Olketa Principle Iu Chusim
WASWE, iu man for followim principle? Or hao, iu ting wei for followim principle hem no fitim taem bilong iumi? Really, evri man followim samfala principle wea hem tingim hem important. The New Shorter Oxford English Dictionary sei wanfala principle hem “wanem man seleva markem olsem hem stretfala fasin.” Olketa principle affectim wanem iumi disaedem and kaen laef wea iumi followim. Principle hem savve olsem wanfala compass.
Olsem example, Jesus encouragem olketa follower bilong hem for keepim datfala Golden Rul wea stap long Matthew 7:12: “Dastawe, evri samting wea iufala wantem olketa man for duim long iufala, iufala tu mas duim olsem long olketa.” Olketa follower bilong Confucius keepim olketa principle bilong li and jen, wea mekhae long olketa fasin olsem kaenfala fasin, hambol fasin, respect, and loyal fasin. Nomata pipol wea no lotu tinghae long samfala mark for followim saed long fasin.
Wanem Kaen Principle?
Iumi shud remember hao olketa principle savve gud or nogud. Olsem example, insaed ten year wea go pas, samting wea muvim moa and moa pipol hem disfala wei for mista-mi. Nomata staka no savve long toktok hia or sei olketa no olsem, mista-mi hem principle wea man followim taem hem lusim olketa hae mark. Nomata pipol iusim toktok hia or nomoa, wei for mista-mi hem showaot selfish fasin, wea staka taem join witim wei for ova tumas long material samting. “Mifala garem tufala principle nomoa,” wanfala bigman bilong TV long China hem talem. “Wanfala hem for provaedem samting pipol laekem. Narawan hem for hipimap selen.”
Wei for mista-mi savve olsem wanfala magnet. Hao nao wanfala magnet affectim compass? Taem iu holem tufala tugeta, datfala arrow bilong compass bae point go difren. Olsem tu, wei for mista-mi savve leadim man olabaot saed long fasin, from evri samting hem mek-tu long wanem body laekem.
Waswe, bae iu sapraes for savve hao mista-mi hem no samting bilong distaem nomoa? Hem start long garden bilong Eden taem firstfala dadi and mami bilong iumi lusim olketa standard from Creator bilong iumi saed long fasin. Datwan changem compass bilong tufala saed long fasin. Olsem olketa pikinini bilong Adam and Eve, olketa man kasem trabol from semkaen wei, wea distaem garem nem “mista-mi.”—Genesis 3:6-8, 12.
Iumi barava lukim hao diskaen wei hem kamap big insaed wanem Bible profesi kolem “nogud taem wea hard for deal witim,” wea hem mark bilong “olketa last day.” Staka pipol “lovem seleva.” So iumi no sapraes hao iumi kasem hevi for copyim disfala wei for mista-mi.—2 Timothy 3:1-5.
Maet iu agree witim youngfala man Olaf wea raet long wanfala branch bilong Olketa Jehovah’s Witness long Europe: “Hem barava hard for stap klin saed long fasin, especially for mifala olketa young wan. Plis go ahed for remindim mifala long need for barava stap klos long olketa Bible principle.”
Olaf hem showimaot fasin for luksavve. Olketa principle bilong God savve helpem iumi—nomata iumi young or olo—for keepim olketa hae standard long fasin. Olketa savve mekem iumi againstim wei for mista-mi tu. Sapos iu laek for savve moa abaotem hao olketa Bible principle savve really helpem iu, read and ting raonem gud nextfala article.
[Olketa Piksa long page 4]
Staka pipol distaem no kea long need bilong narawan