Jehovah Heitim Wei for Brekem Trust
‘No deal long wei for brekem trust witim narawan.’—MALACHI 2:10.
1. Wanem nao iumi mas duim for kasem laef olowe wea God bae givim?
WASWE, iu laek kasem laef olowe? Sapos iu bilivim hope wea Bible promisim, luk olsem iu bae sei, ‘yes.’ Bat sapos iu laekem God for givim iu laef wea no garem end insaed niu world bilong hem, iu bae need for kasem olketa mark bilong hem. (Ecclesiastes 12:13; John 17:3) Waswe, hem fitim for iumi expectim olketa man wea no perfect for duim datwan? Hem fitim, from Jehovah talem disfala toktok wea encouragem man: “Mi hapi long loving-kaeness, and no long sakrifaes; and long savve bilong God winim full bone offering.” (Hosea 6:6) So man, nomata hem mekem mistek, hem savve kasem olketa mark bilong God.
2. Hao nao planti Israelite deal witim Jehovah long wei wea brekem trust?
2 Nomata olsem, no evriwan laek for duim will bilong Jehovah. Hosea showimaot hao planti Israelite nating want for duim datwan. Olsem wanfala nation, olketa agree finis for stap insaed wanfala covenant, wanfala agreement, for obeyim olketa law bilong God. (Exodus 24:1-8) Bat no longtaem nomoa olketa start for ‘sin againstim covenant’ taem olketa brekem olketa law bilong hem. Dastawe, Jehovah sei olketa Israelite hia “deal witim [hem] long wei wea brekem trust.” (Hosea 6:7) And kasem distaem planti pipol duim sem samting. Bat Jehovah heitim wei for brekem trust, nomata sapos datwan againstim hem or againstim olketa wea lovem and servem hem.
3. Wanem nao iumi bae luksavve long hem insaed disfala study?
3 Hosea hem no only profet wea mekhae long tingting bilong God abaotem wei for brekem trust, tingting wea iumi need for followim sapos iumi laek for enjoyim hapi laef. Long first article, iumi start for luksavve long samfala part long profesi message bilong Malachi, wea stap long first chapter long buk bilong hem. Distaem iumi bae lukluk long mek-tu chapter bilong datfala buk and bae iumi lukim moa tingting bilong God abaotem wei for brekem trust. Nomata Malachi storyim living midolwan pipol bilong God planti year bihaen olketa kam bak from Babylon, disfala mek-tu chapter garem really mining for iumi distaem.
Olketa Priest wea Garem Blame
4. Wanem warning nao Jehovah talem long olketa priest?
4 Chapter 2 start witim strongfala toktok bilong Jehovah againstim olketa priest wea lusim olketa raeteous wei bilong hem. Sapos olketa no lisin long kaonsel bilong hem and stretem wei bilong olketa, bae olketa kasem barava nogud samting. Lukim tufala first verse: “‘Disfala komandment hem for iufala, O olketa priest. Sapos iufala bae no lisin, and sapos heart bilong iufala no lisin long hem for givim glory long nem bilong mi,’ Jehovah bilong olketa army hem sei, ‘Mi bae sendem long iufala datfala curse, and mi bae cursim olketa blessing bilong iufala.’” Sapos olketa priest teachim pipol and keepim law bilong God, bae olketa kasem blessing. Bat bikos olketa no followim will bilong God, wanfala curse, wanfala trabol, bae kam. Nomata olketa blessing wea olketa priest talem bae change for kamap curse.
5, 6. (a) Why nao olketa priest garem bigfala blame? (b) Hao nao Jehovah talemaot hem heitim olketa priest?
5 Why nao olketa priest garem bigfala blame? Verse 7 talemaot klia wanfala reason: “Mouth bilong wanfala priest hem mas keepim savve, and law nao samting wea olketa pipol mas lukaotem from mouth bilong hem; from hem nao messenger bilong Jehovah bilong olketa army.” Winim wan thousand year bifor, law wea God givim long Israel thru long Moses sei hao olketa garem responsibility “for teachim olketa son bilong Israel evri law wea Jehovah talem.” (Leviticus 10:11) Sorre tumas, bihaen, man wea raetem 2 Chronicles 15:3 sei: “For planti day Israel no garem wanfala tru God and no eni priest teach and no eni Law.”
