Fraet Long Jehovah and Keepim Olketa Komandment Bilong Hem
“Fraet long trufala God and obeyim olketa komandment bilong hem. From diswan nao full responsibility bilong man.”—ECCLESIASTES 12:13.
1, 2. (a) Hao nao wei for fraet savve protectim iumi long physical wei? (b) Why nao wisefala parents trae for putim gudfala wei for fraet insaed pikinini bilong olketa?
“OLSEM wei for no fraet hem mekem laef stap long danger, wei for fraet hem protectim laef,” hem nao samting wea Leonardo da Vinci hem lukim. Krangge wei for no fraet hem mekem man no luksavve long danger, bat wei for fraet savve mekem hem careful. Olsem example, sapos iumi go klosap long saed bilong wanfala steep ples and luk go daon, iumi bae stretawe muv bak. Olsem tu, gudfala wei for fraet hem mekem wei for fren witim God kamap, bat hem help tu for protectim iumi from nogud samting, olsem iumi lanem long first article.
2 Nomata olsem, wei for fraet long danger samting distaem hem samting wea man mas lanem. From smol pikinini no luksavve long danger bilong electric paoa or trak long road, hem isi for olketa kasem bigfala accident.a Wisefala parents trae for putim gudfala wei for fraet insaed pikinini, long wei for warnim olketa evritaem long danger samting wea stap raonem olketa. Parents savve diswan maet sevem laef bilong pikinini.
3. Why and hao nao Jehovah warnim iumi abaotem olketa spiritual danger?
3 Jehovah tu laekem iumi for stap gud. Olsem loving Dadi, hem teachim iumi thru long Word and organization bilong hem for givim gud samting long iumi. (Isaiah 48:17) Part long disfala teaching program bilong God hem wei for warnim iumi “evritaem” long olketa spiritual danger mekem iumi savve mekem grow gudfala wei for fraet long danger olsem. (2 Chronicles 36:15; 2 Peter 3:1) Insaed history planti spiritual problem and bigfala wei for safa bae no kamap ‘sapos pipol mekem grow insaed heart wei for fraet long God and for keepim evri komandment bilong hem.’ (Deuteronomy 5:29) Long olketa “nogud taem wea hard for deal witim” distaem, hao nao iumi savve mekem grow insaed heart bilong iumi wei for fraet long God and stap klia long spiritual danger?—2 Timothy 3:1.
Tanawe From Nogud Samting
4. (a) Wanem wei for heit nao olketa Christian shud mekem grow? (b) Hao nao Jehovah ting long nogud fasin? (Lukim footnote.)
4 Bible hem explainim hao wei for “fraet long Jehovah hem minim for heitim nogud samting.” (Proverbs 8:13) Wanfala Bible dictionary storyim disfala wei for heit olsem “tingting saed long feeling for pipol and samting wea man barava againstim, barava heitim, lukdaonem and wea man no laek for lukim or fren witim.” So wei for fraet long God hem minim wei for garem feeling insaed man for les long or heitim evri samting wea nogud long eye bilong Jehovah.b (Psalm 97:10) Hem muvim iumi for tanawe from samting wea nogud, long sem wei wea iumi bae muv bak from wanfala steep ples from iumi fraet. Bible hem sei: “Man wea fraet long Jehovah hem tanawe from nogud samting.”—Proverbs 16:6.
5. (a) Hao nao iumi savve strongim wei wea iumi fraet long God and wei wea iumi heitim samting wea nogud? (b) Wanem nao iumi savve lanem from history bilong nation bilong Israel?
