Report Bilong Olketa wea Talemaot Kingdom
“Mi Laek for Servem God”
“GO AOT from hem, pipol bilong mi.” Diswan hem toktok bilong wanfala angel wea aposol John herem long first century C.E. Long taem bilong iumi, staka million pipol wea garem honest heart followim diswan and ranawe from “Bigfala Babylon,” world rul bilong false religion. (Revelation 18:1-4) Midolwan olketa hem Wilner from Haiti, wea talem disfala experience.
“Mi born long 1956 insaed wanfala strong Catholic famili long smol taon bilong St. Marc, Haiti. Tingim bigfala hapi bilong famili bilong mi taem olketa chusim mi and nara tufala from taon bilong mifala for attendim wanfala Bible skul long St. Michel de l’Atalaye, Haiti. Then, long 1980, olketa sendem mifala go long Stavelot, Belgium, for moa training. Long there tu mifala attendim wanfala Catholic university.
“Firstaem mi barava interest for kamap priest. Wanday long rum for kaikai, priest wea leadim grup bilong mifala askem mi for weit lelebet bikos hem laek talem mi wanfala samting. Tingim seke bilong mi taem hem talem stret hem laekem mi! Mi rejectim hem bat hem barava mekem mi feel nogud. Mi raet long famili bilong mi abaotem diswan and nomata olketa no agree mi lusim skul tu-thri month bihaen. Mi faendem ples for stap long vilij and aftarem difren kaen education.
“Taem mi go bak long St. Marc, mi no garem eni trust long Catholic Church. Mi laek for servem God, bat mi no savve wanem for duim. Mi go long Adventist church, Ebenezer church, and Mormon church. Long spiritual wei mi float nomoa.
“Then mi tingim hao taem mi skul long Belgium, mi savve readim datfala Crampon Bible. Insaed long hem mi faendaot hao God garem wanfala nem. So mi iusim nem bilong hem taem mi prea strong for God helpem mi faendem tru religion.
“No longtaem bihaen, tufala Jehovah’s Witness kamap neiba bilong mi. Tufala kwaet, garem respect, and showaot honor. Mi tinghae long wei bilong tufala. Wanday, wanfala long tufala Witness hia invaetem mi for attendim Memorial bilong dae bilong Christ wea kamap evri year. Mi barava enjoyim datfala meeting and agree for studyim Bible witim olketa Witness. Insaed samting olsem six month, mi biliv mi faendem stretfala wei for servem God. Mi dedicatem laef bilong mi long Jehovah and baptaes long November 20, 1988.”
Gogo, Wilner duim full-taem service. Distaem, hem serve olsem wanfala kongregeson elder. Hem and waef bilong hem, witim tufala pikinini bilong tufala, serve long hapi wei insaed kongregeson.
[Piksa long page 9]
From hem readim Bible, Wilner faendaot nem bilong God hem Jehovah