Lukaftarem Olketa Pikinini wea No Garem Parents and Widow Woman wea Kasem Hard Taem
Hem no hard for luksavve hao iumi stap long wanfala world wea no showimaot love. Taem hem story abaotem kaen pipol wea stap long “olketa last day,” aposol Paul hem raet olsem: “Nogud taem wea hard for deal witim bae stap. From man bae lovem seleva, . . . no garem love.” (2 Timothy 3:1-3) Olketa toktok hia barava tru!
WEI bilong living distaem hem wanfala samting wea kosim fasin for no kea insaed heart bilong planti pipol. Wei wea pipol no wari long living bilong narawan kamap moa big, samfala taem nomata long living bilong famili member bilong olketa seleva.
Diswan barava affectim planti pipol wea, bikos long difren kaen living, olketa kamap poor fogud. Namba bilong olketa widow woman and pikinini wea no garem parents grow kwiktaem bikos long olketa war, natural disaster, and wei wea pipol lusim ples bilong olketa and lukaotem sef ples. (Ecclesiastes 3:19) Wanfala report from United Nations Children’s Fund hem sei: “Winim 1 million [pikinini] no garem parents or olketa separate from famili bilong olketa bikos long war.” Iu savve tu long bigfala namba bilong olketa singol mami, wea hasband lusim or divorcem, wea feisim hard taem for stap laef and trae hard seleva for saportim famili. Problem hia hem kamap worse from wei wea samfala kantri garem serious problem saed long selen, wea mekem planti citizen bilong olketa for garem barava poor living.
From diswan, waswe, eni hope stap for olketa wea experiencem trabol olsem? Hao nao man savve daonem problem bilong olketa widow woman and pikinini wea no garem parents? Waswe, disfala problem bae finis enitaem?
Loving Kea Long Taem Bilong Bible
Wei for kea for physical and spiritual need bilong olketa widow woman and olketa pikinini wea garem no parents hem part long wei for worshipim God from bifor kam. Taem olketa harvestim grain or frut, olketa mas no tekem evri samting long garden. Olketa mas leavim samfala samting “for man from difren kantri, for pikinini wea no garem dadi and for widow woman.” (Deuteronomy 24:19-21) Law bilong Moses hem tok stret olsem: “Iufala pipol mas no mekem eni widow woman or boy wea no garem dadi for safa.” (Exodus 22:22, 23) Olketa widow woman and pikinini wea no garem parents wea Bible storyim, hem stand for pipol wea barava poor, wea taem hasband and dadi or tufala parents evriwan dae, olketa famili member wea stap laef maet stap seleva and kamap poor fogud. Datfala laen dadi Job hem sei: “From mi savve sevem wan wea garem problem and singaot for help, and boy wea no garem dadi and eniwan wea no garem samwan for helpem hem.”—Job 29:12.
Long taem bilong olketa Christian kongregeson bifor, wei for kea for olketa wea safa from parents or hasband bilong olketa dae finis hem wanfala spesol part bilong trufala worship. From hem barava interest long living bilong kaen pipol olsem, disaepol James hem raet: “Kaen worship wea klin and no dirty front long God and Father bilong iumi hem olsem: for lukaftarem olketa pikinini wea no garem parents and olketa widow woman wea kasem hardfala taem, and for stap klin from world.”—James 1:27.
Taem hem storyim olketa pikinini wea no garem parents and olketa widow woman, James showimaot tu wei wea hem kea for nara pipol wea poor fogud. (James 2:5, 6, 15, 16) Aposol Paul hem showimaot sem wei for tingim pipol. Taem hem and Barnabas kasem preaching assignment bilong tufala, ‘wei for rememberim olketa wea poor’ nao hem wanfala long olketa instruction wea olketa kasem. Paul hem sei olsem witim gudfala conscience: “Disfala samting nao mi tu barava trae for duim.” (Galatians 2:9, 10) Datfala story abaotem samting wea Christian kongregeson duim no longtaem bihaen hem start sei olsem: “No eniwan long olketa garem need . . . Then olketa bae sharemaot long each wan, for fitim need bilong hem.” (Acts 4:34, 35) Tru nao, datfala arrangement wea olketa mekem long Israel bifor for kea for olketa pikinini wea no garem parents, olketa widow woman, and pipol wea barava poor hem kam kasem Christian kongregeson.