6 Long mek-faev century B.C.E. long taem bilong Malachi, problem long saed bilong priest hem still semsem. Olketa go ahed for fail for teachim Law bilong God long pipol. So olketa priest hia bae mas givim ansa. Lukim strongfala toktok wea Jehovah talem againstim olketa. Malachi 2:3 sei olsem: “Mi bae torowem siti long feis bilong iufala, siti bilong olketa festival bilong iufala.” Datwan barava strong toktok for hotem man! Olketa shud karem siti bilong olketa animal wea olketa savve sakrifaesim go aotsaed camp and bonem. (Leviticus 16:27) Bat taem Jehovah talem olketa hao hem bae torowem datfala siti long feis bilong olketa, hem showimaot klia hao hem heitim and rejectim olketa and olketa sakrifaes bilong olketa.
7. Why nao Jehovah kros long olketa teacher bilong Law?
7 Planti handred year bifor taem bilong Malachi, Jehovah givim assignment long olketa Levite for lukaftarem tabernacle and bihaen temple and holy ministry. Olketa nao teacher insaed nation bilong Israel. Sapos olketa fulfillim datfala assignment bae datwan minim laef and peace for olketa and datfala nation. (Numbers 3:5-8) Bat olketa Levite lusim wei for fraet long God wea olketa garem bifor. Dastawe, Jehovah talem olketa: “Iufala lusim wei bilong mi. Iufala mekem planti for stambol long law. Iufala spoelem covenant bilong Levi. . . . Iufala no keepim olketa wei bilong mi.” (Malachi 2:8, 9) From olketa fail for teachim truth and from nogud example bilong olketa, olketa priest hia leadim go rong planti Israelite, so hem barava fitim for Jehovah kros long olketa.
Keepim Olketa Mark Bilong God
8. Waswe, iumi ova tumas for expectim olketa man for keepim olketa mark bilong God? Explainim.
8 Iumi mas no tingse olketa priest hia fit for kasem kaeness and shud kasem forgiveness bikos olketa man wea no perfect and no eniwan expectim olketa for fit for keepim olketa mark and wei bilong God. Tru samting nao hem, olketa man fit for keepim olketa komand bilong hem, from Jehovah no expectim man for duim samting wea hem no fit for duim. Maet samfala priest wanwan long datfala taem keepim olketa mark bilong God, and no eni daot stap abaotem wanfala wea kam bihaen wea duim olsem—Jesus, datfala nambawan “hae priest.” (Hebrews 3:1) Long hem olketa fit for sei: “Law bilong truth hem stap insaed mouth bilong hem, and no eni fasin wea no raeteous stap long lips bilong hem. Long peace and long stretfala fasin hem wakabaot witim mi, and hem mekem planti for tan bak from rong fasin.”—Malachi 2:6.
9. Hu nao faithful for givimaot truth bilong Bible long taem bilong iumi?
9 Olsem tu, for winim handred year finis, olketa anointed brata bilong Christ, wea garem hope for go long heven, serve olsem “wanfala sekson bilong olketa holy priest, for offerim olketa spiritual sakrifaes wea God acceptim.” (1 Peter 2:5) Olketa nao leadim wei for givimaot truth from Bible long nara pipol. Taem iu lanem truth bilong Bible, waswe, iuseleva lukim hao ‘law bilong truth stap long mouth’ bilong olketa? Olketa helpem planti for tan bak from rong religion, so distaem planti million pipol evriwea long world lanem truth from Bible and garem hope for laef olowe. Then olketa tu garem privilege for teachim law bilong truth go long samfala million moa.—John 10:16; Revelation 7:9.
Reason for Careful
10. Why nao iumi mas careful long hao iumi toktok?
10 Nomata olsem, iumi garem reason for careful. Iumi maet no luksavve long olketa leson wea Malachi 2:1-9 showimaot. Waswe, iumiseleva lukluk gud mekem no eni fasin wea no raeteous stap long mouth bilong iumi? Olsem example, waswe, olketa famili member savve really trustim samting wea iumi talem? Waswe long olketa brata and sista long kongregeson? Hem bae isi tumas for tanem toktok mekem iumi talem samting wea here stret bat garem difren mining. Or man maet talem samting wea ova tumas or haedem samting long saed bilong bisnis. Waswe, Jehovah bae no luksavve long datwan? And sapos iumi followim kaen wei olsem, waswe, bae hem acceptim olketa sakrifaes bilong praise from mouth bilong iumi?
11. Hu nao barava need for careful?
11 For olketa wea garem privilege for teachim Word bilong God long olketa kongregeson distaem, Malachi 2:7 shud olsem wanfala warning. Hem sei mouth bilong olketa “mas keepim savve, and law nao hem samting wea olketa pipol mas lukaotem” from mouth bilong olketa. Olketa teacher olsem garem bigfala responsibility, from olsem James 3:1 showimaot olketa “bae kasem judgment wea moa hevi.” Nomata olketa shud teach witim strong, teaching bilong olketa mas garem strong faondeson long Word bilong God and long olketa instruction wea kam thru organization bilong Jehovah. Long wei olsem bae olketa kamap “fit for teachim olketa narawan.” Dastawe, olketa kasem disfala kaonsel: “Duim best bilong iu for mekem God acceptim iu, wanfala wakman wea no shame long eni samting, wea iusim word bilong truth long stretfala wei.”—2 Timothy 2:2, 15.
