiki. Mi faendem hard for savve wanem for duim.”
Olketa story olsem bilong Sandra and Elaine kamap evriday evriwea long world. Sik, accident, war, ethnic tension, and raf fasin mekem namba bilong olketa widow kamap moa big.a Staka long olketa woman hia safa kwaet nomoa, no savve wanem for duim. Wanem nao olketa fren and relative savve duim for helpem olketa wea deal witim wei for widow? Nextfala article garem samfala idea wea savve help.
[Footnote]
a Samfala woman kasem sem problem olsem olketa widow taem hasband bilong olketa lusim olketa. Nomata wei for separate and divorce garem problem wea difren, samfala principle wea iumi storyim long next article maet savve helpem tu olketa woman olsem.