Key for Kasem Hapi World

“NAMBAWAN strongfala man—no just insaed tu thousand year wea go pas nomoa bat long full history bilong olketa man—hem nao Jesus bilong Nazareth,” hem nao wanem Time magasin talem. Taem Jesus stap long earth, planti thousand pipol wea garem honest heart luksavve long wei wea hem nambawan and wei wea hem tingim olketa narawan. So, iumi no sapraes hao olketa laek for mekem hem kamap king. (John 6:10, 14, 15) Bat, olsem iumi lukim finis long first article, Jesus les for joinim politik.

WHY Jesus les for duim diswan hem from thrifala samting: tingting bilong Dadi bilong hem abaotem olketa wei for showimaot man free for chus seleva, insaed diswan hem rul bilong olketa man; Jesus luksavve hao strongfala paoa wea haed hem againstim wei wea olketa man trae hard for rul; and hem luksavve long purpose bilong God for putim wanfala gavman long heven for rul ovarem disfala earth. Taem iumi go ahed for lukluk gud long thrifala point hia, bae iumi lukim why nao wei wea olketa man trae hard for mekem disfala world for kamap moabeta hem fail. Bae iumi lukim tu hao disfala problem bae kasem ansa.

Waswe, Olketa Man Fit for Rulim Olketa Seleva?

Taem God creatim olketa man, hem givim olketa paoa ovarem olketa animal. (Genesis 1:26) Bat olketa man stap anda long olmaeti rul bilong God. For showimaot olketa stap anda long God, first man and woman mas obeyim wei wea God stopem olketa for kaikaim frut bilong wanfala spesol tree, “tree bilong savve long gud and nogud samting.” (Genesis 2:17) Sorre tumas, Adam and Eve no iusim gud wei wea tufala free for chus and tufala no obeyim God. Wei wea tufala tekem datfala frut wea God stopem hem no just wei for steal nomoa. Hem wei for againstim olmaeti rul bilong God. Wanfala footnote long Genesis 2:17 insaed The New Jerusalem Bible sei Adam and Eve tingse “man fit for kasem fasin for independent evribit wea minim man les for luksavve long position bilong olketa olsem samting wea God creatim . . . Disfala first sin hem attakim olmaeti rul bilong God.”

From olketa important kwestin saed long fasin hem insaed diswan, God letem Adam and Eve and olketa pikinini bilong tufala for chusim wei long laef bilong olketa seleva, and putim mark bilong olketa seleva saed long wanem hem stret and rong. (Psalm 147:19, 20; Romans 2:14) Hem minim, wei wea olketa man traem wei for chus seleva hem start long datfala taem. Waswe, olketa man win? From iumi garem planti thousand year for luk bak long hem, ansa bilong iumi hem nomoa! Ecclesiastes 8:9 sei: “Man hem bossim man and spoelem hem.” Disfala sorre record bilong wei wea man rulim hemseleva hem strongim trufala toktok bilong Jeremiah 10:23: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.” History pruvim olketa man no fit for rul gud sapos olketa no depend long Creator bilong olketa.

Jesus barava agree witim diswan. Hem barava heitim wei for independent from God. “Mi nating duim eni samting followim tingting bilong miseleva,” hem sei. “Evritaem mi duim olketa samting wea mekem [God] hapi.” (John 4:34; 8:28, 29) Dastawe, from God no talem hem for kasem wei for rul from olketa man, Jesus nating ting for acceptim datwan. Diswan no minim hem hol bak for helpem narafala man. Nomoa nao, hem duim evri samting wea hem fit for duim for helpem olketa man for faendem barava nambawan hapi long datfala taem and long future. Hem givim tu laef bilong hem for olketa man. (Matthew 5:3-11; 7:24-27; John 3:16) Bat Jesus savve hao “evriting garem wanfala taem wea set finis,” and insaed diswan hem taem bilong God for showimaot olmaeti rul bilong hem ovarem olketa man. (Ecclesiastes 3:1; Matthew 24:14, 21, 22, 36-39) Bat, ting bak hao long Eden firstfala parents bilong iumi obeyim will bilong wanfala wicked spirit creature wea tok kam olsem wanfala really snek. Diswan leadim iumi long mek-tu reason why Jesus hem no join insaed politik.

Secret Ruler Bilong World

Bible talem iumi hao Satan hem offerim long Jesus “evri kingdom bilong world and glory bilong olketa” sapos Jesus duim wanfala samting for worshipim hem. (Matthew 4:8-10) Diswan minim Jesus savve kasem wei for rulim world—bat hem mas followim wei wea Devil laekem. Jesus nating foldaon long disfala temptation. Bat waswe, hem really wanfala temptation? Waswe, Satan fit for offerim kaen nambawan samting olsem? Yes, from Jesus seleva kolem Devil “ruler bilong disfala world,” and aposol Paul storyim hem olsem “god bilong disfala system.”—John 14:30; 2 Corinthians 4:4; Ephesians 6:12.

Tru nao, Jesus savve Devil nating ting for duim eni gud samting for man. Hem storyim Satan olsem “man for killim dae man” and olsem “dadi bilong olketa laea and evri samting wea no tru.” (John 8:44, The Amplified Bible) Hem klia tumas, wanfala world wea “stap long paoa” bilong kaen wicked wan olsem bae hard for really hapi. (1 John 5:19) Bat Devil bae no garem paoa bilong hem olowe. Jesus, wea distaem hem wanfala maeti spirit creature, bae klosap aotem Satan and barava finisim evribit paoa bilong hem.—Hebrews 2:14; Revelation 20:1-3.

