Golden Rul—Hem Gud Samting
Nomata planti pipol tingim Golden Rul olsem wanfala teaching wea Jesus talem, hemseleva sei: “Wanem mi teachim hem no bilong mi, bat bilong hem wea sendem mi kam.”—John 7:16.
TRU NAO, Man wea Startim samting wea Jesus teachim, insaed diswan hem datfala Golden Rul, hem nao Jehovah God datfala Creator wea sendem kam Jesus.
Hem purpose bilong God firstaem for evri man deal witim narawan long sem wei wea olketa laekem nara pipol deal witim olketa. Wei wea God wakem olketa man hem showimaot best example long wei for kea for living bilong nara pipol: “God hem creatim man long image bilong hemseleva, long image bilong God nao hem creatim hem; man and woman hem creatim tufala.” (Genesis 1:27) Diswan minim God givim olketa nambawan fasin bilong hem long olketa man mekem olketa savve enjoyim laef long peace, hapi living, and wan mind—sapos fitim, for olowe. Conscience bilong olketa wea God givim, sapos olketa trainim long stretfala wei, savve leadim olketa for deal witim nara pipol long wei wea olketa seleva wantem nara pipol for deal witim olketa.
Selfish Fasin Hem Win
From olketa man start kam long nambawan wei olsem, wanem nao go rong? For tok stret, selfish fasin hem start for kamap. Planti pipol savve gud long story bilong Bible abaotem wanem first hasband and waef duim, wea stap long Genesis chapter 3. From Satan, man wea againstim evri raeteous mark bilong God encouragem tufala, Adam and Eve selfish for rejectim rul bilong God and laek for independent and for chus seleva. Samting wea kamaot from selfish fasin bilong tufala and wei wea tufala no obey hem no spoelem tufala seleva nomoa, bat hem bringim bigfala trabol for evri future pikinini bilong tufala tu. Datwan showimaot klia trabol wea kamaot from wei for no followim datfala teaching wea gogo pipol savve long hem olsem Golden Rul. From diswan, “thru long wanfala man sin hem kam insaed long world and dae hem kam from sin, dastawe dae hem kasem evri man bikos evriwan sin.”—Romans 5:12.
Nomata klosap evri man rejectim olketa loving wei bilong Jehovah God, hem nating lusim olketa. Olsem example, Jehovah givim nation bilong Israel Law bilong hem for leadim olketa. Law teachim olketa for deal witim nara pipol long wei wea olketa seleva wantem nara pipol for deal witim olketa. Law givim direction long hao for deal witim olketa slave, pikinini wei wea no garem dadi, and olketa widow woman. Hem showimaot hao for deal witim man wea attakim nara man, wei for stealim man and fasin for steal. Olketa law saed long health showimaot wei for kea for health bilong nara pipol. Olketa law saed long sex stap tu. Jehovah showimaot main point long Law bilong hem taem hem talem pipol: “Iu mas lovem narafala man olsem iuseleva,” wanfala toktok wea Jesus talem moa bihaen. (Leviticus 19:18; Matthew 22:39, 40) Law hia talem tu wei for deal witim olketa stranger wea stap midolwan olketa Israelite. Law hia givim komand olsem: “Iufala mas no spoelem wanfala stranger, from iufala seleva savve finis long feeling bilong stranger, bikos iufala kamap olketa stranger long land bilong Egypt.” Hem minim, olketa Israelite mas showimaot kaenfala fasin and garem feeling for pipol wea garem hardfala living.—Exodus 23:9; Leviticus 19:34; Deuteronomy 10:19.
Taem Israel followim Law hia long faithful wei, Jehovah blessim datfala nation. Anda long rul bilong David and Solomon, datfala nation win and pipol barava hapi and satisfae. Bible talem iumi: “Judah and Israel staka for gud, olsem sandbis long saed sea wea staka tumas, olketa kaikai and drink and hapi. And Judah and Israel go ahed for garem sef living, evriwan anda long vine bilong hemseleva and anda long fig tree bilong hemseleva.”—1 Kings 4:20, 25.
Sorre tumas, peace and security bilong datfala nation hem no stap longtaem. Nomata olketa Israelite garem Law bilong God, olketa nating keepim; olketa letem selfish fasin for stopem interest bilong olketa for nara pipol. Disfala samting, witim apostate fasin, mekem problem kamap long olketa wanwan and olsem wanfala nation. Gogo, long year 607 B.C.E., Jehovah letem olketa bilong Babylon for distroem kingdom bilong Judah, taon bilong Jerusalem, and datfala nambawan temple long there. Why nao olsem? “ ‘From iufala no obeyim olketa word bilong mi, mi bae bringim kam olketa famili bilong north,’ hem nao toktok bilong Jehovah, ‘mi bae bringim kam Nebuchadrezzar king bilong Babylon, servant bilong mi, and mi bae bringim olketa kam againstim disfala kantri and againstim pipol bilong hem and againstim olketa nation wea stap raonem olketa; and mi bae finisim evribit and mekem olketa olsem samting wea mekem pipol sapraes and samting for olketa singaot long hem and olketa ples wea finis evribit for olowe.’ ” (Jeremiah 25:8, 9) Hem bigfala kost for lusim klinfala worship bilong Jehovah!