5 Iumi savve strongim disfala gudfala wei for fraet and heitim samting wea nogud taem iumi tingting long olketa nogud samting wea kamaot from sin. Bible talem iumi klia hao iumi bae harvestim samting wea iumi plantim—nomata sapos iumi plantim samting followim body or followim spirit. (Galatians 6:7, 8) Dastawe Jehovah barava talemaot klia samting wea bae kamaot from wei for no followim olketa komandment bilong hem and wei for lusim tru worship. Sapos God no protectim olketa, datfala smol nation bilong Israel bae stap long hand bilong olketa raf and strongfala neiba. (Deuteronomy 28:15, 45-48) Nogud samting wea kamaot from wei wea Israel no obey hem stap long Bible “olsem warning” mekem iumi savve lane from and mekem grow wei for fraet long God.—1 Corinthians 10:11.
6. Wanem nao samfala Bible example wea iumi savve tingim taem iumi lanem wei for fraet long God? (Lukim footnote.)
6 For join witim samting wea happen long nation bilong Israel olsem wanfala sekson, Bible garem olketa really experience bilong olketa man wea jealous fasin, dirty fasin, greedy fasin, or praod fasin spoelem olketa.c Samfala long olketa hia servem Jehovah for planti year, bat long wanfala important taem long laef bilong olketa, wei wea olketa fraet long God hem no strong inaf, and olketa kasem barava nogud samting from datwan. Wei for ting raonem olketa Bible example olsem savve strongim wei wea iumi disaed for no duim sem mistek. Hem sorre samting sapos iumi weit kasem taem iumiseleva kasem nogud samting bifor iumi followim advaes bilong God! Long difren wei from wanem planti pipol bilivim, samting wea kasem man—especially from wei for ova tumas long samting—hem no best wei for lane.—Psalm 19:7.
7. Hu nao Jehovah invaetem insaed tokpiksa tent bilong hem?
7 Narafala strongfala reason for mekem grow wei for fraet long God hem feeling bilong iumi for laek for protectim wei wea iumi fren witim God. Iumi fraet for mekem Jehovah no hapi bikos iumi tinghae long wei for fren witim hem. Hu nao God tingim olsem wanfala fren, samwan wea hem invaetem insaed long tokpiksa tent bilong hem? Only datwan wea “wakabaot long stretfala wei and duim raeteous fasin.” (Psalm 15:1, 2) Sapos iumi tinghae long disfala wei for fren witim Creator bilong iumi, bae iumi careful for wakabaot followim stretfala wei long eye bilong hem.
8. Hao nao samfala Israelite long taem bilong Malachi ting smol long wei for fren witim God?
8 Sorre tumas, samfala Israelite long taem bilong Malachi ting smol long wei for fren witim God. Olketa no fraet and no givim honor long Jehovah, bat olketa offerim olketa animal wea sik and cripple long altar bilong hem. Wei wea olketa no garem wei for fraet long God hem showaot tu long tingting bilong olketa abaotem marit. From olketa laek maritim olketa young woman, olketa divorcem waef wea olketa maritim taem olketa young for smol reason nomoa. Malachi talem olketa hao Jehovah heitim “wei for divorce” and hao giaman wei bilong olketa mekem olketa stap farawe from God bilong olketa. Hao nao God savve hapi long sakrifaes bilong olketa taem altar hem fulap witim tokpiksa krae—krae bilong waef wea olketa lusim? Kaen bigfala wei for no respectim olketa mark bilong hem olsem hem muvim Jehovah for ask olsem: “Wea nao wei for fraet long mi?”—Malachi 1:6-8; 2:13-16.
9, 10. Hao nao iumi savve showimaot iumi tinghae long wei for fren witim Jehovah?
9 Distaem tu Jehovah lukim krae bilong planti partner and pikinini wea barava feel nogud long selfish and dirty fasin bilong hasband and dadi or waef and mami bilong olketa. Diswan mekem hem sorre tumas. Man wea fren witim God bae garem tingting bilong God long samting and bae waka hard for strongim marit bilong hem, rejectim tingting bilong world wea tokdaonem wei wea marit hem important, and “ranawe from fornication.”—1 Corinthians 6:18.
