Hu Nao Bae Stap Laef Thru Long Day Bilong Jehovah?
“Datfala day bae kam wea bone olsem bigfala fire.”—MALACHI 4:1.
1. Hao nao Malachi storyim end bilong disfala wicked system?
GOD muvim profet Malachi for raetem samfala profesi abaotem samfala bigfala samting wea bae klosap for happen long future. Olketa samting hia bae affectim evri man long earth. Malachi 4:1 hem sei: “‘Lukim! datfala day bae kam wea bone olsem bigfala fire, and olketa praod pipol and olketa wea duim barava nogud samting mas kamap olsem drae grass. And datfala day wea bae kam bae finisim olketa evribit,’ Jehovah bilong olketa army hem talem, ‘mekem no eni rut or branch bilong olketa bae stap.’” Wei wea disfala wicked system distroe hem bae hao big? Hem bae olsem olketa distroem evribit rut bilong wanfala tree, mekem datfala tree bae no savve grow moa.
2. Hao nao samfala scripture storyim day bilong Jehovah?
2 Maet iu ask, ‘Wanem “day” nao profet Malachi talem profesi abaotem?’ Hem sem day wea Isaiah 13:9 storyim: “Lukim! Datfala day bilong Jehovah bae kam, witim hot and bigfala kros, for mekem pipol sapraes tumas long datfala land, and mekem hem finisim evribit olketa sinner bilong datfala land.” Zephaniah 1:15 storyim olsem: “Datfala day hem wanfala day bilong bigfala kros, day for mekem man feel nogud and garem bigfala wari, day bilong bigfala wind and for finisim evri samting, day bilong darkness and bilong no mas laet, day bilong olketa cloud and bilong smoke.”
“Datfala Big Trabol”
3. Wanem nao “datfala day bilong Jehovah”?
3 Taem profesi bilong Malachi hem fulfill long bigfala wei, samting wea bae markem “datfala day bilong Jehovah” hem wanfala taem wea kasem “big trabol.” Jesus hem sei: “Then bigfala trabol bae kamap wea nating happen bifor from taem world hem start kam kasem distaem, and hem bae no happen moa.” (Matthew 24:21) Tingim olketa bigfala trabol wea happen finis long world, especially start kam long 1914. (Matthew 24:7-12) Tru nao, long World War II nomoa, winim 50 million pipol dae! Nomata olsem, datfala “bigfala trabol” bae winim olketa taem olsem. Datfala samting wea bae happen, wea sem witim day bilong Jehovah, hem bae finis long Armageddon, wea bae endim olketa last day bilong disfala wicked system.—2 Timothy 3:1-5, 13; Revelation 7:14; 16:14, 16.
4. Taem day bilong Jehovah hem end, wanem nao happen finis?
4 Kasem end bilong datfala day bilong Jehovah, world bilong Satan and evriwan wea saportim bae finis evribit. First wan for finis nao hem giaman religion. Then judgment bilong Jehovah bae go againstim system bilong Satan saed long bigfala bisnis and politik. (Revelation 17:12-14; 19:17, 18) Ezekiel talemaot profesi olsem: “Olketa bae torowem silver bilong olketa long road, and gold bilong olketa bae kamap samting wea olketa barava heitim. Silver or gold bilong olketa bae nating sevem olketa long day bilong kros bilong Jehovah.” (Ezekiel 7:19) Abaotem datfala day Zephaniah 1:14 hem sei: “Bigfala day bilong Jehovah hem klosap. Hem klosap nao, and hem start for hariap tumas.” Bikos long samting wea Bible talem abaotem day bilong Jehovah, iumi shud disaed strong for duim samting followim olketa raeteous law and principle bilong God.
5. Wanem nao olketa wea fraet long nem bilong Jehovah bae kasem?
5 Bihaen hem talem profesi abaotem samting wea day bilong Jehovah bae duim long world bilong Satan, Malachi 4:2 talem disfala toktok bilong Jehovah: “For iufala wea fraet long nem bilong mi, sun bilong raeteous fasin bae shaen go long iufala, and hem bae healim iufala; and iufala bae go aot and purubutim long graon olsem olketa young fat buluka.” Datfala “sun bilong raeteous fasin” hem Jesus Christ. Hem nao spiritual “laet bilong world.” (John 8:12) Jesus shaen go witim healing, firstaem spiritual healing, wea iumi kasem distaem, and then full physical healing long niu world. Olsem Jehovah talem, olketa wea kasem healing bae “go aot and purubutim graon olsem olketa young fat buluka” wea barava hapi for kamaot from fence.