12. Olketa wea teach need for careful long wanem?
12 Sapos iumi no careful, maet iumi talem tingting or idea bilong iumi seleva taem iumi teach. Datwan bae wanfala danger for man wea barava feel sure long idea bilong hemseleva nomata taem diswan hem go againstim teaching bilong organization bilong Jehovah. Bat Malachi chapter 2 showimaot hao iumi fit for expectim olketa teacher insaed kongregeson for hol strong long savve from God and no olketa idea bilong olketa seleva, wea maet mekem olketa sheep stambol. Jesus sei: “Eniwan wea mekem wanfala long olketa smol wan hia wea putim faith long mi for stambol, hem moabeta for hem taemapem wanfala millstone raonem nek bilong hem, olsem diskaen wea donkey savve tanem raon, and torowem hem long deep sea.”—Matthew 18:6.
Maritim Samwan wea No Biliv
13, 14. Wanem wei for brekem trust nao Malachi showimaot klia?
13 Start from verse 10, Malachi chapter 2 barava showimaot klia wei for brekem trust. Malachi storyim tufala gogo, wea planti taem hem iusim datfala toktok “wei for brekem trust.” Firstaem, lukim hao Malachi startim kaonsel bilong hem witim olketa kwestin hia: “Waswe, iumi evriwan garem wanfala father nomoa? Waswe, wanfala God nomoa creatim iumi? Why nao iumi deal long wei for brekem trust witim narawan, for spoelem covenant bilong olketa laen dadi bilong iumi?” Then verse 11 talem hao gogo bilong Israel wea brekem trust hem olsem wei for spoelem “holy fasin bilong Jehovah.” Wanem nao olketa duim wea hem serious tumas? Datfala verse hem storyim wanfala long olketa rong samting wea olketa duim: Olketa “tekem dota bilong wanfala heathen god olsem waef bilong hem.”
14 So hem minim, samfala Israelite, wea part long datfala nation wea dedicate long Jehovah, maritim olketa wea no worshipim hem. Olketa verse wea stap raonem disfala verse help for showimaot why diswan hem serious samting. Verse 10 sei olketa garem wanfala father nomoa. Diswan no minim Jacob (wea niu nem bilong hem Israel) or Abraham or Adam. Malachi 1:6 showimaot Jehovah nao datfala “wanfala father.” Nation bilong Israel insaed wanfala agreement witim hem, olketa part long datfala covenant wea hem mekem witim olketa laen dadi bilong olketa. Wanfala law insaed datfala covenant sei: “Iu mas no arrangem marit witim olketa. Iu mas no givim dota bilong iu for son bilong hem, and dota bilong hem iu mas no tekem for son bilong iu.”—Deuteronomy 7:3.
15. (a) Hao nao tingting bilong samfala abaotem wei for maritim samwan wea no biliv? (b) Hao nao Jehovah showimaot tingting bilong hem abaotem marit?
15 Samfala distaem maet ting olsem: ‘Datwan wea mi laekem hem barava naes. Maet gogo, hem bae acceptim tru worship.’ Kaen tingting olsem barava fitim disfala Bible warning: “Heart hem savve giamanim man winim eni nara samting and hem nating hol bak.” (Jeremiah 17:9) Tingting bilong God abaotem wei for maritim samwan wea no biliv hem showaot long Malachi 2:12: “Jehovah bae finisim evribit eniwan wea duim datwan.” Dastawe, olketa Christian kasem kaonsel for marit “only insaed Lord.” (1 Corinthians 7:39) Anda long Christian arrangement wanfala wea biliv hem no “finis evribit” from hem maritim samwan wea no biliv. Bat, sapos datwan wea no biliv hem go ahed for no biliv, wanem nao bae happen long hem taem God finisim disfala system?—Psalm 37:37, 38.
For Deal Witim Partner Long Nogud Wei
16, 17. Wanem wei for brekem trust nao samfala followim?
