“Kam Klos Long God, and Hem Bae Kam Klos Long Iufala”
Bifor and Bihaen Hem Kasem Strong for Change
SANDRA, wanfala woman long Mexico, storyim hemseleva olsem wanfala pikinini wea difren from evri narawan insaed famili bilong hem. Wei wea famili rejectim and no showimaot love for hem barava spoelem hem long olketa year wea hem growap. Hem sei: “Mi growap witim barava emti feeling and mi garem planti daot abaot why nao mi stap laef and abaotem laef.”
Taem Sandra long hae skul, hem start for drinkim wine wea dadi bilong hem garem long haos. Gogo, hem start for baem olketa botol alcohol bilong hemseleva and kamap wanfala wea depend long alcohol. Hem talemaot stret “Mi no garem eni reason for stap laef.” From hem no garem eni hope, Sandra start for iusim olketa drug. Hem sei: “Only samting wea helpem mi for forgetim olketa problem bilong mi hem wanem mi karem insaed paos bilong mi: botol alcohol, samfala drug or lelebet marijuana.”
Bihaen Sandra finisim medical skul, wei bilong hem for depend long alcohol kamap moa worse. Hem trae for killim dae hemseleva. Bat hem no dae.
Sandra trae hard for luk aotem spiritual help and saport saed long feeling long planti difren religion bat hem no faendem. From hem barava lus hope, hem evritaem singaot long God: “Wea nao iu? Why nao iu no helpem mi?” Feeling bilong hem for respectim seleva hem barava nomoa nao taem wanfala Jehovah’s Witness tok witim hem. Diswan lead go long wei wea hem studyim Bible. Hem barava muvim Sandra taem hem lanem hao “Jehovah hem stap klosap long olketa wea heart bilong olketa brek.”—Psalm 34:18.
Datwan wea studyim Bible witim Sandra helpem hem for savve hao Jehovah God luksavve iumi isi for foldaon bikos long sin and wei wea iumi no perfect wea iumi kasem from Adam. Sandra minim hao God luksavve iumi kanduit followim long perfect wei olketa raeteous mark bilong hem. (Psalm 51:5; Romans 3:23; 5:12, 18) Hem hapi for lanem hao Jehovah no lukluk long olketa wik point bilong iumi, and hem no expectim moa samting from iumi winim wanem iumi fit for duim. Man wea raetem psalm hem ask: “Sapos olketa mistek nao samting wea iu luk aotem, O Jah, O Jehovah, hu nao savve standap?”—Psalm 130:3.
Wanfala important truth bilong Bible wea mekem heart bilong Sandra hapi hem ransom sakrifaes bilong Jesus Christ. Thru datwan, Jehovah barava showimaot mercy for ting long olketa man wea obey olsem olketa raeteous, nomata olketa no perfect. (1 John 2:2; 4:9, 10) Yes, iumi savve kasem “wei for forgivim olketa sin bilong iumi” and thru long diswan iumi savve kasem help for winim eni feeling bilong wei for feel iusles.—Ephesians 1:7.
Sandra lanem olketa important leson from example bilong aposol Paul. Hem tinghae tumas long kaenfala fasin bilong God for forgivim hem long olketa mistek bilong hem bifor and saportim hem long hardfala faet for winim olketa wik point wea kamap moa. (Romans 7:15-25; 1 Corinthians 15:9, 10) Paul stretem laef bilong hem, ‘whipim body bilong hem and leadim olsem wanfala slave’ mekem hem followim gogo wea God appruvim. (1 Corinthians 9:27) Hem no letem olketa badfala feeling bilong hem for leadim hem olsem wanfala slave.
Olketa wik point bilong Sandra barava spoelem hem, bat hem go ahed for faetem olketa. Hem strong for prea for help bilong Jehovah for winim olketa feeling hia and luk aotem mercy bilong hem. (Psalm 55:22; James 4:8) Wei wea Sandra feelim God really interest long hem muvim hem for changem laef bilong hem. Hem sei: “Mi hapi tumas for teachim olketa narawan abaotem Bible full-taem.” Sandra garem privilege for helpem big sista and smol sista bilong hem for savve long Jehovah. From hem go ahed for ‘duim gud samting,’ hem volunteer tu saed long medical waka bilong hem long taem bilong olketa convention bilong Olketa Jehovah’s Witness.—Galatians 6:10.
Hao nao olketa samting wea Sandra depend long hem bifor? Hem feel sure for sei: “Mind bilong mi hem klia. Mi no drink, smoke, or tekem olketa nogud drug. Mi no needim olketa. Mi faendem nao wanem mi bin luk aotem.”
[Blurb long page 9]
“Mi faendem wanem mi luk aotem”
[Box long page 9]
Olketa Bible Principle wea Help
Samfala Bible principle wea helpem planti for kamap free from olketa dirty samting wea olketa depend long hem:
“Letem iumi klinim iumiseleva from evri samting wea mekem body and spirit dirty, mekem holy fasin kamap perfect taem iumi fraet long God.” (2 Corinthians 7:1) God blessim olketa wea klinim olketa seleva from dirty samting, stap klia long fasin wea no klin.
“For fraet long Jehovah hem minim for heitim nogud samting.” (Proverbs 8:13) For barava fraet long God hem helpem man for kamap free from olketa nogud wei, wea insaed diswan hem wei for iusim drug. And witim wei for mekem Jehovah hapi, man wea change kasem protection from nogud sik.
“Stap anda and obeyim olketa gavman and olketa paoa olsem ruler.” (Titus 3:1) Long planti ples, for man garem or iusim samfala kaen drug hem againstim law. Olketa tru Christian nating garem or iusim olketa drug wea againstim law.