6. Wanem celebration bilong wei for win nao olketa servant bilong Jehovah bae enjoyim?
6 Waswe long olketa wea ting nating long olketa mark bilong Jehovah? Malachi 4:3 hem sei: “‘Iufala pipol [olketa servant bilong God] bae purubutim olketa wicked man, from olketa bae kamap olsem dust anda long leg bilong iufala long day wea mi bae duim samting,’ Jehovah bilong olketa army hem talem.” Pipol wea worshipim God bae no join insaed wei for distroem world bilong Satan. Bat, long tokpiksa wei olketa bae “purubutim olketa wicked man” taem olketa share long bigfala celebration bilong win wea bae kamap bihaen long day bilong Jehovah. Wanfala big celebration hem kamap bihaen Pharaoh and army bilong hem finis insaed Red Sea. (Exodus 15:1-21) Long sem wei tu, bihaen Satan and world bilong hem finis wanfala celebration bilong win bae kamap. Olketa faithful wan wea laef thru long day bilong Jehovah bae singaot: “Iumi mas hapi long salvation thru long hem.” (Isaiah 25:9) Barava bigfala hapi bae kamap bihaen vindication bilong olmaeti rul bilong Jehovah and earth kamap klin for pipol stap insaed long peace!
Christendom Followim Wei Bilong Israel
7, 8. Storyim hao nao spiritual living bilong Israel long taem bilong Malachi.
7 Olketa wea servem Jehovah nao kasem position wea hem favorim, wea difren from olketa wea no servem hem. Hem semsem tu long taem wea Malachi raetem buk bilong hem. Long 537 B.C.E., wanfala smol sekson bilong Israel go bak bihaen olketa stap olsem prisoner long Babylon for 70 year. Nomata olsem, insaed wan handred year bihaen, datfala nation wea kam bak followim apostate wei and nogud fasin. Planti pipol no honorim nem bilong Jehovah; ting nating long olketa raeteous law bilong hem; and mekem temple kamap dirty taem olketa tekem kam olketa animal wea sik, blind, and cripple for sakrifaesim; and olketa divorcem waef wea olketa tekem taem olketa young.
8 Dastawe Jehovah talem olketa: “Mi bae kam klosap for judgem iufala pipol, and mi bae kwiktaem givim witness againstim olketa wea duim magic samting, and againstim olketa wea duim adultery, and againstim olketa wea talem laea promis, and againstim olketa wea no pei gud long wakman bilong olketa, long widow woman and long boy wea no garem dadi, and olketa wea raosem stranger, from olketa no fraet long mi, . . . from mi nao Jehovah; mi nating change.” (Malachi 3:5, 6) Nomata olsem, Jehovah invaetem eniwan wea laek lusim olketa nogud wei bilong hem: “Kam bak long mi, and mi bae kam bak long iufala.”—Malachi 3:7.
9. Hao nao olketa profesi bilong Malachi fulfill long firstaem?
9 Olketa toktok hia fulfill tu long first century C.E. Wanfala remnant bilong olketa Jew kamap part bilong datfala niu “nation” bilong olketa Christian wea spirit anointim, wea gogo olketa Gentile join insaed tu. Bat big haf long olketa really Israelite rejectim Jesus. Dastawe Jesus talem datfala nation bilong Israel: “Lukim! God hem lusim haos bilong iufala nao.” (Matthew 23:38; 1 Corinthians 16:22) Long 70 C.E., olsem Malachi 4:1 talem profesi abaotem, wanfala “day . . . wea bone olsem bigfala fire” hem kasem really Israel. Jerusalem and temple bilong hem distroe, and winim wan million pipol dae from bigfala hangre, faet for paoa, and olketa attak from army bilong Rome. Bat, olketa wea servem Jehovah missim datfala big trabol.—Mark 13:14-20.
10. Hao nao pipol and olketa bigman bilong religion followim olketa bilong Israel long first-century?
10 Olketa man, especially Christendom, followim nation bilong Israel long first-century. Olketa Leader and pipol bilong Christendom laekem teaching bilong religion bilong olketa winim olketa truth abaotem God wea Jesus teachim. Olketa bigman bilong religion nao fit for garem bigfala blame. Olketa les for iusim nem bilong Jehovah and aotem datwan tu from olketa Bible transleison. Olketa mekem Jehovah kasem shame from olketa teaching wea no followim Bible, olsem pain olowe insaed hellfire, heathen teaching bilong Trinity and soul wea no savve dae, and evolution. Olketa no givim Jehovah praise wea hem fit for kasem, olsem olketa priest duim long taem bilong Malachi.
