Hao Nao Iu Savve Helpem Wanfala “Olabaot” Pikinini?

“Iumi mas hapi bikos . . . hem lus bat iumi faendem hem.”—LUKE 15:32.

1, 2. (a) Hao nao samfala young wan ting long Christian truth? (b) Hao nao maet feeling bilong parents and pikinini wea insaed problem olsem?

“MI BAE lusim truth!” Disfala toktok from pikinini hem mekem parents wea trae hard for trainim pikinini long Christian living for seke fogud! Olketa nara young wan “isisi go difren” and no talemaot wanem olketa laek duim. (Hebrews 2:1) Planti long olketa hia olsem olabaot son insaed tokpiksa bilong Jesus, wea lusim haos bilong dadi bilong hem and spendem evri selen bilong hem long nogud wei long wanfala farawe kantri.—Luke 15:11-16.

² Nomata planti Jehovah’s Witness no garem disfala problem, for olketa wea kasem diswan, no eni toktok bilong comfort savve aotem evribit sorre feeling bilong olketa. And tingim tu feeling for no hapi wea datfala young wan wea bighed savve kasem. Insaed heart bilong hem, maet conscience bilong hem mekem hem feel nogud. Long tokpiksa bilong Jesus, gogo datfala olabaot son “kasem bak gudfala tingting bilong hem,” wea mekem dadi bilong hem hapi tumas. Hao nao parents and olketa insaed kongregeson savve helpem olketa young wan wea olabaot for ‘kasem bak gudfala tingting bilong olketa’?—Luke 15:17.

Why Samfala Disaed for Go Aot

3. Wanem nao samfala reason why olketa young wan disaed for lusim Christian kongregeson?

³ Planti handred thousand young wan hapi tumas for servem Jehovah insaed Christian kongregeson. Bat why nao samfala go aot? Maet olketa feel olsem olketa missim samting long world. (2 Timothy 4:10) Or maet olketa ting wei for olsem wanfala sheep bilong Jehovah hem strict tumas. Guilty conscience, interest tumas long opposite sex, or feeling for laekem pipol wea sem age for acceptim hem maet mekem wanfala young wan isisi lusim olketa sheep bilong Jehovah. Wanfala young wan maet stop for servem God bikos wei wea luk olsem parents or narafala Christian garem hypocrite fasin.

4. Planti taem wanem nao mekem olketa young wan go difren?

⁴ Planti taem bighed tingting and fasin bilong pikinini hem saen bilong wei wea hem wik long spiritual saed, wea showimaot samting wea stap insaed heart bilong hem. (Proverbs 15:13; Matthew 12:34) Nomata wanem reason nao mekem young wan go difren, planti taem botom bilong problem hem bikos hem no garem “stretfala savve bilong truth.” (2 Timothy 3:7) Winim wei for worshipim Jehovah drae nomoa, hem important for olketa young wan mekem grow klos wei for fren witim hem. Wanem nao bae helpem olketa for duim olsem?

Kam Klosap Long God

5. Wanem nao hem important for wanfala young wan duim for mekem grow wei for hemseleva fren witim God?

⁵ Disaepol James raet olsem: “Kam klosap long God, and hem bae kam klosap long iufala.” (James 4:8) For duim olsem, wanfala young wan mas kasem help for mekem grow feeling for laekem Word bilong God. (Psalm 34:8) Firstaem hem bae needim “milk”—olketa main teaching bilong Bible. Bat taem hem hapi long Word bilong God and start for laekem “strong kaikai”—deep spiritual information—no longtaem bae hem kamap mature long spiritual wei. (Hebrews 5:11-14; Psalm 1:2) Wanfala young wan wea sei hem followim evribit wei bilong world hem start for tinghae long olketa spiritual samting. Wanem nao helpem hem for tan raon? Taem hem kasem encouragement for readim full Bible, hem evritaem followim Bible reading schedule. Tru nao, wei for readim Word bilong God evritaem hem important tumas for keepim klos wei for fren witim Jehovah.

6, 7. Hao nao parents savve helpem pikinini for mekem grow wei for laekem tumas Word bilong God?

