Kwestin From Reader

Wanem nao Paul minim taem hem sei: “Evritaem iufala kaikaim disfala bred and drinkim disfala kap”?

Taem hem storyim hao Jesus startim Memorial bilong dae bilong hem, Paul raet: “Evritaem iufala kaikaim disfala bred and drinkim disfala kap, iufala go ahed for talemaot dae bilong Lord, go kasem taem hem kam.” (1 Corinthians 11:25, 26) Samfala tingse disfala toktok “evritaem” showimaot hao dae bilong Christ hem samting for celebratem planti taem. Dastawe olketa celebratem winim wanfala taem long year. Waswe, hem nao samting wea Paul minim?

Hem samting olsem 2,000 year finis from taem wea Jesus startim Memorial bilong dae bilong hem. So, nomata iumi celebratem Memorial wanfala taem nomoa long year, iumi celebratem planti taem finis start kam long 33 C.E. Nomata olsem, long olketa toktok wea stap raonem 1 Corinthians 11:25, 26, Paul storyim, no haomas taem, bat hao for celebratem Memorial. Long firstfala Greek languis wea hem iusim for raetem diswan, hem no iusim datfala word pol·laʹkis, wea minim “planti taem.” Nomoa, bat hem iusim datfala word ho·saʹkis, wea minim “evritaem,” wanfala toktok wea minim “enitaem,” “evritaem wea.” Paul hem sei: ‘Evritaem wea iufala duim diswan, iufala go ahed for talemaot dae bilong Lord.’a

So, haomas taem nao iumi shud celebratem Memorial bilong dae bilong Jesus? Hem fitim for celebratem wanfala taem nomoa long year. Hem barava wanfala memorial, and pipol celebratem olketa memorial wanfala taem evri year. Nara samting tu, Jesus dae long day bilong Passover bilong olketa Jew, wea kamap wanfala taem long year. Dastawe Paul storyim Jesus olsem “Christ wea hem passover bilong iumi,” from dae bilong Jesus olsem sakrifaes hem openem wei for laef for spiritual Israel, olsem datfala firstfala Passover sakrifaes protectim laef bilong olketa firstborn son bilong olketa Israelite long Egypt and openem wei for datfala nation kamap free from wei for slave. (1 Corinthians 5:7; Galatians 6:16) Wei wea diswan join witim datfala Passover bilong olketa Jew wea kamap evri year hem nara pruv hao iumi shud celebratem Memorial bilong dae bilong Jesus wanfala taem nomoa long year.

And tu, Paul joinim dae bilong Jesus witim nara feast bilong olketa Jew wea kamap wanfala taem evri year, datfala Day Bilong Atonement. Long Hebrews 9:25, 26, iumi read: “And tu [Jesus] no need for offerim hemseleva planti taem, olsem hae priest duim wea go insaed long holy ples evri year [long Day Bilong Atonement] witim blood wea no bilong hemseleva. . . Bat distaem hem showim hemseleva wanfala taem for olowe long taem bilong end bilong disfala system for finisim sin thru long sakrifaes bilong hemseleva.” From sakrifaes bilong Jesus changem datfala sakrifaes long Day Bilong Atonement wea kamap wanfala taem long year, hem fitim for celebratem Memorial bilong dae bilong hem wanfala taem evri year. No eni reason from Bible stap for celebratem Memorial winim wanfala taem long year.

For fitim diswan, man for raetem history, John Laurence von Mosheim reportim hao olketa Christian long mek-tu century long Asia Minor garem kastom for celebratem Memorial bilong dae bilong Jesus “long mek-foa day bilong first month bilong olketa Jew [Nisan].” Only long olketa year bihaen nomoa Christendom start for celebratem planti taem insaed year.

[Footnote]