11. Hao nao olketa religion bilong world showimaot hu nao olketa really servem?
11 Long 1914, taem olketa last day start, olketa religion bilong world, wea olketa wea sei olketa Christian nao leadim, showimaot hu nao olketa really servem. Insaed tufala world war, olketa encouragem olketa member bilong olketa for faet insaed war midolwan olketa nation, nomata diswan minim wei for killim dae pipol from religion bilong olketa seleva. Word bilong God showimaot klia olketa wea obeyim Jehovah and olketa wea no obey: “Olketa pikinini bilong God and olketa pikinini bilong Devil showaot long disfala samting: Eniwan wea no go ahed for duim raeteous fasin hem no kam from God, and tu man wea no lovem brata bilong hem. From hem nao message wea iufala herem long firstaem, for iumi mas garem love for each other; no olsem Cain, wea hem kam from datfala nogud man and wea killim dae brata bilong hem.”—1 John 3:10-12.
Fulfillim Profesi
12, 13. Olketa wanem profesi nao servant bilong God fulfillim long taem bilong iumi?
12 Long end bilong World War I long 1918, olketa servant bilong Jehovah luksavve hao God judgem finis Christendom and olketa nara giaman religion. Start long datfala taem, invitation hem go aot for pipol wea garem stretfala heart: “Go aot from hem, pipol bilong mi, sapos iufala no want for share witim hem long olketa sin bilong hem, and sapos iufala no want for kasem eni trabol bilong hem. From olketa sin bilong hem barava hipap go kasem heven, and God rememberim evri samting wea datwan duim wea no followim justice.” (Revelation 18:4, 5) Olketa wea barava laek for servem Jehovah start for kamap klin from eni mark bilong giaman religion and start for duim waka for preachim evriwea long world datfala gud nius abaotem Kingdom wea start finis, wanfala waka wea bae finis bifor end bilong disfala system hem kam.—Matthew 24:14.
13 Diswan hem for fulfillim profesi long Malachi 4:5, wea Jehovah sei: “Lukim! Mi sendem kam long iufala pipol Elijah datfala profet bifor bigfala day bilong Jehovah wea mekem man fraet hem kam.” Datfala profesi hem fulfill firstaem long waka bilong John Baptaesa, wea piksarem Elijah. John duim waka olsem Elijah taem hem baptaesim olketa Jew wea repent from olketa sin againstim Law covenant. Moa important, John hem man wea kam firstaem long Messiah. Bat, waka bilong John hem fulfillim profesi bilong Malachi long smol wei nomoa. Taem Jesus storyim John olsem mek-tu Elijah, hem showimaot hao wanfala waka bilong “Elijah” bae kamap long future.—Matthew 17:11, 12.
14. Wanem important waka nao mas finis bifor disfala system hem end?
14 Profesi bilong Malachi showimaot hao datfala bigfala waka bilong Elijah bae finis bifor “bigfala day bilong Jehovah wea mekem man fraet.” Datfala day hem finis witim war bilong bigfala day bilong God Olmaeti, long Armageddon wea klosap nao. Datwan minim wanfala waka wea semsem olsem waka bilong Elijah bae kamap bifor end bilong disfala wicked system and Thousand Year Rul bilong Kingdom bilong God long heven. For fitim datfala profesi, bifor Jehovah distroem disfala wicked system, sekson wea olsem Elijah distaem, wea kasem saport from planti million nara Christian wea garem hope for laef long earth, distaem strong for duim datfala waka for mekem klin worship kamap moa, mekhae long nem bilong God, and teachim pipol wea olsem sheep.
Jehovah Blessim Olketa Servant Bilong Hem
15. Hao nao Jehovah rememberim olketa servant bilong hem?
15 Jehovah blessim olketa wea servem hem. Malachi 3:16 sei: “Long datfala taem olketa wea fraet long Jehovah toktok witim narawan, and Jehovah go ahed for lukluk and lisin. And olketa raetem front long hem wanfala buk for rememberim olketa wea fraet long Jehovah and olketa wea tingim nem bilong hem.” Start from taem bilong Abel, hem olsem God raetem nem bilong olketa wea bae kasem laef olowe insaed wanfala buk. Jehovah sei olsem long olketa: “Tekem kam evri mek-ten part long stoahaos, mekem kaikai stap long haos bilong mi; and testim mi, plis, long disfala samting . . . for faendemaot sapos mi bae openem gate bilong heven long iufala pipol and barava kapsaetem blessing long iufala go kasem taem no eniwan wantem eni samting moa.”—Malachi 3:10.
16, 17. Hao nao Jehovah blessim pipol bilong hem and waka bilong olketa?