⁶ Hem important tumas for parents helpem pikinini for mekem grow wei for lovem Word bilong God! Nomata hem duim famili study evritaem, wanfala teenage girl kaban witim olketa nogud pikinini. Hem sei olsem abaotem famili study bilong hem: “Taem Dadi askem olketa kwestin, mi readim nomoa olketa ansa, and no luk long feis bilong hem.” Winim wei for storyim information nomoa long famili study, wise parents iusim gudfala wei for teach. (2 Timothy 4:2) For young wan enjoyim study, hem mas feel olsem study hem fitim living bilong hemseleva. Hem gud for askem olketa kwestin wea bae mekem hem talemaot tingting bilong hemseleva. Encouragem young wan for followim information wea famili studyim.a

⁷ And tu, mekem datfala Bible study garem laef. Taem fitim, mekem olketa young wan hia actim olketa samting wea happen long Bible and olketa drama. Helpem olketa for piksarem ples and olketa maunten and river and nara samting long datfala kantri wea samting hem happen. Wei for iusim olketa map and chart savve help. Tru nao, sapos iu ting raonem lelebet, famili study savve garem laef and difren. Parents shud lukluk gud tu long wei wea olketa seleva fren witim Jehovah. Taem olketa seleva kam klosap long Jehovah, olketa savve helpem pikinini bilong olketa for duim olsem.—Deuteronomy 6:5-7.

8. Hao nao prea helpem man for kamap moa klos long God?

⁸ Prea helpem man for kam klosap long God tu. Wanfala teenage girl faendem hard for chus midolwan Christian wei bilong laef and olketa fren bilong hem wea no garem sem biliv. (James 4:4) Wanem nao hem duim? Hem sei: “For firstaem, mi barava prea long Jehovah abaotem feeling bilong mi.” Hem sei prea bilong hem kasem ansa taem hem faendem wanfala fren insaed Christian kongregeson wea hem savve story witim. From hem feelim wei wea Jehovah leadim hem, hem start for buildim wei for fren witim God. Parents savve helpem pikinini taem olketa mekem prea bilong olketa seleva kamap moabeta. Taem olketa prea olsem wanfala famili, parents savve talemaot feeling insaed heart bilong olketa mekem pikinini savve feelim wei for fren midolwan parents and Jehovah.

Patient bat Strong

9, 10. Wanem example nao Jehovah showimaot taem hem patient for safa witim olketa bighed Israelite?

⁹ Taem wanfala young wan start for isisi go difren, maet hem trae for stap seleva and no laekem parents for storyim spiritual samting long hem. Wanem nao parents savve duim taem hardfala samting olsem hem happen? Tingim samting wea Jehovah duim witim Israel bifor. Hem patient witim olketa “bighed” Israelite for winim 900 year bifor hem lusim olketa for followim olabaot gogo bilong olketa. (Exodus 34:9; 2 Chronicles 36:17-21; Romans 10:21) Nomata olketa evritaem ‘testim hem,’ Jehovah “showimaot mercy” long olketa. “Planti taem hem holem nomoa kros bilong hem, and hem bae no givim go full kros bilong hem.” (Psalm 78:38-42) Wei wea God deal witim olketa hem stret evribit. Loving parents followim Jehovah and patient taem pikinini no stretawe followim samting wea tufala duim for helpem hem.

¹⁰ Wei for patient for safa, hem no minim wei for “safa for longfala taem”; hem minim for no givap hope hao wei for fren wea nogud bae kamap moabeta. Jehovah showimaot example long wei for patient for safa. Hem duim samting firstaem taem hem sendem olketa man for talemaot message “moa and moa” for olketa Israelite. Jehovah “feel sorre for pipol bilong hem,” nomata “olketa go ahed for mekfani long olketa man for talemaot message bilong tru God and heitim word bilong hem.” (2 Chronicles 36:15, 16) Hem askem olketa Israelite taem hem sei long olketa: “Tan bak, plis, each wan from nogud wei bilong hem.” (Jeremiah 25:4, 5) Nomata olsem, Jehovah no lusim olketa raeteous principle bilong hem. Olketa Israelite kasem instruction for “tan bak” long God and olketa wei bilong hem.

11. Hao nao parents savve patient for safa bat long semtaem strong for deal witim pikinini wea go difren?

¹¹ Parents savve followim Jehovah long wei for patient for safa taem olketa no kwiktaem givap hope long pikinini wea go difren. Long wei for no lus hope, olketa savve duim samting firstaem for keepim open or startim bak wei for story tugeta. Taem olketa go ahed for followim olketa raeteous principle, olketa savve askem datfala pikinini “moa and moa” for kam bak long wei bilong truth.

Taem Wanfala Young Pikinini Hem Disfellowship

12. Wanem responsibility nao parents garem for wanfala young pikinini wea stap witim tufala bat hem disfellowship from kongregeson?

