“Kam Klosap Long God, and Hem Bae Kam Klosap Long Iufala”
Bifor and Bihaen—Word Bilong God Hem Waka
SAPOS iu meetim Tony taem hem teenager, iu bae lukim hao hem boy wea no kaen and wea garem raf fasin, wea gogo olowe long olketa area wea no garem gud nem long Sydney, Australia. Olketa fren bilong hem olketa member bilong gang. Olketa savve join insaed wei for steal, faet midolwan olketa gang, and sut-aot witim gun long road.
Tony start for smoke taem hem naen year. Taem hem kasem 14 year, hem savve iusim marijuana olowe and duim dirty fasin. Taem hem kasem 16 year, hem kamap man wea depend long heroin, and diswan lead go long wei for iusim cocaine, LSD—olsem Tony sei, “really, eniting wea bae mekem mi drunk.” Then hem startim wei for drug-dealer witim tufala main criminal grup. Gogo, planti pipol long east coast bilong Australia savve long Tony olsem man wea evritaem sellim drug.
Tony savve spendem samting olsem $160 (U.S.) go kasem $320 (U.S.) for heroin and marijuana insaed wanfala day. Diswan mekem famili bilong hem safa long planti wei tu. Hem sei: “Mi witim waef bilong mi planti taem feisim wei wea olketa criminal pointim gun and naef long mifala, from olketa kam long area bilong mifala for luk aotem olketa drug and selen.” Bihaen hem insaed prison thrifala taem, Tony luksavve hao hem need for ting raonem wanem kaen living olsem bae lead go long hem.
Nomata hem savve go long church bifor, Tony no feel klos long wanfala God wea olketa sei hem panisim man wea sin long wei for bonem olketa for olowe insaed hell. Bat, taem tufala Jehovah’s Witness visitim hem, Tony sapraes for herem hao God no olsem. And Tony hapi for savve hao hem savve stretem laef bilong hem and kasem olketa blessing from God. Disfala toktok bilong Jesus Christ barava muvim Tony: “God fit for duim evri samting.” (Mark 10:27) Tony barava kasem encouragement from disfala toktok: “Kam klosap long God, and hem bae kam klosap long iufala.”—James 4:8.
Tony feisim bigfala challenge for changem living bilong hem for followim olketa standard bilong Bible. Hem sei: “First samting wea mi lusim nao hem wei for smoke, wea nomata planti taem mi trae for duim bifor, mi no bin winim. Witim paoa from Jehovah, mi fit for lusim wei for iusim heroin and marijuana, olketa drug wea kontrolem laef bilong mi for 15 year. Bifor mi tingse bae hem hard tumas for mi lusim olketa samting olsem.”
Winim wei for fraetem wanfala God wea panisim pipol for olowe long hell—teaching wea no stap insaed Bible—Tony and waef bilong hem kasem hope for laef olowe insaed wanfala paradaes long earth. (Psalm 37:10, 11; Proverbs 2:21) Tony hem sei: “Hem tek taem and mi need for hard waka for mekem laef bilong mi followim olketa standard bilong God, bat witim help bilong Jehovah mi win for duim.”
Yes, disfala man wea bifor hem depend long drug kamap wanfala Christian. Hem and waef bilong hem iusim planti thousand hour for volunteer for iusim taem and material samting wea tufala garem for duim Bible education waka. Tufala busy tu for bringimap tufala pikinini wea fraet long God. Bigfala change hia kamap from paoa bilong Word bilong God, Bible, wea strong for pullim man. Tru nao, olsem aposol Paul sei, “word bilong God hem laef and garem paoa for duim samting.”—Hebrews 4:12.
Nomata olketa gudfala example olsem hem stap, samfala go ahed for sei education waka bilong Olketa Jehovah’s Witness wea garem faondeson long Bible hem savve distroem olketa famili and spoelem olketa gudfala fasin bilong young pipol. Story bilong Tony barava pruvim hao datwan hem no tru.
Olsem Tony, planti faendaot hao olketa savve winim wei for depend long olketa samting wea savve killim olketa dae. Long wanem wei? Thru long wei for garem faith long God and for depend long hem and Word bilong hem, and thru long saport bilong olketa loving Christian brata and sista wea kea. Tony hapi taem hem sei: “Mi lukim hao olketa principle bilong Bible hem protectim olketa pikinini bilong mi. Olketa Bible teaching sevem marit bilong mi. And olketa neiba bilong mi sleep gud distaem bikos mi no wanfala danger long olketa.”
[Blurb long page 9]
‘Witim paoa from Jehovah, mi fit for lusim wei for iusim olketa drug wea kontrolem laef bilong mi for 15 year.’
[Box long page 9]
Olketa Bible Principle wea Waka
Samfala Bible principle helpem planti man wea depend long drug for lusim datfala nogud fasin wea savve spoelem olketa. Samfala long olketa principle hia nao:
“Letem iumi klinim iumiseleva from evri samting wea mekem body and spirit dirty, mekem holy fasin kamap perfect taem iumi fraet long God.” (2 Corinthians 7:1) Wei for iusim drug hem againstim law bilong God.
“Wei for fraet long Jehovah hem start bilong wisdom, and savve bilong Most Holy Wan hem nao wei for minim samting.” (Proverbs 9:10) Wei for fraet long Jehovah wea garem faondeson long stretfala savve abaotem hem and olketa wei bilong hem helpem planti for kamap free from olketa drug.
“Trust long Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae stretem gogo bilong iu.” (Proverbs 3:5, 6) Taem man trustim God from heart and depend long hem evribit bae hem savve lusim olketa nogud fasin wea savve barava spoelem hem.