Wanfala Example for Followim
Long narasaed, Jesus Christ no teachim datfala Golden Rul nomoa bat hem showimaot best example long wei for followim tu. Hem barava interest long living bilong nara pipol. (Matthew 9:36; 14:14; Luke 5:12, 13) Wantaem, klosap long taon bilong Nain, Jesus lukim wanfala widow woman wea feel sorre tumas taem wanfala funeral service bilong only son bilong hem go ahed. Story bilong Bible sei: “Taem Lord lukim hem, hem sorre tumas long hem.” (Luke 7:11-15) Vine’s Expository Dictionary of Old and New Testament Words minim disfala toktok “sorre tumas” olsem “wei for feel sorre insaed.” Hem feelim pain long heart bilong datfala woman, and diswan muvim hem for duim samting for aotem pain bilong hem. Datfala widow woman hapi tumas taem Jesus resurrectim boy hia and “givim hem long mami bilong hem”!
Last samting, for fitim purpose bilong God, long willing wei Jesus safa and givim laef bilong hem olsem wanfala ransom mekem olketa man savve kamap free from wei for slave long sin and dae. Diswan hem nambawan example bilong wei for live followim Golden Rul.—Matthew 20:28; John 15:13; Hebrews 4:15.
Pipol wea Followim Golden Rul
Eni pipol stap long taem bilong iumi wea really live followim Golden Rul? Yes, and olketa no duim long taem wea fitim olketa nomoa. Olsem example, long taem bilong World War II long Nazi Germany, Olketa Jehovah’s Witness keepim faith bilong olketa long God and love for neiba and no willing for brekem datfala Golden Rul. Nomata Gavman forcem pipol for heitim evri Jew and markem olketa olsem difren, olketa Witness go ahed for followim datfala Golden Rul. Nomata insaed olketa concentration camp, olketa go ahed for kea for evriwan, sharem kaikai bilong olketa witim olketa Jew and pipol wea no Jew, nomata kaikai hem short. Narafala samting moa, nomata Gavman komandim olketa for iusim samting for faet for killim dae nara pipol, olketa nating willing for duim, sem wei olsem olketa no want for nara pipol killim dae olketa. Hao nao olketa savve killim dae pipol wea olketa shud lovem olsem olketa seleva? From olketa no willing, olketa sendem planti long olketa for go no long olketa concentration camp nomoa, bat for dae tu.—Matthew 5:43-48.
Taem iu readim disfala article, iu kasem gud samting from narafala example bilong wei wea Golden Rul hem waka. Olketa Jehovah’s Witness luksavve hao distaem planti pipol safa bikos olketa no garem eni hope and eniwan for helpem olketa. From diswan, olketa Witness volunteer for helpem nara pipol for lane abaotem datfala hope and direction bilong Bible. Diswan hem part long wanfala education waka evriwea long world wea olketa go ahed for duim long bigfala wei winim enitaem bifor. Wanem nao kamaot from diswan? Olsem profesi long Isaiah 2:2-4 talem, “planti pipol,” tru nao winim six million pipol raonem world, kasem ‘teaching abaotem wei bilong Jehovah, and olketa wakabaot long road bilong hem.’ Long tok piksa wei, olketa lane for “hammerim sword bilong olketa for kamap hou and spia bilong olketa for kamap naef for katem tree.” Olketa faendem peace and security insaed taem hia wea fulap witim trabol.
Waswe Long Iu?
For lelebet taem tingim bigfala pain and safa wea wei for ting nating long Golden Rul hem bringim long olketa man start from taem wea olketa againstim God long Eden, wea Satan nao startim. Klosap nao Jehovah hem plan for stretem bak datfala problem. Hao? “For disfala reason Son bilong God hem showaot, hem nao, for brekem olketa waka bilong Devil.” (1 John 3:8) Diswan bae kamap anda long rul bilong Kingdom bilong God, thru long man wea wise and fit, Jesus Christ, wan wea teachim and live followim Golden Rul.—Psalm 37:9-11; Daniel 2:44.
King David bilong Israel bifor hem sei: “Long bifor, mi wanfala young man, and distaem mi kamap olo nao, bat mi nating lukim eniwan wea raeteous hem no garem eni samting, or pikinini bilong hem lukaotem bred. Long full day hem showimaot favor and help, and so olketa pikinini bilong hem fit for kasem wanfala blessing.” (Psalm 37:25, 26) Waswe, iu agree hao planti pipol distaem want for tekem and kasem samting nomoa winim wei for “showimaot favor and help”? Tru nao, wei for followim Golden Rul savve lead go long tru peace and security bikos hem mekem man fit for kasem olketa blessing distaem and long future anda long Kingdom bilong God. Kingdom bilong God bae aotem evribit selfish and nogud fasin from earth and changem disfala nogud system bilong rul bilong olketa man witim wanfala niu system wea God wakem. Then, evri pipol bae enjoyim wei for live followim Golden Rul.—Psalm 29:11; 2 Peter 3:13.
[Olketa Piksa long page 4, 5]
Jesus no just teachim Golden Rul nomoa bat hem showim nambawan example long hao for followim
[Olketa Piksa long page 7]
Wei for followim Golden Rul savve lead go long tru peace and security