Golden Rul—Wanfala Teaching for Evriwan
“Dastawe, evri samting wea iufala wantem olketa man for duim long iufala, iufala tu mas duim olsem long olketa.”—Matthew 7:12.
JESUS CHRIST talem olketa toktok hia klosap tu thousand year go finis long Sermon Long Maunten wea planti pipol savve long hem. Insaed planti handred year start kam from datfala taem, pipol talem and raetem planti samting abaotem datfala simpol toktok. Olsem example, pipol mekhae long hem olsem “main idea bilong Scripture,” “main samting long responsibility bilong Christian for neiba bilong hem,” and “wanfala main principle saed long fasin.” Staka pipol savve gud long diswan gogo planti taem olketa kolem hem Golden Rul.
No pipol wea sei olketa Christian nomoa acceptim disfala idea bilong Golden Rul. Jew religion, Buddhist religion, and Greek idea tu tokhae long disfala important principle long planti difren wei. Planti pipol long Far East savve long toktok bilong Confucius, man wea olketa long Asia respectim olsem nambawan savveman and teacher. Insaed The Analects, mek-thri long Fofala Buk bilong Confucius, olketa talem disfala idea thrifala taem. Tufala taem, for ansarem olketa kwestin bilong olketa student, Confucius sei: “Samting wea iu no wantem man duim long iu, iu no duim long nara pipol.” Long narafala taem, wanfala student bilong hem Zigong tok praod “Samting wea mi no wantem pipol for duim long mi, mi no want for duim long olketa tu,” datfala teacher mekem hem tingting strong taem hem ansa, “Hem tru, bat iu no fit for duim diswan yet.”
Taem man readim diswan, hem savve lukim hao toktok bilong Confucius hem opposite long samting wea Jesus talem bihaen. Samting wea difren midolwan tufala hem wei wea Golden Rul wea Jesus talem minim man mas duim gud samting long nara pipol. Tingim sapos pipol followim toktok bilong Jesus, kea long and duim samting for helpem nara pipol, and live followim diswan evriday. Iu tingse datwan bae mekem disfala world kamap wanfala ples wea moabeta? Iumi no daotem.
Nomata olketa talem toktok hia for mekhae long wei for duim gud samting or nomoa, wanfala interesting samting hem wei wea pipol wea stap long olketa difren taem and ples and wea garem difren kaen living olketa trustim idea bilong Golden Rul. Diswan showimaot toktok bilong Jesus long Sermon Long Maunten hem wanfala teaching wea affectim laef bilong pipol long evri ples and thru long full history.
Askem iuseleva: ‘Waswe, mi laekem pipol for respectim mi, no teksaed, and deal witim mi long honest wei? Waswe, mi laek for stap long wanfala world wea no garem wei for daonem man from difren ples, criminal fasin, and war? Waswe, mi laek for stap insaed wanfala famili wea evriwan kea for feeling and living bilong narawan?’ For tok stret, hu nao bae les long olketa samting olsem? Bat sorre nao, distaem tu-thri nomoa garem diskaen living. Klosap evriwan bae feel olsem no eni hope stap for garem kaen living olsem.
Spoelem Golden Rul
Insaed full history, planti duim criminal fasin againstim olketa man long wei wea olketa ting nating long olketa raet bilong pipol. Insaed diswan hem wei for baem and sellim olketa slave long Africa, olketa Nazi camp, forcem pikinini for waka, and raf wei for killim dae pipol bilong nara tribe. List bilong olketa nogud samting hia hem savve kamap moa long.
Distaem, world bilong iumi wea garem enikaen stael samting barava ting tumas long seleva. Planti pipol no tingim nara pipol taem hem no fitim olketa or spoelem freedom bilong olketa. (2 Timothy 3:1-5) Why nao planti pipol kamap selfish, raf, no garem feeling, and ting tumas long olketa seleva? Waswe, hem bikos nomata planti pipol savve long Golden Rul, olketa no tinghae long hem, or tingim olsem samting wea no fitim taem bilong iumi, samting wea fitim fasin bilong bifor? Sorre tumas, diswan hem tru nomata midolwan planti wea sei olketa biliv long God. Taem iumi lukluk long samting wea happen distaem luk olsem pipol bae go ahed for ting long olketa seleva.
Dastawe, olketa important kwestin for tingim hem: Wanem nao insaed wei for live followim Golden Rul? Waswe, eniwan followim diswan long living bilong hem distaem? And, waswe long future, bae enitaem evri pipol live followim datfala Golden Rul? For kasem trufala ansa for olketa kwestin hia, plis readim nextfala article.
[Piksa long page 3]
Confucius and samfala narawan teachim difren idea abaotem Golden Rul