Help hia wea olketa provaedem hem no ova tumas and hem followim wanem each kongregeson fit for givim. Olketa no westem selen, and olketa wea kasem help really garem need. No eni Christian iusim disfala arrangement long raverave wei, and olketa no putim hevi wea no fitim long kongregeson. Diswan hem showaot klia insaed instruction bilong Paul wea hem raetem long 1 Timothy 5:3-16. Long there iumi lukim hao sapos olketa relative bilong olketa wea poor fit for helpem olketa, olketa nao mas lukaftarem datfala responsibility. Olketa widow woman wea poor mas kasem samfala mark for kamap fit for kasem help hia. Evri samting hia showimaot wisefala arrangement wea Jehovah iusim for kea for olketa wea garem need. Bat, hem showimaot tu hao olketa need for balance mekem no eniwan savve iusim kaenfala fasin hia long wei wea no fitim.—2 Thessalonians 3:10-12.
Wei for Kea for Olketa Pikinini wea No Garem Parents and Widow Woman Distaem
Olketa principle wea olketa servant bilong God bifor followim long wei for showimaot kea and helpem olketa wea kasem trabol hem still fitim kongregeson bilong Olketa Jehovah’s Witness. Love for olketa brata hem wanfala spesol mark, olsem Jesus hem sei: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35) Sapos samfala barava needim samting or olketa safa from disaster or from war or raoa, evriwan long olketa brata evriwea long world barava lukaotem samfala wei for help long spiritual and material wei. Iumi lukim samfala experience bilong distaem wea showimaot wanem olketa duim.
Pedro no rememberim staka samting abaotem mami bilong hem, wea dae taem hem wan year and haf nomoa. Taem Pedro hem faev year, dadi bilong hem dae tu. So Pedro hem stap witim olketa brata bilong hem nomoa. Olketa Jehovah’s Witness bin visitim dadi bilong olketa, so Pedro and olketa big brata bilong hem start for studyim Bible.
Pedro hem sei: “Week bihaen nomoa, mifala start for attendim olketa meeting. Taem mifala kaban witim olketa brata, mifala feelim love wea olketa showimaot long mifala. Kongregeson nao hem sef ples for mi bikos olketa brata and sista showimaot love long mi, olsem olketa nao parents bilong mi.” Pedro rememberim hao wanfala long olketa Christian elder savve invaetem hem long haos bilong hem. Long there Pedro share for story tugeta witim datfala famili and feel relax. Pedro, wea start for preach abaotem faith bilong hem taem hem 11 year and baptaes taem hem 15 year, sei olsem: “Diswan nao hem olketa memory wea mi barava lovem.” From olketa wea insaed kongregeson helpem olketa, olketa big brata bilong hem tu kamap gud long spiritual wei.
Story bilong David tu stap. Parents bilong hem no wari long hem and twin sista bilong hem taem tufala separate. Tufala grani and wanfala aunty lukaftarem tufala. “Taem mifala growap and luksavve long problem wea mifala insaed, mifala barava wari and sorre tumas. Mifala needim saport. Aunty bilong mi kamap wanfala Jehovah’s Witness, and mifala thankiu hao from diswan, mifala kasem instruction long Bible truth. Olketa brata showimaot love and wei for fren long mifala. Olketa laekem mifala tumas and encouragem mifala for kasem olketa goal and for go ahed for waka for Jehovah. Taem mi samting olsem ten year, wanfala ministerial servant savve kam for tekem mi for share long field service. Narafala brata provaedem selen for mi attendim olketa convention. Wanfala brata helpem mi so mi fit for givim contribution long Kingdom Hall.”
David hem baptaes taem hem 17 year, and bihaen hem start for waka long branch office bilong Olketa Jehovah’s Witness long Mexico. Nomata distaem hem talemaot: “Samfala elder helpem mi long education bilong mi and givim kaonsel wea helpem mi. Long disfala wei nao mi winim olketa wari and wei for feel lonely.”