16 Malachi storyim mek-tu wei for brekem trust: for deal witim partner long nogud wei, especially for divorcem hem long wei wea no fitim Bible. Verse 14 long chapter 2 sei: “Jehovah seleva hem witness midolwan long iu and waef wea iu tekem taem iu young, wea iu brekem trust midolwan long iu tufala, nomata hem partner bilong iu and waef bilong covenant bilong iu.” Taem olketa deal long wei wea brekem trust witim waef bilong olketa, olketa Jew hasband mekem altar bilong Jehovah ‘tuwet witim krae.’ (Malachi 2:13) Olketa man hia laek for divorce from enikaen reason, olketa rong for lusim waef wea olketa maritim taem olketa young, maet for maritim olketa woman wea moa young or olketa heathen woman. And olketa nogud priest letem datwan! Bat, Malachi 2:16 sei: “‘Hem heitim wei for divorce,’ Jehovah God bilong Israel hem talem.” Bihaen, Jesus showimaot hao dirty fasin nomoa hem only reason for divorce wea bae mekem partner wea no guilty savve marit moa.—Matthew 19:9.
17 Ting raonem toktok bilong Malachi, and lukim hao hem muvim heart and feeling bilong man for showimaot kaenfala fasin. Hem tok abaotem “partner bilong iu and waef bilong covenant bilong iu.” Olketa man hia maritim wanfala wea worshipim Jehovah, wanfala Israelite woman, wea hem chusim olsem partner wea hem lovem, wanfala partner for full laef. Nomata datfala marit maet kamap taem tufala hia young, taem wea go pas and wei wea tufala start for olo hem no endim datfala covenant bilong tufala, datfala kontrak bilong marit.
18. Hao nao kaonsel bilong Malachi abaotem wei for brekem trust hem fitim distaem?
18 Disfala kaonsel abaotem olketa samting hia barava fitim distaem tu. Hem sorre samting hao samfala no laek tingim instruction bilong God for marit only insaed long Lord. And sorre samting tu hem wei wea samfala no laek for waka for keepim marit bilong olketa strong. Bat, olketa trae for mekem excuse and aftarem wanfala gogo wea God heitim taem olketa kasem divorce wea no fitim Bible mekem olketa maritim narawan. Taem olketa duim olketa samting olsem, olketa “finisim wei wea Jehovah hem patient.” Long taem bilong Malachi, olketa wea no followim kaonsel bilong God barava big hed for tingse tingting bilong Jehovah hem no stret. Hem olsem olketa sei, “Wea nao God bilong justice?” Datwan barava nogud tingting! Iumi mas no foldaon long datfala trap.—Malachi 2:17.
19. Hao nao olketa hasband and waef savve kasem spirit bilong God?
19 Long gud saed, Malachi showimaot hao samfala hasband long taem bilong hem no brekem trust witim waef bilong olketa. Olketa ‘garem holy spirit bilong God wea still stap.’ (Verse 15) Iumi hapi from organization bilong God distaem garem planti man wea ‘givim honor long waef bilong olketa.’ (1 Peter 3:7) Olketa no spoelem waef long physical wei or long toktok, olketa no laekem wei for duim nogud sex, and olketa no showim interest long nara woman or lukluk long dirty piksa wea no showaot honor long waef. Organization bilong Jehovah hapi tu for garem planti faithful Christian waef wea loyal long God and law bilong hem. Evri man and woman olsem savve long wanem God heitim, and olketa ting and duim samting followim datwan. Go ahed olsem olketa wea ‘obeyim God olsem ruler’ and kasem blessing from holy spirit bilong hem.—Acts 5:29.
20. Wanem taem nao kakam klosap for olketa man?
20 Klosap nao, Jehovah bae judgem full world. Evri man wanwan bae mas givim ansa long hem for biliv and akson bilong hemseleva. “Iumi wanwan bae givim ansa for iumiseleva long God.” (Romans 14:12) So wanfala interesting kwestin distaem hem: Hu nao bae stap laef thru long day bilong Jehovah? Mek-thri article wea hem nao last wan bae storyim datfala theme.
Waswe, Iu Savve Explainim?
• For wanem important reason nao Jehovah tok strong againstim olketa priest long Israel?
• Why nao mark bilong God hem no hae tumas for iumi olketa man for keepim?
• Why nao iumi shud careful taem iumi teach?
• Tufala wanem samting nao Jehovah barava heitim?
[Piksa long page 15]
Long taem bilong Malachi Jehovah tok strong againstim olketa priest from olketa no keepim olketa wei bilong hem
[Piksa long page 16]
Iumi mas careful for teachim wei bilong Jehovah, no idea bilong iumiseleva
[Olketa Piksa long page 18]
Jehovah tok strong againstim olketa Israelite wea divorcem waef bilong olketa from smol samting nomoa and maritim olketa heathen woman
[Piksa long page 18]
Olketa Christian distaem honorim marit covenant