Satan seleva savve hao klosap nao taem bilong hem for rulim world bae finis. Dastawe, hem barava trae hard for spoelem olketa man gogo olketa no savve change for kamap gud moa, olsem hem duim bifor long Flood long taem bilong Noah. (Genesis 6:1-5; Jude 6) “Trabol for earth and for sea,” Revelation 12:12 hem talem, “bikos Devil hem kam daon finis long iufala, and hem kros tumas, from hem savve hem garem shortfala taem nomoa.” Bible profesi and olketa samting wea happen showimaot hao iumi barava klosap long end bilong disfala “shortfala taem.” (2 Timothy 3:1-5) Help hem klosap nao.

Wanfala Gavman wea Bae Givim Kam Hapi

Mek-thri reason why Jesus no join insaed politik nao from hem savve long wanfala taem wea set finis long future, God bae putim wanfala gavman long heven for rul ovarem disfala earth. Bible kolem disfala gavman Kingdom bilong God, and hem nao main theme long teaching bilong Jesus. (Luke 4:43; Revelation 11:15) Jesus teachim olketa disaepol for prea for disfala Kingdom for kam, from anda long rul bilong hem nomoa bae ‘will bilong God kamap long earth, olsem long heven.’ (Matthew 6:9, 10) Iu maet ting, ‘Sapos disfala Kingdom bae rul ovarem full earth, wanem nao bae happen long olketa gavman bilong man?’

Ansa hem stap long Daniel 2:44: “Long taem bilong olketa king hia God bilong heven bae startim wanfala kingdom wea bae nating savve finis. And datfala kingdom bae no go long eni narafala pipol. Hem bae smasem and finisim evri kingdom [bilong man] hia, and hemseleva nao bae stap olowe.” Why nao Kingdom bilong God mas “smasem” olketa rul long earth? Bikos olketa againstim God olowe taem olketa followim disfala wei for chusim samting seleva wea Satan apim start long garden bilong Eden. Witim wei wea diswan no savve helpem man, olketa wea olowe for followim diswan go againstim Creator. (Psalm 2:6-12; Revelation 16:14, 16) Dastawe iumi mas askem iumiseleva, ‘Waswe, iumi saportim or againstim rul bilong God?’

Olmaeti Rul Bilong Hu Nao Bae Iu Chusim?

For helpem pipol mekem wanfala disison wea garem faondeson long stretfala savve abaotem wei for rul, Jesus appointim olketa disaepol for preachim “gud nius bilong kingdom evriwea long earth for givim witness long evri nation” bifor end bilong disfala system hem kam. (Matthew 24:14) Hu nao preach abaotem Kingdom bilong God evriwea long world distaem ? Olketa Jehovah’s Witness. For longfala taem nao disfala magasin garem disfala toktok long front bilong hem, “Talemaot Kingdom Bilong Jehovah.” Distaem, samting olsem six million Witness long winim 230 kantri helpem pipol for kasem stretfala savve abaotem datfala Kingdom.a

Olketa Blessing for Olketa wea Stap Anda Long Kingdom

Evritaem Jesus duim samting followim wei bilong God. Dastawe, winim wei for chusim independent wei and trae for saportim and fixim disfala system thru long politik, hem waka hard for mekem olketa samting bilong Kingdom bilong God muv ahed, wea hem nomoa ansa for olketa problem bilong world. From loyal fasin bilong hem, hem kasem reward long nambawan throne long heven olsem King bilong datfala Kingdom. Datwan hem nambawan prize from hem stap anda long God!—Daniel 7:13, 14.

Staka million pipol distaem wea followim example bilong Jesus long wei for putim Kingdom bilong God firstaem and followim will bilong God hapi for kasem nambawan present—hem nao datfala privilege for olsem pipol long earth wea stap anda long Kingdom bilong God. (Matthew 6:33) Anda long loving rul bilong hem, olketa man bae kamap perfect, witim chance for laef olowe. (Revelation 21:3, 4) Toktok bilong 1 John 2:17 hem sei: “World hem redy for finis and evri samting wea hem wantem tu, bat man wea duim will bilong God bae stap olowe.” Taem Satan and olketa follower bilong hem finis and full earth kamap wanfala paradaes wea free from wei for divaed from wei for mekhae long kantri, olketa nogud wei for duim bisnis, and false religion, bae hem wanfala bigfala hapi for stap for olowe long hia!—Psalm 37:29; 72:16.

Yes, Kingdom bilong God hem tru key for wanfala hapi world, and dastawe hem fitim for kolem datfala message wea talem aot diswan gud nius. Sapos iu no duim yet, waswe sapos next taem wanfala long Olketa Jehovah’s Witness kam long haos bilong iu, iu lisin long datfala gud nius wea hem tekem kam for iu?

[Footnote]

[Olketa Piksa long page 5]

History pruvim hao olketa man no fit for rul gud sapos olketa no depend long God

[Piksa long page 5]

From hem rulim disfala “system,” Satan fit for offerim long Jesus “evri kingdom bilong world”

[Olketa Piksa long page 7]

Jesus teachim hao anda long Kingdom bilong God, world bae kamap wanfala nambawan ples