10 Insaed marit and tu long olketa difren part bilong living, wei for heitim evri samting wea nogud long eye bilong Jehovah, witim wei for barava tinghae long wei for fren witim hem, bae mekem Jehovah hapi and hem appruvim iumi. Aposol Peter hem tok stret olsem: “Tru nao, mi luksavve hao God hem no saed witim eniwan, bat long evri nation man wea fraet long hem and duim raeteous fasin nao hem acceptim.” (Acts 10:34, 35) Iumi garem planti example from Bible wea showimaot hao wei for fraet long God muvim man wanwan for duim samting wea stret long hard taem.
Thrifala wea Fraet Long God
11. From wanem samting nao Bible kolem Abraham man wea “fraet long God”?
11 Bible storyim wanfala man wea Jehovah seleva kolem olsem fren bilong hem—Abraham. (Isaiah 41:8) Wei wea Abraham fraet long God hem kasem test taem God askem hem for offerim olsem sakrifaes only son bilong hem Isaac, wea God bae fulfillim promis bilong hem thru long hem hao olketa pikinini bilong Abraham bae kamap wanfala bigfala nation. (Genesis 12:2, 3; 17:19) Waswe, “fren bilong Jehovah” bae pasim disfala hardfala test? (James 2:23) Taem Abraham apim naef bilong hem for killim dae Isaac, angel bilong Jehovah sei: “No putim hand bilong iu againstim datfala boy and no duim eni samting long hem, from distaem mi savve iu fraet long God from iu no holem bak son bilong iu, only wan bilong iu, from mi.”—Genesis 22:10-12.
12. Wanem nao muvim Abraham for fraet long God, and hao nao iumi savve showimaot semkaen spirit?
12 Nomata Abraham bin pruvim wei wea hem fraet long Jehovah, long datfala taem hem showimaot wei for fraet long God long barava nambawan wei. Wei wea hem willing for sakrifaesim Isaac hem moa samting winim wei for obey witim respect nomoa. Samting wea muvim Abraham nao hem full trust bilong hem long Dadi bilong hem long heven hao hem bae fulfillim promis bilong Hem long wei for resurrectim Isaac sapos hem dae. Olsem Paul talem, Abraham hem “barava sure hao wanem [God] promisim hem fit for duim tu.” (Romans 4:16-21) Waswe, iumi redy for duim will bilong God nomata diswan needim olketa bigfala sakrifaes? Waswe, iumi garem full trust hao wei for obey evribit bae givim iumi gud samting for olowe, from iumi savve Jehovah hem “man wea givim reward long olketa wea barava lukaotem hem”? (Hebrews 11:6) Datwan nao trufala wei for fraet long God.—Psalm 115:11.
13. Why nao Joseph fit for story abaotem hemseleva olsem man wea “fraet long trufala God”?
13 Iumi lukim nara example bilong wei for fraet long God—hem nao Joseph. Olsem wanfala slave long haos bilong Potiphar, Joseph evriday kasem hevi for duim dirty fasin. Hem no savve missim wei for lukim waef bilong masta bilong hem, wea askem hem evritaem for duim dirty fasin witim hem. Gogo taem woman hia “kasholem hem,” hem “ranawe go aotsaed.” Wanem nao muvim hem for tanawe from nogud samting stretawe? Iumi sure main samting nao wei for fraet long God, wei wea hem no laek for duim “disfala barava nogud samting and sin againstim God.” (Genesis 39:7-12) Joseph fit for story abaotem hemseleva olsem man wea “fraet long trufala God.”—Genesis 42:18.
