Hapi Long Kingdom Hope!
HEM wanfala hapi samting wea mekem audience bilong 5,784 hipap tugeta long March 10, 2001, long thrifala ples long New York State wea datfala bigfala Bethel famili iusim. Datfala samting hem graduation bilong mek-110 class bilong Gilead missionary skul.
Carey Barber, wanfala member bilong Governing Body bilong Olketa Jehovah’s Witness, welkamim evriwan and startim datfala program taem hem sei: “Mifala hapi for savve hao 110 class bilong olketa Gilead student kasem training finis olsem olketa missionary and kasem olketa assignment raonem full world.”
Hao for Go Ahed Hapi
Bihaen firstfala toktok bilong Brata Barber, Don Adams story long audience and 48 student wea graduate long subject “Blessing Bilong Jehovah Mekem Iumi Rich.” Long wei for iusim Proverbs 10:22 olsem faondeson for tok bilong hem, hem remindim audience hao Jehovah saportim and blessim olketa servant bilong hem taem olketa putim Kingdom firstaem long laef. Hem encouragem olketa student for acceptim niu assignment bilong olketa witim semkaen willing spirit olsem aposol Paul showimaot taem hem kasem invitation for ‘muv kam long Macedonia and help.’ (Acts 16:9) Nomata samfala hardfala samting kamap for deal witim, Paul kasem planti hapi blessing from hem willing for preach long ples wea olketa markem.
Olketa member bilong class wea graduate finisim faevfala month long study bilong Bible and training for redyim olketa for missionary waka. Nomata olsem, Daniel Sydlik, wanfala member bilong Governing Body bilong Olketa Jehovah’s Witness, encouragem olketa for go ahed olsem man wea lane. Taem hem storyim theme “Go Ahed Olsem Trufala Disaepol,” hem sei: “For olsem disaepol hem minim man mas evritaem obeyim toktok bilong Jesus. Insaed diswan hem wei wea iumi willing evritaem for lisin long toktok, message, and teaching bilong hem.” Hem talem hao olketa disaepol bilong Christ no disaedem samting bifor olketa lisin long voice bilong Masta; wisdom bilong God hem insaed long laef bilong Christ. (Colossians 2:3) No eniwan long iumi savve herem toktok bilong Jesus wantaem nomoa and then tingse iumi savve evri samting abaotem hem, so Brata Sydlik encouragem olketa graduate for go ahed for lanem, followim, and teachim Christian truth, wea mekem man kamap free.—John 8:31, 32.
For go ahed hapi long service bilong God, man mas willing for acceptim discipline and kaonsel for stretem hem. Gilead teacher Lawrence Bowen hem askem kwestin, “Waswe, Bae Olketa Kidney Bilong Iu Stretem Iu?” Hem showim hao insaed long Bible olketa kidney piksarem olketa deep tingting and feeling bilong man. Olketa savve stretem man sapos advaes from God long Word bilong hem go deep insaed long fasin bilong man. (Psalm 16:7; Jeremiah 17:10) Faithful gogo bilong wanfala man savve muvim Jehovah long bigfala wei tu. Bihaen hem readim Proverbs 23:15, 16, datfala speaker hem ask: “Waswe, bae olketa kidney bilong iu stretem iu?” Hem sei moa: “Mifala prea for diswan, and long wei olsem iu bae mekem Jehovah kasem bigfala hapi. Iu bae barava muvim feeling bilong hem. Yes, iu bae mekem olketa kidney bilong God barava hapi taem iu loyal for stap long assignment bilong iu.”
Mark Noumair, wea serve olsem missionary long Kenya bifor hem kamap teacher long Gilead, hem givim lastfala tok long disfala part bilong program. Tok bilong hem wea garem title “Samting wea Iu Lukim Witim Eye Bilong Iu Hem Moabeta” hem mekhae hao hem important for mekem grow wei for satisfae. Long wei wea join witim Ecclesiastes 6:9, Brata Noumair encouragem olketa for: “Acceptim really samting. Hem nao wei for ‘lukim witim eye bilong iu.’ Winim wei for dream abaotem samting wea iu want for duim bat wea iu no duim, trae hard for duim best bilong iu long living wea iu garem distaem. For stap insaed wanfala dream world, for expectim samting wea iu hard for kasem, or for tingting olowe long nogud saed long assignment bilong iu bae mekem iu feel nogud and no satisfae.” Tru nao, nomata wea iumi stap or wanem kaen living, for mekem grow feeling for satisfae long living bilong iumi wea kam from wei for fren witim God, hem helpem iumi for garem hapi spirit for servem Barava Nambawan Creator bilong iumi.
