Kwestin From Reader

Waswe, wei for baem wanfala building from narafala religion and changem for kamap wanfala Kingdom Hall hem wankaen wei for interfaith (join witim difren religion)?

Planti taem, Olketa Jehovah’s Witness stap klia long wei for deal witim narafala religion. Nomata olsem, wei for duim diswan maet no minim olketa duim wankaen wei for interfaith. Iumi savve ting long diswan olsem wanfala bisnis deal. Kongregeson bilong Olketa Jehovah’s Witness no join witim narafala religion for buildim wanfala ples bilong worship wea tufala evriwan bae iusim.

Long eye bilong Jehovah, wanem nao insaed long wei for duim interfaith? Tingim disfala instruction bilong aposol Paul: “No join tugeta long wei wea no fitim witim olketa wea no biliv. From hao nao raeteous fasin hem join witim fasin for brekem law? Or hao nao laet hem share witim darkness? And tu, hao nao Christ savve wan mind witim Belial? Or hao nao faithful man savve share witim man wea no biliv? Hao nao temple bilong God savve join witim olketa idol? . . . ‘So go aot from midolwan long olketa, and separatem iufala seleva,’ Jehovah hem sei, ‘and no tasim samting wea no klin’; ‘and mi bae acceptim iufala.’” (2 Corinthians 6:14-17) Wanem nao Paul minim taem hem sei “join witim” and “share”?

Hem klia hao wei for join witim wea Paul storyim hem minim worship and for duim spiritual samting witim olketa wea worshipim idol and wea no biliv. Hem warnim olketa long Corinth for no “kaikai long . . . tebol bilong olketa demon.” (1 Corinthians 10:20, 21) So, for duim interfaith hem minim for sharem worship or join long spiritual samting witim olketa narafala religion. (Exodus 20:5; 23:13; 34:12) Taem kongregeson baem wanfala building from narafala religion, goal bilong diswan hem for baem wanfala building for kamap wanfala Kingdom Hall. Bifor iumi iusim olsem Kingdom Hall, iumi aotem eni samting wea join witim worship bilong giaman worship. Taem iumi changem olsem, iumi dedicatem long Jehovah for iusim for worshipim hem nomoa. No eni wei for share hem kamap midolwan tru and giaman worship.

Taem kongregeson mekem olketa arrangement for baem building, olketa mas no spendem staka taem witim olketa and mas storyim datwan nomoa. Hem gud for olketa member bilong Christian kongregeson for tingim warning bilong Paul for “no join tugeta long wei wea no fitim witim olketa wea no biliv.” Nomata iumi no ting iumi winim olketa wea garem difren biliv, iumi stap klia long wei for kaban witim olketa or letem olketa pullim iumi for join insaed worship bilong olketa.a

Waswe long wei wea wanfala kongregeson rentim wanfala building bilong wanfala religion? Wei for rent hem minim for evritaem story witim olketa, wea iumi mas stap klia long datwan. Nomata for rentim building for wanfala taem nomoa, body of elders shud tingim diswan: Waswe, eni idol or saen bilong religion stap insaed or aotsaed long building? Hao nao pipol long community bae ting long wei wea iumi iusim datfala building? Waswe, eniwan long kongregeson bae stambol sapos iumi iusim datfala building? (Matthew 18:6; 1 Corinthians 8:7-13) Olketa elder ting raonem evri point hia and then olketa disaed. Olketa mas tingim conscience bilong olketa seleva and olketa insaed kongregeson for disaedem sapos olketa bae baem and changem building olsem for kamap Kingdom Hall or nomoa.

[Footnote]

[Piksa long page 27]

Disfala building, wanfala synagogue bifor, olketa baem and changem for kamap Kingdom Hall