14. Hao nao mercy wea Joseph showimaot hem showim trufala wei for fraet long God?
14 Planti year bihaen, Joseph lukim moa olketa brata bilong hem, wea bin sellim hem olsem wanfala slave. Bae hem isi for hem iusim datfala taem wea olketa needim tumas kaikai olsem wanfala chance for peim bak rong samting wea olketa bin duim long hem. Bat wei for deal witim pipol long raf wei hem no showimaot wei for fraet long God. (Leviticus 25:43) So, taem Joseph lukim inaf pruv hao olketa brata bilong hem change, hem showimaot mercy and forgivim olketa. Olsem Joseph, wei wea iumi fraet long God bae muvim iumi for winim nogud samting witim gud samting, and tu hem bae holem iumi bak from wei for foldaon insaed test.—Genesis 45:1-11; Psalm 130:3, 4; Romans 12:17-21.
15. Why nao fasin bilong Job hem mekem heart bilong Jehovah hapi?
15 Job hem narafala nambawan example bilong man wea fraet long God. Jehovah sei olsem long Devil: “Waswe, iu lukluk gud long servant bilong mi Job, hao no eniwan olsem hem stap long earth, wanfala man wea no garem blame and garem stretfala fasin, fraet long God and tanawe from nogud fasin?” (Job 1:8) For planti year, faithful fasin bilong Job mekem heart bilong Father bilong hem long heven hapi tumas. Job fraet long God bikos hem savve datwan nao stret samting for duim and best wei bilong living. “Lukim! Wei for fraet long Jehovah—datwan hem wisdom, and for tanawe from nogud fasin, datwan nao hem wei for minim samting.” (Job 28:28) Olsem man wea marit, Job no lukluk long nogud wei long olketa young woman, and tingting for duim adultery hem nating stap insaed heart bilong hem. Nomata hem rich man, hem no want for putim trust bilong hem long olketa rich samting, and hem barava stap klia from eni wei for worshipim idol.—Job 31:1, 9-11, 24-28.
16. (a) Wanem nao olketa wei wea Job showimaot loving-kaeness? (b) Hao nao Job showimaot hem no hol bak for forgive?
16 Nomata olsem, wei for fraet long God hem minim for duim samting wea gud and tu for tanawe from samting wea nogud. So, Job hem showimaot kaenfala fasin long olketa wea blind, cripple, and poor. (Leviticus 19:14; Job 29:15, 16) Job minim hao “eniwan wea no showimaot loving-kaeness long narawan, hem bae no showimaot wei for fraet long Olmaeti Wan tu.” (Job 6:14) Wei for no showimaot loving-kaeness maet minim wei for no forgive or wei for keepim kros. From God talem hem for duim, Job prea for thrifala fren bilong hem, wea kosim bigfala sorre for hem. (Job 42:7-10) Waswe, iumi savve showimaot semkaen spirit for forgive long wanfala brata wea maet mekem iumi feel nogud long eni samting? Wei for talem prea from heart for datwan wea spoelem iumi savve barava help for mekem iumi winim feeling for kros. Olketa blessing wea Job kasem from wei wea hem fraet long God hem showimaot ‘gudfala fasin bilong Jehovah wea staka tumas, wea hem keepim for olketa wea fraet long hem!’—Psalm 31:19; James 5:11.
Fraet Long God Feisim Fraet Long Man
17. Wanem nao wei for fraet long man savve duim long iumi, bat why nao wei for fraet olsem hem minim man no tingim future?
17 Nomata wei for fraet long God savve muvim iumi for duim samting wea stret, wei for fraet long man savve mekem faith bilong iumi wikdaon. Dastawe, taem Jesus encouragem olketa aposol bilong hem for strong for preachim gud nius, hem sei olsem: “No fraet long olketa wea savve killim dae body bat kanduit killim dae soul; bat fraet long datwan wea savve finisim soul and body long Gehenna.” (Matthew 10:28) Jesus explainim hao wei for fraet long man hem minim man no tingim future, bikos olketa man no savve distroem hope bilong iumi for laef long future. And tu, iumi fraet long God bikos iumi luksavve long maeti paoa bilong hem, wea barava winim strong bilong evri nation. (Isaiah 40:15) Olsem Abraham, iumi barava trustim paoa bilong Jehovah for resurrectim olketa faithful servant bilong Hem. (Revelation 2:10) So, iumi savve sei witim trust: “Sapos God stap witim iumi, hu nao bae againstim iumi?”—Romans 8:31.