¹² Waswe sapos wanfala young pikinini wea stap witim parents hem duim bigfala rong and bikos hem no repent hem disfellowship from kongregeson? Bikos pikinini hia stap witim parents bilong hem, tufala still garem responsibility for teachim and disciplinem hem followim Word bilong God. Hao nao tufala savve duim olsem?—Proverbs 6:20-22; 29:17.

13. Hao nao parents savve trae for kasem heart bilong pikinini wea duim rong samting?

¹³ Sapos hem fitim, best samting for duim nao hem for givim instruction and discipline taem tufala studyim Bible witim hem. Parents mas no judgem strongfala tingting bilong pikinini bat trae for lukim wanem nao insaed heart bilong hem. Spiritual sik bilong hem showaot long olketa wanem difren samting? (Proverbs 20:5) Waswe, tufala savve kasem soft part long heart bilong hem? Olketa wanem scripture nao tufala savve iusim long gudfala wei? Aposol Paul promisim iumi: “Word bilong God hem laef and garem paoa and hem sharp winim eni tu-saed sword and hem savve kat go for divaedem soul and spirit, and olketa join and bon, and hem fit for luksavve long tingting and samting wea heart want for duim.” (Hebrews 4:12) Tru nao, parents savve duim moa samting winim wei for talem nomoa long pikinini for no duim rong samting moa. Tufala savve trae for startim and mekem grow wei for kamap gud moa.

14. Wanem nao first samting wea young wan wea duim rong shud duim for buildim moa wei for fren witim Jehovah, and hao nao parents savve helpem pikinini for duim datwan?

¹⁴ Young wan wea duim rong mas buildim moa wei for fren witim Jehovah. First samting hem mas duim nao for “repent, and tan raon.” (Acts 3:19; Isaiah 55:6, 7) Taem tufala helpem young wan hia for repent, parents mas ‘bossim tufala seleva taem nogud samting kamap, teachim witim kwaet fasin’ datfala pikinini wea no laek lisin. (2 Timothy 2:24-26) Tufala need for “repruvim” hem followim Bible. Greek word wea olketa transleitim “repruv” savve minim tu “givim strongfala pruv.” (Revelation 3:19; John 16:8) So, for repruv minim for showim inaf pruv for mekem datfala pikinini barava sure samting wea hem duim hem nogud tumas. Tru, hem no isi for duim olsem. Long taem wea fitim, parents savve muvim heart bilong hem, iusim evri wei wea fitim Scripture for mekem datfala pikinini hem barava sure. Olketa shud trae for helpem hem tinghae long need for “heitim samting wea nogud, and lovem samting wea gud.” (Amos 5:15) Maet hem ‘kasem bak gudfala tingting bilong hem and aot from trap bilong Devil.’

15. Hao nao prea savve helpem man wea duim rong for buildim bak wei for fren witim Jehovah?

¹⁵ For buildim moa wei for fren witim Jehovah, prea hem important tumas. Tru, no eniwan shud “askem” samting saed long wanfala wea bifor hem kaban witim Christian kongregeson bat wea distaem barava duim sin wea klia for lukim and wea no repent. (1 John 5:16, 17; Jeremiah 7:16-20; Hebrews 10:26, 27) Nomata olsem, parents savve askem Jehovah for givim long tufala wisdom for deal witim datwan. (James 1:5) Sapos wanfala disfellowship pikinini givim pruv bilong wei for repent bat hem no feel “free for toktok long God,” parents savve prea for will bilong God kamap sapos hem faendem reason for forgivim rong bilong datfala pikinini. (1 John 3:21) Wei for herem olketa prea hia shud helpem datfala young wan for lukim Jehovah olsem wanfala God wea garem mercy.b—Exodus 34:6, 7; James 5:16.

16. Hao nao iumi savve helpem olketa famili member bilong olketa young pikinini wea disfellowship?

¹⁶ Sapos wanfala young wan wea baptaes hem disfellowship, olketa member bilong kongregeson mas “no kaban witim” hem. (1 Corinthians 5:11; 2 John 10, 11) Maet gogo diswan helpem hem for ‘kasem bak gudfala tingting bilong hem’ and kam bak midolwan olketa sheep bilong God. (Luke 15:17) Nomata hem kam bak or nomoa, olketa member bilong kongregeson savve encouragem famili bilong datfala young wan wea disfellowship. Iumi savve lukaotem olketa chance for “showim feeling long narawan” and “garem fasin for kea” long olketa hia.—1 Peter 3:8, 9.