16 Jehovah barava blessim olketa wea servem hem. Long wanem wei? Wanfala wei hem thru long wei for kasem moa savve abaotem olketa purpose bilong hem. (Proverbs 4:18; Daniel 12:10) Narafala wei hem thru long wei for givim planti frut insaed preaching waka. Staka pipol wea garem honest heart joinim olketa long tru worship, and olketa nao disfala “big crowd, . . . wea kamaot from evri nation and tribe and pipol and languis, . . . and olketa go ahed for singaot big, and sei: ‘Mifala sev thru long God bilong mifala, wea sidaon long throne, and thru long Lamb.’” (Revelation 7:9, 10) Disfala bigfala crowd hem bin showaot long nambawan wei, and namba bilong olketa wea go ahed for servem Jehovah distaem hem ova six million and winim 93,000 kongregeson stap evriwea long earth!
17 Iumi savve lukim tu blessing bilong Jehovah long wei wea Olketa Jehovah’s Witness pablisim and givimaot olketa Bible pablikeson winim eniwan long full history. Distaem, olketa mekem 90 million copy bilong Wastaoa and Wekap! evri month, Wastaoa long 144 languis, Awake! long 87 languis. Bible study buk Truth Where Bringim Man Long Life All The Way, wea olketa pablisim long 1968, olketa printim winim 107 million copy insaed 117 languis. You Savvy Stop All-the-way long Paradise long Earth, wea olketa releasem long 1982, olketa printim winim 80 million copy insaed 130 languis. And datfala buk Savvy Wea Lead Go long Laef Olawe, wea olketa releasem long 1995, olketa printim samting olsem 80 million copy insaed 150 languis. Datfala brochure Wanem Nao God Mas Kasem From Iumi?, wea olketa pablisim long 1996, olketa givimaot samting olsem 150 million insaed 244 languis distaem.
18. Why nao iumi garem gud spiritual living nomata pipol againstim iumi?
18 Olketa bin enjoyim disfala wei for stap gud long spiritual wei nomata world bilong Satan strong for againstim olketa for longfala taem finis. Diswan showimaot hao Isaiah 54:17 hem tru: “‘Eni samting for faet againstim iu bae no win, and eni toktok wea bae kam againstim iu long datfala judgment bae iu pruvim hem rong. Diswan hem samting wea olketa servant bilong Jehovah bae garem, and raeteous fasin bilong olketa hem kam from mi,’ hem nao toktok bilong Jehovah.” Hem barava comfortim olketa servant bilong Jehovah for savve hao Malachi 3:17 hem fulfill long main wei long olketa: “‘Olketa mas kamap pipol bilong mi,’ Jehovah bilong olketa army hem talem, ‘long day wea mi mekem wanfala spesol samting bilong mi.’”
Hapi for Servem Jehovah
19. Hao nao olketa wea servem Jehovah difren from olketa wea no duim datwan?
19 Wei wea olketa faithful loving servant bilong Jehovah difren tumas from wicked pipol long world bilong Satan hem kamap moa klia insaed taem wea go pas. Malachi 3:18 talem profesi olsem: “Iufala bae lukim moa wei wea raeteous man hem difren from wicked man, wei wea man wea servem God hem difren from man wea no servem hem.” Wanfala long planti samting wea mekem olketa wea servem Jehovah difren hem wei wea olketa duim diswan witim bigfala hapi. Wanfala reason for diswan hem nambawan hope wea olketa garem. Olketa barava trustim Jehovah taem hem sei: “Distaem mi wakem niu heven and wanfala niu earth; and olketa samting bilong bifor bae no kamap moa long mind, and hem bae no kamap moa long heart. Bat iufala pipol mas barava hapi, and kamap hapi olowe long wanem mi wakem.”—Isaiah 65:17, 18; Psalm 37:10, 11, 29; Revelation 21:4, 5.
20. Why nao iumi wanfala hapi pipol?
20 Iumi bilivim promis bilong Jehovah hao olketa loyal pipol bae stap laef thru long bigfala day bilong hem and go insaed niu world. (Zephaniah 2:3; Revelation 7:13, 14) And nomata samfala maet dae bifor datfala taem bikos man olo, sik, or accident, Jehovah promis hem bae resurrectim olketa witim hope for laef olowe. (John 5:28, 29; Titus 1:2) So nomata iumi evriwan garem olketa problem and challenge, taem iumi gogo for kasem datfala day bilong Jehovah, iumi garem planti reason for hapi winim eni narawan long disfala earth.
Hao Nao Bae Iu Ansa?
• Wanem nao “datfala day bilong Jehovah”?
• Hao nao olketa religion bilong world distaem followim Israel bifor?
• Wanem nao olketa profesi wea olketa servant bilong Jehovah fulfillim?
• Hao nao Jehovah blessim pipol bilong hem?
[Piksa long page 21]
Jerusalem bilong first century “bone olsem bigfala fire”
[Piksa long page 23]
Jehovah provaed for olketa wea servem hem
[Olketa Piksa long page 24]
Bikos long nambawan hope bilong olketa, olketa servant bilong Jehovah barava hapi