Tufala Pastor wea Barava Tinghae Long Olketa Raeting Bilong Russell

LONG 1891, Charles Taze Russell, wea duim barava nambawan waka midolwan olketa tru Christian wea worshipim Jehovah, visitim Europe for firstaem. Olsem samfala report talem, taem hem stap for lelebet taem long Pinerolo, Italy, Russell meetim Professor Daniele Rivoire, wanfala pastor bilong wanfala grup bilong religion wea olketa kolem Olketa Waldensian bifor.a Nomata Rivoire go ahed for kaban long klos wei witim Olketa Waldensian bihaen hem lusim datfala ministry, hem willing for herem niu samting and hem readim planti buk wea C. T. Russell raetem.

Long 1903, Rivoire transleitim buk bilong Russell The Divine Plan of the Ages long Italian languis and hem peim kost for printim. Diswan hem bifor official edition long Italian languis hem kamap. Long introduction bilong disfala buk, Rivoire raet olsem: “Mifala putim disfala first edition long Italian languis anda long protection bilong Lord. Letem hem blessim buk hia mekem, nomata hem no perfect, hem maet mekhae long holy nem bilong God and encouragem olketa pikinini bilong hem wea iusim Italian languis for worshipim hem long bigfala wei moa. Letem heart bilong evriwan wea, taem olketa readim disfala buk, tinghae long olketa deep riches, wisdom, and savve abaotem plan and love bilong God, sei thankiu long God, wea from favor bilong hem mekem wei for disfala buk fit for kamap.”

Rivoire start for transleitim tu Zion’s Watchtower and Herald of Christ’s Presence long Italian languis. Disfala magasin, wea hem nao Wastaoa distaem, kamap evri foa month long 1903. Nomata Professor Rivoire nating kamap wanfala Bible Student, nem bilong Olketa Jehovah’s Witness bifor, hem showimaot bigfala interest for spreadim Bible message olsem olketa explainim insaed olketa buk bilong olketa Bible Student.

“Luk olsem Olketa Scale Foldaon From Eye Bilong Mi”

Narafala pastor bilong Olketa Waldensian wea barava tinghae long olketa buk bilong Russell hem Giuseppe Banchetti. Dadi bilong Giuseppe, wea hem bilong Catholic religion bifor, teachim hem abaotem Olketa Waldensian. Long 1894, Giuseppe kamap pastor and serve olsem minister long planti difren Waldensian community long Apulia and Abruzzi and long olketa island bilong Elba and Sicily.

Olketa pablisim official edition bilong Divine Plan of the Ages bilong Russell long Italian languis long 1905, Banchetti raetem wanfala review bilong datfala buk wea showimaot hapi feeling abaotem diswan. Disfala review hem kamaot insaed Protestant pablikeson La Rivista Cristiana. “For iumi,” Banchetti hem raet, buk bilong Russell “hem barava klia and sure wei wea eni Christian savve faendem for studyim gud Holy Scripture and kasem reward from datwan . . . Stretawe bihaen mi readim, hem olsem olketa scale foldaon from eye bilong mi, hao wei for go long God hem moa stret and isi. Nomata olketa part wea luk olsem hem againstim hemseleva hem finis nao. Olketa teaching wea hard tumas for minim bifor hem kamap simpol and isi for acceptim. Olketa samting wea bifor hem barava hard for minim kamap klia. Datfala nambawan plan abaotem salvation bilong world thru long Christ showaot long mi long barava simpol wei, and diswan muvim mi for singaot witim datfala Aposol: “O  hao deep nao riches and wisdom and savve bilong God!”—Romans 11:33.

Olsem Remigio Cuminetti storyim long 1925, Banchetti showimaot hem “barava agree” long waka bilong olketa Bible Student and hem “barava bilivim” olketa teaching olsem olketa explainim. Long wei bilong hemseleva, Banchetti trae hard tu for mekem pipol savve abaotem olketa teaching hia.

Hem showaot klia long olketa raeting bilong Banchetti hao, olsem Olketa Jehovah’s Witness, hem biliv hao wanfala resurrection bae kamap long disfala earth, olsem Bible teachim. Hem agree tu witim olketa Bible Student taem hem explainim hao God markem and showimaot finis datfala year wea Jesus dae insaed profesi bilong Daniel abaotem datfala 70 week. (Daniel 9:24-27) Winim wantaem, and long wei wea showaot klia hao hem no agree witim olketa teaching bilong church bilong hem, hem bilivim hao Memorial bilong dae bilong Jesus Christ shud kamap wantaem nomoa evri year, “long barava sem day wea diswan happen.” (Luke 22:19, 20) Hem rejectim olketa idea bilong Darwin abaotem evolution, and strongim hao olketa tru Christian shud no join insaed war.—Isaiah 2:4.

Wantaem, Banchetti hem story witim wanfala man wea nem bilong hem J. Campbell Wall abaotem olketa raeting bilong Russell. For ansarem toktok bilong Wall wea againstim olketa raeting hia, Banchetti sei: “Mi barava sure hao sapos iu readim sixfala volume bilong Russell, iu bae kasem bigfala hapi, and iu bae sei thankiu long mi witim hapi feeling. Mi no ova tumas witim teaching; bat mi readim olketa buk hia eleven year go finis, and mi thankiu long God evri day for putim front long mi laet and comfort olsem thru long buk wea barava garem strong faondeson long Holy Scripture.”

“Lisin, Lisin, Lisin”

Wei wea tufala Waldensian pastor hia—Daniele Rivoire and Giuseppe Banchetti—talemaot wei for tinghae long wei wea Russell explainim Bible hem important. Banchetti raet: “Mi tingse no eniwan long iumi olketa man for preach, nomata olketa pastor or savveman bilong iumi, no eniwan savve long evri samting. Iumi garem staka nara samting for lanem. . . . [Iumi shud] . . . stap and lisin, no tingse iumi savve long evri samting, and no rejectim samting nara man givim for iumi lukluk gud long hem. Bat, lisin, lisin, lisin.”

Evri year, planti thousand pipol lisin long Kingdom message wea Olketa Jehovah’s Witness tekem go long haos bilong olketa. Pipol evriwea wea willing for lisin and thirsty for Bible truth acceptim invitation bilong Jesus: “Kam followim mi.”—Mark 10:17-21; Revelation 22:17.

[Footnote]

[Piksa long page 28]

Professor Daniele Rivoire

[Piksa long page 29]

Giuseppe Banchetti

[Credit Line]

Banchetti: La Luce, April 14, 1926