Hao Narawan Savve Help

17. Wanem nao olketa member bilong kongregeson shud tingim taem olketa trae for helpem wanfala pikinini wea gogo difren lelebet?

¹⁷ Waswe long wanfala young wan wea no disfellowship from Christian kongregeson bat faith bilong hem kamap wik? Aposol Paul raet olsem: “Sapos wanfala part hem safa, evri narafala part safa witim hem.” (1 Corinthians 12:26) Olketa narawan savve showimaot interest long young wan olsem. Tru, mas careful tu, bikos young wan wea sik long spiritual wei savve barava affectim olketa nara young wan. (Galatians 5:7-9) Insaed wanfala kongregeson, samfala wea full-grown wea laek helpem samfala young wan wea kamap wik long spiritual saed invaetem olketa long haos for herem music wea evriwan laekem. Nomata olketa young wan hia duim datwan and enjoyim, wei wea olketa affectim each other hem lead go for olketa no kaban moa witim kongregeson. (1 Corinthians 15:33; Jude 22, 23) Samting wea savve helpem pikinini wea sik long spiritual wei hem, no olketa hapitaem wea no eni spiritual samting insaed, bat wei for kaban wea helpem hem for laekem moa olketa spiritual samting.c

18. Hao nao iumi savve showimaot fasin bilong dadi bilong olabaot son insaed tokpiksa bilong Jesus?

¹⁸ Taem wanfala young wan wea lusim kongregeson hem kam bak long Kingdom Hall or attendim wanfala assembly, tingim hao nao hem maet feel. Waswe, fitim iumi for welkamim hem olsem dadi bilong olabaot son insaed tokpiksa bilong Jesus? (Luke 15:18-20, 25-32) Wanfala teenager wea lusim Christian kongregeson and bihaen hem attendim wanfala distrik convention hem sei: “Mi tingse evriwan bae no tok long man olsem mi, bat olketa brata and sista kam and welkamim mi. Diswan barava muvim mi.” Hem start for studyim Bible moa and bihaen hem baptaes.

No Givap

19, 20. Why nao iumi shud keepim gudfala tingting abaotem pikinini wea olabaot?

¹⁹ Wei for helpem wanfala “olabaot” pikinini for kasem bak gudfala tingting bilong hem needim patient fasin and hem wanfala challenge for parents and olketa narawan. Bat no givap. “Jehovah hem no slow long saed bilong promis bilong hem, olsem samfala pipol tingim wei for slow, bat hem patient witim iufala from hem no laekem eniwan for dae bat hem laekem evriwan for repent.” (2 Peter 3:9) Iumi garem promis from Bible hao Jehovah laekem pipol for repent and stap laef. Tru nao, hem duim samting firstaem for arrangem wei for olketa man fren bak moa witim hem. (2 Corinthians 5:18, 19) Patient fasin bilong hem mekem planti million for kasem bak gudfala tingting bilong olketa.—Isaiah 2:2, 3.

²⁰ So waswe, fitim parents for iusim evri wei wea fitim Bible for helpem olabaot pikinini for kasem bak gudfala tingting bilong hem? Olsem Jehovah, patient for safa taem iu duim samting for helpem pikinini bilong iu kam bak long Jehovah. Strong for followim olketa Bible principle, and trae for showimaot olketa fasin bilong Jehovah olsem love, justice, and wisdom taem iu prea long hem for help. Long sem wei wea planti wea bighed acceptim loving invitation bilong Jehovah for kam bak, olabaot son or dota bilong iu maet kam bak midolwan olketa sheep bilong God.—Luke 15:6, 7.

[Olketa Footnote]

Waswe, Iu Remember?

• Wanem nao maet samting wea mekem olketa young wan lusim kongregeson?

• Hao nao olketa young wan savve kasem help for mekem grow wei for fren witim Jehovah?

• Why nao parents need for patient for safa bat strong taem tufala helpem olabaot pikinini?

• Hao nao olketa insaed kongregeson savve helpem olabaot pikinini for kam bak?

[Piksa long page 15]

Wei for readim Word bilong God hem important for mekem grow wei for fren klos witim Jehovah

[Piksa long page 15]

Prea bilong parents from heart savve helpem pikinini feelim wei wea parents fren witim Jehovah

[Piksa long page 17]

Welkamim olabaot pikinini taem hem ‘kasem bak gudfala tingting bilong hem’

[Piksa long page 18]

Duim samting for helpem pikinini kam bak long Jehovah