Waswe, Iu Remember?
Waswe, iu enjoyim olketa Wastaoa long olketa month wea just go pas finis? Sapos olsem, trae for ansarem olketa kwestin long daon:
• Federal Constitutional Kot bilong Germany help for winim wanem kot case abaotem religion?
Datfala kot changem wei wea nara kot hem sei Olketa Jehovah’s Witness no fit for register olsem wanfala corporation long pablik law. Insaed datfala disison, olketa sei hao from man garem freedom long religion hem savve ‘obeyim biliv long religion bilong hem winim wanem gavman askem.’—8/15, page 8.
• For hao long nao Job safa?
Buk bilong Job no showimaot hem safa for planti year. Wei wea Job safa hem maet happen insaed samfala month nomoa, maet no kasem wan year.—8/15, page 31.
• Why nao iumi sure Devil hem no kastom story nomoa?
Jesus Christ savve hao Devil hem really stap. Jesus kasem test from wanfala man wea really stap, no wicked samting insaed hemseleva. (Matthew 4:1-11; John 8:44; 14:30)—9/1, page 5-6.
• Proverbs 10:15 sei: “Strong taon bilong rich man hem olketa samting wea hem garem wea garem hae price. Samting wea spoelem poor pipol hem wei wea olketa poor.” Hao nao iumi luksavve diswan hem tru?
Riches savve protectim man from samfala samting long laef wea hem no plan for hem, long sem wei wea strongfala wall raonem wanfala taon hem protectim olketa insaed. Long narasaed, wei for poor savve spoelem man taem samting wea hem no expectim hem happen.—9/15, page 24.
• Long wanem wei nao olketa long taem bilong Enosh start for “singaot long nem bilong Jehovah”? (Genesis 4:26)
Olketa bin iusim nem bilong God from start bilong history bilong man; dastawe, samting wea start long taem bilong Enosh hem no wei for singaot long nem bilong Jehovah long faith. Olketa man maet start for kolem nem bilong God long olketa seleva wea nating showimaot respect or olketa kolem long man wea olketa giaman for worshipim God thru long hem.—9/15, page 29.
• Taem Bible iusim datfala word “discipline,” wanem nao hem minim?
Disfala word no minim for spoelem man or raf. (Proverbs 4:13; 22:15) Greek word for “discipline” hem minim instruction, education, wei for stretem and, samfala taem, strong bat loving wei for givim panis. Wanfala important wei wea parents savve followim example bilong Jehovah hem taem olketa trae hard for keepim open wei for story tugeta witim pikinini bilong olketa. (Hebrews 12:7-10)—10/1, page 8, 10.
• Hao nao olketa tru Christian distaem showimaot olketa saportim rul bilong God?
From olketa saportim Kingdom bilong God, Olketa Jehovah’s Witness no mix insaed politik or muvim pipol for againstim olketa gavman long world, nomata long olketa kantri wea olketa tambuim olketa Witness. (Titus 3:1) Olketa trae for duim gud samting long wei wea Jesus and olketa first-century disaepol bilong hem duim and trae hard for helpem pipol for followim olketa gudfala Bible principle olsem honest fasin, klin fasin, and gudfala wei for waka.—10/15, page 6.
• Hao nao wata wea givim laef ran long Andes?
Olketa Jehovah’s Witness go ahed for trae hard for kasem pipol witim truth from Bible, nomata long Quechua or Aymara, tufala languis long datfala ples. Olketa Witness go visitim tu pipol wea stap long olketa island long Lake Titicaca, witim olketa island wea “float” wea olketa mekem from olketa grass wea grow insaed datfala lake.—10/15, page 8-10.
• Wanem nao God provaedem for leadim iumi, wea hem olsem computer wea leadim gogo bilong wanfala aeroplane?
God givim olketa man wanfala samting for leadim olketa saed long fasin. Diswan nao hem conscience bilong iumi. (Romans 2:14, 15)—11/1, page 3-4.
• Why nao dae bilong Jesus garem hae price?
Taem perfect man Adam hem sin, hem lusim wei for laef for hem and olketa pikinini bilong hem. (Romans 5:12) Olsem man wea perfect, Jesus sakrifaesim laef bilong hem, and long datfala wei provaedem ransom wea bae mekem olketa faithful man for kasem laef olowe.—11/15, page 5-6.
• Hu nao olketa bilong Scythia wea Colossians 3:11 storyim?
Olketa bilong Scythia olketa wanfala nation bilong pipol wea savve muv from ples tu ples long olketa grassland bilong Eurasia, wea rul from samting olsem 700 go kasem 300 B.C.E. Olketa barava savve tumas for raedem horse and for faet. Colossians 3:11 maet minim, no datfala nation, bat pipol wea raf tumas.—11/15, page 24-5.
• Why nao iumi fit for sei datfala Golden Rul hem wanfala teaching wea fitim iumi for tingim olowe?
Disfala teaching hem stap insaed Judaism, Buddhism, Greek teaching, and Confucianism. Bat, samting wea Jesus teachim long Sermon long Maunten hem minim man mas duim olketa gud samting, and diswan bae affectim laef bilong pipol evriwea nomata wanem nao age bilong olketa. (Matthew 7:12)—12/1, page 3.