18. Long wanem wei nao Jehovah givim reward for olketa wea fraet long hem?
18 Nomata datwan wea againstim iumi hem wanfala famili member or raf pikinini long skul, iumi bae faendem hao “long wei for fraet long Jehovah strongfala trust hem stap.” (Proverbs 14:26) Iumi savve prea long God for givim iumi strong, and savve hem bae herem iumi. (Psalm 145:19) Jehovah nating forgetim olketa wea fraet long hem. Thru long profet bilong hem Malachi, hem encouragem iumi: “Long datfala taem olketa wea fraet long Jehovah toktok witim narawan, and Jehovah go ahed for lukluk and lisin. And olketa raetem front long hem wanfala buk for rememberim olketa wea fraet long Jehovah and olketa wea tingim nem bilong hem.”—Malachi 3:16.
19. Wanem kaen wei for fraet nao bae finis, bat wanem kaen fraet nao bae stap for olowe?
19 Klosap nao evriwan long earth bae worshipim Jehovah and wei for fraet long man bae finis. (Isaiah 11:9) Wei for fraetem hangre, sik, raf fasin, and war bae finis tu. Bat wei for fraet long God bae stap for olowe taem olketa faithful servant bilong hem long heven and earth go ahed for showim respect, wei for obey, and honor wea hem fit for kasem. (Revelation 15:4) Long distaem, letem iumi evriwan tinghevi long disfala kaonsel bilong Solomon: “No letem heart bilong iu feel jealous long olketa sinner, bat fraet long Jehovah long full day. From sapos olsem future bae stap, and hope bilong iu bae no finis.”—Proverbs 23:17, 18.
[Olketa Footnote]
a Samfala full-grown man lusim nao wei for fraet long danger samting from waka bilong olketa mekem olketa evritaem feisim danger samting. Taem samwan ask why nao planti carpenter no garem wan or tufala finger, wanfala man wea savve tumas for duim datfala waka sei: “Olketa lusim nao feeling for fraet long olketa electric saw.”
b Jehovah seleva garem disfala feeling for barava heit. Olsem example, Ephesians 4:29 storyim dirty toktok olsem “rotten toktok.” Greek word wea olketa iusim for “rotten” hem really minim rotten frut, fish, or meat. Toktok olsem hem showimaot feeling for barava les wea iumi shud garem long nogud or dirty toktok. Long sem wei tu, Bible planti taem storyim olketa idol olsem “rabis.” (Deuteronomy 29:17; Ezekiel 6:9) Wei wea iumi les tumas long rabis, or toilet bilong animal, helpem iumi for minim feeling bilong God for barava les long eni wei for worshipim idol.
c For samfala example, tingim olketa story long Bible abaotem Cain (Genesis 4:3-12); David (2 Samuel 11:2–12:14); Gehazi (2 Kings 5:20-27); and Uzziah (2 Chronicles 26:16-21).
Waswe, Iu Remember?
• Hao nao iumi lane for heitim samting wea nogud?
• Hao nao samfala Israelite long taem bilong Malachi ting smol long wei for fren witim Jehovah?
• Wanem nao iumi savve lanem from Abraham, Joseph, and Job abaotem wei for fraet long God?
• Wanem kaen wei for fraet nao bae stap olowe, and why nao olsem?
[Piksa long page 19]
Wisefala parents putim gudfala wei for fraet insaed pikinini
[Piksa long page 20]
Olsem wei for fraet mekem iumi muv bak from danger, wei for fraet long God mekem iumi tanawe from nogud samting
[Piksa long page 23]
Job keepim wei for fraet long God nomata taem hem mas deal witim thrifala giaman fren
[Credit Line]
From the Bible translation Vulgata Latina, 1795