Olketa Hapi Experience Long Kingdom Service and Long Gilead
Bihaen disfala gudfala kaonsel from olketa tok hia, olketa student storyim samfala experience olketa enjoyim long pablik ministry insaed disfala faev-month course. Olketa student wea graduate talem Wallace Liverance, registrar bilong Gilead Skul, hao olketa seleva showimaot olketa fit olsem olketa minister bilong God. (2 Corinthians 4:2) Olketa win for muvim conscience bilong samfala pipol. Olketa experience bilong olketa student hia showim hao olketa startim olketa Bible study witim samfala honest pipol long street, long haos-tu-haos ministry, and long samfala nara ples. Samfala pipol wea interest talemaot hao olketa Bible pablikeson bilong organization bilong Jehovah here olsem tru samting. Wanfala haosholder barava laekem tumas wanfala Bible scripture. Distaem hem studyim Bible witim Olketa Jehovah’s Witness.
Next samting, Joel Adams interviewim olketa wea graduate from Gilead long samfala year bifor. Theme bilong hem, “No Finis for Lane, No Finis for Servem Jehovah.” Olketa insaed interview givim advaes wea barava fitim olketa niu missionary. Taem hem ting bak long taem hem member bilong mek-26 class bilong Gilead, Harry Johnson sei: “Olketa teachim mifala hao Jehovah olowe bin leadim pipol bilong hem and bae olowe leadim olketa. For biliv strong long datwan hem encouragem mi long olketa year wea go pas.” William Nonkes, member bilong mek-53 class bilong Gilead, givim disfala advaes for olketa wea graduate: “Winim evri samting, tingim olketa Bible principle, and followim olketa long evri samting iu mas disaedem long laef distaem and for olowe. Sapos olsem, iu bae fit for go ahed long assignment bilong iu and bae iu kasem richfala blessing bilong Jehovah.”
Theme wea Richard Rian chusim for part bilong hem long program hem “Kasem Strong for Duim Will Bilong Jehovah.” Wanfala wea hem interviewim hem John Kurtz, wanfala graduate bilong mek-30 class, wea serve olsem missionary long Spain for winim 41 year. Taem hem storyim skul long Gilead, Brata Kurtz hem sei: “Bible nao main textbuk. And iumi garem olketa Bible study buk for helpem iumi minim Bible. Olketa stap for evriwan. Gilead no givimaot eni secret information. Mi evritaem laek for strongim disfala point bikos information wea Gilead provaedem hem stap for evri Witness.”
Brata Gerrit Lösch, wanfala member bilong Governing Body bilong Olketa Jehovah’s Witness, finisim datfala spiritual program taem hem story long subject “Antap and Andanit Olketa Wing Bilong Jehovah.” Hem minim hao Bible iusim olketa wing bilong eagle olsem tokpiksa for showimaot wei wea God protectim and saportim olketa faithful servant bilong hem. (Deuteronomy 32:11, 12; Psalm 91:4) Samfala taem full-grown eagle savve spreadim olketa wing bilong hem for planti hour for protectim olketa pikinini. Samfala taem, mami eagle maet pasolem olketa pikinini witim wing bilong hem for protectim olketa from cold wind. Long sem wei and fitim purpose bilong hem, Jehovah savve helpem olketa faithful servant bilong hem, especially taem olketa feisim olketa spiritual test. Jehovah no letem olketa servant bilong hem kasem eni temptation wea olketa no fit for winim bat hem openem wei for olketa savve stand strong. (1 Corinthians 10:13) Brata Lösch finis witim disfala toktok: “For iumi go ahed kasem spiritual protection, iumi mas go ahed for stap andanit olketa wing bilong Jehovah. Diswan minim iumi mas no mekem grow wei for independent. Iumi mas evritaem stap klosap long Jehovah and organization bilong hem wea olsem wanfala mami, no go difren from loving kaonsel and wei wea olketa leadim iumi.”
Chairman hem readim olketa message and telegram from raonem full world. Then olketa givimaot olketa diploma. Taem Gilead Skul hem start, hem witim goal for garem samfala class nomoa insaed faevfala year. Bat for 58 year Jehovah God mekem disfala skul go ahed. Olsem Brata Barber talem long first tok: “Hem wanfala nambawan record wea olketa Gilead graduate mekem start kam from taem Gilead start long 1943! Samting wea kamaot from waka wea olketa duim hem for joinim planti handred thousand kwaet wan bilong earth long nambawan organization bilong Jehovah.” Yes, disfala missionary skul hem helpem planti million for kamap hapi long Kingdom hope.
[Box long page 24]
INFORMATION ABAOTEM CLASS
[Piksa long page 24]
Haomas kantri olketa kam from: 8
Haomas kantri olketa bae go long hem: 18
Haomas student: 48
Average age: 34
Average year insaed truth: 18
Average year insaed full-taem ministry: 13
[Piksa long page 25]
Mek-110 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.