Abel, elder long wanfala kongregeson long Mexico wea garem samfala widow woman wea needim help, hem sei: “Mi biliv strong hao bigfala need wea olketa widow woman garem hem for saportim olketa saed long feeling. Samfala taem olketa feel sorre tumas; olketa feel lonely. Dastawe, hem barava important for saportim olketa, lisin long olketa. Mifala [olketa elder long kongregeson] visitim olketa evritaem. Hem important for spendem taem for lisin long problem bilong olketa. Diswan barava helpem olketa for feelim comfort long spiritual wei.” Bat, samfala taem olketa needim help saed long selen tu. Abel hem sei olsem no longtaem go nomoa: “Distaem mifala buildim wanfala haos for wanfala sista wea hem widow woman. Mifala spendem taem tugeta samfala Saturday and samfala aftanun insaed week for waka long haos bilong hem.”
Abaotem experience bilong hem for helpem olketa pikinini wea no garem parents and olketa widow woman, wanfala nara elder long kongregeson hem sei: “Mi bilivim hao olketa pikinini wea no garem parents needim tumas Christian love winim olketa widow woman. Mi lukim hao hem moa isi for olketa feel olsem pipol rejectim olketa winim olketa pikinini and young wan wea garem parents. Olketa needim olketa brata for showimaot love. Hem gud for luk for olketa bihaen meeting for faendemaot hao nao olketa. Wanfala marit brata stap wea no garem parents taem hem smol boy. Mi hello long hem evritaem long meeting, and hem holem mi taem hem lukim mi. Diswan strongim trufala love olsem olketa brata.”
Jehovah “Bae Sevem Poor Wan”
Wei for trust long Jehovah hem important samting for deal witim problem bilong olketa widow woman and olketa pikinini wea no garem parents. Olketa sei olsem abaotem hem: “Jehovah hem gardim olketa stranger; hem helpem olketa boy wea no garem dadi and olketa widow woman.” (Psalm 146:9) Ansa for kaen problem olsem bae kam only thru Kingdom bilong God anda long rul bilong Jesus Christ. Taem hem story abaotem datfala rul bilong Messiah long wei bilong profesi, man wea raetem psalm hem raet: “Hem bae sevem poor wan wea krae for help, and man wea safa and eniwan wea needim help. Hem bae feel sorre for man nating and poor man, and hem bae sevem soul bilong olketa poor man.”—Psalm 72:12, 13.
Taem end bilong disfala system hem kam moa klos, olketa hevi wea evri Christian feisim hem bae moa big. (Matthew 24:9-13) Need hem stap evriday for olketa Christian showimaot moa kea for narawan and for “garem barava strongfala love for narawan.” (1 Peter 4:7-10) Olketa Christian man, main wan hem olketa elder, need for showimaot fasin for kea long olketa pikinini wea no garem parents. And olketa mature woman insaed kongregeson savve givim planti saport and comfort long olketa widow woman. (Titus 2:3-5) Tru nao, evriwan savve givim samting long wei for showimaot kea for nara pipol wea insaed trabol.
Olketa trufala Christian no pipol wea ‘nating feel sorre’ taem olketa ‘lukim brata bilong olketa short long samting.’ Olketa barava luksavve long wei for obeyim disfala kaonsel bilong aposol John: “Olketa smolfala pikinini, letem iumi showimaot love, no witim toktok or mouth nomoa, bat long samting iumi duim and long truth.” (1 John 3:17, 18) So letem iumi “lukaftarem olketa pikinini wea no garem parents and olketa widow woman wea kasem hardfala taem.”—James 1:27.
[Blurb long page 11]
“Letem iumi showimaot love, no witim toktok or mouth nomoa, bat long samting iumi duim and long truth.”1 John 3:18
[Olketa Piksa long page 10]
Olketa tru Christian lukaftarem olketa pikinini wea no garem parents and widow woman long material wei, long spiritual wei, and saed long feeling